រតនគិរី:នគរបាលព្រហ្មទណ្ឌក្រុងបានលុង បានសម្រេចបញ្ជូនជនសង្ស័យម្នាក់ ទៅសាលាដំបូងខេត្តរតនគិរី កាលពីល្ងាចថ្ងៃទី ៤ ខែកុម្ភៈឆ្នាំ ២០១៨ ដោយសង្ស័យថា ជននេះ ពាក់ព័ន្ធករណីរំលោភសម្លាប់សិស្សនារីថ្នាក់ទី ១២ ម្នាក់ កាលពីយប់ថ្ងៃទី ២ ខែកុម្ភៈនៅភូមិ ៤ សង្កាត់កាចាញ បើទោះបីជាជននេះបានបដិសេធក៏ដោយ។
លោក តេង សាវុធ អធិការរងក្រុងបានលុង បានឲ្យដឹងថា នគរបាលព្រហ្មទណ្ឌក្រុង និងនគរបាលព្រហ្មទណ្ឌនៃស្នងការខេត្តរតនគិរី បានបញ្ជូនជនសង្ស័យម្នាក់ ទៅសាលាដំបូងខេត្តរតនគិរី កាលពីល្ងាចម្សិលមិញប៉ុន្តែជនសង្ស័យម្នាក់នេះ នៅមិនទាន់ឆ្លើយថា ខ្លួនគេបានសម្លាប់នារីរងគ្រោះនោះទេ។
លោកថ្លែងថា៖«ជនសង្ស័យម្នាក់នោះ ខាងខ្ញុំមិនបានចាប់បញ្ជូនបន្តទៅស្នងការខេត្តទេគឺខាងស្នងការនិងខាងអធិការក្រុងបានលុងកសាងសំណុំរឿងទៅតុលាការតែម្តង។ តែយ៉ាងណាជនសង្ស័យម្នាក់នេះ មិនបានឆ្លើយសារភាពទេ គឺគេលាក់បាំងប៉ូលិស ប៉ុន្តែចំណុចខ្លះគេឆ្លើយស្របគ្នា នឹងនារីរងគ្រោះចេញពីសាលារៀន»។
នារីរងគ្រោះឈ្មោះ អាត ស៊ីង អាយុ ១៨ ឆ្នាំ ជាជនជាតិគ្រឹង រៀនថ្នាក់ទី ១២ នៅវិទ្យាល័យ«សម្តេច ហ៊ុន សែន» ភូមិថ្មី ក្នុងសង្កាត់បានលុង រីឯជនសង្ស័យឈ្មោះ ជា ដែន អាយុ ៣៩ ឆ្នាំ លែងលះប្រពន្ធ និងរស់នៅភូមិ-ឃុំកើតហេតុខាងលើ។
បើតាមលោក សួន សាវុធ នាយនគរបាលប៉ុស្តិ៍កាចាញ ក្រុងបានលុង បានឲ្យដឹងថា បើតាមឪពុកម្តាយនារីរងគ្រោះនិយាយប្រាប់សមត្ថកិច្ចថា នៅយប់មុនពេលកើតហេតុ កូនស្រីរបស់ពួកគាត់ បានជិះម៉ូតូទៅរៀនគួហើយត្រឡប់មកផ្ទះវិញ នៅប្រហែលម៉ោង៨យប់។ ពួកគាត់មានតូបលក់បន្លែមួយ នៅខាងមុខផ្ទះ ហើយកូនស្រីគាត់មកពីសាលារៀន បានចូលទៅសម្រាកនៅក្នុងតូបនោះ។
លោកបានឲ្យដឹងទៀតថា នៅព្រលប់ថ្ងៃកើតហេតុនោះ កូនប្រុសរបស់ពួកគាត់ បានទៅតូបលក់ដូរនោះ ហើយឃើញតែម៉ូតូបងស្រី ហើយស្មានតែបងភ្លេច ព្រោះឃើញក្នុងបន្ទប់មានបើកភ្លើងតែមិនខ្ទាស់ទ្វារទេ។ នៅពេលនោះ ប្អូនប្រុសនារីរងគ្រោះបានខ្ទាស់ទ្វារ ហើយក៏បញ្ឆេះម៉ូតូជិះទៅផ្ទះ ដែលនៅជិតតូបលក់ដូរនោះ។
លោកនាយប៉ុស្តិ៍បានប្រាប់តាមសម្តីឪឱពុកម្តាយនារីរងគ្រោះទៀតថា លុះប្រហែលជាម៉ោង ៣ទៀបភ្លឺ ឪពុកម្តាយបានក្រោកទៅទិញបន្លែដូចសព្វដង ប៉ុន្តែបានដើរមកមើលតូបឃើញតែភ្លើងបើកនៅក្នុងបន្ទប់របស់កូនស្រី តែមិនឃើញកូនក៏នាំគ្នាឆោឡោ ដើររកកូន ហើយក៏ប្រទះឃើញដេកស្លាប់ទាំងអាក្រាតកាយ។ ពេលនោះពួកគាត់បានរាយការណ៍ទៅនគរបាលប៉ុស្តិ៍សង្កាត់កាចាញ។
បន្ទាប់មកសមត្ថកិច្ចរបស់លោកបានចុះដល់កន្លែងកើតហេតុ និងធ្វើកោសល្យវិច័យពិនិត្យឃើញថា នារីរងគ្រោះត្រូវជនល្មើសសម្រាតខោ ប៉ុន្តែអាវមិនទាន់ដោះអស់ចេញពីខ្លួនទេនិងដេកផ្កាប់មុខ។
លោកថ្លែងបន្តថា ករណីនេះសមត្ថកិច្ចសន្និដ្ឋានថា ពេលជនល្មើសធ្វើសកម្មភាពបម្រុងរំលោភប្រហែលចំពេលប្ងូនប្រុសនារីរងគ្រោះទៅបញ្ឆេះម៉ូតូ ហើយពេលនោះនារីរងគ្រោះស្រែក ដូច្នេះជនល្មើសបានវាយនាងមួយដៃចំដើមទ្រូង ព្រោះមានស្នាមជាំ ដែលប្រហែលនារីរងគ្រោះស្រែកទើបជនល្មើសចាប់ក្បាលជ្រមុជនឹងដីធ្វើឲ្យនាងថប់ដង្ហើមស្លាប់តែម្តងទៅ។
លោកបញ្ជាក់ទៀតថា បើតាមការធ្វើកោសល្យវិច័យបង្ហាញថា ជនល្មើស បានអូសនារីរងគ្រោះទៅឆ្ងាយពីតូបលក់ប្រហែល ១៥ ម៉ែត្រប៉ុណ្ណោះ ហើយចាប់នាងរំលោភមែន តែដោយដឹងថា នាងស្លាប់ហើយសង្ស័យប្រហែលជាជនល្មើសអស់អារម្មណ៍ក៏គេចខ្លួនបាត់ទៅ។
កាលពីឆ្នាំមុន ក៏មានករណីដូចគ្នានេះដែរ ដោយជនសង្ស័យបានចាប់នារីសិស្សវិទ្យាល័យថ្នាក់ទី ១២ ម្នាក់អាយុ ១៨ ឆ្នាំរំលោភ ហើយសម្លាប់ចោល ក្នុងព្រៃដំឡូងនៅឃុំប៉ាតាង ស្រុកលំផាត់ខេត្តរតនគិរី។
បើតាមលោក ថេង ចន្ទី អធិការ ស្រុកលំផាត់ បានរំឭកប្រាប់នៅថ្ងៃទី ៤ ខែកុម្ភៈ ឆ្នាំ ២០១៨ ថា កាលណោះសមត្ថកិច្ចរបស់លោក បានឃាត់ខ្លួនជនសង្ស័យម្នាក់ឈ្មោះ ចិល អូន អាយុ ១៨ ឆ្នាំ ប៉ុន្តែជនសង្ស័យរូបនេះ មិនបានឆ្លើយសារភាពពីការរំលោភសម្លាប់នារីរងគ្រោះនោះទេ គឺដូចករណីនៅសង្កាត់កាចាញនេះដែរ។
លោកបញ្ជាក់ថា៖«ជនសង្ស័យនោះ ត្រូវព្រះរាជអាជ្ញាឃុំខ្លួនរហូតដល់បច្ចុប្បន្ននេះ ព្រោះតុលាការធ្វើការអង្កេតឃើញថា ជននោះ អាចជាជនដៃដល់ក្នុងរឿងនោះ»៕