Search form

Login - Register | FOLLOW US ON

Logo of Phnom Penh Post newspaper Phnom Penh Post - ជនសង្ស័យ​សម្លាប់​បណ្ឌិត កែម ឡី ត្រូវ​ចាត់​តាំង​មេធាវី​ឲ្យ​ការពារ

Content image - Phnom Penh Post
ជួប​ សម្លាប់ ពេលត្រូវសមត្ថកិច្ចចាប់បានភ្លាម ក្រោយ​បាញ់​សម្លាប់​លោក​កែម ឡី។

ជនសង្ស័យ​សម្លាប់​បណ្ឌិត កែម ឡី ត្រូវ​ចាត់​តាំង​មេធាវី​ឲ្យ​ការពារ

ភ្នំពេញៈ គណៈមេធាវី​កម្ពុជា​កាលពី​ថ្ងៃ​សុក្រ​បាន​តែងតាំង​ឲ្យ​ធ្វើ​ជា​អ្នក​​ការពារ​ក្តី​ឲ្យ​លោក​ ជួប​ សម្លាប់ អាយុ​ ៤៤ ឆ្នាំ​ជា​អតីត​ទាហាន​ និង​ជា​អតីត​ព្រះសង្ឃ​ និង​ជា​អតីត​មន្ត្រី​បរិស្ថាន​ដែល​បាន​សម្លាប់​លោក​ កែម ​ឡី ​អ្នក​វិភាគ​នយោបាយ​ដ៏​លេចធ្លោ​កាលពី​ឆ្នាំ​មុន​។

លោក​មេធាវី​ យុង ផានិត បាន​ថ្លែង​កាលពី​ម្សិលមិញ​ថា​លោក​បាន​ទទួល​លិខិត​មួយ​កាលពី​ថ្ងៃ​សុក្រ​កន្លង​ទៅ​ដែល​ត្រូវ​បាន​ចាត់​តាំង​ដោយ​គណៈមេធាវី​កម្ពុជា​ដើម្បី​ឲ្យ​លោក​ការពារ​ក្តី​ឲ្យ​លោក​ អឿត អាង ហើយ​លោក​អាច​នឹង​ទទួល​រឿង​ក្តី​នេះ​នៅ​ថ្ងៃ​ចន្ទ​ហើយ​ពេល​សិក្សា​សំណុំ​រឿង​ក្តី​​រួច​លោក​អាច​ទៅ​ជួប​កូន​ក្តី​របស់​លោក​នៅ​ថ្ងៃ​បន្ទាប់។

លោក​បាន​ថ្លែង​ថា៖ «ខ្ញុំ​ទើប​តែ​បាន​ទទួល​រឿង​ក្តី​នេះ​កាលពី​ថ្ងៃ​សុក្រ​ (ថ្ងៃ​សុក្រ) តែ​ពីរ​បី​ថ្ងៃ​មុន...ហើយ​នៅ​សប្តាហ៍​ក្រោយ​បន្ទាប់ពី​ខ្ញុំ​បាន​ទទួល​រឿង​ក្តី​នេះ​ខ្ញុំ​នឹង​ពិនិត្យ​មើល​វា​រួចរាល់​ហើយ​បន្ទាប់​មក​ខ្ញុំ​នឹង​ទៅ​ជួប​គាត់​ដែល​អាច​នៅ​ថ្ងៃ​អង្គារ​ឬ​ថ្ងៃ​ពុធ»។

លោក​បាន​បន្ថែម​ថា​ប្រសិន​បើ​ករណី​នេះ​វា​មាន​ភាព​ស្មុគស្មាញ​ខ្លាំង​លោក​ត្រូវ​ការ​ពេលវេលា​ដើម្បី​សិក្សា​ឲ្យ​បាន​ច្បាស់លាស់​រឿង​ក្តី​នេះ​បន្ថែម​ហើយ​ករណី​នេះ​លោក​អាច​នឹង​ជួប​ពិភាក្សា​ជាមួយ​កូន​ក្តី​ដើម្បី​ស្នើ​សុំ​ឱ្យ​តុលាការ​​ពន្យារ​ពេល​បើក​សវនាការ​ដើម្បី​ឲ្យ​លោក​មាន​ពេលវេលា​គ្រប់គ្រាន់​ក្នុង​ការ​សិក្សា​អំពី​សំណុំ​រឿង​នេះ​ឲ្យ​បាន​ច្បាស់​ហើយ​លោក​ថា​នឹង​ព្យាយាម​ឲ្យ​អស់​ពី​លទ្ធភាព​ដើម្បី​ការពារ​កូនក្តី​លោក​។

លោក​បាន​បន្ត​ថា៖ «ប្រសិន​បើ​រឿង​ក្តី​នេះ​ស្មុគស្មាញ​នោះ​ខ្ញុំ​ត្រូវ​ការ​ពេល​​បន្ថែម​ទៀត​ដើម្បី​សិក្សា​អំពី​ករណី​នេះ​ ប៉ុន្តែ​ប្រសិន​បើ​រឿង​នេះ​វា​មិន​​ស្មុគស្មាញ​ពេក​ទេ​នោះ​ខ្ញុំ​មិន​ត្រូវ​ការ​ពេលវេលា​បន្ថែម​​ទេ​ហើយ​ខ្ញុំ​នឹង​ឡើង​ទៅ​កាន់​តុលាការ​នៅ​ថ្ងៃ​ទី ១ (ខែ​មីនា) តែ​ម្ដង។ ខ្ញុំ​នឹង​ព្យាយាម​ធ្វើ​វា​ព្រោះ​ខ្ញុំ​ធ្លាប់​បាន​ធ្វើ​ការងារ​នេះ​អស់​រយៈពេល​ជាយូរ​មក​ហើយៗ​យើង​នឹង​ធ្វើ​ការងារ​នេះ​តាម​ជំនាញ​​វិជ្ជាជីវៈ​ និង​ទៅ​តាម​ច្បាប់...ហើយ​ការងារ​របស់​ខ្ញុំ​គឺ​ដើម្បី​ការពារ​ជន​ជាប់ចោទ​ដែល​ត្រូវ​បាន​ផ្ដល់​​ឲ្យ​ដោយ​គណៈមេធាវី​ដូច្នេះ​ហើយ​ខ្ញុំ​នឹង​ព្យាយាម​ធ្វើ​ការងារ​ឲ្យ​បាន​ល្អ​បំផុត​នៅ​ក្នុង​រឿង​ក្តី​មួយ​នេះ ... »។

លោក​ យុង ផានិត បាន​បន្ថែម​ថា​រឿង​ក្តី​នេះ​គឺ​មាន​ការ​យក​ចិត្ត​ទុក​ខ្លាំងក្លា​ណាស់​តាំងពី​សាធារណជន​នៅក្នុង​ស្រុក​ និង​អន្តរជាតិ​ហេតុ​ដូច្នេះ​ហើយ «វា​នឹង​មាន​សម្ពាធ​មួយ​ចំនួន​នៅ​លើ​​អារម្មណ៍​របស់​ខ្ញុំ ប៉ុន្តែ​ដោយសារ​តែ​ខ្ញុំ​ធ្លាប់​មាន​បទពិសោធ​ជាច្រើន​មក​ហើយ​នោះ​វា​គឺជា​រឿង​ធម្មតា​សម្រាប់​ការងារ​ និង​អាជីព​របស់​ខ្ញុំ»។

លោក​ យុង ផានិត ធ្លាប់​បាន​បំពេញ​ការងារ​ជា​មេធាវី និង​បាន​ការពារ​​ក្ដី​ក្នុង​រឿង​ឧក្រិដ្ឋកម្ម​ ព្រហ្មទណ្ឌ​មួយ​ចំនួន​ហើយ​លោក​បាន​ធ្វើការ​ចាប់​តាំងពី​ឆ្នាំ​ ១៩៩៦ ​មក​ម្ល៉េះ ជាពិសេស​លោក​ក៏​ធ្លាប់​បាន​ធ្វើ​ជា​មេធាវី​ការពារ​ក្តី​ និង​ជា​មេធាវី​នៅ​សាលាក្តី​ខ្មែរ​ក្រហម​សម្រាប់​ភាគី​ស៊ីវិល​ផង​ដែរ​។

ទោះ​យ៉ាង​ណា​ព្រះសង្ឃ ប៊ុតប៊ុនតិញ មេដឹកនាំ​បណ្តាញ​​ព្រះសង្ឃ​ឯករាជ្យ​ដើម្បី​យុត្តិធម៌​សង្គម​បាន​មាន​សង្ឃដីកា​ថា៖ «អ្នក​ត្រូវ​បាន​គេ​ចោទប្រកាន់​មាន​សិទ្ធិ​ទទួល​បាន​មេធាវី​ ដូច្នេះ​ហើយ​វា​ជា​សិទ្ធិ​ដើម្បី​ទទួល... ប៉ុន្តែ​ចំពោះ​រឿង​ក្តី​នេះ​វា​ហាក់​ដូចជា​ត្រូវ​បាន​គេ​បង្កើត​ និង​រៀបចំ​ឡើង​យ៉ាង​ច្បាស់លាស់​រួម​មាន​ទាំង​ការ​សម្លាប់ ការ​ចាប់​ខ្លួន​ ឬ​ការ​កាត់​ទោស​...រឿង​ក្តី​នេះ ប្រសិន​បើ​គ្មាន​នរណា​ម្នាក់​ជួយ​រៀបចំ​ទេ​នោះ​វា​នឹង​មិន​ដំណើរការ​បាន​យ៉ាង​រលូន​នោះ​ទេ​ហើយ​ហេតុ​អ្វី​បាន​ជា​តុលាការ​ និង​រដ្ឋាភិបាល​មិន​បាន​ផ្ដោត​ការ​យក​ចិត្ត​ទុក​ដាក់​ខ្លាំង​ទៅ​លើ​ការ​បង្ហាញ​វីដេអូ​នៅ​ក្នុង​កាមេរ៉ា​សុវត្ថិភាព ( CCTV) ហើយ​ភ័ស្តុតាង​គឺ​អាច​អនុញ្ញាត​ឲ្យ​មាន​ឱកាស​សម្រាប់​គ្រប់​ភាគី​ទាំងអស់​ឲ្យ​ចូលរួម​តាមដាន​រឿង​ក្តី​នេះ។

(តុលាការ) មិន​អាច​គ្រាន់តែ​នាំ​យក​បុគ្គល​ម្នាក់​ដែល​សម្លាប់​គេ​ទៅ​កាត់​ទោស​តែ​ម្នាក់​ឯង​បាន​ទេ...យើង​ជឿ​ថា​មាន​មនុស្ស​ជាច្រើន​ទៀត​នៅ​ពី​ក្រោយ​រឿង​នេះ​។ នេះ​ជា​រឿង​ឆាក​ល្ខោន ...នេះ​គឺ​មិនមែន​ជា​យុត្តិធម៌​ពិតប្រាកដ​ទេ...ខ្ញុំ​អាច​នឹង​ទៅ​មើល​រឿង​ល្ខោន​នេះ​។ យើង​នឹង​ស្វែងរក​អ្នក​និពន្ធ​ និង​អ្នក​ផលិត​រឿង​ល្ខោន​នេះ»៕ NS

0

Comments

Please, login or register to post a comment