កណ្ដាលៈ លោក អ៊ាវ ចំរើន ស្នងការនគរបាលខេត្តកណ្តាលបានថ្លែងកាលពីម្សិលមិញថា សមត្ថកិច្ចកំពុងបន្តសាកសួរលើជនសង្ស័យជាឃាតករសម្លាប់ស្ដ្រីម្នាក់ដាក់ចូលក្នុងធុងទឹកកក បន្ទាប់ពីជននេះត្រូវបានចាប់ខ្លួនកាលពីល្ងាចថ្ងៃអាទិត្យ។
លោក អ៊ាវ ចំរើន បានថ្លែងថា ជនសង្ស័យនឹងត្រូវចោទប្រកាន់ពីបទ «មនុស្សឃាតគិតទុកជាមុន» តាមមាត្រា ២០០ នៃក្រមព្រហ្មទណ្ឌដែលនឹងត្រូវប្រឈមការផ្ដន្ទាទោសអស់មួយជីវិត។ ហើយជនសង្ស័យ និងវត្ថុតាងនឹងត្រូវបញ្ជូនទៅកាន់តុលាការខេត្តកណ្ដាលនៅថ្ងៃអង្គារនេះ។
លោកបានថ្លែងថាជនសង្ស័យឈ្មោះ សឿ សុផេង អាយុ ៣១ ឆ្នាំមានមុខរបរជាជាងជួសជុលទូរស័ព្ទស្នាក់នៅផ្ទះជួលមួយកន្លែងស្ថិតក្នុងភូមិដីថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ចំណែកស្ត្រីរងគ្រោះឈ្មោះ យឿន ធានី អាយុ ២៩ ឆ្នាំមានស្រុកកំណើតនៅភូមិក្រូចសើច ឃុំហាន់ជ័យ ស្រុកកំពង់សៀម ខេត្តកំពង់ចាម។ នាងទើបមកពីប្រទេសកូរ៉េបានមួយឆ្នាំ។
កាលពីរសៀលថ្ងៃទី ១៦ ខែមីនា ឆ្នាំ ២០១៨ ក្រុមអ្នកភូមិបានប្រទះឃើញធុងទឹកកកពណ៌ក្រហមចំណុះ ២០០ លីត្រមួយត្រូវបានគេប្លុងចោលនៅក្បែរស្ពានព្រះគន្លង ស្ថិតក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ដោយធុងនោះមានកិបសោពណ៌ខ្មៅមួយផងដែរ។ លោកស្នងការបានបញ្ជាក់ថាយោងតាមចម្លើយសារភាពរបស់ជនសង្ស័យករណីឃាតកម្មនេះ គឺ ពុំមានអ្នកផ្សេងទៀតពាក់ព័ន្ធនោះទេ។ ជនសង្ស័យបានសារភាពចំពោះនគរបាលថា ខ្លួនចាញ់ល្បែង និងជំពាក់ប្រាក់គេច្រើនពេកទើបបែកគំនិតរៀបចំគម្រោងសម្លាប់ស្ត្រីរងគ្រោះ ដើម្បីប្លន់យកម៉ូតូ និងគ្រឿងអលង្ការមួយចំនួន។ ជនសង្ស័យថា៖ «ខ្ញុំបានជំពាក់បំណុលសរុបជិត ២០០០ ដុល្លារ ទើបខ្ញុំសម្រេចចិត្តរៀបគម្រោងសម្លាប់នាងដើម្បីប្លន់យកទ្រព្យសម្បត្តិដោយខ្ញុំបានរៀបចំបង្កប់ខ្សែភ្លើងនៅក្នុងបន្ទប់ទឹក»៕