.jpg)
ជនសង្ស័យទាំង ៦ នាក់ដែលពាក់ព័ន្ធនឹងការបាញ់សម្លាប់អ្នកការពារព្រៃឈើ ពេលត្រូវបានសមត្ថកិច្ចចាប់ខ្លួន។ រូបថត Fresh News
មណ្ឌលគិរីៈ ជនសង្ស័យ ៦ នាក់ដែលពាក់ព័ន្ធនឹងការបាញ់សម្លាប់អ្នកការពារ និងអភិរក្សព្រៃឈើនៅស្រុកអូររាំង ខេត្តមណ្ឌលគិរីត្រូវបានបញ្ជូនទៅកាន់តុលាការខេត្តកាលពីម្សិលមិញដើម្បីធ្វើការផ្តន្ទាទោសតាមច្បាប់។
ជនទាំងនេះដែលមានមន្ត្រីយោធា និងមន្ត្រីប៉ូលិសព្រំដែនផងនោះត្រូវបានដឹកបញ្ជូនចេញពីទីបញ្ជាការកងរាជអាវុធហត្ថខេត្តមណ្ឌលគិរី ដើម្បីបញ្ជូនទៅកាន់តុលាការខេត្ត។
លោក ស្វាយ សំអ៊ាង អភិបាលខេត្តមណ្ឌលគិរីថ្លែងថា៖ «យើងបានឃាត់ខ្លួន ៦ នាក់ក្នុងនោះមានជនដៃដល់ ២ នាក់ក្រៅពីនេះគឺជាអ្នករួមគំនិត។ យើងបានកសាងសំណុំរឿងបញ្ជូនទៅតុលាការ»។
លោក ម៉ម វ៉ាន់ដា អ្នកនាំពាក្យព្រះរាជអាជ្ញាខេត្តមណ្ឌលគិរីបានអះអាងកាលពីម្សិលមិញថាតុលាការបានចាប់ផ្ដើមសាកសួរលើជនសង្ស័យទាំងនោះហើយបន្ទាប់ពីមកដល់តុលាការ។
លោក វ៉ាន់ដា ថ្លែងថា៖ «យើងបានសាកសួរ ប៉ុន្តែដោយយើងសាកសួរមិនទាន់ចប់ដូច្នេះយើងផ្ញើទុកនៅទីបញ្ជាការកងរាជអាវុធហត្ថខេត្តមណ្ឌលគិរីសិន ហើយនៅព្រឹកនេះយើងនឹងសាកសួរបន្ត។ ជនទាំងអស់នេះមានការពាក់ព័ន្ធទៅនឹងបទល្មើសផ្សេងៗគ្នា»។
លោក ប៊ូ ប៊ុនឈាត អធិការនគរបាលស្រុកអូររាំងប្រាប់ភ្នំពេញ ប៉ុស្តិ៍ថា ជនសង្ស័យសរុប ៦ នាក់ដែលជាប់ពាក់ព័ន្ធនឹងអំពើឃាតកម្មបាញ់ប្រហារសម្លាប់ជនរងគ្រោះ ៣ នាក់មានម្នាក់ជាមន្ត្រីកងរាជអាវុធហត្ថលើផ្ទៃប្រទេសម្នាក់ជាមន្ត្រីបរិស្ថាន និងម្នាក់ជាមន្ត្រីអង្គការការពារសត្វព្រៃ WCS។
ជនសង្ស័យទាំង ៦ ដែលត្រូវបានឃាត់ខ្លួនមានឈ្មោះ ១. ផល ពេញ ជានាយនគរបាលប៉ុស្ដិ៍អូររលែនៃវរការពារព្រំដែនលេខ ៦២១ ស្នងការដ្ឋាននគរបាលខេត្តមណ្ឌលគិរីត្រូវបានចាប់ខ្លួននៅព្រឹកថ្ងៃ ទី ២ ខែកុម្ភៈ នៅខេត្តត្បូងឃ្មុំ ២. ឈ្មោះ កើត វេតា ជាទាហានការពារព្រំដែន ៣. ឈ្មោះ ឡាយ សាវី ជាទាហានការពារព្រំដែន ៤. ឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ ត្រូវបានចាប់ខ្លួននៅយប់ថ្ងៃទី ១ ខែកុម្ភៈ និង ៥. ឈ្មោះ ឈាង វ៉ាន់និត ប្អូនថ្លៃ ផល ពេញ ត្រូវបានចាប់ខ្លួននៅរសៀលថ្ងៃទី ២ ខែកុម្ភៈ ឆ្នាំ ២០១៨។ ចំណែកទី ៦ ឈ្មោះ កើត វេហា ត្រូវបានចូលខ្លួនមកសារភាពនៅថ្ងៃទី ១ ខែកុម្ភៈ។
លោក ប៊ុនឈាត ថ្លែងថា៖ «អ្នកខ្លះត្រូវបានសមត្ថកិច្ចនាំយកទៅសួរនៅមូលដ្ឋានអាវុធហត្ថខេត្តមណ្ឌលគិរីហើយគាត់ឃាត់នៅទីនោះតែម្តង។ ខាងស្រុកយើងបានធ្វើការស្រាវជ្រាវតាមការចង្អុលបង្ហាញរបស់ស្នងការ យើងបានកោះហៅអ្នកដែលបានពាក់ព័ន្ធមកទាំងអស់ ហើយសរុបមកដល់ពេលនេះគឺមាន ៦ នាក់ដែលត្រូវបានឃាត់ខ្លួនដើម្បីបន្តការស៊ើបអង្កេត»។
លោក សូ សុវណ្ណ ស្នងការរងខេត្តមណ្ឌលគិរី ថា ឈ្មោះ ផល ពេញ ត្រូវបញ្ជូនទៅឲ្យថ្នាក់ជាតិដើម្បីចាត់ការតាមនីតិវិធី។
លោក សុវណ្ណ ថ្លែងថា៖ «នេះជារឿងទំនាស់រវាងភាគីទាំងសងខាង (ជនរងគ្រោះ និងជនដៃដល់) ។ ទាំងសងខាងបានទាស់សម្តីនឹងគ្នាដែលបង្កទៅជារឿងបាញ់សម្លាប់បែបនេះ»។
ទោះបីជាយ៉ាងណាក៏ដោយលោក សុំបដិសេធមិនផ្តល់ព័ត៌មានលម្អិតនោះទេ។
យោងតាមវីដេអូឃ្លីបដែលផ្សាយនៅលើអនឡាញ Fresh News បានឲ្យដឹងថា ជនសង្ស័យ ផល ពេញ បានឆ្លើយប្រាប់សមត្ថកិច្ចនៅក្រសួងមហាផ្ទៃថា ការកាប់ឈើនៅទីនោះគឺជាធម្មតាទៅហើយទាំងពលរដ្ឋកម្ពុជា ទាំងវៀតណាមហើយថាថ្ងៃកើតហេតុមានកងរាជអាវុធហត្ថ និងបរិស្ថានបានប្រទះឃើញរណារវៀតណាម ២ គ្រឿងកាលពីថ្ងៃអង្គារសប្ដាហ៍មុនហើយបានសួរនាំពួកគេថាហេតុអ្វីបានជាពួកគេចូលទៅតំបន់ស ហើយថាក្រុមនេះបានចូលជាច្រើនលើកហើយតែហាមពួកគេមិនស្តាប់ទេ។
យោងតាមវីដេអូឃ្លីបនេះជនសង្ស័យបានថ្លែងថាកងរាជអាវុធហត្ថ និងមន្ត្រីបរិស្ថានដែលជាជនរងគ្រោះបានថតរូបវៀតណាម និងចាប់រណារវៀតណាម ហើយបានសុំ ៥ លានជាថ្នូរនឹងការប្រគល់រណារឲ្យវៀតណាមវិញហើយឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែគឺជាអ្នកទាក់ទងជាមួយមន្ត្រីបរិស្ថានតែដោយសារកងរាជអាវុធហត្ថ និងបរិស្ថានបានរាយការណ៍ទៅព្រះរាជអាជ្ញាដែលធ្វើឲ្យលោក ផល ពេញដាច់ចិត្តបាញ់ទៅលើកងរាជអាវុធហត្ថ និងបរិស្ថាន។
ជនសង្ស័យ ផល ពេញ ថ្លែងថា៖ «ខ្ញុំប្រាប់ថាមិនបាច់រាយការណ៍ទៅណាទេ ពីព្រោះតែប៉ុណ្ណឹងមិនបាច់វែងឆ្ងាយបួនដប់ម៉ឺនចែកគ្នាចាយទៅ...ខ្ញុំមិនបានទៅការពារក្រុមអ្នកកាប់ឈើទេ។ ខ្ញុំខឹងរឿងថាព្រមនឹងគ្នាតែបែរជាទៅរាយកាណ៍ទៅព្រះរាជអាជ្ញា»។
គួរបញ្ជាក់ថាករណីបាញ់ប្រហារនោះបណ្តាលឲ្យមន្ត្រីការពារព្រៃឈើ ៣ រូបស្លាប់នៅចំណុចអូរហ៊ុច ស្រុកអូររាំង ខេត្តមណ្ឌលគិរីបានកើតឡើងនៅចន្លោះម៉ោង ៤ រសៀល ថ្ងៃទី ៣០ ខែមករា ឆ្នាំ ២០១៨ បានបណ្ដាលឲ្យស្លាប់មនុស្ស ៣ នាក់ រួមមានមន្ដ្រីអាវុធហត្ថលើផ្ទៃប្រទេសម្នាក់ឈ្មោះ សេក វឌ្ឍនា មន្ដ្រីឧទ្យានុរក្សនៃមន្ទីរបរិស្ថានខេត្តមណ្ឌលគិរីឈ្មោះ តើន សុខណៃ និងបុគ្គលិកអង្គការសមាគមអភិរក្សសត្វព្រៃ Wildlife Conservation Society (WCS) ឈ្មោះ ថុល ខ្នា។
ទាក់ទងនឹងការស្រាវជ្រាវករណីនេះសមត្ថកិច្ចឲ្យដឹងថាគេបានរកឃើញសម្បកកាទូសចំនួន ៧ គ្រាប់សុទ្ធតែប្រភេទ AK និងថាជនរងគ្រោះត្រូវគេពួនស្ទាក់បាញ់ពេលកំពុងល្បាត។ អង្គការ WCS បានចេញសេចក្តីថ្លែងការណ៍កាលពីថ្ងៃសុក្រដោយហៅជនរងគ្រោះទាំង ៣ ថាជា «វីរជនអភិរក្សព្រៃឈើ»។
អ្នកនាំពាក្យក្រសួងបរិស្ថានលោក សៅ សុភាព បានបដិសេធមិនធ្វើអត្ថាធិប្បាយអំពីការលើកឡើងរបស់លោកអភិបាលខេត្តដែលថាមន្ត្រីល្បាតដែលត្រូវបានគេបាញ់សម្លាប់ទាំងនោះអាច «ឃុបឃិត» ជាមួយកងកម្លាំងព្រំដែន និងអ្នកកាប់ឈើព្រមទាំងមន្ត្រីដទៃៗទៀតដែលពាក់ព័ន្ធនឹងការបាញ់នេះ។
លោកបានថ្លែងថា៖ «ខ្ញុំគិតថាយើងទាំងអស់គ្នាមិនគួរធ្វើឲ្យមានការឈឺចាប់បន្ថែមទៀតទៅដល់គ្រួសារដែលបានបាត់បង់មនុស្សជាទីស្រឡាញ់របស់ខ្លួនទេហើយទុកឲ្យ...ប្រព័ន្ធយុត្តិធម៌ធ្វើការងារលើករណីនេះ និងស្វែងរកយុត្តិធម៌សម្រាប់អ្នកដែលបានបាត់បង់ជីវិត»។
លោក កែន សេរីរដ្ឋា នាយកប្រចាំប្រទេសរបស់អង្គការ WCS បានបដិសេធមិនធ្វើអត្ថាធិប្បាយអំពីការលើកឡើងខាងលើដោយថ្លែងថា៖ «ខ្ញុំទុកឲ្យអាជ្ញាធររដ្ឋាភិបាលឆ្លើយតបដោយសារពួកគេធ្វើការស៊ើបអង្កេត»។
នៅក្នុងសេចក្តីថ្លែងការណ៍មួយដែលបង្ហោះដោយអង្គការអភិរក្សនេះកាលពីថ្ងៃសុក្រលោក សេរីរដ្ឋា បានសម្តែង «ការសោកស្តាយ និងសូមចូលរួមរំលែកទុក្ខដ៏មហាក្រៀមក្រំនេះជាមួយក្រុមគ្រួសារ និងសាច់ញាតិរបស់វីរជនអភិរក្ស ព្រៃឈើទាំង ៣ រូប»។
លោក សេរីរដ្ឋា បានថ្លែងនៅក្នុងសេចក្តីថ្លែងការណ៍នេះថាអ្នកទាំង ៣ នាក់ «ត្រូវបានបាញ់សម្លាប់នៅពេលត្រឡប់មកពីតំបន់អូរហ៊ុចដែលជាតំបន់ព្រំដែនកាប់ឈើខុសច្បាប់។
លោកថ្លែងថា៖ «ជារៀងរាល់ថ្ងៃមន្ត្រីឧទ្យានុរក្ស និងក្រុមអនុវត្តច្បាប់បានប្រថុយជីវិតរបស់ខ្លួនដើម្បីការពារសត្វព្រៃ និងព្រៃឈើ។ យើងមិនត្រូវអនុញ្ញាតឲ្យឧក្រិដ្ឋជន កាប់បំផ្លាញព្រៃនៅកម្ពុជា គំរាមកំហែង និងបាញ់សម្លាប់អ្នកការពារសម្បត្តិ ធម្មជាតិកើតឡើងជាថ្មីម្តងទៀតឡើយ។ យើងទាំងអស់គ្នានឹងចងចាំលោក សុខណៃ លោក វឌ្ឍនា និងលោក ខ្នា ជាវីរជនអភិរក្សព្រៃឈើជារៀងរហូត»៕ PS
