.jpg)
ពិធីសារផ្ដល់ហិរញ្ញប្បទានរបស់ជប៉ុនដល់កម្ពុជាកាលពីព្រឹកមិញ។ ផា លីណា
ភ្នំពេញៈ រដ្ឋាភិបាលកម្ពុជាបានទទួលហិរញ្ញប្បទានឥតសំណងពីរដ្ឋាភិបាលជប៉ុន គិតជាប្រាក់ប្រមាណ ៨០០ លានយ៉េន (ប្រមាណ ៧ លានដុល្លារអាមេរិក) ជាហឹបឆ្នោត និង សម្ភារចាំបាច់ផ្សេងទៀតដល់គណៈកម្មាធិការជាតិរៀបចំការបោះឆ្នោត (គជប) សម្រាប់ការបោះឆ្នោតសកលខាងមុខ។
ពិធីសារនៃការផ្ដល់ហិរញ្ញប្បទាននេះមានការចុះហត្ថលេខារវាងលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងលោក ហូរីណូអូជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជាកាលពីព្រឹកថ្ងៃពុធទី ២១ ខែកុម្ភៈនេះ ដើម្បីអនុវត្តគម្រោងកម្មវិធីអភិវឌ្ឍន៍សេដ្ឋកិច្ចនិងសង្គម។
ក្នុងក្របខណ្ឌនៃកម្មវិធីនេះ ជប៉ុននឹងផ្តល់ហឹបបោះឆ្នោតនិងសម្ភារចាំបាច់ដទៃទៀតដល់(គជប)សម្រាប់ការបោះឆ្នោតជាតិនៅខែកក្កដាឆ្នាំនេះ។
លោក ហូរីណូអ៊ូជិ ហ៊ីដេហ៊ីសា ឯកអគ្គរាជទូតជប៉ុន ប្រចាំកម្ពុជា បានប្រាប់អ្នកសារពត៌មានថា ៖«តាមរយៈជំនួយនេះជប៉ុននឹងផ្តល់ហឹបឆ្នោតចំនួនជាង ១០០០០...ដូចហឹបឆ្នោតដែលជប៉ុនបានផ្តល់ឲ្យកាលពីមុនដើម្បីធានាភាពត្រឹមត្រូវក្នុងការបោះឆ្នោត។ ជប៉ុន ក៏កំពុងផ្តល់ជំនួយផងដែរដល់ការកែទម្រងបោះឆ្នោតក្រោយមានការស្នើសុំពីលោកនាយករដ្ឋមន្ត្រី ហ៊ុន សែន ទៅកាន់នាយករដ្ឋមន្ត្រី ស៊ិនហ្សូ អាបេ កាលពីឆ្នាំ ២០១៣…»។
លោកបានបន្តថា៖ «ហឹបឆ្នោតនេះគឺជានិមិត្តរូបនៃជំនួយជប៉ុនចំពោះប្រជាធិបតេយ្យ។…ខ្ញុំសង្ឃឹមថា ហឹបឆ្នោតនេះនឹងផ្តល់អត្ថប្រយោជន៍យូរអង្វែងសម្រាប់ការរៀបចំការឆ្នោតដោយរលូននៅកម្ពុជានាពេលអនាគត»។
លោក ប្រាក់ សុខុន បានថ្លែងថា រាជរដ្ឋាភិបាលកម្ពុជាសូមសម្តែងនូវអំណរគុណជាថ្មីចំពោះរដ្ឋាភិបាលនិងប្រជាជនជប៉ុនដែលបានបន្តគាំទ្រដំណើរការអភិវឌ្ឍន៍ក៏ដូចជាការសាងនិងពង្រឹងលទ្ធិប្រជាធិបតេយ្យនៅកម្ពុជា។
លោក ស៊ិក ប៊ុនហុក ប្រធាន (គជប) បានប្រាប់អ្នកសារព័ត៌មានថា (គជប) មានកិច្ចសហប្រតិបត្តិការយ៉ាងល្អជាមួយជប៉ុន ក្នុងការរៀបចំការបោះឆ្នោត ហើយប្រទេសជប៉ុនជាមិត្តដ៏ល្អដែលមិនធ្លាប់លូកដៃចូលកិច្ចការផ្ទៃក្នុងកម្ពុជា។
លោកបញ្ជាក់ថា៖ «មិត្តជប៉ុនគឺគេមិនដែលបោះបង់យើងហើយក៏គេមិនលក់ដៃចូលទៅក្នុងកិច្ចការផ្ទៃក្នុងរបស់យើងទេ។ ប្រតិបត្តិការទំនាក់ទំនងការទូតនេះ ៦៥ ឆ្នាំ… យើងសហការជាមួយគ្នាល្អណាស់ គាត់ចុះទៅជួយមើលតាំងពីបច្ចេកទេស។ នេះគឺជាមិត្តដ៏ល្អមិនដែលបោះបង់ចោលគ្នាទេ។ យើងឃើញហើយភាគីជប៉ុនគឺជួយគ្រប់កាលៈទេសៈ»។
លោកបានបញ្ជាក់ថា (គជប) ត្រូវការហឹបឆ្នោតសរុបប្រហែល ៣០ ០០០ ហើយថា កម្ពុជានឹងទទួលមួយចំណែកទៀតពីភាគី ចិន៕
