.jpg)
រថយន្តធុនតូចកែច្នៃមួយគ្រឿង ដែលផ្ទុកឈើពេញ ត្រូវបានសមត្ថកិច្ចចាប់ឃាត់ យកទៅដាក់បញ្ឈរចោល នៅក្នុងខណ្ឌរដ្ឋបាលព្រៃឈើ កែវសីម៉ា ក្នុងខេត្តមណ្ឌលគិរី កាលពីថ្ងៃទី ១០ ខែមករា ឆ្នាំ ២០១៧។ ហេង ជីវ័ន
ភ្នំពេញៈ មនុស្សជាង ៣០០ នាក់ត្រូវបានឃាត់ខ្លួនពាក់ព័ន្ធទៅនឹងបទល្មើសធនធានធម្មជាតិប្រព្រឹត្តកាលពីឆ្នាំ ២០១៧ ខណៈជនសង្ស័យជាង ៤ ពាន់នាក់ទៀតត្រូវបានឃាត់ខ្លួនពាក់ព័ន្ធនឹងបទល្មើសផ្សេងទៀត។ នេះបើតាមរបាយការណ៍កងរាជអាវុធហត្ថ។
លទ្ធផលការងារឆ្នាំ ២០១៧ របស់កងរាជអាវុធហត្ថលើផ្ទៃប្រទេសបានឲ្យដឹងថាជនសង្ស័យចំនួន ៣៤៥ នាក់ត្រូវបានឃាត់ខ្លួនពីការបង្ក្រាបលើការប្រមូល ដឹកជញ្ជូន និងស្តុកផលអនុផលព្រៃឈើទូទាំងប្រទេសកាលពីឆ្នាំមុនក្នុងនោះ មនុស្សចំនួន ១០១ នាក់ត្រូវបានឃុំខ្លួន និងអប់រំចំនួន ២៤៤ នាក់។ ទោះយ៉ាងណារបាយការណ៍ប្រចាំឆ្នាំមិនបានបង្ហាញពីចំនួនវត្ថុតាងដូចជាឈើ និងមធ្យោបាយប្រព្រឹត្តបទល្មើសនោះទេ។
លើសពីនោះរបាយការណ៍ក៏បានបង្ហាញផងដែរថាមានមនុស្សចំនួន ១២ នាក់ត្រូវបានឃាត់ខ្លួនពីបទល្មើសធនធានរ៉ែដែលក្នុងនោះ ៣ នាក់ត្រូវឃុំខ្លួន និង ៩ នាក់ត្រូវធ្វើការអប់រំឲ្យឈប់ប្រព្រឹត្តបទល្មើស។
ក្រៅពីនោះជនសង្ស័យចំនួន ៣០ នាក់ក៏ត្រូវបានឃាត់ខ្លួនរឿងទន្ទ្រានយកដីរដ្ឋខុសច្បាប់ និងបទល្មើសនេសាទចំនួន ២៧៣ លើកត្រូវបានបង្ក្រាបផងដែរ។
លោក អេង ហ៊ី អ្នកនាំពាក្យអាវុធហត្ថលើផ្ទៃប្រទេសបានឲ្យដឹងថាលោកមិនបានដឹងពីចំនួនវត្ថុតាងនោះទេ ដោយសារតែក្រោយបង្ក្រាបបានមន្ត្រីអាវុធហត្ថបានប្រគល់ឲ្យមន្ត្រីជំនាញជាអ្នកចាត់ការបន្ត។
កាលពី ៨ ខែដើមឆ្នាំ ២០១៦ គណៈកម្មការជាតិដើម្បីទប់ស្កាត់ និងបង្ក្រាបបទល្មើសព្រៃឈើដឹកនាំដោយលោកនាយឧត្តមសេនីយ៍ សៅ សុខា បានបង្ក្រាប និងដកហូតឈើជាង ៧ ម៉ឺនម៉ែត្រគុបពីបទល្មើសព្រៃឈើពិសេសគឺនៅតាមបណ្តាខេត្តភូមិភាគឦសាន។
គណៈកម្មការនេះក៏បានពង្រីកខ្លួនទៅជាគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិហើយចាប់តាំងពីខែកញ្ញា ឆ្នាំ ២០១៦ ដល់ខែឧសភាឆ្នាំ ២០១៧ គណៈកម្មការនេះបានបង្ក្រាបបទល្មើសព្រៃឈើចំនួន ៣៧០ លើក។ ក្នុងនោះខេត្តមណ្ឌលគិរីមានច្រើនជាងគេគឺរហូតដល់ទៅ ១៤៦ លើក។ ក្រៅពីនោះខេត្តក្រចេះមាន ៥៩ លើកស្ទឹងត្រែង ៣២ លើកពោធិ៍សាត់ ២៥ លើក ព្រះវិហារ ២៤ លើក កំពង់ធំ ២២ លើក...។
មន្ត្រីគ្រាក់ៗជាង ១០ នាក់ក្នុងខេត្តមណ្ឌលគិរីត្រូវបានរកឃើញថាពាក់ព័ន្ធនឹងបទល្មើសទាំងនោះហើយសំណុំរឿងនេះក៏កំពុងតែត្រូវបានសាលាដំបូងរាជធានីភ្នំពេញចាត់ការតាមនីតិវិធីផងដែរ។
លោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេសក៏បានអានរបាយការណ៍សង្ខេបជូនលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិដែលធ្វើជាអធិបតីនៅក្នុងពិធីប្រជុំបូកសរុបលទ្ធផលកាលពីម្សិលមិញនេះ។
លោកនាយឧត្តមសេនីយ៍បានថ្លែងប្រាប់ថា កម្លាំងអាវុធហត្ថបានបង្ក្រាបបទល្មើសសរុបចំនួន ២៧២៧ លើក និងជនពាក់ព័ន្ធ ៤៨១៩ នាក់ត្រូវបានស្រាវជ្រាវរកឃើញ និងបានឃាត់ខ្លួនចំនួន ៤១៨៨ នាក់។
បទល្មើសទាំងនោះរួមមានអំពើឆក់ចំនួន ១៣១ លើក លួច ៨៦៧ លើកប្លន់ប្រដាប់អាវុធ ៣២៣ លើកឃាតកម្ម ២៧៣ លើក គ្រឿងញៀន ១០៩៤ លើក ការចរាចរប្រើប្រាស់អាវុធខុសច្បាប់ ៤៣ លើក និងចាប់ជំរិត ៧ លើក ជាដើម។
រីឯការតវ៉ាដោយសារការថ្នាំងថ្នាក់មាន ៦១៩ លើកហើយបើធៀបទៅនឹងឆ្នាំ ២០១៦ បានថយចុះចំនួន ៥១៩ លើក៕
