.jpg)
លោក តា ម៉ា រី ត្រូវសមត្ថកិច្ចខេត្តកំពតនាំខ្លួនទៅសាកសួរកាលពីម្សិលមិញ។ រូបថត សហការី
កំពតៈ ភ្លាមៗបន្ទាប់ពីមានបញ្ជាពីលោកនាយករដ្ឋមន្ត្រី តាអាយុ ៧០ ឆ្នាំម្នាក់ ដែលជាអតីតសកម្មជនគណបក្សសង្គ្រោះជាតិ ត្រូវបានសមត្ថកិច្ចហៅទៅសាកសួរ និងដោះលែងឲ្យទៅផ្ទះវិញ ពាក់ព័ន្ធនឹងការនិយាយព័ត៌មានមិនពិត អំពីដំណើររបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសអូស្ត្រាលី កាលពីចុងសប្តាហ៍មុន។
សមត្ថកិច្ចបានបញ្ជាក់ថា លោកតារូបនេះ មានឈ្មោះ ម៉ា រី អាយុ ៧០ ឆ្នាំ ទើបតែសឹកពីព្រះសង្ឃ កាលពីកន្លះខែមុន។ គាត់ត្រូវបានប៉ូលិសខេត្តកំពត ចុះទៅនាំខ្លួនពីផ្ទះប្រពន្ធចុង នៅក្នុងភូមិព្រែកក្រឹស ឃុំព្រែកក្រឹស ស្រុកកំពង់ត្រាច យកទៅសាកសួរ។
ការហៅមកសាកសួរម្សិលមិញ ធ្វើឡើងតែប៉ុន្មានម៉ោងប៉ុណ្ណោះ ក្រោយពីមានការបញ្ជាផ្ទាល់ ពីលោក ហ៊ុន សែន ដែលលោកបានថ្លែងក្នុងពេលជួបសំណេះសំណាល ជាមួយកម្មករកម្មការិនីរោងចក្រកាត់ដេរ។
លោកនាយករដ្ឋមន្ត្រីថ្លែងថា៖ «តាមរកអាមួយហ្នឹង ហៅ សង្ឃ ម៉ារី។ យើងមានរូបមុនពេលបួស។ សង្ស័យអានេះកោរត្រង៉ោលដាក់ស្បង់ចេះតែទៅអត់មានវត្តពិតប្រាកដ។ អានេះភូតប្រចាំត្រកូល ហើយភូតពីមួយថ្ងៃទៅមួយថ្ងៃ។ ពីមុនភូតថា ដល់ត្រឹមនេះគេធ្វើអីចេះដល់ត្រឹមនេះធ្វើអីចេះ។ អាថ្ងៃឯងចេញពីនេះ វាថា ឯងគេចចេញពីអ្នកកាសែតរត់ឡើងកប៉ាល់ហោះ។ អានេះឆ្កួតវាឆ្កួត។ ឯងទៅប្រជុំតាំងពីព្រឹក»។
ដោយអះអាងថា ជននេះ អាចជាចារកម្មនោះ លោកនាយករដ្ឋមន្ត្រីថ្លែងបន្តថា៖«តាមការស្មានរបស់ខ្ញុំ អានេះមិនមែនលោកសង្ឃទេ។ រូបថ្មីៗយើងរកឃើញ។ មិនមែនជាសិទ្ធិព័ត៌មានទេអានេះ។ អានេះធ្វើចារកម្ម។ មុនទៅ(អូស្ត្រាលី)អាម៉ាសៀនេះ វាបោកថា លោក ហ៊ុន សែន ទៅនេះ ត្រូវគេចាប់។ ផុតពីគេចាប់ គេថា ទៅចរចា។ ចាំតែចរចាទៅ ហ៊ុន សែនអត់ត្រូវការចរចាជាមួយអ្នកណាទេ»។
លោក ឧត្តមសេនីយ៍ ម៉ៅ ច័ន្ទមធុរិទ្ធ ស្នងការខេត្តកំពត បានថ្លែងថា សមត្ថកិច្ចរបស់លោក មិនបានចាប់ខ្លួនតាឈ្មោះ ម៉ា រី នេះទេ គ្រាន់តែហៅមកសាកសួរប៉ុណ្ណោះ រួចដោះលែងវិញ។ លោកនិយាយថា៖ «យើងអញ្ជើញគាត់ គឺគាត់កំពុងនៅផ្ទះប្រពន្ធចុងទី២របស់គាត់។ ឃាត់ខ្លួនទាល់តែមានបទល្មើស»។ ដោយបដិសេធផ្តល់ព័ត៌មានលម្អិតលើការសាកសួរ លោកស្នងការបានថ្លែងថា ឈ្មោះ ម៉ា រី ត្រូវបានឲ្យត្រឡប់ទៅផ្ទះវិញក្រោយពេលសាកសួរចប់។
លោក ជ័យ រិទ្ធី មេប៉ុស្តិ៍ ឃុំព្រែកក្រឹស បានឲ្យដឹងថា ឈ្មោះ ម៉ារី មិនសូវចូលមករស់នៅក្នុងភូមិឃុំនេះទេ យូរៗមកម្តង។ លោក រិទ្ធីនិយាយថា៖ «គាត់មិនមែនលោកសង្ឃទេ តែពេលខ្លះនៅផ្ទះ គាត់យកស្បង់ជីពរមកគ្រងធ្វើលោកសង្ឃ។ ពេលគាត់ទៅណាឆ្ងាយ គាត់ដាក់ស្បង់ជីពរទៅតាម។ ផ្ទះគាត់នៅជិតវត្ត។ ពេលគាត់មកដល់ផ្ទះគាត់សំងំនៅតែផ្ទះ សូម្បីអ្នកជិតខាងក៏គាត់មិនដែលទៅជិតផង»។
លោក តូច សុវណ្ណ អធិការស្រុកដំណាក់ចង្អើរ ខេត្តកែប បានឲ្យដឹងដែរថា តាឈ្មោះ ម៉ារី នេះ ជាពលរដ្ឋរស់នៅក្នុងភូមិអូរដូង ឃុំពងទឹក ស្រុកដំណាក់ចង្អើរ ខេត្ដកែប។ គាត់មានប្រពន្ធ និងកូនចំនួន ៥នាក់។ គាត់ធ្លាប់បានបួសពីរដង ហើយចុងក្រោយទើបតែបានសឹកកាលពីកន្លះខែមុន។
លោកបានបញ្ជាក់ដែរថា តា ម៉ារី ក៏មានប្រពន្ធនៅស្រុកដងទង់ផងដែរ ហើយកាលពីគណបក្សសង្គ្រោះជាតិមិនទាន់រំលាយ គាត់គឺជាសកម្មជនសកម្មម្នាក់ ប៉ុន្តែមិនបានឈរជាបេក្ខជនអ្វីទេ៕
