ភ្នំពេញៈ អតីតប្រធានគណបក្សប្រឆាំងលោក សម រង្ស៊ី កាលពីម្សិលមិញ ត្រូវបានសាលាដំបូងរាជធានីភ្នំពេញចេញដីកាកោះថ្មីមួយឲ្យបំភ្លឺទាក់ទងនឹងសំណុំរឿងចុះកិច្ចព្រមព្រៀងជាមួយឈ្មោះ កុក ស កាត់ដីឲ្យជនជាតិម៉ុងតាញ៉ា ជាទង្វើដែលរដ្ឋាភិបាលចាត់ទុកថាជាអំពើក្បត់ជាតិ ប៉ុន្តែមេធាវីម្នាក់បានសម្ដែងការងឿងឆ្ងល់ទៅលើចំណុចមួយចំនួន ខណៈដែលលោក សម រង្ស៊ី គ្មានអំណាចក្នុងរដ្ឋដើម្បីសម្រេចកិច្ចការនេះ។
យោងតាមដីកាកោះនៃសំណុំរឿងព្រហ្មទណ្ឌលេខ ១៥៧៤ ចុះហត្ថលេខាដោយព្រះរាជអាជ្ញារងលោក សៀង សុខ ដែលជាតំណាងអយ្យការអមសាលាដំបូងរាជធានីភ្នំពេញកាលពីម្សិលមិញបានកំណត់ឲ្យលោក សម រង្ស៊ី ដែលកំពុងហ៊ុមព័ទ្ធដោយបណ្ដឹង និងទោសជាប់ខ្លួនចូលបំភ្លឺនៅថ្ងៃទី ៧ ខែឧសភា ឆ្នាំ ២០១៨ វេលាម៉ោង ៩ ព្រឹកនៅបន្ទប់ (ឋ) ជាន់ទី ២ នៃសាលាដំបូងរាជធានីភ្នំពេញ។
ដីកាដដែលនេះបានតម្រូវឲ្យលោក សម រង្ស៊ី បំភ្លឺពីដំណើររឿងការចុះកិច្ចព្រមព្រៀងជាមួយឈ្មោះ កុក ស ដែលបានធ្វើឡើងកាលពីថ្ងៃទី ១៤ ខែមេសាឆ្នាំ ២០១៣ នៅសហរដ្ឋអាមេរិកពាក់ព័ន្ធនឹងការកាត់ដី ៤ ខេត្តទៅឲ្យជាតិដើមភាគតិចដេហ្គា (ម៉ុងតាញ៉ា) និងឲ្យសាមីខ្លួនយកលិខិតពាក់ព័ន្ធនឹងរឿងនេះមកជាមួយផង ប្រសិនបើមាន។
ក្រោយបានដីកានេះមន្ត្រីនគរបាលមូលដ្ឋានយកទៅបិទនៅរបងផ្ទះលោក សម រង្ស៊ី លេខ ៥៧៦ ក្នុងសង្កាត់ចាក់អង្រែលើ ខណ្ឌមានជ័យ ជាអតីតទីស្នាក់ការគណបក្សសង្គ្រោះជាតិដែលទើបត្រូវបានតុលាការសម្រេចរឹបអូសជាបណ្ដោះអាសន្នដើម្បីទូទាត់សំណងដល់នាយករដ្ឋមន្ត្រី និងប្រធានរដ្ឋសភា។
នៅពេលនាំយកដីកាទៅនេះនគរបាលបានជួបបុរស ៨ នាក់នៅទីនោះ និងបានអានដីកាឲ្យស្ដាប់ ប៉ុន្តែពួកគេបានបដិសេធមិនព្រមទទួលទេ។ នេះបើតាមចំណារលើលិខិតមួយរបស់សមត្ថកិច្ចកាលពីម្សិលមិញ។
ការចេញដីកានេះបានធ្វើឡើងបន្ទាប់ពីក្រសួងមហាផ្ទៃបានផ្ញើរបាយការណ៍សំយោគទៅជូនសាលាដំបូងកាលពីសប្ដាហ៍មុនតាមការជំរុញឲ្យសិក្សាដោយលោកនាយករដ្ឋមន្ត្រីដែលលោកចាត់ទុកថា ជាករណីមិនអាចអត់ឱនឲ្យបាន។
លោក សម រង្ស៊ី មិនអាចទាក់ទងសុំអត្ថាធិប្បាយជុំវិញករណីនេះទេ កាលពីម្សិលមិញ។ ប៉ុន្តែយ៉ាងណាក្ដីបន្ទាប់ពីករណីនេះត្រូវបានទម្លាយលោកធ្លាប់បានអះអាងថា ឈ្មោះ កុក ស ជាខែ្មរ ខណៈមានអ្នកខ្លះថាគាត់មិនចេះនិយាយខ្មែរផងនោះ។
ទាក់ទងករណីនេះលោកមេធាវី ជូង ជូងី ដែលធ្លាប់ការពារក្ដីឲ្យមន្ត្រីគណបក្សប្រឆាំងមិនបានសម្ដែងការយល់ឃើញថាយ៉ាងណានោះទេ កាលពីម្សិលមិញ ខណៈលោកមិនយល់ពីបណ្ដឹងរបស់រដ្ឋាភិបាល តែលោកមានចម្ងល់មួយចំនួនទាក់ទងនឹងសំណុំរឿងនេះ។
លោកបានថ្លែងថា៖ «ខ្ញុំមិនដឹងថា ឯកសារនោះពិតឬយ៉ាងណានោះទេ ដូច្នេះខ្ញុំគ្មាន Comment អីទេ។ ខ្ញុំមិនយល់យ៉ាងណាពីបណ្ដឹងរបស់រដ្ឋាភិបាលលើករណីនេះទេ តែខ្ញុំមានចម្ងល់ចំនួន ៣ ទី ១- លោក សម រង្ស៊ី អត់មានអំណាចក្នុងរដ្ឋទាល់តែសោះ ធ្វើម៉េចគាត់កាត់ដី ៤ ខេត្តឲ្យវៀតណាមបាន។ ទី ២- បើគាត់ពិតជាបានធ្វើមែន តើគាត់ទទួលបានប្រយោជន៍អ្វីពីកិច្ចព្រមព្រៀងនោះ និងទី ៣- តើប្រទេសណាដាក់សម្ពាធឲ្យគាត់ធ្វើដូច្នេះ ព្រោះជាទូទៅបើប្រមុខរដ្ឋនៃប្រទេសមួយសម្រេចកាត់ដីរបស់ខ្លួនឲ្យទៅប្រទេសមួយទៀត វាលុះត្រាតែមានសម្ពាធពីប្រទេសមួយទៀត ហើយនៅក្នុងផលប្រយោជន៍អ្វី?»៕