.jpg)
អ្នកស្រី សំ សុខា នៅសាលាដំបូងខេត្តកំពង់ស្ពឺ កាលពីពេលកន្លងមក។ រូបថត សហការី
កំពង់ស្ពឺៈ តុលាការខេត្តកំពង់ស្ពឺ កាលពីព្រឹកថ្ងៃទី ២២ ខែមីនាម្សិលមិញ បានប្រកាសសាលក្រមផ្តន្ទាទោសអ្នកស្រី សំ សុខា សាជាថ្មី ដោយដាក់ពន្ធនាគារកំណត់ ២ ឆ្នាំដដែល ពាក់ព័ន្ធនឹងការយកស្បែកជើងគប់ស្លាកគណបក្សប្រជាជនកម្ពុជា នៅខេត្តព្រះសីហនុ កាលពីខែមេសា ឆ្នាំ ២០១៧។
អ្នកស្រី សំ រចនា ត្រូវជាប្អូនស្រីរបស់អ្នកស្រីសំ សុខា បានថ្លែងថា តុលាការ បានកាត់ទោសបងស្រីរបស់អ្នកស្រី ឲ្យជាប់ពន្ធនាគារ ២ ឆ្នាំដដែល ក្រោយពេលបានបើកសវនាការកាលពីថ្ងៃទី ១៥ ខែមីនា សប្តាហ៍មុន។
អ្នកស្រីថ្លែងថា ការកំណត់ដាក់២ឆ្នាំនេះ«ជារយៈពេលយូរ ដោយសារតែគាត់ បានសារភាពទទួលកំហុស និងបានស្នើសុំឲ្យតុលាការជួយបន្ធូរបន្ថយទោស»។
អ្នកស្រី សំ សុខា បានរត់គេចខ្លួនទៅប្រទេសថៃមួយរយៈ ក្រោយពេលតុលាករខេត្តកំពង់ស្ពឺ បានចេញដីកាចាប់ខ្លួន ពាក់ព័ន្ធនឹងបទចោទ ២បទល្មើស គឺបទជេរប្រមាថ និងបទញុះញង់ ឲ្យមានការរើសអើង។ បទចោទនេះ កើតឡើងនៅពេលអ្នកស្រី បានយកស្បែកជើងគប់ស្លាកគណបក្សប្រជាជនកម្ពុជា កាលពីថ្ងៃទី ១ ខែមេសា ឆ្នាំ ២០១៧ នៅខេត្តព្រះសីហនុ។
កាលពីថ្ងៃទី ២៥ ខែមករា ស្ត្រី សំ សុខា ត្រូវតុលាការខេត្តកំពង់ស្ពឺកាត់ទោសកំបាំងមុខ និងចេញសាលក្រមផ្តន្ទាទោសដាក់ពន្ធនាគារ ២ ឆ្នាំ។
លោក ខុន ខូច មន្ត្រីផ្នែកអង្កេតនៃអង្គការសិទ្ធិមនុស្សលីកាដូខេត្តកំពងស្ពឺ បាននិយាយថា ក្រៅពីផ្តន្ទាទោសដាក់ពន្ធនាគារ២ឆ្នាំ អ្នកស្រី សំ សុខា ក៏ត្រូវបានតុលាការ តម្រូវឲ្យបង់ប្រាក់ពិន័យចំនួន ៥ លានរៀលផងដែរ។
លោក អ៊ុន ច័ន្ទថុល មេធាវីការពារអ្នកស្រី សំ សុខា បានថ្លែងថា ការជម្រះឡើងវិញនេះ ដោយសារតែកាលពីខែមករា តុលាការ បានកាត់ទោសកូនក្តីរបស់លោក ដោយកំបាំងមុខ ហេតុដូច្នេះ កូនក្តីរបស់លោក បានប្តឹងទាស់នឹងការសម្រេចនោះ ហើយបានស្នើឲ្យមានការកាត់ក្តីឡើងវិញ។
លោកបញ្ជាក់ថា កាលពីថ្ងៃទី ១៥ មីនា មានតែការសួរទៅលើកូនរបស់អ្នកស្រី សំ សុខា ដែលជាអ្នកកាន់ទូរស័ព្ទថតសកម្មភាពគប់ស្បែកជើង។ លោកនិយាយថា៖ «ទីមួយគាត់ស្នើសុំបន្ធូរបន្ថយទោស ហើយគាត់បានទទួលសារភាព និងលើកលែងទោស ...»។
លោក អ៊ូ ផាត អ្នកនាំពាក្យសាលាដំបូងខេត្តកំពង់ស្ពឺ និងជាព្រះរាជអាជ្ញា ក្នុងសំណុំរឿងនេះ មិនអាចទាក់ទងសុំការបញ្ជាក់បានទេ កាលពីម្សិលមិញ៕
