Search form

Login - Register | FOLLOW US ON

Logo of Phnom Penh Post newspaper Phnom Penh Post - តុលាការ​ផ្តន្ទាទោស​សកម្មជន​អារ៉ែង​ចំនួន​ ១ ​ឆ្នាំ​តែ​ព្យួរ​ទោស

លោក វ៉ែន វ៉ន (ពកូន​ស្រី) សកម្មជន​អារ៉ែង​ដែល​ត្រូវ​បាន​ដោះលែង​កាលពី​ម្សិលមិញ​។
លោក វ៉ែន វ៉ន (ពកូន​ស្រី) សកម្មជន​អារ៉ែង​ដែល​ត្រូវ​បាន​ដោះលែង​កាលពី​ម្សិលមិញ​។ រូបថត LICADHO

តុលាការ​ផ្តន្ទាទោស​សកម្មជន​អារ៉ែង​ចំនួន​ ១ ​ឆ្នាំ​តែ​ព្យួរ​ទោស

កោះកុងៈ សាលា​​ដំបូង​​ខេត្ត​កោះកុង​កាលពី​ថ្ងៃ​ម្សិលមិញ​បាន​ប្រកាស​សាលក្រម​លើ​សកម្មជន​តំបន់​អារ៉ែង លោក វ៉ែន វ៉ន ដោយ​ផ្តន្ទាទោស​ដាក់​ពន្ធនាគារ​ ១ ​ឆ្នាំ​ពាក់ព័ន្ធ​នឹង​​ការ​​ប្រមូលផល​ព្រៃឈើ​ដោយ​​គ្មាន​ច្បាប់​អនុញ្ញាត​ប៉ុន្តែ​ទោស​​នោះ​ត្រូវ​​បាន​ព្យួរ​ហើយ​លោក​ត្រូវ​បាន​ដោះលែង​ឲ្យ​មាន​សេរីភាព​នៅ​រសៀល​ថ្ងៃ​ដដែល​។

តំណាង​​សហគមន៍​អារ៉ែង និង​ជា​ក្រុម​ប្រឹក្សា​ឃុំ​ជំនាប់​នៃ​គណបក្ស​ប្រជាជន​កម្ពុជា​លោក វ៉ែន វ៉ន ត្រូវ​បាន​ចាប់​ខ្លួន​បញ្ជូន​ទៅ​ពន្ធនាគារ​កាលពី​ដើម​ខែ​តុលា​ឆ្នាំ​​ ២០១៥ ក្រោយពី​សាលា​ដំបូង​បាន​សាកសួរ និង​ចោទប្រកាន់ ២ ​បទល្មើស​គឺ​បទ «ប្រមូលផល​អនុផល​ព្រៃឈើ​​ដោយ​គ្មាន​លិខិត​​អនុញ្ញាត» និង​បទ «លុប​បំបាត់​វត្ថុតាង» ប្រព្រឹត្ត​នៅ​ឃុំ​ជំនាប់ ស្រុក​ថ្មបាំង ខេត្ត​កោះកុង។ លោក វ៉ែន វ៉ន ត្រូវ​បាន​រដ្ឋបាល​ព្រៃឈើ​ជា​អ្នក​ដាក់​ពាក្យ​បណ្តឹង​។

ព្រះរាជអាជ្ញា​រង​ខេត្ត​កោះកុង​លោក អ៊ីវ ត្រាយ ដែល​កាន់​សំណុំ​រឿង​នេះ​ឲ្យ​ដឹង​ថា​ចៅក្រម​ជំនុំជម្រះ អាំង ចិន្តា បាន​សម្រេច​រក្សា​បទចោទ​លោក​ វ៉ែន វ៉ន មួយ​ករណី​ពី​បទ​ប្រមូលផល​អនុផល​ព្រៃឈើ​​ដោយ​គ្មាន​ការ​​អនុញ្ញាត​ដោយ​ផ្តន្ទាទោស​ជាប់​ពន្ធនាគារ​ ១ ឆ្នាំ​ប៉ុន្តែ​ទោស​នោះ​ត្រូវ​ព្យួរ​​ទាំង​ស្រុង​។

លោក​បន្ត​ថា «​បទល្មើស​មួយ​ទៀត​រឿង​លុប​បំបាត់​ភ័ស្តុតាង​នោះ​ចៅក្រម​សម្រេច​​ឲ្យ​រួច​​ផុត​ពី​​​ការ​​​​ចោទ​​​ប្រកាន់​ដោយសារ​ពុំ​​មាន​​ធាតុ​ផ្សំ​គ្រប់គ្រាន់»។

លោកស្រី អ៊ិត មធុរ៉ា មេធាវី​ការពារ​ក្តី​ឲ្យ​លោក វ៉ែន វ៉ន បាន​ថ្លែង​ថា៖ «នេះ​ជា​ដាក់​ទោស​មួយ​ក្នុង​ស្ថាន​មួយ​ស្រាល​បំផុត​ដោយសារ​ដាក់​ទោស​​ក្នុង​កម្រិត​​ទាប​បំផុត​ហើយ​​ដាក់​ទោស​​ជា​ការ​​ព្យួរ​ទោស​ទៀត​អ៊ីចឹង​គាត់​អាច​​មាន​សេរីភាព​ចេញ​មក​ខាង​ក្រៅ​ដើម្បី​ប្រកប​ការងារ​រកស៊ី​ចិញ្ចឹម​គ្រួសារ​ព្រោះ​​តែ​ក្រុម​​គ្រួសារ​ពឹង​ផ្អែក​លើ​ការ​រក​ចំណូល​​របស់​គាត់​ម្នាក់​គត់»។

លោក វ៉ែន វ៉ន សកម្មជន​ការពារ​ធនធាន​ធម្មជាតិ​នៅ​តំបន់​អារ៉ែង​ដែល​បាន​ចេញ​ពី​ពន្ធនាគារ​កាលពី​ម៉ោង​ ៤ ​រសៀល​ថ្ងៃ​ម្សិលមិញ​បាន​ឲ្យ​ដឹង​ថា​ការ​សម្រេច​របស់​តុលាការ​នេះ​នៅ​មិន​ទាន់​មាន​ភាព​យុត្តិធម៌​ទាំង​ស្រុង​ទេ​ដែល​ករណី​នេះ​លោក​កំពុង​​ពិចារណា​លើ​ការ​ប្តឹង​ឧទ្ធរណ៍​បន្ត​ទៀត​ដើម្បី​ប្រឆាំង​នឹង​សាលក្រម​នេះ​។

លោក​ថា៖ «ការ​​ចោទប្រកាន់​នេះ​មិន​ត្រឹមត្រូវ​ទេ​ព្រោះ​ពួកខ្ញុំ​ជា​ជនជាតិ​ដើម​ភាគ​​តិច​រស់នៅ​ទី​នោះ​ហើយ​ច្បាប់​បាន​ចែង​​ដែរ​ថា​យើង​មាន​សិទ្ធិ​ដកហូត​អនុផល​ព្រៃឈើ​​សម្រាប់​ប្រយោជន៍​សហគមន៍​ដោយ​មិន​ចាំបាច់​សុំ​ការ​អនុញ្ញាត​»។

លោក​បាន​ចាត់​ទុកការ​ចោទប្រកាន់​នេះ​ថា​ជា​ការ​គំរាមកំហែង​ដោយសារ​លោក​ធ្លាប់​បាន​​ចូលរួម​តស៊ូ​មតិ​ជាមួយ​សហគមន៍​ពាក់ព័ន្ធ​នឹង​ផលប៉ះពាល់​នៃ​គម្រោង​​សាងសង់​ទំនប់​វារីអគ្គិសនី​ជាយ​អារ៉ែង។

ទោះ​យ៉ាង​ណា ​លោក​នៅ​តែ​បន្ត​សកម្មភាព​តស៊ូ​​មតិ​បន្ត​ទៀត​ពាក់ព័ន្ធ​នឹង​ការ​ទាមទារ​ចុះ​បញ្ជី​ដី​សហគមន៍ និង​ការ​ចុះ​បញ្ជី​​ជនជាតិ​ដើម​ភាគតិច​ព្រោះ​សកម្មភាព​ទាំងនោះ​គឺ​ធ្វើ​ដើម្បី​ប្រយោជន៍​សហគមន៍​ពុំ​មាន​ពាក់ព័ន្ធ​នឹង​នយោបាយ​ទេ។

អ្នក​សម្រប​សម្រួល​អង្គការ​លីកាដូ​ខេត្ត​កោះកុង​លោក អ៊ិន គង់ជិត បាន​សាទរ​ចំពោះ​ការ​​សម្រេច​របស់​តុលាការ​ដែល​បាន​សម្រាល​ទោស​ដល់​សកម្មជន​តំបន់​អារ៉ែង​រូប​នោះ​ប៉ុន្តែ​លោក​ថា​តុលាការ​គួរតែ​ទម្លាក់​ចោល​ការ​ចោទប្រកាន់​ទៅ​លើ​រូបគាត់​ទាំងអស់​ព្រោះ​គាត់​ពុំ​បាន​ប្រព្រឹត្ត​​ខុស​ដូច​ការ​ចោទប្រកាន់​ឡើយ។

លោក​ថា៖ «លោក វ៉ែន វ៉ន ទិញ​ឈើ​ហ្នឹង​យក​មក​ធ្វើ​រោង​សហគមន៍ ដើម្បី​ជា​ប្រយោជន៍​សហគមន៍​ និង​ឲ្យ​កូន​សិស្ស​រៀន​ភាសា​អង់គ្លេស​តែ​ប៉ុណ្ណោះ​អ៊ីចឹង​គាត់​អត់​បាន​ប្រព្រឹត្ត​ទេ​អ្វី​ដែល​នៅ​ពី​ក្រោយ​ការ​ចោទប្រកាន់​នេះ​គឺ​ដោយសារ​គាត់​ធ្វើការ​ជាមួយ​លោក​អាឡិច [ស្ថាបនិក​អង្គការ​មាតា​ធម្មជាតិ] ​នា​ពេល​កន្លង​មក​ដែល​បាន​ដឹកនាំ​សហគមន៍​ដើម្បី​ធ្វើការ​តស៊ូ​មតិ​តវ៉ា​មិន​ឲ្យ​មាន​ទំនប់​វារីអគ្គិសនី​នៅ​តំបន់​ជាយ​អារ៉ែង»៕

0

Comments

Please, login or register to post a comment