ព្រះវិហារៈ តុលាការខេត្តព្រះវិហារកាលពីរសៀលថ្ងៃសៅរ៍បានបញ្ជាឲ្យឃុំខ្លួនបុរសម្នាក់ពាក់ព័ន្ធករណីលួចកាប់បំផ្លាញព្រៃក្នុងតំបន់អភិរក្សប្រាសាទព្រះវិហារ។ នេះបើតាមការប្រាប់ឲ្យដឹងពីលោក អ៊ា សុខា ប្រធានមន្ទីរបរិស្ថានខេត្តព្រះវិហារកាលពីម្សិលមិញ។
លោក សុខា បានថ្លែងបន្តថាបុរសសង្ស័យក្នុងអំពើកាប់បំផ្លាញព្រៃឈើខាងលើឈ្មោះ ធី សុភា អាយុ ២៧ ឆ្នាំជាជនចំណាកស្រុកមកពីខេត្តត្បូងឃុំ។ ជនសង្ស័យត្រូវបានកម្លាំងសន្តិសុខការពារតំបន់ប្រាសាទព្រះវិហារ និង ក្រុមមន្ត្រីឧទ្យានុភិរក្សនៃមន្ទីរបរិស្ថានខេត្តព្រះវិហារចាប់ឃាត់ខ្លួនកាលពីវេលាម៉ោង ២:០០ ព្រឹកថ្ងៃទី ២៧ ខែមករាឆ្នាំ ២០១៨ ខណៈកំពុងធ្វើសកម្មភាពលួចកាប់ផ្ដួលរំលំដើមឈើប្រភេទធ្នង់ នាងនួន និង បេង នៅចំណុចផ្នែកខាងក្រោមជាប់ជណ្ដើរបុរាណផ្នែកខាងជើងនៃប្រាសាទព្រះវិហារ។
លោក សុខា បានបញ្ជាក់ថា៖ «ជនសង្ស័យត្រូវបានក្រុមសមត្ថកិច្ចយើង បង្ក្រាបចាប់បាននៅនឹងកន្លែងក្នុងអំឡុងពេលកំពុងប្រព្រឹត្តបទល្មើសជាក់ស្ដែង និងបានរឹបអូសរណារយន្តចំនួនមួយគ្រឿងព្រមទាំងសម្ភារបម្រើឲ្យបទល្មើសមួយចំនួន។ នៅកន្លែងកើតហេតុមានដើមឈើប្រភេទ ធ្នង់ នាងនួន និង បេង សរុបចំនួន ១៥ ដើមត្រូវបានផ្ដួលរំលំ និង ត្រូវបានអារច្រៀកជាក្ដារបន្ទះបានមួយចំនួន»។
យោងតាមរបាយការណ៍សួរចម្លើយជនសង្ស័យបាននិយាយថាខ្លួនបានមកស្នាក់នៅក្នុងឃុំស្រឯម ស្រុកជាំក្សាន្ត ខេត្តព្រះវិហារអស់រយៈពេលជាងមួយខែមកហើយដើម្បីលួចកាប់ឈើក្នុងតំបន់អភិរក្សប្រាសាទព្រះវិហារនេះ។
យ៉ាងណាក៏ដោយជនសង្ស័យអះអាងថាគ្មាននរណាម្នាក់នៅពីក្រោយករណីនេះទេគឺខ្លួនមកលួចកាប់ដើម្បីយកទៅលក់បន្តយកប្រាក់ផ្គត់ផ្គង់ជីវភាពគ្រួសាររបស់ខ្លួនប៉ុណ្ណោះ។
លោក សុខា បានបន្តថាទោះជាមានការឆ្លើយដោះសារបែបនេះក្ដីជនសង្ស័យត្រូវបានក្រុមមន្ត្រីឧទ្យានុរក្សនៃមន្ទីរបរិស្ថានប្រចាំតំបន់ប្រាសាទព្រះវិហារ សម្រេចកសាងសំណុំរឿងបញ្ជូនទៅតុលាការខេត្តព្រះវិហារភ្លាមៗនៅរសៀលថ្ងៃសៅរិ៍ហើយនៅល្ងាចថ្ងៃដដែលតុលាការក៏បានសម្រេចចេញបញ្ជាឲ្យឃុំខ្លួនជនសង្ស័យជាបណ្ដោះអាសន្ននៅក្នុងពន្ធនាគារខេត្តដោយចោទប្រកាន់ពីបទ «កាប់បំផ្លាញព្រៃឈើដោយខុសច្បាប់ និងមានស្ថានទម្ងន់ទោស» ក្នុងតំបន់អភិរក្សប្រាសាទព្រះវិហារ។
យោងតាមច្បាប់ជនសង្ស័យអាចនឹងជាប់ទោសពី ២ ទៅ ៥ ឆ្នាំប្រសិនបើតុលាការរកឃើញនូវទោសកំហុសរបស់គេតាមការចោទប្រកាន់៕