Search form

Login - Register | FOLLOW US ON

Logo of Phnom Penh Post newspaper Phnom Penh Post - តុលាការ​សម្រេច​រំលាយ CNRP ​និង​​ហាម​មនុស្ស​ ១១៨ ​រូប​មិន​ឲ្យ​ធ្វើ​នយោបាយ

Content image - Phnom Penh Post
កម្លាំង​សមត្ថកិច្ច ឈរ​តម្រៀប​គ្នា នៅ​អែប​មាត់​ច្រកចូល​តុលាការ​កំពូល អំឡុង​ពេល​បើក​សវនាការ​កាលពី​ម្សិលមិញ​។ ផា លីណា

តុលាការ​សម្រេច​រំលាយ CNRP ​និង​​ហាម​មនុស្ស​ ១១៨ ​រូប​មិន​ឲ្យ​ធ្វើ​នយោបាយ

ភ្នំពេញ: បន្ទាប់ពី​សវនាការ​បាន​អូសបន្លាយ​ពេលវេលា​ពេញ​មួយ​ថ្ងៃ​កាលពី​ម្សិលមិញ​តុលាការ​កំពូល​បាន​សម្រេច​​រំលាយ​គណបក្ស​សង្គ្រោះ​ជាតិ​ និង​ហាម​ធ្វើ​សកម្មភាព​នយោបាយ​ ៥ ​ឆ្នាំ​ចំពោះ​ថ្នាក់ដឹកនាំ​គណបក្ស​នេះ​ចំនួន​ ១១៨ ​នាក់ ខណៈ​ដែល​កងកម្លាំង​ប្រដាប់​អាវុធ​រាយ​រនាំង​ដែក​បិទ​ជិតឈឹង​ជុំវិញ​បរិវេណ​តុលាការ​ដោយ​បាន​អះអាង​ថា​ដើម្បី​​ការពារ​សន្តិសុខ​ដល់​ដំណើរការ​សវនាការ និង​ការ​រំខាន​ណា​មួយ​ពី​សកម្មជន​របស់​គណបក្ស​ប្រឆាំង​ដ៏ធំ​នេះ​។

ក្នុង​សន្និសីទ​កាសែត​ក្រោយ​បញ្ចប់​សវនាការ​លោក គី តិច មេធាវី​របស់​ក្រសួង​មហាផ្ទៃ​បាន​បញ្ជាក់​ថា​សវនាការ​នេះ​បាន​ធ្វើ​ពី​ម៉ោង​ ៨ ​ព្រឹក​ដល់​ ១២ និង​ ៣០ ​នាទី​សម្រាក និង​ម៉ោង​ ២ ​រហូត​ម៉ោង​ ៥ និង​ ២០ ​នាទី​ដោយ​បាន​ប្រកាស​ទទួល​ស្គាល់​បណ្តឹង​ក្រសួង​មហាផ្ទៃ និង​រំលាយ​គណបក្ស​សង្គ្រោះ​ជាតិ​ចាប់ពី​ថ្ងៃ​នេះ​តទៅ និង​ហាម​ថ្នាក់ដឹកនាំ​គណបក្ស​ ១១៨ ​រូប​មិន​ឲ្យ​ធ្វើ​នយោបាយ​ផ្សេងៗ​ចាប់ពី​ប្រកាស​សាលដីកា​នេះ​តទៅ​។ ប្រកាស​ជា​សាធារណៈ​ និង​បិទ​ផ្លូវ​តវ៉ា​។ នៅ​ពេល​អនុវត្ត​រចនាសម្ព័ន្ធ​របស់​គណបក្ស​សង្គ្រោះ​ជាតិ​ត្រូវ​រលាយ​ទាំងអស់​»​។

លោក ឌិត មន្ទី ប្រធាន​តុលាការ​កំពូល និង​ជា​ប្រធាន​ក្រុមប្រឹក្សា​ជំនុំជម្រះ បន្ទាប់ពី​បាន​បើក​សវនាការ​ជំនុំជម្រះ​ពេញ​មួយ​ថ្ងៃ​ដោយ​គ្មាន​មេធាវី​ការពារ​ក្តី​តំណាង​ឲ្យ​គណបក្ស​សង្គ្រោះ​ជាតិ​នៅ​ម៉ោង ៥ ល្ងាច​ម្សិលមិញ​លោក​បាន​អាន​សាលដីកា​របស់​តុលាការ​កំពូល​ដែល​សម្រេច​រំលាយ​គណបក្ស​សង្គ្រោះ​ជាតិ​។

លោក​ មន្ទី ថ្លែង​ថា​៖ «​ក្រោយពី​បាន​ស្តាប់​តំណាង​មហាអយ្យការ ក្រោយ​ពី​បាន​ស្តាប់​ក្រុម​មេធាវី​ក្រសួង​មហាផ្ទៃ និង​បាន​ស្តាប់​ការ​ពិភាក្សា​ចប់​តុលាការ​កំពូល​យល់​ឃើញ​ថា​បណ្តឹង​របស់​ក្រសួង​មហាផ្ទៃ​កាលពី​ថ្ងៃ​ទី​ ៦ ខែ​តុលា​ឆ្នាំ ២០១៧ ​ធ្វើ​ឡើង​ត្រឹមត្រូវ​តាម​ច្បាប់​»​។

លោក​ ឌិត មន្ទី បាន​លើក​ឡើង​ថា​មន្ត្រី​អាជ្ញាសាលា​របស់​តុលាការ​កំពូល​បាន​បង្គាប់​ឲ្យ​គណបក្ស​សង្គ្រោះ​ជាតិ​ធ្វើ​សារ​ណា​តប​ទៅ​នឹង​បណ្តឹង​របស់​ក្រសួង​មហាផ្ទៃ ប៉ុន្តែ​គណបក្ស​នេះ​បែរ​ជា​ស្ងៀមស្ងាត់​មិន​មាន​ការ​ឆ្លើយតប​ត្រឡប់​វិញ ដោយ​គ្មាន​ការ​បញ្ជាក់​ហេតុផល​ដែល​នេះ​ជា​ការ​ «​សារភាព​ចំពោះ​អង្គហេតុ​»​។ «​ភាព​ស្ងៀមស្ងាត់​របស់​សង្គ្រោះ​ជាតិ​គឺជា​ការ​សារភាព​ទទួល​ស្គាល់​ និង​ជា​កំហុស​ធ្ងន់ធ្ងរ​»​។

លោក ឌិត មន្ទី ដែល​ក៏​ជា​សមាជិក​គណៈកម្មាធិការ​កណ្តាល​របស់​គណបក្ស​ប្រជាជន​កម្ពុជា​ដែរ​នោះ​បាន​អាន​សាលដីកា​បន្ត​ទៀត​ថា​៖ «​ហេតុ​នេះ​ (​តុលាការ​កំពូល​) ​សម្រេច​ទទួល​បណ្តឹង​របស់​ក្រសួង​មហាផ្ទៃ និង​សម្រេច​រំលាយ​គណបក្ស​សង្គ្រោះ​ជាតិ និង​ហាម​មន្ត្រី​គណបក្ស​ចំនួន ១១៨ នាក់​មិន​ឲ្យ​ធ្វើ​នយោបាយ​រយៈពេល ៥ ឆ្នាំ​គិត​ចាប់ពី​កាលបរិច្ឆេទ​នៃ​សវនាការ​ថ្ងៃ​ទី​ ១៦ ខែ​វិច្ឆិកា ឆ្នាំ ២០១៧ តទៅ​»​។

លោកស្រី ជា លាង អគ្គព្រះរាជអាជ្ញា​បាន​ថ្លែង​ថា​៖ «​ព្រះរាជអាជ្ញា​យល់​ឃើញ​ថា​សកម្មភាព​លោក កឹម សុខា សម រង្សី ​និង​មេដឹកនាំ​គណបក្ស​មួយ​ចំនួន​ទៀត​ចាប់​តាំង​ពី​ឆ្នាំ​ ១៩៩៣ ​ដល់​ឆ្នាំ​ ២០១៧ គឺ​បាន​ធ្វើ​សកម្មភាព​ដោយ​ផ្ទុយ​ទៅ​នឹង​ច្បាប់​ដែល​ការ​ថ្លែង​របស់​លោកស្រី​ព្រះរាជអាជ្ញា​គឺ​សំអាង​លើ​ភ័ស្តុតាង ផ្ដល់​ដោយ​ក្រុម​មេធាវី​​របស់​ក្រសួង​មហាផ្ទៃ​អំពី​សកម្មភាព​ដែល​ត្រូវ​បាន​ចោទ​ថា​ក្បត់​ជាតិ​ដែល​មាន​ចេតនា​ធ្វើ​បដិវត្តន៍​ពណ៌ ហើយ​បណ្ដឹង​ដែល​ដាក់​ដោយ​ក្រសួង​មហាផ្ទៃ​គឺ​ត្រឹមត្រូវ​តាម​នីតិវិធី​ច្បាប់​។

ប្រមាណ​ជា​ជាង​មួយ​ម៉ោង​ក្រោយ​ពី​តុលាការ​សម្រេច​រំលាយ​គណបក្ស​សង្គ្រោះ​ជាតិ​លោក​នាយក​រដ្ឋមន្ត្រី ហ៊ុន សែន បាន​ថ្លែង​តាម​ទូរទស្សន៍​ដោយ​បាន​បញ្ជាក់​ពី​ជំហរ​របស់​រាជរដ្ឋាភិបាល​គាំទ្រ​ការ​សម្រេច​របស់​តុលាការ កំពូល​ក្នុង​ការ​រំលាយ​គណបក្ស​នេះ​ហើយ​បាន​អំពាវនាវ​ដល់​ប្រជាពលរដ្ឋ​កម្ពុជា​ទាំងអស់​ឲ្យ​មាន​ការ​ស្ងប់ស្ងាត់ ដោយ​លើក​ឡើង​ថា​កម្ពុជា​មិនមែន​មាន​តែ​ ២ ​បក្ស​នោះ​ទេ តែ​មាន​បក្ស​រាប់​សិប​។

Content image - Phnom Penh Post
តំណាងរាស្ត្រ​ និង​អ្នក​គាំទ្រ​នៅ​ទីស្នាក់ការ​បក្ស​កាលពី​ម្សិលមិញ​។ រូបថត ហ្វេសប៊ុក

លោក ហ៊ុន សែន ថ្លែង​ថា​៖ «​តុលាការ​កំពូល​បាន​កាត់​សេចក្តី​រំលាយ​គណបក្ស​សង្គ្រោះ​ជាតិ​គ្មាន​ឈ្មោះ​សង្គ្រោះ​ជាតិ​នៅ​កម្ពុជា​ទៀត​ទេ​។

កំហុស​នេះ​ជា​មេដឹកនាំ​តែ​មួយ​។ តែ​នាំ​ទៅ​ដល់​សោកនាដកម្ម​មួយ​គឺ​ការ​រំលាយ​បក្ស​នយោបាយ​មួយ​។ ការ​​រំលាយ​គណបក្ស​ស្រប​តាម​វិធាន​នៃ​​និតិរដ្ឋ​។ ការ​សម្រេច​នេះ​នឹង​បន្ត​រក្សា​គង់វង្ស​នៃ​សន្តិភាព ឯករាជ្យ អធិបតេយ្យ​ជាតិ និង​បន្ត​អភិវឌ្ឍន៍​សេដ្ឋកិច្ច​សង្គម​ប្រកប​ដោយ​សមធម៌​»​។

លោក​ថ្លែង​បន្ត​ថា​៖ «​យើង​បាន​បន្ត​ជាមួយ​គោលនយោបាយ​បង្រួបង្រួម​ជាតិ ផ្សះផ្សារ​ជាតិ និង​ឯកភាព​ជាតិ ដើម្បី​ប្រមូល​សាមគ្គី​ក្នុង​នោះ​គឺ​ធានា​នូវ​ឯករាជ្យ និង​បូរណភាព​ទឹកដី​យើង​នៅ​តែ​បន្ត​ការ​ប្តូរផ្តាច់​នៃ​ដំណើរការ​​លទ្ធិប្រជាធិបតេយ្យ​ផ្តល់​នូវ​ការ​បោះឆ្នោត​ជា​ទៀងទាត់​ទាំង​ថ្នាក់​ជាតិ និង​ថ្នាក់​ក្រោម​ជាតិ​»​។

ជាមួយ​គ្នា​នេះ​លោក​ក៏​បាន​ធ្វើការ​អំពាវនាវ​ផង និង​ព្រមាន​ផង ឲ្យ​ក្រុម​ប្រឹក្សា​គណបក្ស​សង្គ្រោះ​ជាតិ​ទាំងអស់​នៅ​ទូទាំង​ប្រទេស​ចុះ​ចូល​ជាមួយ​គណបក្ស​ប្រជាជន​ឲ្យ​បាន​មុន​ពេល​ជាង​ ១ ​សប្តាហ៍​ដើម្បី​អាច​រក្សា​តំណែង​របស់​ពួកគេ​ឲ្យ​នៅ​ដដែល​តែ​ស្ថិត​នៅ​ក្រោម​ឆត្រ​របស់​គណបក្ស​ប្រជាជន​កម្ពុជា​។

កងកម្លាំង​ប្រដាប់​អាវុធ​យ៉ាង​តិច​ប្រមាណ​ជា ២០០ នាក់​ត្រូវ​បាន​ដាក់​ពង្រាយ​នៅ​តាម​ផ្លូវ​សំខាន់ៗ​នៅ​ជុំវិញ​តុលាការ​កំពូល ខណៈ​ដែល​កងយោធពល​ខេមរភូមិន្ទ​ជាច្រើន​រយ​នាក់ និង​រថយន្ត​ជាច្រើន​គ្រឿង​បំពាក់​ដោយ​កាំភ្លើង​យន្ត​នៅ​បាំង​ខាង​ក្រោយ​តម្រៀប​ជួរ​គ្នា​ត្រៀម​បោះ​ទីតាំង​នៅ​មុខ​ក្រសួង​ការពារ​ជាតិ​កាលពី​ម្សិលមិញ​។

លោក ជួន សុវណ្ណ ស្នងការ​រាជធានី​ភ្នំពេញ​បាន​ថ្លែង​ថា​៖ «​ខ្ញុំ​ធ្វើ​ការងារ​​ជំនាញ​ទេ នៅ​ជុំវិញ​ពិភពលោក​របស់​យើង​ជាពិសេស​បណ្ដា​ប្រទេស​ជឿនលឿន​បញ្ហា​ភេរវកម្ម​គឺជា​បញ្ហា​ចម្បង​ និង​ក្ដៅគគុក​ដោយ​បាន​បទពិសោធ​ពី​បណ្ដា​ប្រទេស​ជឿនលឿន​ទាំងអស់​នោះ​អ៊ីចឹង​បាន​រាជធានី​ភ្នំពេញ​របស់​ខ្ញុំ​សមត្ថកិច្ច​ជំនាញ ខំ​ស្រង់​បទពិសោធ​ទាំងអស់​ដើម្បី​វាយតម្លៃ​សភាពការណ៍​បាន​បង្កើត​តំបន់​សន្តិសុខ​សុវតិ្ថភាព​មួយ​ដើម្បី​ធានា​សុវត្ថិភាព​ដល់​សវនាការ​​តុលាការ​កំពូល ការ​ត្រួតពិនិត្យ​ជា​​ជំនាញ​សន្តិសុខ​។ នេះ​ជា​រឿង​ធម្មតា​មិន​ឲ្យ​មាន​អ្នក​មាន​ចេតនា​ទុច្ចរិត​មក​លើ​សង្គម​ជាតិ​របស់​ខ្ញុំ​ទេ​»​។

Content image - Phnom Penh Post
ក្រុម​មេធាវី​​របស់​ក្រសួង​មហាផ្ទៃ​ធ្វើ​សន្និសីទ​កាសែត​កាលពី​ម្សិលមិញ​។ ផា លីណា

លោក​ សុខ ឥសាន អ្នក​នាំ​ពាក្យ​គណបក្ស​ប្រជាជន​បាន​សរសេរ​សារ​នៅ​ក្នុង​បណ្ដាញ​តេលេក្រាម​របស់​លោក​កាលពី​ម្សិលមិញ​ថា​ថ្ងៃ​ដែល​​តុលាការ​កំពូល​ដំណើរការ​សវនាការ​កាត់ក្តី​រឿង​ក្តី​បក្ស​ប្រឆាំង​នៅ​កម្ពុជា សភាពការណ៍​មាន​លក្ខណៈ​ល្អ​ប្រសើរ​ស្ងប់ស្ងាត់​មាន​សន្តិសុខ សុវត្ថិភាព​ល្អ គ្មាន​បញ្ហា​អ្វី​គួរ​កត់សម្គាល់​ឡើយ​។ សភាពការណ៍​ពិត​នេះ​វា​ផ្ទុយ​ស្រឡះ​ពី​ការ​និយាយ​បំភិត​បំភ័យ​ពី​មជ្ឈដ្ឋាន​ «​អគតិ​មួយ​ចំនួន​»​។

លោក ឥសាន ថ្លែង​បន្ត​ថា​ទោះបី​មាន​ការ​អំពាវនាវ​ឲ្យ​ប្រុងប្រយ័ត្ន​ក៏​នៅ​តែ​មាន​ការ​ស្ងប់ស្ងាត់​ល្អ ជីវភាព​សង្គម​នៅ​តែ​រស់​រវើក​ និង​មមាញឹក​ជាធម្មតា​មាន​ប្រក្រតីភាព​អត់​មាន​ការ​ព្រួយបារម្ភ ការ​ភ័យខ្លាច​អ្វី​ឡើយ​។

លោក​ថ្លែង​ថា​៖ «​ដូច្នេះ​បញ្ហា​នេះ​បង្ហាញ​ថា​ប្រជាពលរដ្ឋ​មាន​ការ​យល់​ដឹង​ច្បាស់​ពី​អត្ថន័យ​នៃ​សន្តិភាព ស្ថិរភាព​នយោបាយ និង​សុខសុវត្ថិភាព​សង្គម​ក្រោម​ការ​ដឹកនាំ​ថែរក្សា​របស់​រាជរដ្ឋាភិបាល​​កម្ពុជា មាន​ការ​ជឿ​ទុក​ចិត្ត មិន​ជឿ​ការ​ញុះញង់​បំភិត​បំភ័យ​ទាល់តែ​សោះ​...» ។

ទោះ​យ៉ាង​ណា​ក៏ដោយ​លោក យឹម សុវណ្ណ អ្នក​នាំពាក្យ​សង្គ្រោះ​ជាតិ​ថ្លែង​ថា​ក្រុម​អ្នក​នយោបាយ​នៃ​គណបក្ស​ប្រឆាំង​នឹង​បន្ត​យុទ្ធវិធី​ និង​ធ្វើការ​យ៉ាង​ជិតស្និទ្ធ​ជាមួយ​សហគមន៍​អន្តរជាតិ​​ដើម្បី​នាំ​លទ្ធិប្រជាធិបតេយ្យ​ត្រឡប់​មក​កម្ពុជា​វិញ​បើ​ទោះបី​ពេល​នេះ​គណបក្ស​សង្គ្រោះ​ជាតិ​ត្រូវ​បាន​គេ​រំលាយ​ចោល​ក្ដី​។

លោក​ សុវណ្ណ បាន​ថ្លែង​ថា​៖ «​នេះ​គឺជា​ទីបញ្ចប់​នៃ​លទ្ធិប្រជាធិបតេយ្យ​នៅ​កម្ពុជា​។ ប៉ុន្តែ​ខ្ញុំ​នៅ​តែ​មាន​សុទិដ្ឋិនិយម​ពួកគេ​អាច​រំលាយ​គណបក្ស​សង្គ្រោះ​ជាតិ​បាន​ ប៉ុន្តែ​ពួកគេ​មិន​អាច​រំលាយ​ឆន្ទៈ​របស់​ប្រជាពលរដ្ឋ​បាន​ទេ​។ ពួកគេ​មិន​អាច​ដក​គណបក្ស​សង្គ្រោះ​ជាតិ​ចេញ​ពី​ចិត្ត​របស់​​ប្រជាពលរដ្ឋ​បាន​ទេ​។ យើង​នឹង​បន្ត​ប្រយុទ្ធ​ដោយ​សន្តិវិធី​»​។ «​ចំពោះ​ការ​ហាមឃាត់​អ្នក​នយោបាយ​វា​គឺជា​រឿង​គួរ​ឱ្យ​អស់​សំណើច​ណាស់​។ វា​ពិតជា​អយុត្តិធម៌​ណាស់ សម្រាប់​ប្រទេស​នេះ​។ យើង​មិន​បាន​ធ្វើអ្វី​ខុស​ទេ​។ យើង​បាន​ប្រយុទ្ធ​ដើម្បី​លទ្ធិប្រជាធិបតេយ្យ​... ប្រជាពលរដ្ឋ​ជឿជាក់​លើ​យើង​។ ពួកគេ​បាន​សម្លាប់​ឆន្ទៈ​របស់​ប្រជាពលរដ្ឋ​ជាង​ ៣ ​លាន​នាក់​នៅក្នុង​ប្រទេស​កម្ពុជា​»​។

តំណាងរាស្ត្រ​មណ្ឌល​កំពង់ចាម​លោក​ ម៉ៅ មុនីវណ្ណ បាន​សម្ដែង​នូវ​ការ​សោកស្តាយ​ចំពោះ​ការ​រំលាយ និង​ហាមឃាត់​សកម្មភាព​នយោបាយ​​រយៈពេល​​ ៥ ​ឆ្នាំ​របស់​មន្ត្រី​ជាន់​ខ្ពស់​គណបក្ស​សង្គ្រោះ​ជាតិ​នេះ​ដោយ​លោក​បាន​ចាត់​ទុក​ថា​លទ្ធិប្រជាធិបតេយ្យ​នៅ​កម្ពុជា​បាន​ដើរ​ថយ​ក្រោយ​ឈាន​ទៅ​រក​ទសវត្សរ៍ ៨០ ​។

លោក​បញ្ជាក់​ថា​៖ «​យើង​មាន​ការ​សោកស្តាយ​។ យើង​ដឹង​ជា​មុន​ហើយ​នៅ​ពេល​ដែល​មាន​ការ​ធ្វើ​វិសោធនកម្ម​រដ្ឋធម្មនុញ្ញ​ចំនួន ២ ​ដង​ដែល​បាន​ន័យ​ថា​គេ​ធ្វើ​ច្បាប់​ដើម្បី​តម្រូវ​ទៅ​អ៊ីចឹង​ហើយ​។ ឥឡូវ​វា​ឈាន​ដល់​ចំណុច​ហ្នឹង​ហើយ​។ ដូច្នេះ​យើង​គេច​មិន​​ផុត​ចំណុច​នេះ​ទេ​។ គាត់​ចង់​បាន​​ចំណុច​ហ្នឹង​ហើយ​។ អ៊ីចឹង​មាន​អី​ប្លែក​។ កម្ពុជា​ប្រកាន់​យក​លទ្ធិប្រជាធិបតេយ្យ តែ​ឥឡូវ​វា​ដើរ​ថយ​ក្រោយ​ហើយ​។ សង្គ្រោះ​ជាតិ​ជា​បក្ស​ប្រឆាំង​ធំ​ជាង​គេ​។ មាន​បក្ស​នយោបាយ​ចូលរួម​ប្រកួត​ក្នុង​ការ​បោះឆ្នោត​ច្រើន​មែន តែ​បើ​យក​គណបក្ស​គីឡូ​ស្រាលៗ​ទៅ​​ប្រកួត​ជាមួយ ហ្នឹង​ដូច​មិន​ខុស​អី​ពី​ការ​ប្រកួត​តែ​ឯង​នោះ​ទេ​។ គណបក្ស​ទាំង​អស់​ហ្នឹង​គ្រាន់​តែ​ហែហម​ទេ​»​។

Content image - Phnom Penh Post
ក្រុម​អ្នក​កាសែត​ និង​អ្នក​សង្កេតការណ៍​នៅ​មុខ​តុលាការ​កំពូល​កាលពី​ម្សិលមិញ​។ ហុង មិនា

លោក​បន្ថែម​ថា​អន្តរជាតិ​នឹង​មិន​ទទួល​ស្គាល់​លទ្ធផល​ការ​បោះឆ្នោត​នាពេល​ខាង​មុខ​ទេ ដោយសារ​តែ​ការ​រំលាយ​គណបក្ស​សង្គ្រោះ​ជាតិ​នេះ ខណៈ​ដែល​គណបក្ស​សង្គ្រោះ​ជាតិ​មាន​អ្នក​គាំទ្រ​ជាង​ ៣ ​លាន​នាក់​។

លោក Frithjof Schmidt ដែល​ជា​សមាជិក សភា អាល្លឺម៉ង់​បាន​ថ្លែង​កាលពី​ថ្ងៃ​ពុធ​នៅ​ក្នុង​សន្និសីទ​កាសែត​ថា ប្រសិន​បើ​គណបក្ស​សង្គ្រោះ​ជាតិ​ត្រូវ​បាន​រំលាយ​នោះ​សហភាព​អឺរ៉ុប​ និង​ប្រទេស​អាល្លឺម៉ង់​ត្រូវ​តែ​ពិចារណា​ឡើង​វិញ​នូវ​ទំនាក់ទំនង​របស់​ពួកគេ​ជាមួយ​នឹង​រដ្ឋាភិបាល​កម្ពុជា​ភ្លាមៗ​។

លោក​បញ្ជាក់​ថា​៖ «​ការ​បោះឆ្នោត​សភា​នៅ​ខែ​កក្កដា​ឆ្នាំ ២០១៨ ​នឹង​បាត់បង់​ភាព​ស្រប​ច្បាប់​របស់​ពួកគេ​ដោយសារ​តែ​ការ​រំលាយ​នេះ​។ នៅ​ក្នុង​ករណី​នេះ ជំនួយ​ផ្នែក​បច្ចេកទេស​ និង​ហិរញ្ញវត្ថុ​ពី​សហភាព​អឺរ៉ុប​សម្រាប់​​អនុវត្ត​ដល់​ការ​បោះឆ្នោត​សភា​នៅ​ឆ្នាំ​ ២០១៨ ​ត្រូវ​តែ​បង្អាក់​ភ្លាមៗ​»​។

លោក Chairperson Charles Santiago សមាជិក​សភា​អាស៊ាន​សម្រាប់​សិទ្ធិមនុស្ស និង​ជា​សមាជិក​សភា​ម៉ាឡេស៊ី​បាន​ថ្លែង​ថា​៖ «​តុលាការ​កំពូល​បាន​ដំ​ដែកគោល​ចុងក្រោយ​បិទ​មឈូស​លទ្ធិប្រជាធិបតេយ្យ​កម្ពុជា​។ ការ​សម្រេច​នេះ​មិន​ត្រឹម​តែ​ធ្វើ​ឱ្យ​ប្រទេស​នេះ​មិន​មាន​គណបក្ស​ប្រឆាំង​ដ៏ធំ​តែ​មួយ​គត់​នៅ​មុន​ការ​បោះឆ្នោត​ដែល​នឹង​ចូល​មក​ដល់​មិន​ដល់​មួយ​ឆ្នាំ​ផង​នោះ​ទេ ប៉ុន្តែ​វា​ថែម​ទាំង​បាន​ធ្វើ​ឱ្យ​ប៉ះពាល់​ដល់​ក្របខ័ណ្ឌ​រដ្ឋធម្មនុញ្ញ និង​​នីតិរដ្ឋ​របស់​កម្ពុជា​ថែម​ទៀត​ផង​»​។

សកម្មជន​ដែល​គាំទ្រ​គណបក្ស​សង្គ្រោះ​ជាតិ​មកពី​ស្រុក​រំដួល ខេត្ត​ស្វាយរៀង អ្នកស្រី​ ប៉េង ភិន បាន​ធ្វើ​ដំណើរ​មក​ភ្នំពេញ​មាន​បំណង​ចូល​ស្ដាប់​សវនាការ តែ​ត្រូវ​បាន​ហាមឃាត់​មិន​ចូល​ហើយ​បាន​ចំណាយ​ពេល​ពេញ​មួយ​ថ្ងៃ​រង់ចាំ​ដំណឹង​នៅ​បរិវេណ​ខាង​ក្រៅ​តំបន់​ហាមឃាត់​បាន​​សម្ដែង​ការ​សោកស្ដាយ​ក្រោយ​ពី​ដឹង​លទ្ធផល​។

អ្នកស្រី ភិន ថ្លែង​ថា​៖ «​ខ្ញុំ​មក​នេះ​គ្រាន់​តែ​ចង់​ចូល​ស្ដាប់​សវនាការ​ព្រោះ​វា​ប្រព្រឹត្ត​ទៅ​ជា​សាធារណៈ ប៉ុន្តែ​ខ្ញុំ​ត្រូវ​បាន​ហាម​មិន​ចូល​។ ​ខ្ញុំ​មាន​ការ​សោកស្ដាយ​ណាស់​»​។

ការ​សម្រេច​រំលាយ​គណបក្ស​សង្គ្រោះ​ជាតិ​នេះ​ធ្វើ​ឡើង​ស្រប​ពេល​លោក កឹម សុខា ប្រធាន​គណបក្ស​កំពុង​ជាប់​ឃុំ​នៅ​ក្នុង​ពន្ធនាគារ​ត្រពាំងផ្លុង​ក្រោម​ការ​ចោទ​ពី​បទ​ «​ក្បត់ជាតិ​»៕ NS

រាយការណ៍​បន្ថែម​ដោយ Leonie Kijewski, Ananth Baliga

Content image - Phnom Penh Post
បារ៉ាស់​ និង​កម្លាំង​សមត្ថកិច្ច​បិទ​ផ្លូវ​ចូល​ទៅ​កាន់​តុលាការ​កំពូល​។ ផា លីណា

Content image - Phnom Penh Post
រថយន្ត​ត្រៀម​ទប់ទល់​បាតុកម្ម​ចត​នៅ​តាម​ផ្លូវ​ចូល​តុលាការ​កំពូល​។ ហុង មិនា

Content image - Phnom Penh Post
កងកម្លាំង​ប្រដាប់​អាវុធ​ដើរ​ចល័ត​នៅ​សួន​ច្បារ​មុខ​វត្ត​បទុម ខាង​លិច​តុលាការ​កំពូល​។ ហុង មិនា

0

Comments

Please, login or register to post a comment