កោះកុងៈ បុរសម្នាក់តំណាងឲ្យពលរដ្ឋ ៥០ គ្រួសារដែលមានទំនាស់ដីធ្លី ជាមួយក្រុមហ៊ុនលោកឧកញ៉ា លី យ៉ុងផាត់ កាលពីម្សិលមិញត្រូវបានតុលាការខេត្តកោះកុងសម្រេចឲ្យឃុំខ្លួនបណ្ដោះអាសន្នក្រោមការចោទប្រកាន់ពីបទ «ប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត» តាមមាត្រា ២៥៣ នៃច្បាប់ភូមិបាល បន្ទាប់ពីបុរសរូបនេះបានចូលទៅបោះបង្គោលព្រំដី នៅលើដីជម្លោះ។
កាលពីថ្ងៃទី ២១ និង ២២ ខែកុម្ភៈលោក ហេង សុខ វ័យ ៤៨ ឆ្នាំតំណាងប្រជាពលរដ្ឋចំនួន ៥០ គ្រួសារបានចូលទៅបោះបង្គោលព្រំដីនៅលើដីជម្លោះចំនួន ១០៣ ហិកតាដើម្បីចរចាជាមួយក្រុមហ៊ុន លី យ៉ុងផាត់។ លុះដល់ថ្ងៃទី ២៣ កុម្ភៈ បុរសរូបនេះត្រូវបានសមត្ថកិច្ចឃាត់ខ្លួនទៅតាមបណ្តឹងរបស់លោក ចាន់ ណាគ្រី មេការក្រុមហ៊ុន លី យ៉ុងផាត់។ នេះបើតាមមន្ត្រីសិទ្ធិមនុស្សប្រចាំខេត្តកោះកុង។
លោក អ៊ិន គង់ជិត មន្ត្រីសិទ្ធិមនុស្សរបស់អង្គការការពារសិទ្ធិមនុស្សលីកាដូ ប្រចាំខេត្តកោះកុងបានឲ្យដឹងថាលោក ហេង សុខ បានចូលទៅបោះបង្គោលលើដីដែលមានទំនាស់កាលពីថ្ងៃសុក្រ។ ភ្លាមៗ ក្រោយការបោះបង្គោលដី ដើម្បីចរចាជាមួយក្រុមហ៊ុននោះលោក ចាន់ ណាគ្រី តំណាងក្រុមហ៊ុន LYP Group ដែលគ្រប់គ្រងតំបន់សេដ្ឋកិច្ចពិសេសក្នុងខេត្តកោះកុងបានប្តឹងឲ្យសមត្ថកិច្ចចាប់ខ្លួនលោក ហេង សុខ តែម្តង។
លោកបន្តថា៖ «ប្រជាពលរដ្ឋដែលមានលោក ហេង សុខ ជាតំណាងហ្នឹងដាក់ពាក្យស្នើសុំទៅខេត្តឲ្យកាត់ឆ្វៀលដី ហើយរដ្ឋបាលខេត្តមិនព្រមដោះស្រាយឲ្យគាត់ បែរទៅជាចាប់ឃាត់ខ្លួនគាត់ក្នុងសំណុំរឿងចោទពីព្រហ្មទណ្ឌ។ អ៊ីចឹងយើងគិតថា រឿងហ្នឹងវាអយុត្តិធម៌សម្រាប់ពលរដ្ឋ ហើយខ្ញុំថា ការឃុំខ្លួនគាត់ម្នាក់ទៀតនេះ យើងគិតថាក្រុមហ៊ុននេះ គឺមិនមែនជាក្រុមហ៊ុនដែលអភិវឌ្ឍជួយប្រជាពលរដ្ឋឲ្យរួចផុតអំពីភាពក្រីក្រទេ»។
បើតាមមន្ត្រីសិទ្ធិមនុស្សរូបនេះលោកឧកញ៉ា លី យ៉ុងផាត់ គឺជាអ្នកមានលុយដ៏មានឥទ្ធិពលម្នាក់ក្នុងខេត្តកោះកុង «ដូច្នេះហើយរាល់បណ្តឹងចេញពីក្រុមហ៊ុនរបស់លោកត្រូវអាជ្ញាធរមូលដ្ឋានចាត់ការភ្លាមៗ ហើយសំណុំរឿងតែងតែទៅដល់តុលាការដែលជារឿយៗបានឃុំខ្លួនជនដែលត្រូវបានចាប់ដោយកម្លាំងមានសមត្ថកិច្ច»។
លោក ឡាយ ទីរ៉ូ ស្នងការរងទទួលបន្ទុកផែនព្រហ្មទណ្ឌកម្រិតធ្ងន់ ខេត្តកោះកុងបានលើកឡើងថា សមត្ថកិច្ចបានឃាត់ខ្លួនជនសង្ស័យរូបនេះដោយធ្វើតាមពាក្យបណ្ដឹងរបស់ភាគីតំណាងក្រុមហ៊ុន លី យ៉ុងផាត់។ ប៉ុន្ដែលោកមិនអាចសម្រេចថា ភាគីខាងណាមួយជាកម្មសិទ្ធិដីនោះទេ ខណៈភាគីក្រុមហ៊ុនមានឯកសារបញ្ជាក់។
លោកបញ្ជាក់ថា៖ «ក្រុមហ៊ុនគេដាក់ពាក្យប្ដឹងមកខាងខ្ញុំ ខ្ញុំក៏ចាត់ចែងតាមនីតិវិធី គឺគ្រាន់តែបានសួរនាំពីមូលហេតុខ្លះៗ ជុំវិញករណីបណ្ដឹងរបស់ក្រុមហ៊ុន ហើយឥឡូវមន្ត្រីខ្ញុំបានបញ្ជូនបន្តទៅតុលាការបន្តទៀតបាត់ហើយ ចង់ដឹងអ្វីបន្ថែមទៀតទាល់តែសួរទៅតុលាការ»។
លោក អ៊ុន សុណ្ណធារី អ្នកនាំពាក្យ និងជាព្រះរាជអាជ្ញារងអមសាលាដំបូងខេត្តកោះកុងបានបដិសេធធ្វើអធិប្បាយដោយលោកឆ្លើយថា កំពុងជាប់រវល់ការងារផ្ទាល់ខ្លួន។
លោក ចាន់ ណាគ្រី មេការក្រុមហ៊ុន លី យ៉ុងផាត់ បានលើកឡើងថា ករណីនេះឈ្មោះ ហេង សុខ បានធ្វើការរំលោភបំពានដីធ្លីរបស់ក្រុមហ៊ុនទាំងគាត់មិនមានឯកសារគ្រប់គ្រាន់ដោយបានមកបោះបង្គោលរបងលើដីក្រុមហ៊ុន ហើយក្រុមហ៊ុនក៏បានពន្យល់គាត់ជាច្រើនដងដែរ ប៉ុន្ដែគាត់នៅតែចោទក្រុមហ៊ុនថា រំលោភយកដីគាត់ទៅវិញ។
លោកបញ្ជាក់ថា៖ «ដីនេះមិនមែនជារបស់ពួកគាត់ទេ ព្រោះក្រុមហ៊ុនមានអាជ្ញាប័ណ្ណត្រឹមត្រូវពីរដ្ឋាភិបាល ដោយបានកំណត់ព្រំដី និងមានរបងច្បាស់លាស់ ហើយពួកគាត់ចេះតែមកចង្អុលថា កន្លែងនេះដីគាត់ កន្លែងនោះដីគាត់ ហើយយើងធ្វើនេះ គឺតាមនីតិវិធីច្បាប់យើងមិនអនុញ្ញាតឲ្យអ្នកណាមករំលោភដីក្រុមហ៊ុនផ្ដេសផ្ដាសបានទេ។ កន្លងមកពួកគាត់ដើរតែចោទថា ក្រុមហ៊ុនហ្នឹងរំលោភដីគាត់ ប៉ុន្ដែគ្មានទេគឺពួកគាត់ទេ ដែលមករំលោភដីក្រុមហ៊ុន»។
នៅមុនពេលដែលអាជ្ញាធរចាប់ខ្លួនលោក ហេង សុខ ដែលមានលំនៅឋានក្នុងឃុំព្រែកខ្សាច់ ស្រុកគិរីសាគរ តំណាងប្រជាពលរដ្ឋរូបនេះបានប្តឹងទៅអភិបាលខេត្តកោះកុងគឺលោកស្រី មិថុនា ភូថង ដើម្បីសុំកិច្ចអន្តរាគមន៍។ នេះបើយោងតាមពាក្យបណ្តឹងរបស់លោក ហេង សុខ ដែលបានដាក់ចូលទៅសាលាខេត្តកោះកុងកាលពីថ្ងៃទី ១២ ខែធ្នូ ឆ្នាំ ២០១៧។
ពាក្យបណ្តឹងលោក សុខ បាន ពណ៌នាអំពីដំណើររឿងវិវាទដីធ្លីជាមួយក្រុមហ៊ុនឧកញ៉ា លី យ៉ុងផាត់ ដែលបានកើតឡើងនៅពេលក្រុមហ៊ុនរបស់សមាជិកព្រឹទ្ធសភារូបនេះបានចូលមកដល់តំបន់ព្រែកខ្សាច់នៅឆ្នាំ ២០០៥។ ប៉ុន្តែជម្លោះដីធ្លីនេះបានកើនកម្តៅខ្លាំងនៅខែកុម្ភៈ ឆ្នាំ ២០១៦ នៅពេលដែលក្រុមហ៊ុនបាននាំមន្ត្រីបរិស្ថានមកបោះបង្គោលព្រំដីចំនួន ៦ បង្គោលពីចំណុចឆាយក្រូចមកដល់ចំណុចលើត្រពាំងគា ក្នុងភូមិសំរុងតាកែវ ដើម្បីខណ្ឌព្រំប្រទល់ដី។ ការបោះបង្គោលនេះបានហ៊ុមព័ទ្ធផ្ទៃដីសរុប ១០៣ ហិកតាដែលប្រជាពលរដ្ឋចំនួន ៥០ គ្រួសារបានអះអាងថា ជាដីរបស់ពួកគាត់។
ពាក្យបណ្តឹងបានរៀបរាប់ទៀតថាក្រោយមកគឺនៅខែធ្នូ ឆ្នាំ ២០១៧ នេះក្រុមហ៊ុនដែលមានលោក ចាន់ ណាគ្រី ជាតំណាងបានបញ្ជូនគ្រឿងចក្រមកឈូសឆាយប៉ះពាល់លើដីប្រជាពលរដ្ឋនៅចំណុចវាលពួចធំក្នុងភូមិសំរុងតាកែវធ្វើឲ្យបាត់បង់ស្លាកស្នាមព្រំប្រទល់ក្បាលដី។
ពាក្យបណ្តឹងបានបញ្ជាក់ថា៖ «ពួកខ្ញុំនាំគ្នាចេញទៅតវ៉ាសុំឲ្យគ្រឿងចក្រផ្អាកការឈូសឆាយក៏តំណាងក្រុមហ៊ុនមិនព្រមស្តាប់ដែរ»។
ក្នុងបណ្តឹងលោក ហេង សុខ ក៏សុំអន្តរាគមន៍ពីលោកស្រី មិថុនា ភូថង គឺ «ស្នើសុំកាត់ឆ្វៀលផ្ទៃដីទំហំ ១០៣ ហិកតាដែលមានទីតាំងស្ថិតនៅចំណុចវាលពួចធំ ភូមិសំរុងតាកែវ ឃុំព្រែកខ្សាច់ ស្រុកគិរីសាគរ ពីទីតាំងអនុវត្តគម្រោងរបស់ក្រុមហ៊ុន SEZ និងសុំចុះបញ្ជីដីគ្រប់គ្រងជាកម្មសិទ្ធិ»។
លោកស្រី មិថុនា ភូថង អភិបាលខេត្តកោះកុងមានប្រសាសន៍កាលពីម្សិលមិញថា លោកស្រីមិនទាន់ទទួលបានដំណឹងអំពីការចាប់ខ្លួនលោក ហេង សុខ នៅឡើយទេ តែលោកស្រីថាលោកស្រីនឹងពិនិត្យទិដ្ឋភាពច្បាប់ពាក់ព័ន្ធករណីនេះ។
ជម្លោះដីធ្លីរបស់ប្រជាពលរដ្ឋ ៥០ គ្រួសារជាមួយក្រុមហ៊ុនលោក លី យ៉ុងផាត់នេះបានកើតឡើងក្រោយពីក្រុមហ៊ុននេះបានទទួលដីសម្បទានសេដ្ឋកិច្ចប្រមាណ ៩៩៧៧ ហិកតាពីរដ្ឋាភិបាលនៅក្នុងឆ្នាំ ២០១០។ ផ្ទៃដីដែលកំពុងតែធ្វើឲ្យកើតមានជម្លោះនេះ គឺស្ថិតនៅក្នុងតំបន់ឧទ្យានជាតិបទុមសាគរ ដែលមានព្រំប្រទល់ជាប់នឹងប្រទេសថៃ៕