.jpg)
ពលរដ្ឋក្នុងពេលរារាំងត្រាក់ទ័រក្រុមហ៊ុនមិនឲ្យឈូសស្រូវដែលក្រុមហ៊ុនថាដាំលើដីខ្លួន។ រូបថត សហគមន៍
ឧត្តរមានជ័យៈ ស្ត្រីជាតំណាងពលរដ្ឋត្រូវបានប្រធានក្រុមហ៊ុនដែលជាមន្ត្រីយោធាម្នាក់ប្តឹងដោយចោទថា បានបំពានលើសេចក្តីសម្រេចរបស់តុលាការ និងធ្វើឲ្យខូចខាតដោយចេតនានៅក្នុងជម្លោះដីធ្លីដ៏ស្មុគស្មាញមួយនៅខេត្តឧត្ដរមានជ័យ។
អ្នកស្រី អឹម ចន្ថា អាយុ ៥៤ ឆ្នាំតំណាងឲ្យពលរដ្ឋ ១២០ គ្រួសាររស់នៅឃុំ-ស្រុកអន្លង់វែងបានសុំអន្តរាគមន៍ពីអង្គការសិទ្ធិមនុស្សអាដហុកខេត្តឧត្តរមានជ័យកាលពីម្សិលមិញ ខណៈសាលាដំបូងខេត្តបានកោះហៅអ្នកស្រីឲ្យចូលបំភ្លឺនៅថ្ងៃសុក្រខាងមុខនេះតាមបណ្តឹងក្រុមហ៊ុនដាតារ៉ាប់ប៊ើ Data Rubber (Cambodia) Co. Ltd។
ដើមចមនៃបណ្តឹងនេះបណ្តាលមកពីជម្លោះដីធ្លីទំហំ ៥០០ ហិកតាក្នុងចំណោមដី ៧៧០០ ហិកតាដែលក្រសួងបរិស្ថានបានកាត់ចេញពីដែនជម្រកសត្វព្រៃគូលែនព្រហ្មទេពឲ្យក្រុមហ៊ុន និងផ្តល់សិទ្ធិឲ្យឈូសឆាយដើម្បីដាំកៅស៊ូកាលពីឆ្នាំ ២០១១។
លោកស្រី ណារ៉េន អ្នកសម្របសម្រួលអង្គការអាដហុកខេត្តឧត្ដរមានជ័យ បានឲ្យដឹងថាពលរដ្ឋបានដាក់ពាក្យសុំអន្តរាគមន៍ទៅទីស្តីការគណៈរដ្ឋមន្ត្រី ហើយគណៈរដ្ឋមន្ត្រីក៏បានចេញ ស.ជ.ណ លេខ ៥២៥ កាលពីថ្ងៃទី ៣០ ខែឧសភា ឆ្នាំ ២០១២ ដើម្បីកាត់ដីទំហំ ៣៣៥៤ ហិកតាដែលប៉ះពាល់ចេញពីក្រុមហ៊ុន Data និងទំរីងរ៉ាប់ប៊ើរ ដើម្បីផ្តល់ឲ្យពលរដ្ឋ ២២០០ គ្រួសារ។
តែពលរដ្ឋទាំង ១២០ គ្រួសារបានអះអាងថា ពួកគាត់មិនដែលបានទទួលដីនោះទេ។
ករណីនេះក្រុមហ៊ុនបានប្តឹងទាមទារដីនោះទៅតុលាការខេត្តរហូតដល់សាលាឧទ្ធរណ៍ទៀត។ បន្ទាប់មកសាលាឧទ្ធរណ៍បានសម្រេចចេញដីការក្សាការពារដោយប្រគល់ដីនោះទៅឲ្យក្រុមហ៊ុនកាលពីខែសីហាឆ្នាំ ២០១៧ ហើយមួយខែក្រោយមកតុលាការខេត្តបានហៅអ្នកស្រី អឹម ចន្ថា និងតំណាងពលរដ្ឋផ្សេងទៀតទៅប្រាប់ពីដីការក្សាការពារនោះនៅសាលាស្រុកអន្លង់វែង ប៉ុន្តែពលរដ្ឋបានជំទាស់ ដោយសំអាងថាពួកគាត់បានចូលកាន់កាប់ដីនោះតាំងពីឆ្នាំ ២០០២ និង ២០០៣ មកម្ល៉េះ។
អ្នកស្រី ចន្ថា បានថ្លែងកាលពីម្សិលមិញថា៖ «យើងប្រកែកថា មិនអាចទទួលយកបានទេដីកានេះ ព្រោះមុនចេញដីការក្សាការពារ ហេតុអីមិនសិក្សាឲ្យច្បាស់លាស់ថា ដីហ្នឹងអ្នកណានៅមុនអ្នកណានៅក្រោយ? សម្តេចកាត់ចេញឲ្យពលរដ្ឋហ្នឹងនៅត្រង់ណាខ្លះ?»។
អ្នកស្រីបន្ថែមថា៖ «ហេតុអីបានតុលាការសម្រេចកាត់ឲ្យទៅក្រុមហ៊ុន? អ៊ីចឹងពលរដ្ឋមិនស្លាប់អស់ហើយ។ ពេលមានដីកា គេមិនឈូសឆាយខ្ទេចខ្ទីអស់ហើយ។ ឲ្យខ្ញុំទទួលយកម៉េចបាន?»។
អ្នកស្រី បន្ថែមថាពលរដ្ឋមិនបានទទួលដីការក្សាការពារនោះទេ ហើយដោយសារការជំទាស់នោះហើយ ទើបមានឧត្តមសេនីយ៍ត្រីម្នាក់ឈ្មោះ ដួង ស៊ីណា តំណាងក្រុមហ៊ុនបានប្តឹងអ្នកស្រីពីបទ «រំលោភលើសេចក្តីសម្រេចរបស់តុលាការ និងធ្វើឲ្យខូចខាតដោយចេតនាដែលប្រព្រឹត្តទៅនៅចំណុចអូរតាម៉េង»។
តុលាការបានកោះហៅឲ្យអ្នកស្រីចូលសាកសួរនៅថ្ងៃទី ៥ ដើមខែនេះតែអ្នកស្រីបានសុំពន្យារពេលចូលបំភ្លឺនៅថ្ងៃសុក្រខាងមុខនេះវិញ។ ដោយសារមិនទាន់មានមេធាវី និងមិនទាន់រៀបចំឯកសារ ទើបបានសុំអន្តរាគមន៍ពីអង្គការអាដហុក។
អ្នកស្រីចន្ថា និងអង្គការអាដហុកក៏បានឲ្យដឹងផងដែរថាឈ្មោះ ដួង ស៊ីណា ទើបតែបានចេញមុខជាតំណាង និងអ្នកការពារក្រុមហ៊ុនចាប់ឆ្នាំ ២០១៧ មក ហើយបានបញ្ជាឲ្យសន្តិសុខបាញ់ថ្នាំ និងបើកត្រាក់ទ័រភ្ជួរបំផ្លាញស្រូវ ចេក និងស្វាយចន្ទីជាដើម។
អ្នកស្រីថា៖ «តាំងពី ដួង ស៊ីណា ហ្នឹងចេញមុខមកភ្លាមចាប់ផ្តើមធ្វើបាបពលរដ្ឋអត់មានឲ្យនៅសុខបានទេ។ ពលរដ្ឋដេកព្រួយ ដេកភ័យរហូតដល់សព្វថ្ងៃហ្នឹង»។
លោក ណារ៉េន បានឲ្យដឹងថាការចោទប្រកាន់នេះជាបទល្មើសព្រហ្មទណ្ឌ ហើយអាចមានការឃាត់ខ្លួនក្រោយសាកសួរ។
លោកក៏បានលើកឡើងដែរថា ដីការក្សាការពារនោះគឺផ្អែកតែលើការអនុញ្ញាតពីក្រសួងបរិស្ថានដែលបានចេញមុន ស.ជ.ណ របស់ទីស្តីការគណៈរដ្ឋមន្ត្រី។
លោក ណារ៉េនបន្តថា៖ «ពលរដ្ឋមិនអាចទទួលយកបានទេ ព្រោះដីហ្នឹងមាន ស.ជ.ណ ពីទីស្តីការគណៈរដ្ឋមន្ត្រីកាត់ឲ្យពួកគាត់ហើយ ហេតុអីសាលាឧទ្ធរណ៍កាត់រំលោភ ស.ជ.ណ?»។
ទោះយ៉ាងណាលោក ដួង ស៊ីណា បានបដិសេធការចោទប្រកាន់ ហើយថាគឺពលរដ្ឋទៅវិញទេដែលបានកាប់បំផ្លាញដើមកៅស៊ូក្រុមហ៊ុនលោកអស់រាប់សិបដើម និងយកស្រូវទៅព្រោះលើដីក្រុមហ៊ុនព្រមទាំងបានជេរប្រមាថសន្តិសុខក្រុមហ៊ុនទៀតផង។
លោកបញ្ជាក់ថា៖ «គាត់កាប់បំផ្លាញដើមកៅស៊ូច្រើនសាហើយ...ក្រុមហ៊ុនមិនមែនធ្វើអត់ច្បាប់ទេ ហើយក៏មិនរំលោភយកដីប្រជាជនដែរ គឺសុទ្ធតែមានអនុក្រឹត្យ មានសម្តេចតេជោចុះហត្ថលេខា។ តែគាត់អត់មានអីផង មកកាប់ដើមកៅស៊ូ និងមករំលោភយកដីគេ»។
លោកថាក្រៅពីឈ្មោះ អឹម ចន្ថា លោកក៏បានប្តឹងមនុស្សប្រមាណ ៣ នាក់ផ្សេងផងដែរ។
លោក ស៊ីណា បានអះអាងទៀតថា គ្មាន ស.ជ.ណ ឯណាចេញដើម្បីកាត់ដីក្រុមហ៊ុនឲ្យពលរដ្ឋទាំងនោះទេ។
លោកបញ្ជាក់ថា បើមាន ស.ជ.ណ មែន លោកប្រាកដជាបានដឹងហើយ ហើយលោកក៏នឹងអនុវត្តតាមផងដែរ ព្រោះដីនោះជាដីរបស់រដ្ឋមិនមែនជាដីរបស់លោកទេ៕
