ភ្នំពេញៈ ឯកអគ្គរដ្ឋទូតអាមេរិកប្រចាំកម្ពុជាថ្លែងថា គំនិតដែលថាលោក ជុន ច័ន្ទបុត្រ ភ័យខ្លាចនៅសហរដ្ឋអាមេរិកគឺជាគំនិត «ឆ្កួតៗ» និងគ្មានតម្លៃនឹងយកមកនិយាយទេ ស្របពេលដែលក្រសួងព័ត៌មានបានស្នើឲ្យក្រសួងការបរទេសកម្ពុជាជួយអន្តរាគមន៍ឲ្យវិទ្យុអាស៊ីសេរីកែតម្រូវព័ត៌មានអំពីហិង្សានៅក្រចេះកាលពីថ្ងៃទី ៨ ខែមីនា។
លោក William Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានថ្លែងនៅខេត្តកំពង់ធំកាលពីម្សិលមិញថា អាមេរិកមានសារព័ត៌មានសេរី និងបើកចំហជាងគេនៅលើពិភពលោក ហើយថាគ្មានអ្នកសារព័ត៌មានណាម្នាក់ភ័យខ្លាចឡើយ។
លោកថ្លែងដូច្នេះជាការឆ្លើយតបនឹងអ្នកសារព័ត៌មាន ដែលចោទសួរលោកអំពីការលើកឡើងរបស់លោកនាយករដ្ឋមន្ត្រីកម្ពុជា នៅក្នុងជំនួបជាមួយពលរដ្ឋខ្មែរនៅអូស្ត្រាលី កាលពីថ្ងៃសុក្រ នៅពេលលោកលើកឡើងថា លោក ជុន ច័ន្ទបុត្រ ភ័យខ្លាច «CIA អាមេរិកសម្លាប់ដូច កែម ឡី»។
លោក William Heidt បានបញ្ជាក់ថា៖ «ខ្ញុំសូមប្រាប់អ្នកថាគ្មានអ្នកសារព័ត៌មានម្នាក់ណា មានការភ័យខ្លាចទេ នៅសហរដ្ឋអាមេរិក។ គ្មានទាល់តែសោះ។ ដូច្នេះគំនិតដែលថា ជុន ច័ន្ទបុត្រ មានការភ័យខ្លាចនៅសហរដ្ឋអាមេរិកគឺពិតជាគំនិតឆ្កួតៗ។ វាគ្រាន់តែជាគំនិតឆ្កួតៗប៉ុណ្ណោះ ហើយវាមិនមានប្រយោជន៍ក្នុងការលើកយកវាមកពិភាក្សាទេ»។
ក្នុងដំណើរទៅចូលរួមជំនួបកំពូលអាស៊ាន និងអូស្ត្រាលី លោកនាយករដ្ឋមន្ត្រី ហ៊ុន សែន បានជួបពលរដ្ឋខ្មែរអ្នកគាំទ្រលោកនៅទីនោះដោយលោកបានថ្លែងថា លោក ជុន ច័ន្ទបុត្រ ជាចារកម្មរបស់លោកហើយបានស្នើសុំឲ្យឧត្តមសេនីយ៍មួយរូបជួយការពារពីការតាមសម្លាប់របស់ CIA អាមេរិក។ លោកបានបញ្ជាក់ថា៖ «គាត់សុំឲ្យឧត្តមសេនីយ៍ឯក ម៉ៅ សុផាន់ ជួយការពារផង ប្រយ័ត្នពួកអាមេរិកសម្លាប់គាត់ដូច កែម ឡី។ ជុន ចាន់បុត្រ បើអ្នកឯងហ៊ានស្បថថា អ្នកឯងជួប ម៉ៅ សុផាន់ ហើយជួបកូនប្រុសខ្ញុំឬអត់?»។
ក្រៅពីការលើកឡើងរបស់លោកនាយករដ្ឋមន្ត្រី សារព័ត៌មាន ហ្វ្រេសញូវក៏បានបញ្ចេញសារតាមប្រព័ន្ធ WhatsApp ដែលមានឈ្មោះ Pou Chun Chann និងរូបលោក ជុន ច័ន្ទបុត្រ ហើយក្នុងការសន្ទនានោះឈ្មោះ Pou Chun Chann បានសរសេរថាចង់ជួបឪពុកនៅទីក្រុងស៊ីដនី។ លើសពីនេះទៀតសារព័ត៌មាន ហ្វ្រេសញូវបានសម្ភាសជាមួយឧត្តមសេនីយ៍ឯក ម៉ៅ សុផាន់ ដោយលោកបានអះអាងថា កាលពីថ្ងៃទី ២២ ខែមីនា ២០១៧ លោកបានឲ្យកម្លាំង ៣ នាក់តាមការពារលោក ជុន ច័ន្ទបុត្រ ពីព្រលានយន្តហោះរហូតដល់សណ្ឋាគារសាន់វ៉េ មុខស្ថានទូតអាមេរិក ហើយថានៅថ្ងៃទី ២៣ ខែមីនាលោកបាននិយាយជាមួយលោក ជុន ច័ន្ទបុត្រ ១ ម៉ោង និង ៤៥ នាទី។
ឧត្តមសេនីយ៍ឯក ម៉ៅ សុផាន់ បានថ្លែងថា៖ «កន្លងមកលោក ជុន ច័ន្ទបុត្រ ធ្លាប់បានប្រាប់ពីរឿងរ៉ាវលំបាកមួយចំនួននៅវិទ្យុអាស៊ីសេរី ហើយថានឹងចង់ចាកចេញពីវិទ្យុបរទេសមួយនេះ ប៉ុន្តែមិនដឹងចាកចេញដោយវិធីណានោះទេ។ លោក ជុន ច័ន្ទបុត្រ ធ្លាប់បាននិយាយប្រាប់ខ្ញុំថា ធ្វើការនៅទីនោះត្រូវតែធ្វើការតាមពួកគេ [អាមេរិក] គេឲ្យនិយាយអ្វីត្រូវធ្វើតាមគេ បើមិនធ្វើតាមគេ គេនឹងសម្លាប់ចោល»។
ទាំងលោក ជុន ច័ន្ទបុត្រ និងឧត្តមសេនីយ៍ឯក ម៉ៅ សុផាន់ មិនអាចទាក់ទងសុំការបំភ្លឺបានទេកាលពីម្សិលមិញ។ ប៉ុន្តែ លោក ជុន ច័ន្ទបុត្រ បានថ្លែងតាមវីដេអូឃ្លីបមួយនៅអូស្ត្រាលីថាលោកចង់ឲ្យលោកនាយករដ្ឋមន្ត្រី ហ៊ុន សែន បញ្ចេញភ័ស្តុតាង និងឯកសារបន្ថែមទៀត និងស្នើឲ្យលោក ហ៊ុន សែន ចូលក្នុងកម្មវិធីវិទ្យុរបស់លោក។
លោកថ្លែងថា៖ «ខ្ញុំសប្បាយចិត្តអញ្ជើញលោកនាយករដ្ឋមន្ត្រី ហ៊ុន សែន ឲ្យលោកយកភ័ស្តុតាងមកដើម្បីឲ្យអាចថា ខ្ញុំជាចារកម្មរបស់លោកដើម្បីបកស្រាយនៅលើវិទ្យុយើងដើម្បីឲ្យប្រជាពលរដ្ឋបានដឹងម្តង ហើយបានប្រជាពលរដ្ឋសួរសំណួរផង។ ខ្ញុំក៏ចង់ដឹងដែរ តាមពិតអន្ទះសាចង់ដឹងណាស់ថាហេតុអី ហើយខ្ញុំបានបញ្ជូនឯកសារអី? ដំណឹងអី ទៅលោកនាយករដ្ឋមន្ត្រី ហ៊ុន សែន ខ្លះ? ហើយការពិតគឺខ្ញុំក៏បាននិយាយខ្លះដែរនៅលើហ្វេសប៊ុក របស់ខ្ញុំបាទគឺថា មានតែចារកម្មសម្ងាត់របស់លោកនាយករដ្ឋមន្ត្រី ហ៊ុន សែន ទេ បញ្ជូនសម្ងាត់មកខ្ញុំហើយខ្ញុំមានភ័ស្តុតាង»។
ស្របពេលជាមួយគ្នានេះក្រសួងព័ត៌មានកាលពីថ្ងៃទី ១៥ មីនាបានសរសេរលិខិតមាន ២ ទំព័រផ្ញើទៅកាន់ក្រសួងការបរទេសកម្ពុជាដោយស្នើសុំឲ្យក្រសួងជួយអន្តរាគមន៍ឲ្យវិទ្យុអាស៊ីសេរីកែតម្រូវព័ត៌មានដែលបានចុះថា «មានពលរដ្ឋចំនួន ៦ នាក់បានស្លាប់ និងរងរបួស ៤០ នាក់ក្នុងហេតុការណ៍បង្កហិង្សាជម្លោះដីធ្លីនៅស្រុកស្នួល ខេត្តក្រចេះកាលពីថ្ងៃទី ៨ ខែមីនា ឆ្នាំ ២០១៨»។
ដោយយោងលើចម្លើយរបស់អ្នកស្រី គិន ភ័ក្ត្រ ដែលជាសាក្សីឃើញផ្ទាល់ភ្នែក ក្រសួងព័ត៌មានអះអាងថាហិង្សារឿងជម្លោះដីធ្លីនៅខេត្តក្រចេះគឺជា «ផែនការរបស់វិទ្យុអាស៊ីសេរីដែលតែងតែឃុបឃិតជាមួយគណបក្សប្រឆាំងរៀបចំឡើងជាបន្តបន្ទាប់ បំផុសឲ្យប្រជាពលរដ្ឋប្រឆាំងនឹងរដ្ឋាភិបាល និងអាជ្ញាធរមានសមត្ថកិច្ចបង្កឲ្យមានអំពើហិង្សាកើតឡើងដើម្បីទម្លាក់កំហុស និងប៉ុនប៉ងផ្តួលរំលំរាជរដ្ឋាភិបាលកម្ពុជាស្របច្បាប់»។
ទោះយ៉ាងណាក្រសួងព័ត៌មានមិនបានប្រាប់ឲ្យអាស៊ីសេរីកែតម្រូវព័ត៌មានទៅជាយ៉ាងណានោះទេ។
លោក អ៊ុក គឹមសេង អ្នកនាំពាក្យក្រសួងព័ត៌មានថ្លែងថា ក្រសួងបានស្នើទៅក្រសួងកិច្ចការបរទេសឲ្យជួយអន្តរាគមន៍ដោយសារវិទ្យុអាស៊ីសេរីមិនមានស្នាក់ការនៅកម្ពុជា។ លោកបានបន្តថា៖ «យើងធ្វើការងារការទូតតាមក្រសួងការបរទេស ព្រោះអីអាស៊ីសេរីអត់មានការិយាល័យតំណាងនៅកម្ពុជាទេ។ ដូច្នេះមានតែក្រសួងការបរទេសខ្មែរដែលមានមធ្យោបាយផ្តល់ទៅឲ្យសហរដ្ឋអាមេរិក»៕