Search form

Login - Register | FOLLOW US ON

Logo of Phnom Penh Post newspaper Phnom Penh Post - ទូត​អាមេរិក ច្រាន​ចោល​ការ​ចោទ​ពី​រឿង​ជ្រៀត​ជ្រែក​ចូល​ផ្ទៃ​ក្នុង​កម្ពុជា

Content image - Phnom Penh Post
លោក William A. Heidt ឯកអគ្គរដ្ឋទូត​សហរដ្ឋអាមេរិកប្រចាំនៅ​កម្ពុជា​ ថ្លែង​នៅ​ក្នុង​សន្និសីទកាសែត​ កាលពីថ្ងៃម្សិលមិញ​។ រូបថត សហ​ការី

ទូត​អាមេរិក ច្រាន​ចោល​ការ​ចោទ​ពី​រឿង​ជ្រៀត​ជ្រែក​ចូល​ផ្ទៃ​ក្នុង​កម្ពុជា

ភ្នំពេញៈ ឯកអគ្គរដ្ឋ​ទូត​ អាមេរិក ​ប្រចាំ​កម្ពុជា​លោក William Heidt កាល​ពី​ម្សិលមិញ​​បាន​ច្រាន​ចោល​ចំពោះ​ការ​ចោទ​ប្រកាន់​ដែល​ថា អាមេរិក​ជ្រៀត​ជ្រែក​កិច្ចការ​ផ្ទៃ​ក្នុង​កម្ពុជា ​ដោយ​បាន​ហៅ​ការ​ចោទ​នោះ​ថា ​គ្មាន​ហេតុ​ផល​និង​ធ្វើ​ឡើង​ដោយ​គ្មាន​ភ័ស្តុតាង​ដែល​អាច​ជឿ​ជាក់​បាន​ ប៉ុន្តែ​លោក​មិន​បាន​និយាយ​អំពី​ផល​ប៉ះពាល់​ណា​មួយ​ដែល​អាច​កើត​​មាន​​ពី​ប្រទេស​មហា​អំណាច​មួយ​នេះ​ទេ។

សេចក្តី​ថ្លែង​ការណ៍​របស់​​លោក​ឯកអគ្គរដ្ឋ​ទូត​សហរដ្ឋ​អាមេរិក​នៅ​កម្ពុជា បាន​ធ្វើ​ឡើង​មួយ​ថ្ងៃ​ បន្ទាប់​ពី​លោក​នាយក​រដ្ឋ​មន្រ្តី​ ហ៊ុន សែន រិះគន់​អាមេរិក​​ដោយ​ហៅ​អាមេរិក​ថា​ជា «មេខ្លោង» នៅ​ពី​ក្រោយ​ការ​ឃុប​ឃិត​​របស់​លោក កឹម សុខា មេ​ដឹក​នាំ​គណបក្ស​ប្រឆាំង​ ដើម្បី​ផ្តួល​រំលំ​​រដ្ឋាភិបាល​​​ក្រោម​ជំនួយ​ពី​អាមេរិក​ ខណៈ​លោកក៏​​បាន​ព្រមាន​ស្ថានទូត​មហា​អំណាច​នេះ​ផង​ដែរ​មិនឲ្យ​ដើរ​តួ​ដូចជា​ «ឪពុក​ម្តាយ» របស់​កម្ពុជា។

ឯកអគ្គរដ្ឋ​ទូតអាមេរិក លោក Heidt បានថ្លែង​​ជា​មួយ​អ្នកកាសែត​ក្នុង​ស្រុក​​នៅ​ស្ថានទូត​កាល​ពី​ម្សិលមិញ ​​​និង​​បាន​ថ្លែង​ជា​ដដែល​អំពី​​ការ​អំពាវនាវ​របស់​សហភាព​អឺរ៉ុប​ដែល​សុំ​ឲ្យ​មាន​ការ​ដោះ​លែង​លោក កឹម សុខា ជា​បន្ទាន់​ ​ជាមួយ​គ្នា​នឹង​ការ​ច្រាន​ចោល​​ការ​ចោទ​ប្រកាន់​​របស់​លោក​នាយក​រដ្ឋ​មន្រ្តី​និង​មន្រ្តី​រដ្ឋា​ភិបាល​កម្ពុជា​ដែល​ថា​ អាមេរិក​មាន​ជាប់​ពាក់​ព័ន្ធ​ក្នុង​ព្រឹត្តិការណ៍​នា​ពេល​ថ្មី​ៗ​នេះ។

លោក​បាន​ថ្លែង​ថា​៖ «​រាល់​ការ​ចោទ​ប្រកាន់​​ទាំង​អស់​​ដែល​អ្នក​បាន​ឮ​​នា​សប្តាហ៍​ថ្មី​ៗ​​អំពី​សហរដ្ឋ​អាមេរិក​គឺ​មិន​ពិត» នោះ​ទេ។

លោក​បាន​បញ្ជាក់​ថា៖ «សាច់​រឿង​សារព័ត៌មាន​កាល​ពី​ពេល​ថ្មីៗ​អំពី​ការ​ចាប់​ខ្លួន​លោក កឹម សុខា ​គឺ​ជា​ការ​យល់​ខុស​ទាំង​ស្រុង​ពី​អ្វី​ដែល​អាមេរិក​បាន​និង​កំពុង​ធ្វើ​នៅ​កម្ពុជា»។

ខណៈ​ឯកអគ្គរដ្ឋទូត​មិន​បាន​រៀប​រាប់​អំពី​​ការ​ចោទ​ប្រកាន់​ទាំង​នេះ មន្រ្តី​ជាន់​ខ្ពស់​រដ្ឋាភិបាល​និង​ទ្រឹស្តី​នៃ​ការ​ឃុប​ឃិត​​នៅ​​លើ​សារព័ត៌មាន Fresh News បាន​ចោទ​ប្រកាន់​មក​លើអាមេរិក​ថា​ជា «បាត​ដៃ​ទី​បី» នៅ​ក្នុង​ការ​ប៉ុនប៉ង​ជំរុញ​ឲ្យ​មាន​បដិវត្តន៍​ពណ៌​នៅ​ក្នុង​ប្រទេស​កម្ពុជា​ ដើម្បី​ផ្តួល​រំលំ​រដ្ឋាភិបាល។

លោក Heidt បានថ្លែង​ជា​ដដែល​ថា អាមេរិក​​បានចាក់​ថវិកា​ប្រមាណ ១ ពាន់​លាន​ដុល្លារ​ក្នុង​រយៈ​កាល ២៤ ឆ្នាំ​ចុង​ក្រោយ ខណៈ​ជាមួយ​គ្នា​នេះ ការ​នាំ​ចេញ​របស់​កម្ពុជា​​បាន​​កើន​ឡើង​រហូត​ដល់ ៣៦ ​ពាន់​លាន​នៅ​ក្នុង​រយៈពេល​ដូចគ្នា រួម​ទាំង​ការ​ធ្លាក់​ចុះ​ពន្ធនាំ​ចូល​លើ​ទំនិញ​សម្រាប់​ធ្វើ​ដំណើរ​ (travel goods) កាល​ពី​ឆ្នាំ​មុន ដែល​នឹង​ធ្វើ​ឲ្យ​កម្ពុជា​ចំណេញ​ថវិកា ១០០ លាន​ដុល្លារ​។

លោក​បាន​ថ្លែង​បន្ត​ថា៖ «ដូច្នេះ​ សូម​គិត​អំពី​រឿង​នេះ ខណៈ​យើង​កំពុង​ធ្វើ​រឿង​ទាំង​នេះ​ដើម្បី​ជួយ​​ស្រុក​ខ្មែរ​»។

ដូចអ្វី​ដែល​លោក Heidt ​បាន​លើក​ឡើង​អំពី​ការ​រួម​ចំណែក​របស់​អាមេរិក​​នៅ​ក្នុង​វិស័យ​កសិកម្ម ​កិច្ច​ខិត​ខំ​ប្រឹង​ប្រែង​ដោះ​មីន ​និង​ការ​អភិវឌ្ឍ​វប្បធម៌​ ​លោក​បាន​ថ្លែងថា​ ​យុទ្ធនាការ «RedHerringsKH» ​របស់​ស្ថានទូត​អាមេរិក​គឺ​កំពុង​ព្យាយាម​​ផ្តល់​ការ​រួម​ចំណែក​ជាក់​ស្តែង​ដល់​កម្ពុជា​​មិន​មែន​អ្វី​ដែល​បាន​លើក​ឡើង​ក្នុង​ប្រព័ន្ធ​ផ្សព្វ​ផ្សាយ​នោះ​ទេ។

ជាង​នេះ​ទៀត​ លោក​បាន​ទទួល​ស្គាល់​ថា ប្រទេស​ដទៃ​ៗ​​បាន​គាំទ្រ​ចំណាត់​ការ​របស់​រដ្ឋាភិបាល​កម្ពុជា ប៉ុន្តែ​ស្ថាន​ទូត​អាមេរិក​​នឹង​បន្ត​​លើក​កម្ពស់​ប្រជាធិបតេយ្យ​ ​ដែល​ជា​ធាតុ​សំខាន់​នៃ​គោល​នយោបាយ​បរទេស​អាមេរិក។

លោក Heidt បាន​បន្ត​ថា៖ «អ្វី​ដែល​ធ្វើ​ឲ្យ​ខ្ញុំ​បារម្ភ​ ធ្វើ​ឲ្យ​ខ្ញុំ​ក្រៀម​ក្រំ ​គឺ​ថា​​​កម្ពុជា​កំពុង​ផ្តាច់​ខ្លួន​ឯង​បន្តិច​ម្តងៗ​ពី​សហគមន៍​អន្តរជាតិ» ដោយ​លោក​​ថ្លែង​ថា ​ការ​ព្រមាន​ពី​សហរដ្ឋ​អាមេរិក សហភាព​អឺរ៉ុបនិង​មជ្ឈដ្ឋាន​ដទៃៗ​​មិន​គួរ​មិន​អើពើ​នោះ​ទេ​។

បន្ទាប់ពី ការ​ចាប់​ខ្លួន​លោក កឹម សុខា ​ក្រសួង​ការ​បរទេស​ចិន​និង​មន្រ្តី​ទូត​ដែល​មក​ទស្សនកិច្ច​បាន​គាំទ្រ​ការ​ចាប់​ខ្លួន​នេះ​ និង​បាន​សន្យា​ថា​ នឹង​បន្ត​គាំទ្រ​រដ្ឋាភិបាល​កម្ពុជា​។

អ្នក​នាំ​ពាក្យរ​ដ្ឋាភិបាល លោក ផៃ ស៊ីផាន ​​បាន​គាំទ្រ​ការ​លើកឡើង​របស់​រដ្ឋាភិបាល​ដែល​ថា អាមេរិក​កំពុង​ជ្រៀត​ជ្រែកនៅ​ក្នុង​កិច្ច​ការ​ផ្ទៃ​ក្នុង​កម្ពុជា​ ដោយ​លើក​ឡើង​អំពី​ករណី​​ចាប់​ខ្លួន​លោក​ កឹម សុខា​។

លោក​បាន​ថ្លែង​តាម​ទូរស័ព្ទ​កាល​ពី​​ម្សិល​មិញ​ថា៖ «ការ​ជ្រៀត​ជ្រែក​​របស់​អាមេរិក​នៅ​ក្នុង​កិច្ច​ការ​ផ្ទៃ​ក្នុង​កម្ពុជា​ គឺ​ជា​ការ​បំផ្លាញ​ប្រជាធិបតេយ្យ​​របស់​ខ្មែរ​ពិត​ប្រាកដ»។

​លោក​​ក៏​បា​ន​​ថ្លែង​ផង​ដែរ​​ថា ​ការ​លើក​ឡើង​​របស់​លោក Heidt ​​ដែល​ថា​អ្នក​ទេសចរ​​និង​ក្រុម​ហ៊ុន​លោក​ខាង​លិច​កំពុង​មាន​អារម្មណ៍​មិន​ស្វាគមន៍​​​ដោយសារ​ព្រឹត្តិការណ៍​ថ្មី​​ៗ​នេះ​​គឺ​ «មិនពិត» ហើយ​ថា កម្ពុជា​​ប្តេជ្ញា​ចំពោះ​អធិបតេយ្យ​និង​ការ​អភិវឌ្ឍ​ប្រជាធិបតេយ្យ​ដោយ​​ឯករាជ្យ។

ទន្ទឹមនេះ សភា​អឺរ៉ុប​​នឹង​បោះ​ឆ្នោត​លើ​សេចក្តី​សម្រេច​​ស្តីពី​កម្ពុជា​នៅ​ថ្ងៃ​ព្រហស្បតិ៍។

សេចក្តី​ព្រាង​មួយ​ក្នុង​ចំណោម​សេចក្តី​ព្រាង​​ទាំង​នោះ​ដែល​​ស្នើ​ដោយ​សម្ព័ន្ធ​សេរី​អឺរ៉ុប​ដែល​ជា​ស្ថាប័ន​មួយ​ក្នុង​ចំណោម​ស្ថាប័ន​​នយោបាយ​ចំនួន​ ៨ ​នៅ​ក្នុង​សភា​អឺរ៉ុបបាន​​ថ្កោល​ទោស​​ការ​ចាប់​ខ្លួន​លោក កឹម សុខា ​ប៉ុន្តែ​ក៏​បាន​បញ្ចូល​ប្រការ​មួយ​ផង​ដែរ​ពាក់ព័ន្ធ​នឹង​ការ​ព្យួរ​លទ្ធភាព​របស់​កម្ពុជា​​ទៅ​កាន់​អឺរ៉ុប​គឺ​ «ការ​នាំ​ចូល​ផលិត​ផល​គ្រប់​ប្រភេទ​លើក​លែង​តែ​​អាវុធ» ទៅ​កាន់​​ទីផ្សារ​សហភាព​អឺរ៉ុប។

ប្រការនេះ​ក៏​អំពាវនាវ​ឲ្យរ​ដ្ឋាភិបាល​ពិនិត្យ​ការ​អះ​អាង​របស់​ប្រជាពលរដ្ឋ​រាប់ពាន់​នាក់​​ដែល​ត្រូវ​បាន​បណ្តេញ​ចេញ​ពី​ដី​ធ្លី​​តាម​រយៈ​សំណង​តិច​តួច​ឬ​គ្មាន​សំណង​​សម្រាប់​ការ​ធ្វើ​ចម្ការ​អំពៅ​ក្នុង​ខេត្ត​ កំពង់ស្ពឺ​ ​កោះកុង និង​ខេត្ត​ឧត្តរមានជ័យ រួម​ទាំង​ការ​ប្រើ​ពលកម្ម​កុមារ​​ដោយ​ក្រុម​ហ៊ុន​ស្ករ​ស​ដែល​ជា​កម្មសិទ្ធិ​របស់​​លោក លី យ៉ុងផាត់។

ក្នុង​ករណី​មិន​យល់​ព្រម​ធ្វើ​ការ​ពិនិត្យ​​ ក្រុម​នេះ​​​ស្នើ​សុំ​គណៈកម្មការ​សហភាព​អឺរ៉ុប​​ចាប់​ផ្តើម​ការ​ស៊ើប​អង្កេត​​ដែល​អាច​​នាំ​ឲ្យ​មាន​ «​ការ​ព្យួរ​​​ទៅ​លើ​​ផលិត​ផល​ឬ​វិស័យ​ជាក់​លាក់​ណា​មួយ» មិន​ឲ្យ​នាំ​ចូល​ទៅ​ទីផ្សារ​អឺរ៉ុប​​៕ PS

រាយ​ការណ៍​​បន្ថែម​ដោយ​ Leonie Kijewski

0

Comments

Please, login or register to post a comment

ព័ត៌មានពាក់ព័ន្ធ