ភ្នំពេញៈ មន្ត្រីនគរបាលដែលបាញ់បង្ក្រាបសង្វៀនជល់មាន់បណ្តាលឲ្យមនុស្សម្នាក់ស្លាប់នៅខណ្ឌពោធិ៍សែនជ័យត្រូវបានតុលាការសម្រេចចោទប្រកាន់ពីបទមនុស្សឃាតដោយអចេតនា ហើយបញ្ជូនទៅឃុំខ្លួនបណ្តោះអាសន្ននៅពន្ធនាគារនៅថ្ងៃម្សិលមិញនេះ។
ជនត្រូវចោទឈ្មោះ ចន វីរៈ ជានគរបាលអន្តរាគមន៍នៃអធិការដ្ឋាននគរបាលខណ្ឌពោធិ៍សែនជ័យត្រូវបានឃាត់ខ្លួនសាកសួរនៅថ្ងៃទី ២២ ខែមករាមួយថ្ងៃក្រោយមានប្រតិបត្តិការបង្ក្រាបសង្វៀនជល់មាន់ និងល្បែងស៊ីសងនៅក្នុងសង្កាត់ចោមចៅ ២ ដែលបណ្តាលឲ្យបុរសម្នាក់ស្លាប់។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ ថ្លែងឲ្យដឹងថាតំណាងអយ្យការបានសម្រេចចោទប្រកាន់គាត់ពីបទមនុស្សឃាតដោយអចេតនា។
លោកបញ្ជាក់ថា៖ «ក្រោយពីបានពិនិត្យឯកសារសំណុំរឿងសាកសួរចម្លើយតាមនីតិវិធី និងពិនិត្យភ័ស្តុតាងតំណាងអយ្យការបានសម្រេចបើកការស៊ើបសួរដោយចោទប្រកាន់ពីបទមនុស្សឃាតដោយអចេតនាតាមមាត្រា ២០៧ នៃក្រមព្រហ្មទណ្ឌ...»។
ប្រសិនបើគាត់ត្រូវបានផ្តន្ទាទោសនោះគាត់នឹងត្រូវប្រឈមការជាប់ពន្ធនាគារចាប់ពី ១ ឆ្នាំទៅ ៣ ឆ្នាំ និងពិន័យជាប្រាក់ពី ២ លានរៀល ទៅ ៦ លានរៀល (៥០០-១៥០០ ដុល្លារ)។
លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបានឲ្យដឹងថាចៅក្រមស៊ើបសួរបានសម្រេចបញ្ជូនមន្ត្រីនគរបាលរូបនេះទៅកាន់ពន្ធនាគារក្រោយការសាកសួរ។
អ្នកស្រី ណុប សុផានី ជាភរិយាជនរងគ្រោះបានប្រាប់ថាអ្នកស្រីមិនបានដឹងពីការចោទប្រកាន់របស់តុលាការទៅលើមន្ត្រីនគរបាលនោះទេ។
អ្នកស្រីបាននិយាយថា៖ «ពួកគាត់បានចុះមកកាលពីយប់ថ្ងៃអាទិត្យ ហើយខ្ញុំបានប្រាប់គាត់ថា ខ្ញុំមិនចង់ប្តឹង ឬយកទោសពៃរ៍អីទេ ទោះជាខ្ញុំប្តឹងរកទោសពៃរ៍ ក៏ប្តីខ្ញុំមិនរស់មកវិញដែរ។ តែគាត់បានប្រាប់ខ្ញុំ មិនអីទេ យើងបានចាប់អ្នកនោះហើយ»។
អ្នកស្រីបន្ថែមថា៖ «ខ្ញុំគិតថាវាយុត្តិធម៌សម្រាប់ខ្ញុំ ឲ្យតែម្នាក់នោះបានចូលគុក មួយឆ្នាំ ឬបីឆ្នាំក៏ដោយ។ ខ្ញុំនៅតែឆ្ងល់ថា ហេតុអីគេមកបង្ក្រាបថ្ងៃហ្នឹង គេជល់មាន់រាល់ថ្ងៃ ហេតុអីមកបង្ក្រាបថ្ងៃហ្នឹង»។
លោក យឹម សារ៉ាន់ អធិការខណ្ឌពោធិ៍សែនជ័យបានប្រាប់ភ្នំពេញប៉ុស្តិ៍នៅថ្ងៃអង្គារថាលោកទទួលស្គាល់នូវភាពចន្លោះប្រហោងក្នុងការអនុវត្តការងារ។
លោកថ្លែងថា៖ «ការងារហ្នឹងយើងមិនដែលធ្វើឲ្យមានបទល្មើសយើងមិនដែលឲ្យប្រើប្រាស់ដល់ថ្នាក់ផ្ទុះអាវុធទេ។ ពេលនោះដោយសារអី? ដោយសារកម្លាំងយើង គាត់មានការជ្រួលច្របល់ព្រោះមនុស្សច្រើនពេកហើយកងកម្លាំងយើងជ្រុះអាវុធ ជ្រុះអី ទីងណាត់ទីងណែងពេលហ្នឹង។ ពេលហ្នឹង យើងមានចន្លោះប្រហោង»។
លោក ជួន សុវណ្ណ ស្នងការនគរបាលរាជធានីភ្នំពេញមានប្រសាសន៍ថា ក្រោយមានការផ្ទុះអាវុធបណ្តាលឲ្យស្លាប់មនុស្ស សមត្ថកិច្ចស្នងការដ្ឋានបានឃាត់មន្ត្រីនគរបាល ២ នាក់មកធ្វើការសាកសួរ និងបានដោះលែងម្នាក់ទៅវិញក្រោយមានការធ្វើកោសល្យវិច័យលើកាំភ្លើង និងគ្រាប់ដែលបាញ់ចំបុរសរងគ្រោះស្លាប់។
លោកថ្លែងថា៖ «បន្ទាប់ពីធ្វើកោសល្យវិច័យហើយ យើងរកឃើញអ្នកណាដែលជាអ្នកបង្កឲ្យមានគ្រោះថ្នាក់ដល់ស្លាប់។ ក្នុងចំណោមមនុស្សហ្នឹងមាន ២ នាក់ផ្ទុះអាវុធ អ៊ីចឹងមិនដឹងមួយណាដែលធ្វើឲ្យរងគ្រោះដល់ប្រជាពលរដ្ឋ អ៊ីចឹងយើងយកមកឃាត់ទាំង ២ ហើយធ្វើកោសល្យវិច័យទៅលើភ័ស្តុតាងដែលយើងដកហូតបានពីកន្លែងកើតហេតុមានសំបកគ្រាប់ ហើយនិងក្បាលគ្រាប់ វះយកពីសពរបស់ជនរងគ្រោះ។ បន្ទាប់ពីធ្វើកោសល្យវិច័យហើយបានយើងរកឃើញថាអាវុធមួយណាដែលផ្តល់គ្រោះថ្នាក់ដល់ជនរងគ្រោះ»។
គួររំឭកផងដែរថាករណីផ្ទុះអាវុធក្នុងពេលបង្ក្រាបការជល់មាន់ និងអាប៉ោងនេះ បានកើតឡើងនៅម៉ោងប្រហែល ១១ ព្រឹក ថ្ងៃអាទិត្យនៅចំណុចក្រោយផ្សារកាណាស៊ីធី សង្កាត់ចោមចៅ ២ ខណ្ឌពោធិ៍សែនជ័យ៕