ភ្នំពេញៈ នគរបាលដែលបាញ់បង្ក្រាបល្បែងជល់មាន់បណ្ដាលឲ្យស្លាប់ពលរដ្ឋស្លូតត្រង់នៅខណ្ឌពោធិ៍សែនជ័យកាលពីខែមករាត្រូវតុលាការកាត់ទោសកាលពីម្សិលមិញដោយសម្រេចដាក់គុក ១ ឆ្នាំ ប៉ុន្តែទោសនេះត្រូវព្យួរទាំងស្រុងតាមការស្នើសុំរបស់តំណាងអយ្យការ។
លោក រស់ ពិសិដ្ឋ ចៅក្រមជំនុំជម្រះនៃសាលាដំបូងរាជធានីភ្នំពេញបានបើកសវនាការជំនុំជម្រះជនជាប់ចោទ ចន វីរៈ អាយុ ២៥ ឆ្នាំដែលមានមុខងារជាមន្ត្រីប៉ូលិសខណ្ឌពោធិ៍សែនជ័យដែលជាប់ចោទពីបទមនុស្សឃាតដោយអចេតនាដោយសម្រេចដាក់ពន្ធនាគារ ១ ឆ្នាំ តែទោសទាំងមូលត្រូវព្យួរ និងបើកផ្លូវប្តឹងឧទ្ធរណ៍តាមកំណត់ច្បាប់។
លោកបានថ្លែងថា៖ «តុលាការប្រកាសសាលក្រមផ្ដន្ទាទោសដាក់ពន្ធនាគាររយៈពេល ១ ឆ្នាំ ប៉ុន្ដែទោសទាំងមូលត្រូវព្យួរពីបទមនុស្សឃាតដោយអចេតនា។ វត្ថុចាប់យកត្រូវប្រគល់ទៅឲ្យអង្គភាពដើមវិញ»។
ការប្រកាសផ្ដន្ទាទោសនេះធ្វើឡើងភ្លាមៗក្រោយពេលចៅក្រម រស់ ពិសិដ្ឋ និងតំណាងអយ្យការលោក សៀង សុខ បានសួរដេញដោលលើជនជាប់ចោទ ចន វីរៈ និងតំណាងជនរងគ្រោះរយៈពេលប្រមាណជាមួយម៉ោង ហើយបានថយទៅពិចារណារយៈពេលប្រមាណ ១០ នាទី។
ក្នុងដំណាក់កាលសួរដេញដោលជនជាប់ចោទ ចន វីរៈ មិនអាចឆ្លើយនឹងសំណួរជាច្រើនរបស់ចៅក្រម និងតំណាងអយ្យការជាហេតុធ្វើឲ្យចៅក្រមបានជជីកសួរដោយប្រើសំណួរនាំមុខជាច្រើន។ សំណួរដែល ចន វីរៈ មិនអាចឆ្លើយភ្លាមៗគឺពាក់ព័ន្ធនឹងកាំភ្លើង។
នៅពេលលោក រស់ ពិសិដ្ឋ សួរថា តើកាំភ្លើងនេះជារបស់ផ្ទាល់ខ្លួន ឬជារបស់អង្គភាព ឈ្មោះ ចន វីរៈ ពីដំបូងឆ្លើយមិនចេញ ប៉ុន្តែក្រោយពេលចៅក្រមពន្យល់បន្តិចរួចមក គាត់បានឆ្លើយថា កាំភ្លើងម៉ាក Berretta ជារបស់អង្គភាពមាន ៥ គ្រាប់ ប៉ុន្តែគាត់បាញ់តែ ១ គ្រាប់ទេ។
ជនជាប់ចោទបានទទួលស្គាល់កំហុសរបស់ខ្លួនដោយថ្លែងថា៖ «ខ្ញុំទៅគ្នា ៦ នាក់ ដំបូងទៅបង្ក្រាបគ្រឿងញៀន ហើយក្រោយមកក៏បង្ក្រាបល្បែងជល់មាន់ដែលមានអ្នកលេងប្រហែល ៤០ នាក់។ ពេលទៅដល់អ្នកលេងល្បែងរត់ប្រសេចប្រសាច ហើយប៊ិះប៉ះទង្គិចជាមួយនាយផ្នែក ខ្ញុំក៏បាញ់ឡើងលើមួយគ្រាប់។ ពួកគេអត់មានអាវុធទេ ហើយអត់បានមកប្រតាយប្រតប់ជាមួយខ្ញុំទេ។ ការបាញ់នេះមិនមានបានទទួលបទបញ្ជាពីថ្នាក់លើទេ»។
ចន វីរៈ និយាយថាគេបានធ្វើជាប៉ូលិសបាន ២ ឆ្នាំ ហើយធ្លាប់ផ្ទុះអាវុធចំនួន ២ ដងក្នុងប្រតិបត្តិការបង្ក្រាបបទល្មើស។
ចៅក្រមក៏បានឲ្យអ្នកស្រី ណុប សុផានី ត្រូវជាភរិយារបស់ជនរងគ្រោះ សៀក រ៉ន ឡើងថ្លែងអ្វីដែលអ្នកស្រីបានដឹង។ អ្នកស្រី ណុប សុផានី និយាយថា៖ «ខ្ញុំកំពុងនៅក្នុងបន្ទប់ជាន់ទី ៣ ។ ប្តីខ្ញុំមកពីក្រោម គាត់ឈរមើលសមត្ថកិច្ចបង្ក្រាបកន្លែងជល់មាន់នៅបង្កាន់ដៃ។ ខ្ញុំឮស្នូរអាវុធ ៣ ទៅ ៤ គ្រាប់ ខ្ញុំរត់ចេញមកឃើញប្តីដួល ខ្ញុំសួរថាម៉េចក៏ដួល គាត់ចង្អុលថាគេបាញ់។ យើងហៅឡានពេទ្យ តែឡានមកមិនទាន់ម្ចាស់ផ្ទះជួលក៏យកម៉ូតូជូនទៅពេទ្យ តែគាត់ស្លាប់តាមផ្លូវបាត់ហើយ»។
បើទោះជាហេតុការណ៍បង្ក្រាបល្បែងស៊ីសងបណ្ដាលឲ្យស្លាប់នេះ ទើបកើតឡើងបាន ២០ ថ្ងៃក៏ដោយ អ្នកស្រី ណុប សុផានី បានអនុគ្រោះដល់ជនដៃដល់ដែលសម្លាប់ប្តីគាត់ដោយអចេតនា
ដោយអ្នកស្រីនិយាយថា៖ «កាលពីមុនខ្ញុំអត់ដឹងថាអ្នកណាជាអ្នកបាញ់ទេ ទើបតែឃើញពេលនេះទេ។ ខ្ញុំអត់ទាមទារសំណងបន្ថែមទេ ព្រោះគិតថានេះជារឿងអចេតនា។ តែនេះជាមេរៀនទី ១ និងចុងក្រោយសម្រាប់សមត្ថកិច្ចគ្រប់គ្នាកុំឲ្យមានរឿងអ៊ីចឹងទៀត។ វាមិនសមសោះតែវាជារឿងចៃដន្យ។ នេះជីវិតមនុស្សមិនមែនជីវិតសត្វទេ»។
អ្នកស្រីនិយាយថា អ្នកស្រីបានទទួលសំណងចំនួន ៨ ពាន់ដុល្លារពីភាគីក្រុមការងាររបស់ជនជាប់ចោទ និងប្រាក់សម្រាប់ធ្វើបុណ្យពីសមត្ថកិច្ចខណ្ឌពោធិ៍សែនជ័យ។
ក្រោយពេលសួរដេញដោលតំណាងអយ្យការលោកសៀង សុខ បានសន្និដ្ឋានដោយស្នើឲ្យតុលាការ «ផ្ដន្ទាទោសជនជាប់ចោទពីបទមនុស្សឃាតដោយអចេតនាតាមមាត្រា ២០៧ នៃក្រមព្រហ្មទណ្ឌ និងស្នើឲ្យលោកចៅក្រមផ្តន្ទាទោសដោយព្យួរទោសដើម្បីឲ្យគាត់ត្រឡប់ទៅបំពេញការងារវិញ»។
លោក សុក សំអឿន មេធាវី និងជាអ្នកជំនាញផ្នែកច្បាប់ពន្យល់ថា សាលក្រមអាចចូលជាធរមានក្នុងរយៈពេលមួយខែ «ប៉ុន្តែបើតំណាងអយ្យការចារប្រាប់ចៅក្រមថា គាត់មិនប្តឹងឧទ្ធរណ៍សាលក្រមនឹងចូលជាធរមាន»។
លោក សៀង សុខ មិនអាចសុំការបញ្ជាក់បន្ថែមបានទេម្សិលមិញ។ ប៉ុន្តែគិតត្រឹមរសៀលម្សិលមិញ លោក ពេជ្រ យ៉ុន ប្រធានពន្ធនាគារ PJ ដែលជនជាប់ចោទត្រូវឃុំខ្លួនទីនោះឲ្យដឹងថា លោកមិនទាន់ទទួលបានដីកាឲ្យដោះលែងឈ្មោះ ចន វីរៈ នៅឡើយ៕