.jpg)
ភរិយា និងកូនទាំង ៥ នាក់របស់លោក កែម ឡី ដែលកំពុងរស់នៅប្រទេសអូស្ត្រាលី។ រូបថត ហ្វេសប៊ុក
ភ្នំពេញៈ អាជ្ញាធរអូស្ត្រាលីកាលពីថ្ងៃព្រហស្បតិ៍ម្សិលមិញបានបញ្ជាក់ថា ពួកគេបានចាប់ផ្តើមការស៊ើបអង្កេតមួយទៅលើសារសរសេរគំរាមសម្លាប់ដែលផ្ញើទៅគ្រួសាររបស់លោក កែម ឡី និងសមាជិកសភារដ្ឋ Victoria លោក ហុង លីម។
លិខិតដែលសរសេរដោយការវាយកុំព្យូទ័រនេះត្រូវបានរាយការណ៍ទៅនគរបាលរដ្ឋ Victoria ទំនងជាត្រូវបានសរសេរដោយនរណាម្នាក់ដែលត្រូវបានអះអាងថា ជាសមាជិកឥស្សរជននយោបាយរបស់កម្ពុជា។
មន្ត្រីនគរបាលអូស្ត្រាលី លោក Cameron Scott បានថ្លែងតាមអ៊ីមែលកាលពីថ្ងៃព្រហស្បតិ៍ថា៖ «នគរបាលរដ្ឋ Victoria បានចាប់ផ្តើមការស៊ើបអង្កេតមួយបន្ទាប់ពីមានការរាយការណ៍ថា លិខិតគំរាមកំហែងនោះត្រូវបានយកទៅឲ្យបុរសម្នាក់កាលពីដើមខែមីនា»។ នេះជាការឆ្លើយតបនឹងសំណួរអំពីការរាយការណ៍នៃការគំរាមកំហែងដែលទទួលដោយតំណាងរាស្ត្រ និងជាសមាជិកសហគមន៍ខ្មែរអូស្ត្រាលី។ ដោយសារតែច្បាប់ស្តីពីភាពឯកជន នគរបាលបានបដិសេធឆ្លើយតបនឹងសំណួរពាក់ព័ន្ធនឹងបុគ្គលជាក់លាក់។
លោក Scott បានថ្លែងបន្តថា៖ «ខណៈការស៊ើបអង្កេតកំពុងបន្តធ្វើ វាមិនសមស្របទេដែលត្រូវធ្វើអត្ថាធិប្បាយបន្ថែម»។
លិខិតនេះសំដៅទៅលោក ហុង លីម និងគ្រួសារ ព្រមទាំង ភរិយារបស់លោក កែម ឡី អ្នកស្រី ប៊ូ រចនា និងកូនៗរបស់គាត់។ អ្នកស្រី រចនា និងកូនប្រុស ៥ នាក់របស់អ្នកស្រីកាលពីពេលថ្មីៗនេះត្រូវបានផ្តល់ឲ្យនូវសិទ្ធិជ្រកកោនក្នុងទីក្រុង Melbourne គឺអស់រយៈពេលជាង ១៨ ខែបន្ទាប់ពីលោក កែម ឡី ត្រូវបានធ្វើឃាត។
លិខិតនេះក៏សំដៅទៅគ្រួសារលោក ជា យូហន ដែលជាអភិបាលក្រុង Greater Dandenong និងប្រធានសមាគមកម្ពុជានៅក្នុងរដ្ឋ Victoria និងសមាជិកក្រុមប្រឹក្សាក្រុង Greater Dandenong លោក តាក់ ម៉េងហ៊ាង។ ក្រុង Dandenong គឺជាជាយក្រុងនៃទីក្រុង Melbourne។
លិខិតគំរាមនោះសរសេរថា៖ «អញនឹងសម្លាប់ពួកឯងទាំងអស់។ អញនឹងបាញ់ពួកឯង ឲ្យងាប់ដូចអា កែម ឡី»។
លោក កែម ឡី ដែលជាអ្នកវិភាគនយោបាយល្បីឈ្មោះម្នាក់ត្រូវបានបាញ់សម្លាប់ទាំងកណ្តាលថ្ងៃកាលពីខែកក្កដាឆ្នាំ ២០១៦ គ្រាន់តែប៉ុន្មានថ្ងៃ បន្ទាប់ពីលោកបាននិយាយនៅក្នុងវិទ្យុអំពីរបាយការណ៍មួយពាក់ព័ន្ធនឹងទ្រព្យសម្បត្តិ និងអត្ថប្រយោជន៍អាជីវកម្មរបស់គ្រួសារមន្ត្រីជាន់ខ្ពស់កម្ពុជា។
នៅពេលឃាតករត្រូវបានចាប់ខ្លួនភ្លាមៗ និងផ្តន្ទាទោស ចម្លើយសារភាពរបស់គាត់ត្រូវបានចោទសួរដោយគ្រួសារលោក កែម ឡី ហើយសូម្បីតែអាជ្ញាធរបានទទួលស្គាល់ថាគាត់ទំនងជាមិនប្រព្រឹត្តសកម្មភាពនោះដោយម្នាក់ឯងបានទេ។ ទោះបីយ៉ាងណាក្តីការស៊ើបអង្កេតចំពោះការបាញ់លោក កែម ឡី ត្រូវបានបញ្ចប់ដោយមិនមានការកំណត់អត្តសញ្ញាណជនសង្ស័យបន្ថែមឡើយ ហើយការសម្លាប់នេះត្រូវបានមជ្ឈដ្ឋានជាច្រើនជឿថា ជារឿងនយោបាយ។
លិខិតគំរាមនោះបានហៅអ្នកដែលត្រូវបានគំរាមទាំងនោះថាជា «អាឆ្កែអូស្ត្រាលី» ហើយអ្នកសរសេរលិខិតនោះអះអាងថា មានប្រពន្ធ និងកូននៅប្រទេសអូស្ត្រាលី និងសិទ្ធិមក និងទៅពេលណាក៏បាន។
លិខិតនោះសរសេរបន្តថា៖ «យើងនឹងគ្រប់គ្រងកម្ពុជាជារៀងរហូត។ យើងនឹងឈ្នះការបោះឆ្នោតឆ្នាំ ២០១៨ នឹងនៅកាន់អំណាចជារៀងរហូត»។
សមាជិកសភារដ្ឋ Victoria លោក ហុង លីម បានថ្លែងថា លោកបានរាយការណ៍អំពីលិខិតគំរាមនេះទៅនគរបាលអូស្ត្រាលីហើយត្រូវបានជម្រាបថា នគរបាលអូស្ត្រាលីកំពុងស៊ើបអង្កេត។
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានថ្លែងថា បើទោះបីជាមានការសំដៅទៅការឈ្នះឆ្នោតនាពេលខាងមុខក៏ដោយ ក៏គណបក្សប្រជាជនកម្ពុជាមិននៅពីក្រោយការគំរាមសម្លាប់នេះទេ។ «គណបក្សប្រជាជនកម្ពុជាមិនដែលធ្វើរឿងគួរឲ្យអាម៉ាស់បែបនោះទេ»។
លោកបានថ្លែងដោយសំដៅទៅលោក ហុង លីម ថា៖ «ខ្ញុំគិតថា វាគ្រាន់តែជាជំងឺផ្ទាល់ខ្លួនគាត់ដែលភ័យខ្លាចស្រមោលខ្លួនឯង»។ «គាត់បានធ្វើរឿងអគតិជាច្រើន រឿងអបិយជំនឿ ប៉ះពាល់ដល់កិត្តិយសសម្តេច ហ៊ុន សែន ដូចជា ការដុតរូប ដូច្នេះគាត់ភ័យខ្លាចថា វា [នឹង] ត្រឡប់ទៅរកគាត់វិញ»។
លោកបានចោទលោក លីម ថាព្យាយាមទម្លាក់កំហុសទៅលើលោកនាយករដ្ឋមន្ត្រី ប៉ុន្តែថ្លែងថាវាគ្រាន់តែជាការដាក់បន្ទុកមួយទៅអាជ្ញាធរអូស្ត្រាលីប៉ុណ្ណោះ។ «យើងនឹងសហការជាមួយអូស្ត្រាលីដើម្បីធ្វើការស៊ើបអង្កេត»៕ PS
រាយការណ៍បន្ថែមដោយ គង់ មេត្តា
