Search form

Login - Register | FOLLOW US ON

Logo of Phnom Penh Post newspaper Phnom Penh Post - នាយក​រដ្ឋមន្ត្រី​​ បញ្ជាក់​ពី​រឿង​ទទួល​ខ្មែរ​ជាប់​ទោស ​ពី​អាមេរិក

Content image - Phnom Penh Post
លោក​នាយក​រដ្ឋមន្ត្រី ហ៊ុន សែន ក្នុង​ពិធី​ចែក​សញ្ញាបត្រ​កាលពី​ម្សិលមិញ។ រូបថត ហ្វេសប៊ុក

នាយក​រដ្ឋមន្ត្រី​​ បញ្ជាក់​ពី​រឿង​ទទួល​ខ្មែរ​ជាប់​ទោស ​ពី​អាមេរិក

ភ្នំពេញៈ ប្រមុខ​រដ្ឋាភិបាល​កម្ពុជា​បាន​ជម្រះ​មន្ទិល​សង្ស័យ​ដែល​ថា​មាន​ការ​លុប​ចោល​កិច្ចព្រមព្រៀង​ទទួល​ពលរដ្ឋ​ខ្មែរ​ដែល​ជាប់​ទោស​នៅ​អាមេរិក​មក​កម្ពុជា​វិញ ដោយ​បាន​ហៅ​ការ​លើក​ឡើង​មួយ​ចំនួន​ថា​ជា​រឿង​មិន​ពិត ប៉ុន្តែ​បាន​បញ្ជាក់​ថា​កម្ពុជា​គ្រាន់តែ​ស្នើសុំ​ធ្វើ​វិសោធនកម្ម​ក្រោម​ហេតុផល​មនុស្សធម៌ និង​សិទ្ធិ​មនុស្ស​ប៉ុណ្ណោះ។

ក្នុង​ពិធី​ចែក​សញ្ញាបត្រ​ដល់​និស្សិត​សាកលវិទ្យាល័យ​មួយ​នៅ​វិទ្យាស្ថានជាតិ​អប់រំ​កាលពី​ម្សិលមិញ​លោក​ នាយក​រដ្ឋមន្ត្រី ហ៊ុន សែន បាន​ថ្លែង​ថា​កម្ពុជា​មាន​កិច្ចព្រមព្រៀង​មួយ​ជាមួយ​សហរដ្ឋ​អាមេរិក​ក្នុង​ការ​ទទួល​យក​ពលរដ្ឋ​ខ្មែរ​នៅ​អាមេរិក​ដែល​ជាប់​ទោស​រួច​ហើយ​ឲ្យ​វិល​ត្រឡប់​មក​កម្ពុជា​វិញ។

លោក​ថា​កិច្ចព្រមព្រៀង​នេះ​ត្រូវ​បាន​មនុស្ស​មួយ​ចំនួន​លើក​ឡើង​ថា​កម្ពុជា​បាន​លុប​ចោល​ជា​ឯកតោ​ភាគី​តែ​លោក​ថា​ការ​លើក​ឡើង​នេះ​មិន​ពិត​ទេ ដោយ​កម្ពុជា​គ្រាន់​តែ​ស្នើសុំ​ធ្វើ​វិសោធនកម្ម​លើ​កិច្ចព្រមព្រៀង​នោះ​ប៉ុណ្ណោះ។

លោក​ថ្លែង​ថា៖ «កម្ពុជា​មាន​កិច្ចព្រមព្រៀង​ជាមួយ​អាមេរិក​សម្រាប់​ទទួល​ពលរដ្ឋ​ខ្មែរ​ដែល​ទៅ​រស់នៅ​អាមេរិក​ហើយ​ជាប់​គុក បន្ទាប់ពី​ជាប់គុក​ត្រូវ​បញ្ជូន​មក​កម្ពុជា...កិច្ចព្រមព្រៀង​នេះ​មិន​ត្រូវ​បាន​លុប​ចោល​ទេ តែ​យើង​សុំ​ធ្វើ​វិសោធនកម្ម​លើ​កិច្ចព្រមព្រៀង​នេះ​ដោយសារ​មូលហេតុ​មនុស្សធម៌ និង​សិទ្ធិ​មនុស្ស»។

លោក​ថា​រដ្ឋាភិបាល​កម្ពុជា​មាន​កាតព្វកិច្ច​គាំពារ​សិទ្ធិ​ពលរដ្ឋ​ខ្លួន​ដែល​កំពុង​រស់នៅ​អាមេរិក ប៉ុន្តែ​លោក​ថា​ការ​បញ្ជូន​ពួកគេ​មក​កម្ពុជា​វិញ ក្រោយ​ពី​ការ​អនុវត្ត​ទោស​គឺ​ជា​រឿង​អាណោច​អាធ័ម​មួយ​ដែល​ធ្វើ​ឲ្យ​អ្នក​ទាំង​នោះ​ព្រាត់ប្រាស​គ្រួសារ។

លោក​បន្ត​ថា៖ «តើ​វា​ជា​ភាព​អាណោចអាធ័ម​ទេ​អារឿង​ជាប់​គុក​នៅ​អាមេរិក​ជា​រឿង​មួយ​ហើយ តែ​រឿង​ធំ​ជាង​នេះ​គឺ​នៅ​ពេល​គេ​បញ្ជូន​មក​រស់នៅ​កម្ពុជា កូន​ប្រពន្ធ​នៅ​បន្ត​រស់នៅ​អាមេរិក​នេះ​គឺជា​ការ​បែកបាក់​ដ៏គួរ​ឲ្យ​អាណិត...យើង​ស្នើសុំ​ឲ្យ​ធ្វើ​វិសោធនកម្ម​លើ​កិច្ចព្រមព្រៀង​បញ្ជូន​ពលរដ្ឋ​ខ្មែរ​ដែល​ជាប់​ទោស​នៅ​អាមេរិក​ត្រឡប់​មក​កម្ពុជា...រដ្ឋាភិបាល​ក៏​ត្រូវ​គិត​ដល់​ពលរដ្ឋ​របស់​ខ្លួន...មូលហេតុ​ផ្តើម​ចេញ​ពី​មនុស្សធម៌ និង​សិទ្ធិ​មនុស្ស​ហើយ​សង្ឃឹម​ថា...សហរដ្ឋ​អាមេរិក​ដែល​តាំង​ខ្លួន​ជា​បិតា​សិទ្ធិ​មនុស្ស​នឹង​គោរព​ដល់​សិទ្ធិ​មនុស្ស ទទួល​យក​នូវ​សំណើ​សុំ​ធ្វើ​វិសោធនកម្ម​នេះ​ដើម្បី​ផ្តល់​ឱកាស​ឲ្យ​ពលរដ្ឋ​ខ្មែរ​ដែល​ជាប់​ទោស​បាន​បន្ត​ស្នាក់​នៅ​លើ​ទឹកដី​អាមេរិក​ជួបជុំ​គ្រួសារ​នៅ​ក្នុង​ទឹកដី​អាមេរិក​ហើយ​មិន​ត្រូវ​ទទួល​នូវ​ទណ្ឌកម្ម​អស់​មួយ​ជីវិត​នៃ​ការ​បែកបាក់​ដោយសារ​តែ​ការ​បញ្ជូន​អ្នក​ទាំង​នេះ​មក​កម្ពុជា​ទេ»។

ទាក់ទង​នឹង​ករណី​នេះ​ដែរ​អ្នក​នាំពាក្យ​ក្រសួង​ការបរទេស​កម្ពុជា​លោក ជុំ សុន្ទរី កាលពី​ថ្ងៃ​ទី ២៥ ខែ​មេសា ឆ្នាំ ២០១៧ តាមរយៈ​លិខិត​កែតម្រូវ​មួយ បាន​ច្រាន​ចោល​ព័ត៌មាន​ដែល​ថា​កម្ពុជា​បាន​បញ្ឈប់​ការ​អនុវត្ត​កិច្ចព្រមព្រៀង​នេះ។

លោក​បញ្ជាក់​ថា​កម្ពុជា​មាន​បំណង​ធ្វើ​វិសោធនកម្ម​លើ​កិច្ចព្រមព្រៀង​នេះ​ដើម្បី​ឆ្លើយតប​ទៅ​នឹង​ទិដ្ឋភាព​មនុស្ស​ធម៌ និង​មេត្តា​ធម៌។

លោក​សរសេរ​ថា៖ «កិច្ចព្រមព្រៀង​នេះ​នៅ​តែ​បន្ត​អនុវត្ត​ក្នុង​ពេល​ភាគី​ទាំង​ពីរ​ធ្វើការ​ពិភាក្សា​លើ​វិសោធនកម្ម​នេះ»។

បើ​តាម​លោក ជុំ សុន្ទរី គិត​ចាប់​ពី​ឆ្នាំ ២០០២ មក​ទល់​ឆ្នាំ​នេះ​មាន​ពលរដ្ឋ​ខ្មែរ​នៅ​សហរដ្ឋ​អាមេរិក​ចំនួន ៥៤៩ នាក់​ហើយ​ដែល​ត្រូវ​បាន​បញ្ជូន​ត្រឡប់​មក​កម្ពុជា បន្ទាប់ពី​ពួកគេ​បាន​អនុវត្ត​ទោស​នៅ​សហរដ្ឋ​អាមេរិក​រួច​រាល់៕

0

Comments

Please, login or register to post a comment

ព័ត៌មានពាក់ព័ន្ធ