Search form

Login - Register | FOLLOW US ON

Logo of Phnom Penh Post newspaper Phnom Penh Post - បក្ស​ប្រឆាំង​បដិសេធ​រាល់​សកម្មភាព​របស់​ទណ្ឌិត

Content image - Phnom Penh Post
លោក​ យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ​។ ស្រេង ម៉េងស្រ៊ុន

បក្ស​ប្រឆាំង​បដិសេធ​រាល់​សកម្មភាព​របស់​ទណ្ឌិត

ភ្នំពេញៈ គណបក្ស​ប្រឆាំង​បាន​ចេញ​សេចក្តី​ថ្លែងការណ៍​មួយ​បដិសេធ​រាល់​ការ​ចុះ​ផ្សាយ និង​សកម្មភាព​របស់​ទណ្ឌិត​ធ្វើ​ឡើង​ដោយ​បុគ្គល​ណា​ក៏ដោយ ដោយ​អះអាង​ថា​នេះ​មិនមែន​ជា​ការ​ទទួល​ខុសត្រូវ​របស់​គណបក្ស​ទេ វា​គឺជា​រឿង​របស់​បុគ្គល ប៉ុន្តែ​គណបក្ស​កាន់​អំណាច​បាន​អះអាង​ថា​ប្រសិន​បើ​គណបក្ស​ប្រឆាំង​ពាក់ព័ន្ធ វា​អាស្រ័យ​លើ​សេចក្តី​សម្រេច​របស់​តុលាការ​។

នៅ​ក្នុង​សេចក្តី​ថ្លែងការណ៍​មួយ​ចេញ​កាលពី​ម្សិលមិញ​បាន​បញ្ជាក់​ថា​គណបក្ស​សង្គ្រោះ​ជាតិ​មិន​ទទួល​ខុសត្រូវ​ចំពោះ​រាល់​ការ​ចុះ​ផ្សាយ ឬ​សកម្មភាព​ដែល​ធ្វើ​ឡើង ឬ​សម្រេច​ដោយ​បុគ្គល​ដែល​មិនមែន​ជា​សេចក្តី​សម្រេច​របស់​គណបក្ស​សង្គ្រោះ​ជាតិ​ដូចជា ការ​ប្រើប្រាស់​សារ​ជា​សំឡេង រូបភាព ឯកសារ​ជា​លាយលក្ខណ៍​អក្សរ ឬ​ការ​ឃុបឃិត​ជាមួយ​ទណ្ឌិត​ដែល​ភ្ជាប់​មក​គណបក្ស​សង្គ្រោះ​ជាតិ​។

សេចក្តី​ថ្លែងការណ៍​នេះ​បាន​បញ្ជាក់​ថា​រាល់​សេចក្តី​សម្រេច​ដែល​នឹង​ត្រូវ​ទទួល​ខុស​ត្រូវ​ដោយ​គណបក្ស​សង្គ្រោះ​ជាតិ​គឺជា​សេចក្តី​សម្រេច​ណា​ដែល​ត្រូវ​តែ​សម្រេច​ដោយ​សមាជ​ ឬ​ ក្រុម​ប្រឹក្សា​ជាតិ ឬ​គណៈកម្មាធិការ​អចិន្ត្រៃយ៍ ឬ​គណៈកម្មាធិការ​នាយក​ដែល​សម្រេច​ទៅ​តាម​លក្ខន្តិកៈ​របស់​បក្ស​។

អ្នក​នាំ​ពាក្យ​គណបក្ស​សង្គ្រោះ​ជាតិ​លោក យឹម សុវណ្ណ បាន​ថ្លែង​ថា​សេចក្តី​ថ្លែងការណ៍​នេះ​គឺ​ដើម្បី​ឆ្លើយតប​ទៅ​នឹង​ច្បាប់​ស្តីពី​គណបក្ស​នយោបាយ​ដ៏ចម្រូងចម្រាស​ដែល​ទើប​តែ​ត្រូវ​បាន​ចុះហត្ថលេខា​ចូល​ជា​ធរមាន​ហាមប្រាម​ទណ្ឌិត​មិន​ឲ្យ​ពាក់ព័ន្ធ​ជាមួយ​គណបក្ស ហើយ​លោក​ថា​ប្រសិន​បើ​បុគ្គល​ណា​ម្នាក់​ទាក់ទង​ជា​ចំហ​ ឬ​នៅ​តែ​រក្សា​ទំនាក់ទំនង​ជាមួយ​ទណ្ឌិត វា​ជា​រឿង​បុគ្គល​របស់​គាត់​។

លោក យឹម សុវណ្ណ ថ្លែង​បន្ត​ថា​៖ «[​បុគ្គល​ណា​] ​ចង់​បញ្ចេញ​មតិ វា​ជា​រឿង​របស់​គាត់ វា​មិនមែន​ជា​ការ​បញ្ចេញ​មតិ​របស់​បក្ស​ទេ លុះត្រាតែ​ជា​សេចក្តី​សម្រេច​របស់​គណៈកម្មាធិការ​អចិន្ត្រៃយ៍ គណៈកម្មាធិការ​នាយក និង​អ្នក​នាំ​ពាក្យ​»​។

ច្បាប់​ស្តីពី​គណបក្ស​នយោបាយ​ត្រូវ​បាន​ធ្វើ​វិសោធនកម្ម​ដោយ​តំណាងរាស្ត្រ និង​សមាជិក​ព្រឹទ្ធសភា​របស់​គណបក្ស​ប្រជាជន​កម្ពុជា​ដែល​ជា​គណបក្ស​កាន់​អំណាច​កាលពី​ខែ​មុន​ហើយ​នៅ​ថ្ងៃ​ទី ​២៨ ខែ​កក្កដា​ច្បាប់​នេះ​ត្រូវ​បាន​ចុះ​ហត្ថលេខា​ដោយ​ប្រធាន​ព្រឹទ្ធសភា​លោក សាយ ឈុំ ប្រមុខ​រដ្ឋស្តីទី​ដែល​ជា​​អនុប្រធាន​គណបក្ស​ប្រជាជន​កម្ពុជា​។

ការ​ធ្វើ​វិសោធនកម្ម​ម្តង​ហើយ​ម្តង​ទៀត​លើ​ច្បាប់​នេះ​ត្រូវ​បាន​មជ្ឈដ្ឋាន​ជាច្រើន​ចាត់ទុក​ថា​ជា​ចេតនា​ចង់​កម្ចាត់​លោក សម រង្ស៊ី ប្រធាន​គណបក្ស​សង្គ្រោះ​ជាតិ​ដែល​ជា​គូប្រកួត​ប្រជែង​នយោបាយ​កាន់តែ​ខ្លាំង​ឡើង​របស់​លោក​នាយក​រដ្ឋមន្ត្រី ហ៊ុន សែន និង​ត្រូវ​បាន​កាត់ទោស​ជា​ទណ្ឌិត​នៅ​ក្នុង​សំណុំ​រឿង​ជាច្រើន​ដែល​ប្តឹង​ដោយ​មេដឹកនាំ​គណបក្ស​ប្រជាជន​កម្ពុជា​ហើយ​ច្បាប់​នេះ​ត្រូវ​បាន​ធ្វើ​វិសោធនកម្ម​យ៉ាង​តក់ក្រហល់​បន្ទាប់ពី​ត្រូវ​បាន​ស្នើ​ឡើង​ដោយ​លោក​នាយក​រដ្ឋមន្ត្រី ហ៊ុន សែន ប្រធាន​គណបក្ស​ប្រជាជន​កម្ពុជា​។

ប៉ុន្តែ​អ្នក​នាំ​ពាក្យ​របស់​គណបក្ស​ប្រជាជន​លោក សួស យ៉ារ៉ា បាន​ថ្លែង​កាលពី​ម្សិលមិញ​ថា​គណបក្ស​នយោបាយ​មិន​អាច​បដិសេធ​ថា តើ​វា​ពាក់ព័ន្ធ​ជាមួយ​សកម្មភាព​របស់​សមាជិក​ខ្លួន​ជាមួយ​ទណ្ឌិត​ឬ​អត់​នោះ​ទេ នៅ​ពេល​តុលាការ​មិនទាន់​បាន​វិភាគ​ហើយ​ថា​សេចក្តី​ថ្លែងការណ៍​នេះ​គ្រាន់​តែ​ជា​ការ​ខំប្រឹង​របស់​គណបក្ស​ដើម្បី​ការពារ​ភាព​ស្រប​ច្បាប់​របស់​ខ្លួន​ប៉ុណ្ណោះ​។

លោក​ថា​៖ «​តំណាងរាស្ត្រ​គណបក្ស​ប្រជាជន​កម្ពុជា​បាន​អនុម័ត​ [​ច្បាប់​ស្តីពី​គណបក្ស​នយោបាយ​] ជា​ឯកច្ឆន្ទ​ក្នុង​តម្លៃ​រដ្ឋសភា​ទាំង​មូល​។ ដូច្នេះ​តម្លៃ​ [​នៃ​ច្បាប់​នេះ​] ​ត្រូវ​តែ​អនុវត្ត​ទូទាំង​ប្រទេស​»​។

«​ដូច្នេះ​ការវិភាគ​ត្រូវ​ ឬ​ខុស​មានតែ​តុលាការ​ប៉ុណ្ណោះ​»៕ PS

0

Comments

Please, login or register to post a comment

ព័ត៌មានពាក់ព័ន្ធ