Search form

Login - Register | FOLLOW US ON

Logo of Phnom Penh Post newspaper Phnom Penh Post - បក្ស​ប្រឆាំង​ នឹង​នៅ​តែ​បន្ត​ដើរ​ឆ្ពោះ​ទៅ​មុខ

Content image - Phnom Penh Post
លោក សុន ឆ័យ និង​តំណាង​រាស្ត្រ​​គណបក្ស​សង្រ្គោះ​ជាតិ​ផ្សេង​ទៀត ធ្វើ​សន្និសីទ​កាសែត​កាល​ពី​ម្សិលមិញ។ ហេង ជីវ័ន

បក្ស​ប្រឆាំង​ នឹង​នៅ​តែ​បន្ត​ដើរ​ឆ្ពោះ​ទៅ​មុខ

ភ្នំពេញៈ លោក សុន ឆ័យ អភិបាល​ក្រុម​សមាជិក​សភា គណបក្ស​សង្គ្រោះ​ជាតិ បាន​បង្ហាញ​សញ្ញា​ច្បាស់​លាស់​មួយ​កាលពីម្សិល​មិញ​ថា គណបក្ស​ប្រឆាំង នឹង​នៅ​តែ​បន្ត​ដើរ​ទៅមុខ បើ​ទោះបី​ជា​មាន​ចលាចល​ខាង​នយោបាយ​ នាពេល​បច្ចុប្បន្ន​ក្តី​ ហើយ​គណបក្ស​នេះ​ នឹង​នៅតែ​ចូលរួម​ការរ​បោះ​ឆ្នោត​ជាតិ នៅ​ឆ្នាំ ២០១៨ ខាង​មុខ។

សេចក្តី​ប្រកាស​របស់​លោក​ សុន ​ឆ័យ កើត​ឡើង​មួយ​ថ្ងៃ​ បន្ទាប់​ពី​អនុប្រធាន​គណបក្ស​លោកស្រី​ មូរ សុខហួរ​ បាន​ថ្លែង​ថា​ ការ​បដិសេធ​របស់​រដ្ឋាភិបាល​ចំពោះ​ការ​ដោះ​លែង​លោក កឹម សុខា ​ដែល​កំពុង​ជាប់​ពន្ធនាគារ អាច​នាំ​ឱ្យ​មាន​ការ​ធ្វើ​ពហិការ​ការ​បោះ​ឆ្នោត​នៅ​ឆ្នាំ​ក្រោយ។

ការ​ចាប់​ខ្លួន​លោក កឹម សុខា ដ៏​ភ្ញាក់​ផ្អើល​កាលពី​ថ្ងៃទី ៣ ខែ​ កញ្ញា​ ក្រោម​ការ​ចោទ​ប្រកាន់​ពី​បទ​ក្បត់​ជាតិ គឺ​ធ្វើ​ឡើង​ បន្ទាប់​ពី​វីដេអូ​មួយ​ បាន​បង្ហាញ​ថា​ លោក​បាន​ទទួល​ជំនួយ​ពី​សហរដ្ឋ​អាមេរិក​ ដើម្បី​រៀបចំ​គម្រោង​អាជីព​នយោបាយ​របស់​លោក ​ហើយ​​តំណាងរាស្ត្រ​គណ​បក្ស​សង្គ្រោះ​ជាតិ​ បាន​ធ្វើ​អត្ថាធិប្បាយ​ជាច្រើន​អំពី​ផែនការ​របស់​គណបក្ស ទាក់ទង​ទៅ​នឹង​ការ​បោះ​ឆ្នោត​នៅ​ឆ្នាំ​ក្រោយ ​និង​លទ្ធភាព​នៃ​ការ​ធ្វើ​បាតុកម្ម​តវ៉ា​ដែល​ជា​សំណើ​មួយ​ធ្វើ​ឡើង​ដោយ លោក អេង​ ឆៃអ៊ាង​ដែល​ជា​អនុប្រធាន​គណបក្ស​ម្នាក់​ទៀត កាល​ពី​សប្តាហ៍​មុន។

ប៉ុន្តែ​ទោះជា​យ៉ាងណា លោក​ ឆ័យ ​បាន​ថ្លែង​ថា​ គណបក្ស​ មាន​ទិស​ដៅ​តែ​មួយ​ប៉ុណ្ណោះ​ គឺ​ធ្វើ​ការ​ដើម្បី​ឆ្ពោះទៅ​រក​ការ​ប្រកួត​ប្រជែង​នៅ​ក្នុង​ការ​បោះ​ឆ្នោត​នៅ​ឆ្នាំ​ក្រោយ ​ដោយ​សង្ឃឹម​ថា​ ដំណោះ​ស្រាយ​បែប​នេះ​អាច​ដោះ​ស្រាយ​បាន​ចំពោះ​វិបត្តិ​នយោបាយ​បច្ចុប្បន្ន។

នៅក្នុង​សន្និសីទ​សារព័ត៌មាន​មួយ​ដែល​ធ្វើឡើង​នៅ​ទីស្នាក់​ការ​គណបក្ស​លោក​ ឆ័យ​ បាន​និយាយ​ថា៖ «គណបក្ស​សង្គ្រោះ​ជាតិ មាន​ទិស​ដៅ​តែ​មួយ​ទេ គឺ​ឆ្ពោះ​ទៅរក​ការ​បោះ​ឆ្នោត នៅ​ឆ្នាំ ២០១៨»។

លោក​ឆ័យ សង្ឃឹម​ថា សហគមន៍​អន្តរជាតិ​នឹង​ជួយ​អន្តរាគមន៍ ធ្វើ​ឲ្យ​ស្ថានភាព​នយោបាយ​ដែល​កំពុង​តែ​ឡើង​កម្តៅ​នាពេល​បច្ចុប្បន្ន ​នឹង​វិល​ទៅ​រក​ភាព​ប្រក្រតី​ឡើង​​វិញ។

លោក​ ​ឆ័យ​ បញ្ជាក់ថា​ ទស្សនៈ​ផ្ទាល់​ខ្លួន​ណា​មួយ​ មកពី​តំណាងរាស្ត្រ​អាច​នឹង​មិន​ត្រូវ​បាន​ពិចារណា​ឡើយ​ហើយ​គណៈកម្មាធិការ​អចិន្រៃ្តយ៍​របស់​គណបក្ស ​គណៈកម្មាធិការ​នាយក សមាជ​ប្រចាំ​ឆ្នាំ​គណបក្ស គឺ​ជា​ស្ថាប័ន​តែ​មួយ​គត់​ ដែល​មាន​សិទ្ធិ​ធ្វើ​សេចក្តី​សម្រេច​បែប​នោះ។

លោក​ស្រី មូរ សុខហួរ​ ដែល​ជា​អនុ​ប្រធាន​គណបក្ស​ ​កាល​ពី​ម្សិលមិញ​បាន​អះ​អាង​ថា លោកស្រី នឹង​លោក​ ឆ័យ កំពុង​លើក​ឡើង​ដូច​គ្នា ប៉ុន្តែ​ប្រើ​វិធី​ផ្សេង​​គ្នា​ក្នុង​ការ​និយាយ។

លោក​ស្រី​បាន​ថ្លែង​ថា ​ការ​តម្រូវ​របស់​លោក ឆ័យ​ ឲ្យ​ការ​បោះ​ឆ្នោត​មាន​លក្ខណៈ​សេរី​និង​យុត្តិធម៌​ ​រួម​មាន​​ការ​ដោះលែង ​លោក កឹម សុខា។ «គណបក្ស​ប្រឆាំង​គឺ​ច្បាស់​ណា​ស់​ចំពោះ​អ្វី​ដែល​យើង​នឹង​ប្រកួត​ប្រជែង​ការ​បោះឆ្នោត​។ ប៉ុន្តែ​​វា​ត្រូវ​តែ​សេរី និង​យុត្តិធម៌​ ​ដូច​ជាការ​ដោះលែង​លោក កឹម សុខា​»។

ទោះ​យ៉ាង​ណា​ អ្នក​នាំ​ពាក្យ​គណបក្ស​ប្រជាជន​ លោក សុខ ឥសាន ហៅ​គណបក្ស​ប្រឆាំង​ថា ​គណបក្ស​ «គ្មាន​ជំហរ» ដោយ​លើក​ឡើង​អំពី​ការ​ថ្លែង​ផ្ទុយ​គ្នា​​​របស់​សមាជិក​​គណបក្ស​ប្រឆាំង​។

លោក ​ថ្លែង​ថា៖ «លោក​ស្រី មូរ សុខហួរ និយាយ​ដូច​នេះ​ ​ហើយ​​មេដឹកនាំ​ដទៃៗ​ទៀត​​និយា​យ​ដូច​នោះ។ ដូច្នេះ​ វា​មាន​ន័យ​ថា គណបក្ស​នេះ​មិន​មាន​មុខ។ ​ពួកគេ​មិន​មាន​ជំហរ​នយោបាយ»។

ទន្ទឹម​នេះ​ដែរ គណបក្ស​សង្គ្រោះ​ជាតិ​នឹង​ប្រារព្ធ​ពិធិ​​ភ្ជុំ​បិណ្ឌ​សម្រាប់​ជន​រងគ្រោះ​នៃ​ការ​វាយ​ប្រហារ​គ្រាប់​បែក​ឆ្នាំ​ ១៩៩៧ ​​ទៅ​លើ​ការ​​ប្រមូល​ផ្តុំ​នយោបាយ​​ដែល​រៀប​ចំ​ឡើង​ដោយ​លោក សម រង្ស៊ី អតីត​មេដឹកនាំ​គណបក្ស​ប្រឆាំង។

គណបក្ស​គ្រោង​ប្រារព្ធ​ពិធី​នេះ​នៅ​វត្ត​បទុម ប៉ុន្ដែ​សាលា​រាជធានី​ភ្នំពេញ មិន​អនុញ្ញា​តឲ្យ​​ប្រារព្ធ​ពិធី​នៅ​មុខ​វត្ត​បទុម​ទេ ដោយ​ស្នើ​ឲ្យ​ធ្វើ​នៅ​តាម​វត្ត​វិញ៕NS/PS

0

Comments

Please, login or register to post a comment

ព័ត៌មានពាក់ព័ន្ធ