Search form

Login - Register | FOLLOW US ON

Logo of Phnom Penh Post newspaper Phnom Penh Post - បក្ស​ប្រជាជន​ ត្រូវ​បាន​រំពឹង​ថា ​នឹង​ឈ្នះ​អាសនៈ​ទាំងអស់​ ក្នុង​ការ​បោះឆ្នោត​ព្រឹទ្ធសភា

Content image - Phnom Penh Post
សាលប្រជុំ​នៅ​ព្រឹទ្ធសភា​កាលពី​ពេល​កន្លង​មក​។ រូបថត សហការី

បក្ស​ប្រជាជន​ ត្រូវ​បាន​រំពឹង​ថា ​នឹង​ឈ្នះ​អាសនៈ​ទាំងអស់​ ក្នុង​ការ​បោះឆ្នោត​ព្រឹទ្ធសភា

ភ្នំពេញៈ គណបក្ស​ប្រជាជន​កម្ពុជា​ត្រូវ​បាន​រំពឹង​ថា​នឹង​ឈ្នះ​អាសនៈ​ទាំងអស់​ចំនួន​ ៥៨ ​ដោយ​ងាយស្រួល​នៅ​ក្នុង​ការ​បោះឆ្នោត​ព្រឹទ្ធសភា​នា​ខែ​កុម្ភៈ បើ​ទោះបី​ជា​មាន​ការ​ធានា​អះអាង​ពី​គណបក្ស​កាន់​អំណាច​ថា ប្រជាធិបតេយ្យ​សេរី​ពហុបក្ស​កំពុង​មាន​ភាព​រីកចម្រើន​បន្ទាប់ពី​ការ​រំលាយ​គណបក្ស​សង្គ្រោះ​ជាតិ​ដែល​ជា​គណបក្ស​ប្រឆាំង​ដ៏ធំ​បំផុត​ក្នុង​ប្រទេស​កម្ពុជា​។

ការ​គណនា​មួយ​របស់​ភ្នំពេញ-ប៉ុស្តិ៍​ចំពោះ​សំឡេង​ឆ្នោត​នៅ​ក្នុង​ការ​បោះឆ្នោត​ប្រយោល​ថ្ងៃ​ទី ២៥ ខែ​កុម្ភៈ​ដែល​បោះឆ្នោត​ដោយ​ក្រុម​ប្រឹក្សា​ឃុំ សង្កាត់ និង​សមាជិក​រដ្ឋសភា​បង្ហាញ​ថា​ព្រឹទ្ធសភា​កម្ពុជា​នឹង​ជា​ស្ថាប័ន​ឯកបក្ស បើ​ទោះបី​ជា​មាន​គណបក្ស​តូចៗ​ដទៃ​ទៀត​ចំនួន​ ៣ ​ចូលរួម​ប្រកួត​ប្រជែង​សម្រាប់​អាសនៈ​ព្រឹទ្ធសភា​ក៏ដោយ​។

ការ​រំលាយ​គណបក្ស​សង្គ្រោះ​ជាតិ​កាលពី​ថ្ងៃ​ទី​ ១៦ ខែ​វិច្ឆិកា​បាន​ធ្វើ​ឲ្យ​មាន​ការ​បែងចែក​ឡើង​វិញ​នូវ​អាសនៈ​ក្រុម​ប្រឹក្សា​ឃុំ សង្កាត់​ចំនួន ៥០០៧ និង​តំណាងរាស្ត្រ​ចំនួន ៥៥ កាលពី​ដើម​ខែ​នេះ​ហើយ​តំណែង​ឃុំ សង្កាត់​ជាច្រើន បាន​ទៅ​គណបក្ស​ប្រជាជន​កម្ពុជា​ដែល​គ្រប់គ្រង​ទាំងអស់​លើក​លែង​តែ​មួយ​ឃុំ​ក្នុង​ចំណោម​ឃុំ​សង្កាត់​ចំនួន ១៦៤៦ និង​កាន់កាប់​ ៩៥ ភាគរយ​នៃ​ក្រុម​ប្រឹក្សា​ឃុំ សង្កាត់​។

ទោះ​យ៉ាង​ណា​ក្តី​គណបក្ស​កាន់​អំណាច​មិន​បាន​ចូលរួម​នៅ​ក្នុង​ការ​បែងចែក​អាសនៈ​សភា​ទេ ដោយ​ត្រួស​ត្រាយ​ផ្លូវ​ឲ្យ​គណបក្ស​តូចៗ​ចំនួន​ ៣ ចូល​ទៅ​ក្នុង​រដ្ឋសភា​។

បន្ទាប់ពី​ការ​រំលាយ​គណបក្ស​សង្គ្រោះ​ជាតិ​រដ្ឋាភិបាល​ និង​មន្ត្រី​គណបក្ស​ដែល​ដឹកនាំ​ដោយ​លោក​នាយក​រដ្ឋមន្ត្រី ហ៊ុន សែន បាន​ធានា​ចំពោះ​ប្រជាជន​កម្ពុជា​ថា​ការ​ចូលរួម​របស់​គណបក្ស​តូចៗ​ទៅ​ក្នុង​ក្រុម​ប្រឹក្សាឃុំ សង្កាត់ និង​រដ្ឋសភា​គឺ​នឹង​រក្សា​លទ្ធិប្រជាធិបតេយ្យ​សេរី​ពហុបក្ស​ឲ្យ​មាន​លក្ខណៈ​ល្អ​ប្រសើរ​។

លោក​បាន​ថ្លែង​ប៉ុន្មាន​ម៉ោង​បន្ទាប់ពី​ការ​រំលាយ​គណបក្ស​សង្គ្រោះ​ជាតិ​ថា​៖ «​រដ្ឋាភិបាល​នឹង​ប្តេជ្ញា​ការពារ​ដំណើរការ​ប្រជាធិបតេយ្យ​សេរី​ពហុបក្ស​ហើយ​ការ​បោះឆ្នោត​នាពេល​ខាង​មុខ​នឹង​ត្រូវ​រៀបចំ​ដោយ​ [​គណៈកម្មាធិការ​ជាតិ​រៀបចំ​ការ​បោះឆ្នោត​] ដែល​ជា​ស្ថាប័ន​ឯករាជ្យ​»​។

គណបក្ស​តូចៗ​ចំនួន​ ៣ ដែល​ប្រកួត​ប្រជែង​រួមមាន​គណបក្ស​ហ៊្វុនស៊ិនប៉ិច គណបក្ស​ខ្មែរ​រួបរួម​ជាតិ និង​គណបក្ស​យុវជន​កម្ពុជា​។ គណបក្ស​តូចៗ​អាច​នឹង​ទទួល​បាន​អាសនៈ​ ២-៣ ប្រសិន​បើ​សមាជិក​គណបក្ស​ប្រជាជន​កម្ពុជា បោះឆ្នោត​ឲ្យ​គណបក្ស​តូចៗ​ទាំង​នោះ​។

ខេត្ត​ចំនួន ២៤ របស់​កម្ពុជា និង​រាជធានី​ភ្នំពេញ​ត្រូវ​បាន​បែងចែក​ទៅ​ជា​តំបន់​បោះឆ្នោត​ចំនួន ៨ ដែល​បញ្ជូន​សមាជិក​ព្រឹទ្ធសភា​សរុប ៥៨ រូប​ទៅ​រាជធានី​ខេត្ត​ហើយ​ព្រះមហាក្សត្រ និង​រដ្ឋសភា​ត្រូវ​ជ្រើសរើស​សមាជិក​ ២ ​រូប​បន្ថែម​ទៀត​រៀងៗ​ខ្លួន​ដោយ​ធ្វើឲ្យ​សមាជិក​ព្រឹទ្ធសភា​សរុប​ឡើង​ដល់ ៦២ រូប​។

សមាជិក​ព្រឹទ្ធសភា​គណបក្ស​ប្រជាជន​កម្ពុជា​លោក ម៉ម ប៊ុននាង បាន​ថ្លែង​ថា នៅ​ពេល​ដែល​គណបក្ស​ចំនួន​ ៤ ​អាច​ប្រកួត​ប្រជែង​នៅក្នុង​ការ​បោះឆ្នោត​មាន​ន័យ​ថា​គោលការណ៍​ប្រជាធិបតេយ្យ​សេរី​ពហុបក្ស​ត្រូវ​បាន​គោរព​តាម​ដោយ​លោក​មិន​ចង់​ធ្វើ​អត្ថាធិប្បាយ​អំពី​ការ​គណនា​របស់​ភ្នំពេញ​ប៉ុស្តិ៍​នោះ​ទេ ប៉ុន្តែ​បាន​ថ្លែង​ថា​គណបក្ស​ប្រជាជន​កម្ពុជា​នឹង​ទទួល​បាន​អាសនៈ​ភាគច្រើន​។

លោក​បញ្ជាក់​ថា​៖ «​ជា​មធ្យម​យើង​នឹង​ទទួល​បាន​អាសនៈ​ភាគច្រើន​។ ប៉ុន្តែ​យើង​មិន​ប្រាកដ​ថា តើ​យើង​នឹង​ទទួល​បាន​ចំនួន​ប៉ុន្មាន​? ដោយសារ​យើង​មិន​ទាន់​បាន​បោះឆ្នោត​»​។

លោក ប៊ុននាង បាន​ថ្លែង​ថា​ក្រុម​ប្រឹក្សា​ឃុំ​សង្កាត់​មាន​សេរីភាព​ក្នុង​ការ​បោះឆ្នោត​ឲ្យ​នរណា​ដែល​ពួកគេ​ចង់​បោះឆ្នោត​ឲ្យ ប៉ុន្តែ​លោក​ ប៊ុននាង មិន​ឆ្លើយ​ថា​តើ​គណបក្ស​ប្រជាជន​កម្ពុជា​នឹង​អនុញ្ញាត​ឲ្យ​ក្រុម​ប្រឹក្សា​ឃុំ​សង្កាត់​របស់​ខ្លួន​បោះឆ្នោត​ឲ្យ​គណបក្ស​ដទៃ​ឬ​អត់​នោះ​ទេ​។

អ្នក​នាំពាក្យ​គណបក្ស​ខ្មែរ​រួបរួម​ជាតិ និង​គណបក្ស​ហ៊្វុនស៊ិនប៉ិច​មិន​អាច​ទាក់ទង​សុំ​អធិប្បាយ​បាន​ទេ​កាលពី​ម្សិលមិញ​។

កាលពី​ថ្ងៃ​ចន្ទ​ប្រធាន​គណបក្ស​យុវជន​កម្ពុជា​លោក ពេជ្រ ស្រស់ បាន​ថ្លែង​ថា វា​ជា​កាតព្វកិច្ច​របស់​គណបក្ស​លោក​ក្នុង​ការ​ប្រកួត​ប្រជែង​នៅ​ក្នុង​រាល់​ការ​បោះឆ្នោត បើ​ទោះបី​ជា​គណបក្ស​របស់​លោក​មាន​ក្រុម​ប្រឹក្សា​ឃុំ​សង្កាត់​បោះឆ្នោត​តែ​ ២-៣ ​នាក់​ក៏ដោយ​។ លោក​ថ្លែង​ថា​៖ «​ប្រសិន​បើ​យើង​បោះបង់​ឱកាស​ប្រកួត​ប្រជែង​យើង​មិន​គួរ​បង្កើត​គណបក្ស​នោះ​ទេ​»​។

លោក អៀ សុផល សាស្ត្រាចារ្យ​ផ្នែក​កិច្ចការ​បរទេស​ និង​ការទូត​នៅ​មហាវិទ្យាល័យ Occidental រដ្ឋ Los Angeles បាន​ថ្លែង​ថា​ប្រសិន​បើ​គណបក្ស​ប្រជាជន​កម្ពុជា​នឹង​ឈ្នះ​អាសនៈ​ទាំងអស់​នៅ​ក្នុង​ការ​បោះឆ្នោត​ព្រឹទ្ធសភា​នៅ​ក្នុង​ខែ​កុម្ភៈ​វា​នឹង​ជា​ការ​បញ្ចប់​លទ្ធិប្រជាធិបតេយ្យ​។

លោក​ក៏​បាន​ថ្លែង​ផង​ដែរ​ថា ​វា​មិន​អាច​ទៅ​រួច​ទេ​ដែល​សមាជិក​គណបក្ស​ប្រជាជន​កម្ពុជា​បោះឆ្នោត​ទៅ​ឲ្យ​គណបក្ស​ផ្សេង ប៉ុន្តែ​ការ​ព្យាយាម​លាប​ពណ៌​វា​ជា​ដំណើរការ​ប្រជាធិបតេយ្យ​នឹង​មិន​ជោគជ័យ​ទេ​។

លោក សុផល បាន​ថ្លែង​បន្ត​ថា​៖ «​ពួកគេ​ធ្វើ​ដូចជា​ការ​លាប​ក្រែម​បបូរ​មាត់ជ្រូក ប៉ុន្តែ​វា​នៅ​តែ​ជា​ជ្រូក​។ ការ​បោះឆ្នោត​ឲ្យ​គណបក្ស​ផ្សេង​គឺ​ដូចជា​ក្រែម​លាប​បបូរមាត់​»​។

អ្នក​អត្ថាធិប្បាយ​អំពី​បញ្ហា​នយោបាយ​លោក មាស នី បាន​ថ្លែង​ថា​៖​ «​ខ្ញុំ​ប្រាកដ​ថា​ពួកគេ​ខ្វាយខ្វល់ ហើយ​ពួកគេ​រំពឹង​ថា​វា​នឹង​ជា​ពហុបក្ស ប៉ុន្តែ​គណបក្ស​ប្រជាជន​កម្ពុជា​ក៏​​មាន​មហិច្ឆតា​គ្រប់គ្រង​អាសនៈ​របស់​ក្រុមប្រឹក្សា​ឃុំ សង្កាត់​ផង​ដែរ​»៕ PS

0

Comments

Please, login or register to post a comment

ព័ត៌មានពាក់ព័ន្ធ