Search form

Login - Register | FOLLOW US ON

Logo of Phnom Penh Post newspaper Phnom Penh Post - បណ្តឹង​បក្ស​ប្រឆាំង​សុំ​ចាត់​ការ​កង​សន្តិសុខ​របស់​​អាជ្ញាធរ ត្រូវ​បាន​ច្រាន​ចោល

Content image - Phnom Penh Post
លោក សារឹម សរុន អ្នកសារព័ត៌មានឯករាជ្យម្នាក់ដែលរងរបួសបែកក្បាល បន្ទាប់ពីត្រូវបានវាយដោយកងសន្តិសុខរាជធានីក្នុងក្បួនដង្ហែទិវាលំនៅឋានពិភពលោក កាលពីខែមុន។ ហេង ជីវ័ន

បណ្តឹង​បក្ស​ប្រឆាំង​សុំ​ចាត់​ការ​កង​សន្តិសុខ​របស់​​អាជ្ញាធរ ត្រូវ​បាន​ច្រាន​ចោល

ភ្នំពេញៈ រដ្ឋ​មន្រ្តី​ក្រសួង​មហាផ្ទៃ លោក ស ខេង បាន​ច្រាន​ចោល​ពាក្យ​បណ្តឹង ដែល​លោក​ចាត់​ទុក​ថា «គ្មាន​មូល​ដ្ឋាន» របស់​គណបក្ស​ប្រឆាំង​ដែល​បាន​ចោទ​អាជ្ញាធរ​រាជធានី​ ថា​បាន​ប្រើប្រាស់​ «កម្លាំង​ការពារ​សន្តិសុខ​មិន​ស្រប​​ច្បាប់» ​ហើយ​លោក​បាន​គម្រាម​បើក​ការ​ស៊ើប​អង្កេត​វិញ​ ថា​តើ​ ការ​រៀប​ចំ​សន្តិសុខ​របស់​គណបក្ស​សង្គ្រោះ​ជាតិ​ស្រប​ច្បាប់​ដែរ​ឬ​ទេ។

នៅ​ក្នុង​លិខិត​មួយ​ដែល​មាន​ចុះ​ថ្ងៃ​ទី ១៧ ខែ​ វិច្ឆិកា ឧបនាយក​រដ្ឋ​មន្រ្តី​រូប​នេះ​បាន​ឲ្យ​ដឹង​ថា ការ​ប្រើ​ប្រាស់ «កង​កម្លាំង​​ការពារ​ប្រជាជន» សម្រាប់​ «ការ​ការពារ​ច្បាប់​និង​សណ្តាប់ធ្នាប់» ពុំ​ត្រូវ​បាន​ហាមឃាត់​ដោយ​ច្បាប់​ណាមួយ​នោះ​ឡើយ។

លោក​បន្ថែម​ថា​ ក្រុម​ទាំង​នេះ​មិន​បាន​បំពេញ​តួនាទី​ជា​សមត្ថកិច្ច​នគរបាល​នោះ​ទេ ក៏​ប៉ុន្តែ​ក្រុម​ទាំង​នេះធ្វើ​ការផ្តល់ «កម្លាំង​​អន្តរាគមន៍» ដើម្បី​ជួយ​ទៅដល់​ក្រុម​អាជ្ញាធរ​ដើម្បី​ថែ​រក្សា​សន្តិសុខ។​

លិខិត​របស់​លោក ស ខេង ជូនចំពោះ​ប្រធានរដ្ឋ​សភា លោក ហេង សំរិន គឺ​ជា​ឆ្លើយតប​នឹង​​បណ្តឹង​របស់​អ្នកស្រី​ មូ សុខហួរ ជា​តំណាង​រាស្រ្ត​មួយ​រូប​របស់​គណបក្ស​សង្គ្រោះ​ជាតិ។

អ្នកស្រី មូ សុខហួរ ដែល​មិន​អាច​ទាក់​ទង​បាន​កាល​ពី​ម្សិល​មិញ បាន​រិះគន់ចំពោះ​ការ​ប្រើ​ប្រាស់ «កម្លាំង​សន្តិសុខ​មិន​ស្រប​ច្បាប់» ដែល​អនុវត្ត​ដោយ​អាជ្ញាធរ​រាជធានី​ក្នុង​ការ​បំបែក​ហ្វូង​បាតករ​តវ៉ា។

តំណាងរាស្រ្ត​​រូប​នេះ ​បាន​លើក​យក​មក​ជា​ឧទាហរណ៍​នូវ​ក្រុម​សន្តិសុខ​ខណ្ឌ​ដូន​ពេញ ដែល​ប្រើ​ហិង្សា ហើយ​អ្នក​ស្រី​បន្ថែម​​ថា លោក ជាម រដ្ឋា ជា​ប្រធាន​ក្រុមសន្តិសុខ​នេះ គួរ​តែ​ត្រូវ​បាន​ផ្តន្ទា​ទោស ចំពោះ​ការ​ចុះ​ទៅ​បង្ក្រាប​ក្រុម​បាតុករ​កាល​ពី​ថ្ងៃ​ទី ១០ ខែតុលា ដែល​បាន​ធ្វើ​ឲ្យមនុស្ស​ ៥ ​នាក់ រង​របួស។

ទោះជា​យ៉ាងនេះក្តី ជំនួស​ឲ្យ​ការ​រិះគន់​កង​សន្តិសុខ​នៅ​ខណ្ឌ​ដូនពេញ ដែល​ភាគច្រើន​ត្រូវ​បាន​ចាត់​ឲ្យ​ទប់​ទល់​នឹង​បាតុកម្ម​អហិង្សា លោក ស ខេង ថ្លែងថា លោក​នឹង «ត្រួត​ពិនិត្យ» លើ​មន្រ្តី​សន្តិសុខ​របស់​គណបក្ស​ប្រឆាំង និង​«ចេញ​សេចក្តី​ណែនាំ»​ ប្រសិន​ជា​ពួក​គេ​មិន​អនុវត្ត​តាម​ស្តង់ដារ​ច្បាប់។

លោក​ឲ្យដឹងថា៖​ «ផ្ទុយ​ទៅ​វិញ និង​កាន់​តែ​ធ្ងន់ធ្ងរ​ជាង​នេះ គណបក្ស​នេះ​បាន​រៀប​ចំ​កង​សន្តិសុខ​ជា​ច្រើន​រយ​នាក់​នៅ​​ក្នុង​គណបក្ស​ខ្លួន មាន​ទាំង​ឯកសណ្ឋាន​និង​វិទ្យុទាក់ទង... ដោយ​ពុំ​មាន​ការ​អនុញ្ញាត​ពី​ក្រុម​អាជ្ញាធរ។ [គណបក្ស ​នេះ​​ក៏​បាន] បង្ក​ជា​សកម្មភាព​អនាធិបតេយ្យ​ជា​ច្រើន​ដូចជា ការ​ប៉ះ​ទង្កិច​គ្នា​ជាមួយ​នឹងកង​កម្លាំង​អនុវត្ត​​ច្បាប់​​របស់​រដ្ឋាភិបាល»។

គណបក្ស​សង្គ្រោះជាតិ​បាន​ចាត់​ក្រុម​សន្តិសុខ​ជា​ច្រើន​នៅ​ទីស្នាក់​ការ​​នៅ​រាជធានី​ភ្នំពេញ​របស់​ខ្លួន ដែល​លោក​ កឹម សុខា ប្រធាន​ស្តីទី​​គណបក្ស​ កំពុង​តែ​លាក់​ខ្លួន​ដើម្បី​គេច​ពី​ការ​​ចាប់​ខ្លួន។

ជា​ការ​ឆ្លើយតប​ កាល​ពី​ថ្ងៃ​ម្សិលមិញ លោក កែវ ភិរម្យ ​តំណាង​រាស្រ្ត​គណបក្ស​ប្រឆាំង​​បាន​អះ​អាង​ថា ក្រុម​សន្តិសុខ​​របស់​គណបក្ស​លោក​មិន​បាន​ធ្វើ​ខុស​នឹង​ច្បាប់​នោះ​ទេ។

លោក​បន្ត​ថា៖ «ពួក​គេ​មិន​មាន​កាន់​កំាភ្លើង ឬអាវុធ​ផ្សេង​ទៀត​នោះ​ទេ ហើយ​ក៏​មិន​ដែល​ធ្វើបាប​សាធារណ​ជន ឬ​នរណា​ម្នាក់​ដែរ»។

លោក​ កែវ ភិរម្យ បន្ថែម​ថា ក្រុម​សន្តិសុខ​ទាំង​នោះ​ត្រូវ​បាន​ចាត់​តាំង​នៅ​ទី​នោះ ព្រោះ​តែ​មាន «ហេតុ​ផល​ល្អ»។

លោក​និយាយ​ថា៖ «យើង​គ្រាន់​តែ​ព្យាយាម​ការ​ពារ​ថ្នាក់​ដឹក​នាំ​របស់​យើង​តែ​ប៉ុណ្ណោះ»៕ TN

0

Comments

Please, login or register to post a comment

ព័ត៌មានពាក់ព័ន្ធ