Search form

Login - Register | FOLLOW US ON

Logo of Phnom Penh Post newspaper Phnom Penh Post - បទចម្រៀង​ជាប់​បម្រាម​មាន​បង្កប់​រឿង​ពិត ជីវិត​អ្នក​ប្រដាល់

Content image - Phnom Penh Post
សកម្មភាព​របស់​កីឡាករ​ប្រដាល់​ខ្មែរ​ក្នុង​ពេល​កំពុង​ចូលរួម​ប្រកួត​នៅ​លើ​សង្វៀន​នា​ពេល​កន្លង​មក។ ស្រេង ម៉េងស៊្រុន

បទចម្រៀង​ជាប់​បម្រាម​មាន​បង្កប់​រឿង​ពិត ជីវិត​អ្នក​ប្រដាល់

ភ្នំពេញៈ បទចម្រៀង​សម័យ​មួយ​បទ​ច្រៀង​ដោយ​តារា​ចម្រៀង​ ខេម ​មាន​ចំណង​ជើង​ថា «ជីវិត​អ្នក​ប្រដាល់» ហើយ​ដែល​ត្រូវ​ក្រសួង​វប្បធម៌ និង​វិចិត្រ​សិល្បៈ​ហាម​ចាក់​ផ្សាយ​ដោយសារ​អត្ថន័យ​ក្នុង​បទចម្រៀង​បាន​ប្រដូច​កីឡាករ​ប្រដាល់​ដូច​សត្វ​តិរច្ឆាន​នោះ​ បើ​ទោះ​ជា​​មាន​ការ​រិះគន់​ពី​ប្រធាន​សហព័ន្ធ​កីឡា​ប្រដាល់​កម្ពុជា​ក្ដី​ក៏​នៅ​មាន​អតីត​កីឡាករ​ និង​អ្នកឯ​ទៀត​ថា​វា​ឆ្លុះបញ្ចាំង​ពី​ការពិត​នៅ​ក្នុង​ដំណាក់កាល​មួយ​របស់​អ្នក​ប្រដាល់​ខ្មែរ​។

បើ​តាម​សារាចរ​ណែនាំ​របស់​ក្រសួង​ដែល​បាន​ចេញ​ផ្សាយ​កាលពី​ថ្ងៃ​ព្រហស្បតិ៍​ខណៈ​លោក​ ខេម ​បច្ចុប្បន្ន​កំពុង​នៅ​ប្រទេស​បារាំង​គឺ​បាន​ហាម​មិន​ឲ្យ​សម្តែង​បទចម្រៀង​នេះ​ទេ​ក្នុង​ពេល​ដែល​ស្ថានីយ​ទូរទស្សន៍​ និង​វិទ្យុ​នានា​ក៏​ត្រូវ​បាន​ហាម​មិន​ឲ្យ​ចាក់​ផ្សាយ​ដូច​គ្នា​ហើយ​ក៏​មិន​អនុញ្ញាត​ឲ្យ​ផលិត​ជា​ខារ៉ាអូខេ​ផង​ដែរ។

ទន្ទឹម​នឹង​នេះ​ដែរ​ផលិតកម្ម​ថោន​ជា​ទី​ដែល​ ខេម ​ធ្វើ​ជា​តារាចម្រៀង​នៅ​ទី​នោះ​ក៏​បាន​ចេញ​លិខិត​សុំទោស​ទៅ​ដល់​សហព័ន្ធ​កីឡា​ប្រដាល់​កម្ពុជា​ចំពោះ​បទចម្រៀង​នេះ​ផង​ដែរ​ ដែល​លិខិត​នោះ​បាន​បញ្ជាក់​ថា​ពេល​នេះ​ខ្លួន​បាន​កែ​ទំនុក​ច្រៀង​សា​ជាថ្មី​រួច​ហើយ​តែ​នៅ​រក្សា​ទំនុក​ភ្លេង​ចាស់​ដដែល។

បទចម្រៀង​មួយ​បទ​នេះ​បាន​ចេញ​ផ្សាយ​ក្រៅ​ផ្លូវការ​ប្រហែល​ ៣ ខែ​មុន​ដោយ​យក​លំនាំ​សាច់​ភ្លេង​តាម​បទ​របស់​លោកស្រី​ រស់ សេរីសុទ្ធា ឆ្នាំ​ ១៩៧១ ​ដែល​មាន​ចំណង​ជើង​ថា «ជ្រោះ​អូរយ៉ាដា» ប៉ុន្តែ​បាន​រៀបរាប់​ពី​ជីវិត​អ្នក​ប្រដាល់​ដែល​បាន​ជួប​ទុក្ខ​លំបាក​ក្នុង​អាជីព​របស់​ខ្លួន​តាមរយៈ​ការ​យល់​ឃើញ​មួយ​ចំនួន​នៅ​ក្នុង​បទចម្រៀង​នេះ។

លោក​ ខេម ​បាន​សម្តែង​​ផ្ទាល់​នៅ​លើ​កញ្ចក់​ទូរទស្សន៍ PNN កាលពី​ខែ​កញ្ញា​កន្លង​ទៅ​ដោយ​លោក​បាន​​លើក​យក​បទចម្រៀង​នេះ​មក​ច្រៀង​ដែល​មាន​អត្ថន័យ​ថា «ខ្ញុំ​លើក​ម្រាម​ដប់​ខ្ចប់​ដោយ​លោហិត​សូម​ច្រៀង​រឿង​ពិត​រឿង​អ្នក​ប្រដាល់​គ្មាន​អ្នក​អើពើ​គ្មាន​អ្នក​ណា​យល់ ជីវិត​វិលវល់ រស់​កំដរ​គេ...»។«យប់​ឡើង​ដេក​ថ្ងូរ ឈាម​ដក់​ពេញ​ប្រាណ ថ្ងៃ​ខ្លះ​ខ្លួន​ខ្សោយ​ទប់ទល់​លែង​បាន ឈឺ​ហួស​ប្រមាណ ត្រូវ​គេ​វាយ​ដំ នេះ​ហើយ​ជីវិត​ជា​អ្នក​ប្រដាល់ មិន​ដឹង​ថា​កាលណា​ផុត​សៅហ្មង...»។

មន្ត្រី​ម្នាក់​នៅ​ក្រសួង​វប្បធម៌​បាន​ឱ្យ​ដឹង​កាលពី​ថ្ងៃ​ចន្ទ​ថា​វា​មិន​មាន​ជម្រើស​ទេ​ប៉ុន្តែ​ត្រូវ​តែ​ហាមឃាត់​ចាក់​បទចម្រៀង​មួយ​បទ​នេះ​ដែល​បាន​ពណ៌នា​កីឡា​ប្រដាល់​ជាតិ​ថា​ស្មើ​នឹង​សត្វ​តិរច្ឆាន​នោះ។

លោក​ ថៃ នរៈសត្យា រដ្ឋលេខាធិការ និង​ជា​អ្នក​នាំពាក្យ​ក្រសួង​វប្បធម៌ ​និង​វិចិត្រ​សិល្បៈ​កាលពី​ថ្ងៃ​ចន្ទ​បាន​ថ្លែង​ថា៖ «ការ​សរសេរ​បទចម្រៀង​ដែល​មាន​អត្ថន័យ​ថា​ដូច​សត្វ​តិរច្ឆាន​ត្រូវ​គេ​វាយដំ​គឺ​ធ្វើឲ្យ​ប៉ះពាល់​ដល់​តម្លៃ​កីឡា​ប្រដាល់​ដែល​ជា​កីឡា​ជាតិ​របស់​យើង។ តួនាទី​របស់​អ្នក​និពន្ធ​គឺ​មិនមែន​ដើម្បី​បង្កើត​អរិភាព​ទេ»។

លោក តែម ម៉ឺន ប្រធាន​សហព័ន្ធ​កីឡា​ប្រដាល់​កម្ពុជា​បាន​ប្តឹង​ពី​បទចម្រៀង​នេះ។

អ្នក​ចាត់ការ​ទូទៅ​ផលិតកម្ម​ថោន លោក អ៊ា វឌ្ឍនា មិន​អាច​ទាក់ទង​សុំ​អត្ថាធិប្បាយ​បាន​ទេ​កាលពី​ថ្ងៃ​ចន្ទ។ ទោះ​ជា​យ៉ាង​ណា​មាន​អ្នក​ប្រដាល់​ខ្មែរ​ល្បី​ឈ្មោះ​យ៉ាង​ហោច​ម្នាក់​បាន​ការពារ​បទចម្រៀង​នេះ។

លោក​ អូត ភូថង ដែល​ធ្លាប់​ប្រកួត​​ប្រហែល​ ៣០០ ​ដង​ទាំង​នៅ​កម្ពុជា​ និង​ប្រទេស​ថៃ​ហើយ​បាន​ឈ្នះ​ខ្សែ​ក្រវាត់​ជើងឯក​ជាច្រើន​មុន​ពេល​ចូលនិវត្តន៍​កាលពី​ពីរ​ឆ្នាំ​មុន​បាន​ថ្លែង​ថា​លោក​ជឿ​ថា​បទចម្រៀង​ថ្មី​នេះ​ឆ្លុះ​បញ្ចាំង​ពី​អ្វី​ដែល​លោក​បាន​ឃើញ។

លោក​ ភូថង ​ថា៖ «វា​ដូចជា​ជីវិត​ពិត​កាលពី​មុន។ សព្វ​ថ្ងៃនេះ​គឺ​មិន​ដូច​អត្ថន័យ​នៃ​បទចម្រៀង​នេះ​ទេ...ភាព​ខុស​គ្នា​នេះ​គឺ​ថា​អ្នក​ប្រដាល់​ឥឡូវ​នេះ​ទទួល​បាន​ប្រាក់​ច្រើន​ជាង​មុន​ហើយ​​គ្រួសារ​ពួកគេ​មិន​បាន​បញ្ឈប់​ពួកគេ​ធ្វើ​ជា [អ្នក​ប្រដាល់] ទេ»។

លោក​ថ្លែង​ថា​គាត់​ធ្លាប់​ទទួល​បាន​ប្រាក់​ប្រមាណ ១០ ម៉ឺន ឬ​ ១៥ ម៉ឺន​រៀល (ប្រហែល​ ២៥ ទៅ ៣៧,៥០ ដុល្លារ​) ក្នុង​មួយ​ប្រកួត​នៅ​ដើម​ឆ្នាំ ២០០០ ពេល​ចាប់ផ្តើម​ប្រកួត​ដំបូង​ប៉ុន្តែ «ឥឡូវ​សម្រាប់​ការ​ប្រកួត​ពិសេស​អ្នក​ប្រដាល់​អាច​ទទួល​បាន​ប្រាក់​ច្រើន​ជាង​ ១០០ ដុល្លារ» ដែល​ផ្តល់​ឲ្យ​ពួកគេ​យ៉ាង​ហោច​ណាស់​មាន​ឱកាស​រស់នៅ​ក្នុង​ជីវិត​មួយ​ប្រសើរ​ជាង​មុន។

លោក​ សេង ដារ៉ា អ្នក​និពន្ធ​សៀវភៅ​មាស​ស្រោប​នគរ​ដែល​បាន​ចងក្រង​ប្រវត្តិ​អ្នកចម្រៀង​ពី​សម័យ​ដើម​បាន​ឱ្យ​ដឹង​ថា​បទ​ចម្រៀង​នេះ​ត្រូវ​បាន​សរសេរ​ឡើង​យ៉ាង​ល្អ​ហើយ​លោក​ជឿ​ថា​សហព័ន្ធ​កីឡា​ប្រដាល់​មាន​ភាព​អាម៉ាស់​អំពី​រឿង​សម្ងាត់​នៃ​ជីវិត​អ្នក​ប្រដាល់​របស់​ខ្លួន​ដែល​ត្រូវ​បាន​បង្ហាញ។ «វា​គឺជា​ការពិត។ សូម​មើល​ទៅ​លោក​ អេភូថង» ដោយ​លោក​ ដារ៉ា ​និយាយ​ចង់​សំដៅ​ទៅ​លើ​បង​ប្រុស​របស់​លោក អូត ភូថង ​ដែល​ជា​ជើងឯក​ប្រដាល់​ដ៏ល្បី​បំផុត​មួយ​រូប​នៅ​កម្ពុជា។ នៅ​ពេល​ដែល​គាត់​ចាកចេញ​ពី​កីឡា​ប្រដាល់​មើល តើ​ជីវិត​របស់​គាត់​មាន​លក្ខណៈ​បែប​ណា? ពេល​ខ្លះ​គាត់​នាំ​យក​កូនចៅ​របស់​គាត់​ទៅ​ធ្វើ​ការងារ​សំណង់​ក៏​មាន​ដែរ។

លោក​បញ្ជាក់​ថា៖ «បទចម្រៀង​នេះ​ហាក់​ដូចជា​រឿង​ពិត​ដែល​រៀបរាប់​អំពី​សង្គម​មួយ។ វា​គឺជា​សេរីភាព​នៃ​ការ​បញ្ចេញ​មតិ...ហើយ​នេះ​គឺជា​ទេពកោសល្យ​របស់​អ្នក​និពន្ធ។ ខ្ញុំ​គិត​ថា​ក្រសួង​វប្បធម៌​មិន​គួរ​ដាក់​សម្ពាធ​លើ​តារា​ចម្រៀង​នោះ​ទេ»៕ NS

0

Comments

Please, login or register to post a comment