.jpg)
ព្រះសីហនុៈ បុរសដែលកាប់ប្រពន្ធស្លាប់នៅភូមិវាល ឃុំ-ស្រុកកំពង់សិលា ខេត្តព្រះសីហនុកាលពីព្រឹកថ្ងៃទី ១០ កុម្ភៈត្រូវបានព្រះរាជអាជ្ញាខេត្តនេះចោទប្រកាន់ និងឃុំខ្លួនហើយ បន្ទាប់ពីសមត្ថកិច្ចបញ្ជូនដល់តុលាការប៉ុន្មានម៉ោងនៅថ្ងៃដដែលនោះ។
លោកឧត្តមសេនីយ៍ កុល ផល្លី ស្នងការរងខេត្តព្រះសីហនុប្រាប់ពីម្សិលមិញថា បុរសសង្ស័យនោះត្រូវព្រះរាជអាជ្ញាចោទប្រកាន់ និងឃុំខ្លួននៅពន្ធនាគារហើយនៅថ្ងៃដដែលនោះ។
លោកប្រាប់ថា៖ «បុរសនោះត្រូវបានឃាត់ខ្លួនដោយនគរបាលស្រុក ព្រោះគាត់កាប់ប្រពន្ធរបស់គាត់ឲ្យស្លាប់ ហើយព្រះរាជអាជ្ញាបានឃុំខ្លួនគាត់ហើយ»។
លោក ទេព ណារិទ្ធ អធិការរងនគរបាលស្រុកកំពង់សិលាបានឲ្យដឹងថាបុរសសង្ស័យនោះឈ្មោះ ជា នៅ អាយុ ៥២ ឆ្នាំ រីឯស្ត្រីរងគ្រោះឈ្មោះ សាក់ ស្រី អាយុ ៥៣ ឆ្នាំជាកសិករ ពួកគេរស់នៅភូមិ-ឃុំកើតហេតុ។
លោករំឭកប្រាប់តាមសម្តីសាក្សីថា មុនកើតហេតុវេលាម៉ោង ៥ ព្រឹកថ្ងៃសៅរ៍ ស្ត្រីរងគ្រោះបានទៅអង្គុយអាំងភ្លើងភ្នក់ជាមួយអ្នកជិតខាង។ ពេលនោះស្រាប់តែជនសង្ស័យបានកាន់កាំបិតផ្កាក់មួយដើរសំដៅមកភ្នក់ភ្លើងនោះ ប៉ុន្តែគ្មាននរណាម្នាក់ចាប់អារម្មណ៍ថាបុរសនោះកាប់ប្រពន្ធទេ។
លោកបន្តថា លុះជនសង្ស័យដើរមកជិតប្រពន្ធក៏យារកាំបិតកាប់តែម្តងដោយត្រូវស្ត្រីរងគ្រោះចំគុម្ពត្រចៀកឆ្វេង ១ កាំបិត និងត្រូវគុម្ពត្រចៀកស្តាំ ១ កាំបិត ដួលស្លាប់នៅនឹងកន្លែងកើតហេតុ ហើយតែជនសង្ស័យមិនរត់ទៅណាទេ។
លោកអធិការរងប្រាប់តាមសម្តីអ្នកភូមិថា ជនសង្ស័យមានជំងឺសរសៃប្រសាទ ប៉ុន្តែលោកមិនបានដឹងថា គេមានលិខិតបញ្ជាក់ពីមន្ទីរពេទ្យថាមានជំងឺសរសៃប្រសាទនោះទេ៕
