ភ្នំពេញៈ បុរសជាប់ចោទជាតិ ប៉ាគីស្ថានម្នាក់ ពីម្សិលមិញបានទទូចសុំចៅក្រមនៃសភាស៊ើបសួរសាលាឧទ្ធរណ៍ឲ្យបន្ថយទោសដល់ខ្លួនពាក់ព័ន្ធលួចលុយពីទូ ATM បានជាង ១ លានបាត នៅក្រុង ប៉ោយប៉ែត ខេត្តបន្ទាយមានជ័យ កាលពីឆ្នាំ ២០១៤។
តាមអង្គហេតុបង្ហាញថា ជនជាប់ចោទឈ្មោះ KHAN AZHAR HAMEED អាយុ ៤៨ ឆ្នាំ (២០១៤) ជនជាតិ ប៉ាគីស្ថាន និងមានមិត្តភកិ្តម្នាក់ទៀតឈ្មោះ RANA TARIQ MAHMOOD ជាជនជាតិ ប៉ាគីស្ថានដូចគ្នា បានចូលមកប្រទេសកម្ពុជា ដើម្បីដើរមើលទូ ATM។ បន្ទាប់មកជនជាប់ចោទបានបន្តដំណើរទៅខេត្ត សៀមរាប ដោយប្រកបមុខជំនួញតូចមួយ ដើម្បីបិទបាំងសកម្មភាពអាក្រក់របស់ខ្លួន ហើយបន្តទៅស្នាក់នៅក្រុង ប៉ោយប៉ែតទៀត។
អង្គហេតុបង្ហាញទៀតថា ពេលស្នាក់នៅកាស៊ីណូហូលីដេទីក្រុង ប៉ោយប៉ែតនោះ ជនជាប់ចោទបានលួចលុយពីទូ ATM នៅក្នុងកាស៊ីណូនោះចំនួន ៣ លើក គឺប្រព្រឹត្តនៅ ខែកុម្ភៈ ឆ្នាំ ២០១៤ យកលុយបានចំនួន លានបាត (៣១០០០ ដុល្លារ) ជាមួយឈ្មោះ RANATARIQ MAHMOOD ។
សកម្មភាពនេះត្រូវម្ចាស់កាស៊ីណូដឹង ហើយប្តឹងសមត្ថកិច្ចឲ្យឃាត់ខ្លួន នៅថ្ងៃបន្ទាប់នោះ ឯឈ្មោះ RANATARIQ MAHMOOD គេចខ្លួនបាត់។ ក្រោយឃាត់ខ្លួនសមត្ថកិច្ចរកឃើញជនជាប់ចោទ មានលិខិតឆ្លងដែន ២ ដែលមួយជាលិខិតឆ្លងដែនចម្លងនិងមួយជាលិខិតឆ្លងដែនពិត មានរូបថតគាត់តែមួយ ប៉ុន្តែមានហត្ថលេខា និងឈ្មោះខុសគ្នា។
សំណុំរឿងនេះ កាលពីឆ្នាំ ២០១៤ ត្រូវសាលាដំបូងរាជធានី សម្រេចផ្តន្ទាទោសដាក់ពន្ធនាគារ ៦ ឆ្នាំក្រោមការចោទប្រកាន់ពីបទ «លួច និងក្លែងឯកសារសាធារណៈ»។
លោក KHAN AZHAR HAMEED តាមរយៈអ្នកបកប្រែឆ្លើយក្នុងសវនាការ ពីម្សិលមិញថា គាត់ទទួលស្គាល់អំពើលួចពិតប្រាកដមែន តែករណីចោទពីក្លែងឯកសារនោះ គាត់មិនទទួលយកទេ ព្រោះលិខិតឆ្លងដែននោះគាត់មិនបានប្រើប្រាស់ទេ។
លោក K0HAN AZHAR HAMEED ថ្លែងថា៖ «រហូតដល់ពេលនេះ ខ្ញុំជាប់គុកបាន ៣ ឆ្នាំ ៦ ខែហើយហើយនៅសល់ ២ ឆ្នាំ ៥ ខែទៀត ទើបរួចទោស។ ប៉ុន្តែខ្ញុំសូមតុលាការ ជួយបន្ថយទោសដល់ខ្ញុំ ព្រោះខ្ញុំមានម្តាយអាយុ ៩០ ឆ្នាំ និងមានកូនអាយុ ៧ ឆ្នាំនៅប្រទេស ប៉ាគីស្ថាន»។
ប៉ុន្តែលោកព្រះរាជអាជ្ញា ឃុត សុភាង តំណាងមហាអយ្យការ សន្និដ្ឋានថា ជនជាប់ចោទទទួលស្គាល់កំហុសមែនតែហាក់មិនទទួលស្គាល់លិខិតឆ្លងដែនក្លែងក្លាយទេ។ «តាមការបញ្ជាក់របស់ដើមបណ្តឹងថា គាត់ពិតជាមានលិខិតក្លែងមែន។ ដូច្នេះការសម្រេចសេចក្តីរបស់តុលាការថ្នាក់ក្រោម ត្រឹមត្រូវតាមច្បាប់ហើយខ្ញុំសូមតម្កល់សាលក្រម»។
លោក គិន វិបុល មេធាវីការពារសិទ្ធិឲ្យជនជាប់ចោទ សន្និដ្ឋានថា រឿងនេះ ចោទ ២ ករណីដោយ ១អង្គហេតុបទលួចនិង ១ អង្គហេតុទៀត ក្លែងឯកសារ។ ប៉ុន្តែកូនក្តីលោកទទួលយកតែបទលួចទេ ព្រោះគាត់មិនបានក្លែងឯកសារដូចការចោទទេ។ «គាត់ចង់សុំតុលាការព្យួរទោស ដែលនៅសល់ក្រោយពីគាត់ជាប់គុកបានជាង ៣ ឆ្នាំ ដើម្បីគាត់មានឱកាសទៅប្រទេសគាត់វិញ មើលថែម្តាយ និងកូន។ ដូច្នេះសូមតុលាការជួយបន្ថយទោសដល់គាត់ផង»។
សាលដីកានេះនឹងត្រូវប្រកាសនៅថ្ងៃទី ២ ខែមីនា ឆ្នាំ ២០១៨៕