ភ្នំពេញៈ ខណៈតុលាការកំពូលកំពុងបើកសវនាការលើសំណុំរឿងរបស់ខ្លួន នៅថ្ងៃទី ១០ មករា នេះបុរសអូស្រ្តាលីដែលជាប់ពាក់ព័ន្ធនឹងការបង្ហោះដ្រូនបានទទូចសុំនៅក្រៅឃុំ បន្ទាប់ពីតុលាការថ្នាក់ក្រោមបដិសេធសំណើរបស់ខ្លួនជាបន្តបន្ទាប់។
សវនាការដែលមានចៅក្រម ៥ រូប ដោយមានលោកចៅក្រម ស៊ឹង បញ្ញាវុឌ្ឍ ជាប្រធានក្រុមប្រឹក្សាជំនុំជម្រះនោះ លោក Jame Staniforth Ricketson អាយុ ៦៨ ឆ្នាំប្រាប់តុលាការថាគាត់ប្តឹងសារទុក្ខនេះ គឺដើម្បីស្នើសុំនៅក្រៅឃុំហើយ លោកយល់ថា ចៅក្រមស៊ើបសួរនៃសាលាដំបូងរាជធានីភ្នំពេញ នៅតែឃុំខ្លួនគាត់ ៦ ខែ ហើយហើយថែម ៦ ខែទៀត។
លោកបានប្រាប់ចៅក្រមថាអ្វីដែល លោកសំអាងជាថ្នូរក្នុងការសុំនៅក្រៅឃុំនោះ គឺឧបករណ៍ថតភាពយន្តដែលនគរបាលរឹបអួសពីគាត់មានតម្លៃស្មើ ៥ ម៉ឺនដុល្លាររួមនឹងកូនធម៌របស់គាត់ម្នាក់ផង នៅប្រទេសកម្ពុជា។
លោក Jame Staniforth Ricketsonត្រូវបានចោទប្រកាន់ពីបទ«ប្រមូលផ្តុំព័ត៌មានធ្វើឲ្យអន្តរាយដល់ការការពារជាតិ» តាមមាត្រា ៤៤៦ ។ មាត្រានេះប្រសិនបើតុលាការរកឃើញកំហុសជនត្រូវចោទនឹងត្រូវជាប់ ពន្ធនាគារចន្លោះពី ៥ ឆ្នាំទៅ ១០ ឆ្នាំ។
គួររំឭកថាលោក JAMES STANIFORTH RICKETSON ត្រូវបានសមត្ថកិច្ចឃាត់ខ្លួនកាលពីថ្ងៃទី ៣ ខែមិថុនាឆ្នាំ ២០១៧ ពាក់ព័ន្ធទៅនឹងការបង្ហោះយន្តហោះ Drone ថតរូបភាពនៅរាជធានីភ្នំពេញ៕