Search form

Login - Register | FOLLOW US ON

Logo of Phnom Penh Post newspaper Phnom Penh Post - ប្រជាកសិករ​រាប់រយ​នាក់​ នាំ​គ្នា​បិទ​ផ្លូវ​ទាមទារ​ឲ្យ​ផ្នែក​ពាក់ព័ន្ធ​ជួយ​រក​ទីផ្សារ​លក់​កសិផល​ ខណៈ​តម្លៃ​ចុះ​ថោក

Content image - Phnom Penh Post
រថយន្ត​ដឹក​កសិផល​ដែល​មាន​តម្លៃ​ថោក​មក​បិទ​ផ្លូវ​នៅ​ស្រុក​កំរៀង​កាលពី​ម្សិលមិញ​។ រូបថត ហ្វេសប៊ុក

ប្រជាកសិករ​រាប់រយ​នាក់​ នាំ​គ្នា​បិទ​ផ្លូវ​ទាមទារ​ឲ្យ​ផ្នែក​ពាក់ព័ន្ធ​ជួយ​រក​ទីផ្សារ​លក់​កសិផល​ ខណៈ​តម្លៃ​ចុះ​ថោក

បាត់ដំបងៈ ប្រជាកសិករ​រាប់រយ​នាក់​កាលពី​ម្សិលមិញ​បាន​នាំ​គ្នា​បិទ​ផ្លូវ​មួយ​កន្លែង​ក្នុង​ស្រុក​កំរៀង ខេត្ត​បាត់ដំបង​ដើម្បី​ទាមទារ​ឲ្យ​អាជ្ញាធរ​ពាក់ព័ន្ធ​ជួយ​រក​ទីផ្សារ​សម្រាប់​លក់​កសិផល​របស់​គាត់ ខណៈ​ផលិតផល​កសិកម្ម​ស្ទើរ​គ្រប់​ខេត្ត​កំពុង​ជួប​បញ្ហា​ធ្លាក់​ថ្លៃ​ខ្លាំង មិន​ឃើញ​ស្ថាប័ន​ណា​មួយ​ជួយ​ដោះស្រាយ​។

ប្រជាកសិករ​ដែល​ចូលរួម​តវ៉ា​ទាំង​នោះ​បាន​បិទ​ផ្លូវ​ត្រង់​ចំណុច​ផ្លូវ​បំបែក​ស្រុក​កំរៀង និង​ស្រុក​ភ្នំព្រឹក ក្នុង​ឃុំ​តាក្រី ខេត្ត​បាត់ដំបង​។

ប្រជាកសិករ​បាន​ថត​ជា​វីដេអូ​ខ្លី​ និង​បាន​បង្ហោះ​លើ​បណ្តាញ​សង្គម​ហ្វេសប៊ុក​ទាមទារ​ឲ្យ​រដ្ឋាភិបាល និង​ថ្នាក់​ដឹកនាំ​ផ្សេង​ទៀត​ជួយ​រក​ទីផ្សារ​ឲ្យ​ពួកគាត់ ខណៈ​ពួកគាត់​លើក​ឡើង​ថា​ពោត​ដែល​ប្រមូល​ផល​បាន​មាន​តម្លៃ​ថោក​ប្រហែល​ត្រឹម​ ៣០០ ​រៀល​ក្នុង​មួយ​គីឡូក្រាម​។

ប្រជាពលរដ្ឋ​ទាំង​នោះ​អះអាង​តាមរយៈ​វីដេអូ​ឃ្លីប​ថា​តម្លៃ​ពោត​ធ្លាក់​ថ្លៃ​ធ្វើ​ឲ្យ​ពួកគាត់​មិន​អាច​លក់​ពោត​ដើម្បី​សង​ធនាគារ​បាន​នោះ​ទេ​។

កសិករ​ម្នាក់​ក្នុង​ចំណោម​កសិករ​រាប់រយ​នាក់​ផ្សេង​ទៀត​លោក នាក់ វណ្ណី ថ្លែង​ប្រាប់ ​ភ្នំពេញ ​ប៉ុស្តិ៍ ​តាម​ទូរស័ព្ទ​ កាលពី​ម្សិលមិញ​ថា ​ពួកគាត់​មាន​គ្នា​រាប់រយ​នាក់ និង​មាន​គោយន្ត​ច្នៃ​រាប់​សិប​គ្រឿង​បាន​បិទ​ផ្លូវ​តាំងពី​ម៉ោង ៨ ​ព្រឹក​ហើយ​រហូត​ដល់​ម៉ោង​ជាង​ ៣ ​រសៀល​ម្សិលមិញ ពួកគាត់​មិន​ទាន់​បើក​ផ្លូវ​នេះ​វិញ​នៅ​ឡើយ​ទេ បើ​ទោះបី​ជា​មាន​ការ​ចុះ​សម្រួល​ពី​អភិបាល​ខេត្ត​បាត់ដំបង​លោក ច័ន្ទ សុផល ក៏ដោយ​។

លោក​បាន​ថ្លែង​ថា​ លោក​ប្រមូលផល​ពោត​បាន​ប្រហែល​ជា​ ១០ ​តោន តែ​តម្លៃ​លក់​ចេញ​ក្នុង​មួយ​គីឡូក្រាម​មិន​បាន​ ៣០០ ​រៀល​ផង ដែល​តម្លៃ​នេះ​មិន​អាច​ទូទាត់​នឹង​តម្លៃ​ដាំ​ដុះ និង​ពូជ​បាន​ទេ​។

លោក នាក់ វណ្ណី បាន​ឲ្យ​ដឹង​ដែរ​ថា​ចំពោះ​ដំឡូងមី​ស្រស់​​វិញ ក្នុង​មួយ​គីឡូក្រាម​មាន​តម្លៃ​តិច​ជាង​ ១០០ ​រៀល​ដែល​តម្លៃ​នេះ​ធ្វើ​ឲ្យ​កសិករ​មិន​អាច​ទប់ទល់​នឹង​ការ​ចំណាយ​ពេល​ដាំ​ដុះ​បាន​នោះ​ទេ​។

បើ​តាម​លោក​ នាក់ វណ្ណី ពី​មុន​ពោត​លក់​បាន​ក្នុង​តម្លៃ​ ៥ ​បាត​ (​ប្រាក់​ថៃ​) ​ឬ​ប្រហាក់​ប្រហែល​ ៥០០ ​រៀល​ក្នុង​មួយ​គីឡូក្រាម​។ ប៉ុន្តែ​ សម្រាប់​ពេល​នេះ កសិករ​សុំ​ឲ្យ​តែ​ថ្នាក់​ដឹកនាំ​អាច​រក​ទីផ្សារ​ឲ្យ​លក់​បាន​តែ​តម្លៃ​ ៣,៥ ​បាត ឬ​ប្រហែល​ជា​ ៤០០ ​រៀល​ក្នុង​មួយ​គីឡូក្រាម​ក៏​ពួក​លោក​សុខ​ចិត្ត​ដែរ​។

លោក​បន្ថែម​ថា​៖ «​ឥឡូវ​នេះ​កំពុង​ប្រមូល​ផល​ពោត ហើយ​ចុះ​ថ្លៃ​ខ្លាំង​ណាស់ ថ្ងៃ​នេះ​ តម្លៃ​ ៣ ​បាត​ទៅ​ ៣,១ ​បាត ហើយ​ឮ​​ថា​ស្អែក​ចុះ​ជាង​នេះ តម្លៃ​នេះ​គ្រាន់​តែ​ចំណាយ​លើ​ពូជ​មិន​រួច​ផង មិន​បាច់​គិត​ថ្លៃ​ឈ្នួល​កាច់ ថ្លៃ​ភ្ជួរ ថ្លៃ​ដឹក ថ្លៃ​ដាំ​អី​ទេ​...​ឥឡូវ​សុំ​តម្លៃ​ត្រឹម​តែ​ ៣,៥ ​បាត​ទេ ដើម្បី​ទប់ទល់​អត់​ចំណេញ​សោះ​​តែ​ម្តង អាហ្នឹង​អត់​ហ៊ាន​សុំ​ច្រើន​ទៀត​»​។

អភិបាល​ខេត្ត​បាត់ដំបង​លោក ច័ន្ទ សុផល ដែល​ចុះ​ទៅ​កន្លែង​តវ៉ា​មិន​អាច​ទាក់ទង​សុំ​អត្ថាធិប្បាយ​បាន​ទេ​កាលពី​ម្សិលមិញ​។

ទោះ​យ៉ាង​ណា​នាយ​នគរបាល​​ប៉ុស្តិ៍​ឃុំ​តាក្រី លោក ឆុន ឆាង ដែល​បាន​ដឹកនាំ​កម្លាំង​ការពារ​នៅ​កន្លែង​តវ៉ា​ឲ្យ​ដឹង​តាម​ទូរស័ព្ទ​ថា​ប្រជាពលរដ្ឋ​បាន​បំបែក​គ្នា​នៅ​ម៉ោង​ប្រហែល​ជា​ ៤ ​រសៀល ក្រោយ​ពី​អាជ្ញាធរ​ខេត្ត​បាន​សន្យា​យក​បញ្ហា​នេះ​ទៅ​ពិភាក្សា​ដោះស្រាយ និង​ថា​អាជ្ញាធរ​នឹង​ជូន​ដំណឹង​វិញ​នៅ​ពីរ​ថ្ងៃ​បន្ទាប់​។

លោក​បន្ថែម​ថា​៖ «​លទ្ធផល​ឆ្លើយតប​មិន​ទាន់​ដឹង​ទេ តែ​ថា​ពាំនាំ​សំណូមពរ​របស់​ប្រជាពលរដ្ឋ​ទៅ​ប្រជុំ​ពិភាក្សា​គ្នា​នៅ​ខេត្ត​សិន​ពីរ​ថ្ងៃ​បាន​តប​»​។

អ្នក​នាំ​ពាក្យ​ក្រសួង​កសិកម្ម​លោក ឡោ រស្មី និង​អ្នក​នាំ​ពាក្យ​ក្រសួង​ពាណិជ្ជកម្ម កញ្ញា សឹង សុផារី មិន​អាច​ទាក់ទង​សុំ​អត្ថាធិប្បាយ​បាន​ទេ​កាលពី​ម្សិលមិញ​។

ទោះ​យ៉ាង​ណា ​ក្រសួង​ពាណិជ្ជកម្ម​កាលពី​ថ្ងៃ​ទី​ ៥ ខែ​កក្កដា ឆ្នាំ​ ២០១៧ បាន​ចេញ​សេចក្តី​ជូន​ដំណឹង​មួយ​ដោយ​បញ្ជាក់​ថា​ខ្លួន​បាន​ធ្វើ​កិច្ចការ​មួយ​ចំនួន​ដើម្បី​ឆ្លើយតប​នឹង​ការ​ធ្លាក់​ចុះ​តម្លៃ​កសិផល​នេះ​។

សេចក្តី​ជូនដំណឹង​របស់​ក្រសួង​កសិកម្ម​សរសេរ​ថា​ក្រសួង​បាន​ចរចា​បើក​ទីផ្សារ​មួយ​ចំនួន​នៅ​សហរដ្ឋអាមេរិក ជប៉ុន ចិន សហភាព​អឺរ៉ុប វៀតណាម និង​ឥណ្ឌា ជាដើម សម្រាប់​លក់​ទំនិញ​របស់​កម្ពុជា​។

ក្រសួង​សរសេរ​ថា ​ក្រសួង​ក៏​បាន​ជំរុញ​ឲ្យ​មាន​ការ​តាំងពិព័រណ៍​ពាណិជ្ជកម្ម​ទាំង​ក្នុង និង​ក្រៅ​ប្រទេស​ក្នុង​មួយ​ឆ្នាំៗ​ពី​ផលិតផល​របស់​កម្ពុជា រៀបចំ​ឲ្យ​មាន​ការ​ជួប​គ្នា​រវាង​អ្នក​លក់ និង​អ្នក​ទិញ និង​រៀបចំ​ឲ្យ​មាន​យុទ្ធនាការ​ប្រើប្រាស់​ផលិតផល​ខ្មែរ​ឲ្យ​បាន​អតិបរមា​ជាដើម​។

ជាមួយ​គ្នា​នេះ​ក្រសួង​បាន​លើក​ហេតុផល​ថា​ការ​ធ្លាក់​ថ្លៃ និង​ការ​នាំ​ចេញ​ពិបាក​នេះ​ក៏​មកពី​កត្តា​សត្យានុម័ត​មួយ​ចំនួន​ដូចជា បរិមាណ​ផ្គត់ផ្គង់​លើស​តម្រូវការ តម្លៃ​កសិផល​កម្ពុជា​ មិន​អាច​ប្រកួត​ប្រជែង​ជាមួយ​តម្លៃ​កសិផល​ប្រទេស​ដទៃ ​ដែល​បណ្តាល​មកពី​ផលិតភាព​នៅ​ទាប និង​ទំនុក​ចិត្ត​លើ​ផលិតផល​របស់​កម្ពុជា​នៅ​មាន​កម្រិត​នៅ​ឡើយ​ជាដើម​៕

0

Comments

Please, login or register to post a comment