.jpg)
ព្រះមហាក្សត្រក្នុងពិធីបិទកិច្ចប្រជុំកាលពីម្សិលមិញ។ រូបថត ហ្វេសប៊ុក
ភ្នំពេញៈ ឧត្តមក្រុមប្រឹក្សានៃអង្គចៅក្រមកាលពីម្សិលមិញបានបើកសម័យប្រជុំលើកទី ២៩ ក្រោមព្រះរាជាធិបតីរបស់ព្រះមហាក្សត្រកម្ពុជាដោយសម្រេចលើរបៀបវារៈសំខាន់ៗចំនួន ១០ ក្នុងនោះក៏មានការដាក់ពិន័យដល់ចៅក្រម ១២ រូប និងព្រះរាជអាជ្ញា ៥ រូបពាក់ព័ន្ធនឹងការបំពេញភារកិច្ច «ដោយការភ្លេចភ្លាំង» ផងដែរ។
លោក សំ ប្រជាមានិត អគ្គលេខាធិការនៃឧត្តមក្រុមប្រឹក្សានៃអង្គចៅក្រមបានថ្លែងក្រោយកិច្ចប្រជុំថា ពិន័យសម្រាប់ចៅក្រម និងព្រះរាជអាជ្ញាទាំងនោះ «ភាគច្រើនជាការស្តីបន្ទោសផ្ទាល់មាត់ ពិន័យចុះក្នុងសំណុំលិខិតផ្ទាល់ខ្លួន តែប៉ុណ្ណឹងមិនមែនពិន័យអីធំពេកទេ ព្រោះនេះស្ថិតក្នុងនីតិវិធីតូចតាចការភ្លេចរបស់គាត់តែប៉ុណ្ណឹង។ ការងារផ្នែករដ្ឋបាលដែលគាត់ភ្លេចភ្លាំងមួយចំនួនតូច»។
លោកបន្ថែមថា ប្រសិនបើមានការពិន័យដោយកំហុសធំដុំនោះនឹងមានព្រះរាជក្រឹត្យដូចករណីដែលធ្លាប់បានធ្វើពីពេលមុន ហើយថាលោកមិនអាចបញ្ចេញឈ្មោះចៅក្រម និងព្រះរាជអាជ្ញាដែលរងពិន័យនោះបានទេ។
យ៉ាងណាក៏ដោយលោក សំ ប្រជាមានិត បានឲ្យដឹងដែរថា ប្រធានសាលាដំបូង ២ រូបត្រូវបានផ្ទេរកន្លែងបំពេញការងារកន្លែងថ្មីគឺប្រធានសាលាដំបូងខេត្តព្រៃវែងលោក សុខ កល្យាណ ត្រូវផ្ទេរទៅជាប្រធានសាលាដំបូងខេត្តព្រះសីហនុ ហើយលោក ម៉ុង មុន្នីចរិយា ដែលជាប្រធានសាលាដំបូងខេត្តព្រះសីហនុត្រូវផ្ទេរមកទទួលជាប្រធានសាលាដំបូងខេត្តព្រៃវែងវិញ។
លោកថា ការផ្ទេរនេះ «វាជារឿងធម្មតាដូចជាការផ្លាស់ប្តូរមន្ត្រីរាជការធម្មតាទេ»។
ជាមួយនេះដែរអង្គប្រជុំនេះក៏បានសម្រេចដាក់ឲ្យលោក សាំង សេរី អតីតចៅក្រមសាលាដំបូងខេត្តកោះកុងចូលបំពេញការងារវិញដោយត្រូវទៅបំពេញការងារនៅសាលាដំបូងខេត្តព្រៃវែង។
ចៅក្រម សាំង សេរី ធ្លាប់ត្រូវបានដាក់ពិន័យកាលពីខែមីនា ឆ្នាំ ២០១៧ ដោយតម្រូវឲ្យទៅទទួលការបណ្ដុះបណ្ដាលបន្ថែម និងព្យួរការងារមិនឲ្យមានប្រាក់បៀវត្សរ៍អស់រយៈពេល ៩ ខែ។
លោក ប្រជាមានិត ថ្លែងថាការសម្រេចឲ្យលោក សាំង សេរី វិលចូលការងារវិញនេះគឺដោយសារ «គាត់បានរៀបរយការងារគាត់ល្អឡើងវិញហើយ»។
លោក អ៊ិន គង់ជិត មន្ដ្រីសម្របសម្រួលអង្គការការពារសិទ្ធិមនុស្សលីកាដូ ប្រចាំខេត្តកោះកុងបានថ្លែងថា លោកមិនដឹងច្បាស់ករណីលោក សាំង សេរី ទេ ប៉ុន្តែលោកសង្កេតឃើញជាទូទៅថា ចៅក្រម សាំង សេរី បានបំពេញការងារល្អប្រសើរ លើកលែងត្រង់គាត់ឧស្សាហ៍អវត្តមាន។
លោកបន្តថា៖ «គាត់អនុវត្តវិជ្ជាជីវៈរបស់គាត់ គាត់មិនមានរឿងអាស្រូវ មិនសូវមានគេនិយាយដើម។ យើងមិនដឹងមូលហេតុនៃការដាក់ពិន័យគាត់ទេ តែការសង្កេតខាងក្រៅ គាត់អត់ធ្លាប់មានបញ្ហាអីធ្ងន់ធ្ងរផង។ កំហុសដែលគាត់ធ្លាប់មាន គឺច្រើនតែអវត្តមាន»។
លោកបន្ដទៀតថាចៅក្រម សាំង សេរី «កាលពីខែសីហា ២០១៦ គាត់សម្រេចលើកលែងចោទប្រកាន់សកម្មជនដីធ្លីម្នាក់នៅខេត្តកោះកុង»។
លោក ឌិត មន្ទី ប្រធានតុលាការកំពូល និងជាប្រធានក្រុមប្រឹក្សាពិន័យបដិសេធអត្ថាធិប្បាយករណីដាក់ពិន័យនេះ ខណៈលោកស្រី ជា លាង អគ្គព្រះរាជអាជ្ញានៃតុលាការកំពូល និងជាប្រធានក្រុមប្រឹក្សាពិន័យមិនអាចសុំការបំភ្លឺបាន។
ទាក់ទិននឹងការដាក់ពិន័យនេះលោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជាយល់ថាចៅក្រម និងព្រះរាជអាជ្ញាដែលប្រព្រឹត្តខុស គួរត្រូវបានបញ្ចេញឈ្មោះដើម្បីឲ្យសាធារណជនបានដឹង។
លោកថា៖ «ចៅក្រមធ្វើខុសហើយមិនហ៊ានប្រកាសជាសាធារណៈ ខណៈដែលពលរដ្ឋ និងអ្នកនយោបាយមួយចំនួនស្ថិតនៅក្នុងការឃុំខ្លួនត្រូវបានគេដាក់ខ្នោះដៃ។ ការកែលម្អការងាររបស់ចៅក្រមគួរតែបង្ហាញឈ្មោះ បង្ហាញទីកន្លែងធ្វើការជាដើមជាប្រយោជន៍ដើម្បីកុំឲ្យការប្រព្រឹត្តដោយកំហុសហ្នឹងកើតឡើងតទៅទៀត»។
លោកថាប្រសិនបើលើកហេតុផលថា ដោយសារតែចៅក្រម និងព្រះរាជអាជ្ញាបានប្រព្រឹត្តកំហុសរដ្ឋបាលតូចតាចមែននោះ កំហុសបែបនេះមិនគួរលើកមកវែកញែកធំដុំទេ «ព្រោះការប្រជុំលើការងាររបស់ចៅក្រមគួរពិនិត្យមើលលើការងារសំខាន់ៗជាជាងយកកំហុសកំប៉ិកកំប៉ុក ក្រោមព្រះរាជាអធិបតីនៃអង្គព្រះមហាក្សត្រវាជារឿងមួយមិនល្អមើល»។
លោកបន្តថា៖ «ក្នុងប្រទេសយើងស្ថាប័នតុលាការនេះត្រូវបានគេរិះគន់ច្រើនណាស់។ អ្នកក្រ គាត់គិតថារឿងក្តីគាត់មិនទទួលបានយុត្តិធម៌ទេ បើរឿងក្តីគាត់ចូលទៅតុលាការ»។
កាលពីឆ្នាំមុន ព្រះរាជអាជ្ញាអមសាលាដំបូងខេត្តសៀមរាប លោក សំរិទ្ធ សុខុន ត្រូវបានរាយការណ៍ថា បានបង្កគ្រោះថ្នាក់ចរាចរណ៍ទាំងស្ថិតក្នុងស្ថានភាពស្រវឹង បណ្ដាលឲ្យអ្នកបើកបរម៉ូតូម្នាក់ស្លាប់។ ករណីមួយទៀតនៅខេត្តកំពង់ស្ពឺ ចៅក្រមឈ្មោះ ម៉ែន វណ្ណៈ ត្រូវបានរាយការណ៍ថាបានយកកាំភ្លើងភ្ជង់ក្រឡាបញ្ជីដែលពិការជើង។ ប៉ុន្តែថាតើគាត់ទាំង ២ ស្ថិតក្នុងចំណោមមនុស្ស ១៧ រូប ឬយ៉ាងណា ភ្នំពេញប៉ុស្តិ៍មិនអាចសុំការបំភ្លឺពីស្ថាប័នឧត្តមក្រុមប្រឹក្សានៃអង្គចៅក្រមបានទេកាលពីម្សិលមិញ។
យ៉ាងណាក្ដី នៅក្នុងពិធីបិទព្រះមហាក្សត្រ បានថ្លែងអំណរគុណចំពោះសមាជិកក្រុមប្រឹក្សានៃអង្គចៅក្រមដែលបានយកចិត្តទុកដាក់បំពេញការងារប្រកបដោយជោគជ័យ និងបរិយាកាសល្អប្រសើរ៕
