Search form

Login - Register | FOLLOW US ON

Logo of Phnom Penh Post newspaper Phnom Penh Post - ប្រធាន​គណបក្ស​អំណាច​ខ្មែរ​ ចូល​បំភ្លឺ​តុលាការ​រឿង ​ប៉ុនប៉ង​មនុស្ស​ឃាត

Content image - Phnom Penh Post
លោក​ សួន​ សេរីរដ្ឋា ប្រធាន​គណបក្ស​អំណាច​ខ្មែរ​។ ហុង មិនា

ប្រធាន​គណបក្ស​អំណាច​ខ្មែរ​ ចូល​បំភ្លឺ​តុលាការ​រឿង ​ប៉ុនប៉ង​មនុស្ស​ឃាត

ភ្នំពេញៈ លោក​ សួន​ សេរីរដ្ឋា ប្រធាន​គណបក្ស​អំណាច​ខ្មែរ​ត្រូវ​បាន​សាលា​ដំបូង​រាជធានី​កោះ​ហៅ​ទៅ​សាកសួរ​កាលពី​ម្សិលមិញ​ បន្ទាប់ពី​ស្ត្រី​ម្នាក់​ដែល​ជា​អតីត​បុគ្គលិក​របស់​លោក​បាន​ប្តឹង​ពី​បទ​ប៉ុនប៉ង​មនុស្ស​ឃាត​ និង​បទ​បរិហារកេរ្តិ៍​ជា​សាធារណៈ។

ថ្លែង​ប្រាប់​កាសែត​ភ្នំពេញ​ប៉ុស្តិ៍​កាលពី​ម្សិលមិញ​លោក​ សួន​ សេរីរដ្ឋា បាន​អះអាង​ថា​លោក​មិន​បាន​ដឹង​អំពី​ពាក្យ​បណ្តឹង​ប្រឆាំង​នឹង​រូបលោក​ដោយ​ស្ត្រី​ម្នាក់​ឈ្មោះ ម៉ៃ ស្រីលក្ខណ៍ ​នោះ​ទេ​ហើយ​រូប​លោក​ក៏​មិន​យល់​ពី​មូលហេតុ​អ្វី​បាន​ជា​អតីត​បុគ្គលិក​ធ្វើការ​ក្នុង​បក្ស​របស់​លោក​រូប​នេះ​ចោទប្រកាន់​រូប​លោក​ពី​បទ​ប៉ុនប៉ង​មនុស្ស​ឃាត​ និង​បទ​បរិហារកេរ្តិ៍​ជា​សាធារណៈ​ដែរ​ហើយ​លោក​បាន​មក​បង្ហាញ​ខ្លួន​នៅ​​តុលាការ​គ្រាន់តែ​ដើម្បី​បំពេញ​កាតព្វកិច្ច​ក្នុង​នាម​ជា​ជន​ជាប់ចោទ​ដែល​​ត្រូវ​បាន​ព្រះរាជអាជ្ញារង​លោក​ សេង ហៀង កោះ​ហៅ​តែ​ប៉ុណ្ណោះ​​។

«ខ្ញុំ​មិន​បាន​ធ្វើ​អ្វី​សោះ​។ គាត់​ធ្លាប់​ធ្វើការ​ជាមួយ​ខ្ញុំ​ប៉ុន្តែ​នៅពេល​​ដែល​​គាត់​ចាកចេញ​គាត់​ប្តឹង។ [ព្រះរាជអាជ្ញា] ​សួរ​ខ្ញុំ​​ថា​ស្គាល់​គាត់​ពី​ពេល​ណា។​ ពេល​ដែល​គាត់​មក​ធ្វើការ​នៅក្នុង​គណបក្ស​ និង​ហេតុ​អ្វី​បាន​ជា​គាត់​ឈប់។ ខ្ញុំ​សូម​ប្រាប់​ថា​ហេតុផល​នេះ​ខ្ញុំ​ក៏​មិន​បាន​ដឹង​ដែរ»។

លោក​ សេរីរដ្ឋា មិន​បាន​ប្រាប់​កាលបរិច្ឆេទ​ជាក់លាក់​ថា​ឈ្មោះ ស្រីលក្ខណ៍ បាន​ចាប់ផ្តើម​ធ្វើការ​នៅ​គណបក្ស​អំណាច​ខ្មែរ​តាំង​ពេល​ណា​នោះ​ទេ ប៉ុន្តែ​ លោក​បាន​ប្រាប់​ថា ​គណបក្ស​អំណាច​ខ្មែរ​បាន​បង្កើត​ឡើង​នៅ​ក្នុង​ឆ្នាំ ២០១៥ ហើយ​លោក​ក៏​បាន​វិល​ត្រឡប់​មកពី​អាមេរិក​វិញ​ដើម្បី​បើក​គណបក្ស​នេះ​នៅ​ខែ​តុលា។ «ខ្ញុំ​អស់​សំណើច​ខ្លួនឯង​ដែល​ថា​ខ្ញុំ​ប៉ុនប៉ង​សម្លាប់​មនុស្ស»។

លោក សុក សំអឿន​ មេធាវី​ការពារ​ក្តី​លោក សេរីរដ្ឋា បាន​ឲ្យ​ដឹង​ថា​ពាក្យ​បណ្តឹង​ប្រឆាំង​នឹង​កូន​ក្តី​របស់​លោក​បាន​ប្តឹង​មក​កាន់​តុលាការ​កាលពី​ថ្ងៃ​ទី​ ១២ ខែ​ធ្នូ​ ដោយ​ ស្រីលក្ខណ៍ ​​សំអាង​លើ​ភ័ស្តុតាង​នៃ​សារ​ឆ្លើយឆ្លង​នៅក្នុង​គ្រុប​ឆាត (Group Chat) នៅ​លើ​ហ្វេសប៊ុក​របស់​គណបក្ស​​អំណាច​ខ្មែរ ប៉ុន្តែ​លោក​​បន្ថែម​ថា​កូនក្តី​របស់​លោក​មាន​ភ័ស្តុតាង​យ៉ាង​រឹងមាំ​ដើម្បី​បញ្ជាក់​ថា​គាត់​​មិន​បាន​ប៉ុនប៉ង​សម្លាប់​ ស្រីលក្ខណ៍ ​ដូច​ការ​ចោទប្រកាន់​នោះ​ទេ​។

លោក​ សំអឿន ​ថ្លែង​ថា៖ «​ម្នាក់​និយាយ​អំពី​រុយ​ដោយ​លោក​បាន​ប្រៀបធៀប​ទៅ​នឹង​មនុស្ស​អាក្រក់​នៅក្នុង​គណបក្ស​នេះ​ដែល​អាច​ធ្វើ​អ្វី​មួយ​មិន​ល្អ។

លោក​ រដ្ឋា ​​មើល​ឃើញ​ថា​ការ​និយាយ​អំពី​​រុយ​គឺ​លោក​និយាយ​ក្នុង​នាម​ជា​អ្នក​នយោបាយ​គឺ​គាត់​មិន​អនុញ្ញាត​ឲ្យ​មាន​​រុយ​នៅ​ក្នុង​គណបក្ស​របស់​គាត់​នោះ​ទេ...។ សាមី​ខ្លួន​លើក​ដាក់​សត្វ [រុយ] ជា​ខ្លួនឯង ដូច្នេះ​វា​មាន​ន័យ​ថា​ជា​ការ​ប៉ុនប៉ង​សម្លាប់»។

កាលពី​ម្សិលមិញ​ដើម​បណ្តឹង ម៉ៃ ស្រីលក្ខណ៍ មិន​អាច​ទាក់ទង​ដើម្បី​សុំ​អត្ថាធិប្បាយ​បាន​ទេ។

អ្នក​នាំពាក្យ​សាលា​ដំបូង​រាជធានី​លោក​ លី សុផាណា មិន​បាន​និយាយ​លម្អិត​នោះ​ទេ​ដោយ​លោក​គ្រាន់​តែ​ថ្លែង​ថា​ពាក្យ​បណ្តឹង​ប្រឆាំង​លោក សួន សេរីរដ្ឋា ត្រូវ​ព្រះរាជអាជ្ញារង​លោក​ សេង ហៀង កំពុង​ចាត់ការ​ដោយ​ស្ដាប់​ចម្លើយ​របស់​ភាគី​ទាំង​សង​ខាង​​ និង​មើល​ទៅ​លើ​ភ័ស្តុតាង៕ NS

0

Comments

Please, login or register to post a comment