Search form

Login - Register | FOLLOW US ON

Logo of Phnom Penh Post newspaper Phnom Penh Post - ផ្សារ​ស្ទឹងត្រែង ​មាន​លក់​សត្វព្រៃ​ជា​ប្រចាំ ​រហូត​អង្គការ​អភិរក្ស​ថា ​ជា​ផ្សារ​ដ៏​អាក្រក់

Content image - Phnom Penh Post
សាច់​សត្វ​ត្រកួត​ដែល​គេ​ដាក់​លក់​ជា​ចំហ​នៅ​ផ្សារ​ស្ទឹងត្រែង​នៅ​ដើម​សប្ដាហ៍​នេះ។ រូបថត ELIAH LILLIS

ផ្សារ​ស្ទឹងត្រែង ​មាន​លក់​សត្វព្រៃ​ជា​ប្រចាំ ​រហូត​អង្គការ​អភិរក្ស​ថា ​ជា​ផ្សារ​ដ៏​អាក្រក់

ស្ទឹងត្រែងៈ បើទោះ​ជា​​សត្វ​ព្រៃ​កម្រ​នៅ​កម្ពុជា​​ស្ទើរ​ផុត​ពូជ​ទៅ​ហើយ​ក្ដី សកម្មភាព​នៃ​ការ​លក់ដូរ​នៅ​តែ​បើក​ចំហ​នៅ​ផ្សារ​ស្ទឹងត្រែង​ជា​ទង្វើ​មួយ​ដែល​​​ធ្វើឲ្យ​អង្គការ​អភិរក្ស​សត្វព្រៃ​ចាត់ទុក​ទីផ្សារ​នោះ​ថា​ជា​កន្លែង​ដ៏អាក្រក់​បំផុត​មួយ​នៅ​កម្ពុជា​។

កាលពី​ព្រឹក​ថ្ងៃ​ចន្ទ​ដើម​សប្តាហ៍​នេះ​មាន​សាច់​សត្វព្រៃ​ចម្រុះ​ប្រមាណ ៧០ គីឡូ​ត្រូវ​បាន​យុវជន ២ នាក់​ដាក់​លក់​ដោយ​គ្មាន​លាក់លៀម​នៅ​ប៉ែក​ខាង​កើត​នៃ​ផ្សារ​ស្ទឹងត្រែង។ យុវជន​ម្នាក់​បាន​កាត់​សាច់​សត្វ​ព្រៃ​ថ្លឹង​យ៉ាង​រហ័ស​ឲ្យ​អ្នក​ទិញ​នៅ​ខាង​ក្រោយ​តូប ខណៈ​គូកន​គេ​ម្នាក់​ទៀត​ដែល​មិន​ប្រាប់​ឈ្មោះ​ជា​អ្នក​ចាំ​ហៅ​ភ្ញៀវ​នៅ​ខាង​មុខ​តូប និង​បាន​រារាំង​មិន​ឲ្យ​ផ្តិត​យក​រូបភាព​ពី​សកម្មភាព​លក់ដូរ​ខុស​ច្បាប់​របស់​ពួកគេ​ទេ។

យុវជន​វ័យ​ជាង ២០ ឆ្នាំ​ដែល​ឈរ​មុខ​តូប​ប្រាប់​ថា៖ «កុំ​ថត! បើ​ថត​បង្ហោះ​ហ្នឹង គេ​មក​ចាប់​ហើយ»។

សាច់​សត្វព្រៃ​សំខាន់ៗ​ដែល​ពួកគេ​លក់​នោះ​មាន​ដូចជា​ ប្រើស ប្រមា និង ឈ្លូស ដែល​ពួកគេ​បាន​ដាក់​បង្កប់​ក្រោម​សាច់​ជ្រូក​ព្រៃ។ ក្រៅ​ពី​នោះ​ក៏​មាន​នូវ​សាច់សត្វ​ផ្សេងៗ​ទៀត​ដែល​អ្នក​សារព័ត៌មាន​ភ្នំពេញ​ប៉ុស្តិ៍​មិន​ស្គាល់។

យុវជន​ដែល​ហៅ​ភ្ញៀវ​បាន​ប្រាប់​ពី​តម្លៃ​សាច់​ដល់​អ្នក​ទិញ​ថា​សាច់​ប្រើស​លក់ ៣៥ ០០០ រៀល​ក្នុង ១ គីឡូ និង​ប្រមា​តម្លៃ ៣ ម៉ឺន​រៀល​ក្នុង ១ គីឡូ...។

យុវជន​រូប​នេះ​បាន​សុំ​ឲ្យ​គេ​ជួយ​ទិញ​ថា៖ «សាច់​ល្អ​ស្រស់។ ឆាក្តៅ ភ្លា​ក៏​បាន​ឆ្ងាញ់​ណាស់។ អ្នក​នៅ​លើ​មិន​ងាយ​បាន​ហូប​ទេ»។ ដោយ​បាន​លើក​សាច់​ប្រមា​មាន​ជាប់​ក្បាល​បង្ហាញ​ផង យុវជន​ម្នាក់​នេះ​ថា៖ «ប្រមា​មាន​សាច់ និង​ក្បាល។ ធ្មេញ​វា​យក​ចង​ឲ្យ​ក្មេង​កាច យំ​ច្រើន​ក៏​បាន»។

មុន​បដិសេធ​មិន​ឆ្លើយ​សំណួរ​ផ្សេង​យុវជន​រូប​នោះ​ថា ពួកគេ​ទិញ​ពី​អ្នក​ភូមិ​ហើយ​ថា៖ «[យើង] មិន​ដែល​ស្គាល់​ព្រៃ​ទេ»។

រីឯ​នៅ​ជិត​តូប​យុវជន​ទាំង ២ នាក់​នោះ​ក៏​មាន​ស្ត្រី​ម្នាក់​អង្គុយ​លក់​សាច់​សត្វ​ត្រកួត និង​ឈ្លូស​ផង​ដែរ តែ​ស្ត្រី​វ័យ​ខ្ទង់ ៣០ ឆ្នាំ​រូប​នេះ​មិន​ប្រាប់​ពី​ការ​លក់ដូរ​នេះ​ទេ។

ប៉ុន្តែ​ស្ត្រី​ម្នាក់​ទៀត​ដែល​ប្រាប់​តែ​អាយុ ៣៩ ឆ្នាំ​នៅ​ឃុំ​ក្បាល​រមាស ស្រុក​សេសាន មាន​លក់​សត្វ​ត្រកួត ២ ក្បាល និង​អណ្តើក​ ១ ក្បាល​នៅ​ក្រោម​គ្រែ​ក្នុង​ផ្ទះ​គាត់​ដែល​បាន​ពី​ការ​ប្រមាញ់​តាម​ព្រៃ។ គាត់​បាន​ឲ្យ​ដឹង​ថា​មាន​គេ​ដើរ​ប្រមូល​ទិញ​សត្វព្រៃ​ពី​អ្នកភូមិ​មក​លក់​បន្ត​នៅ​ទី​ប្រជុំជន ឬ​ផ្សារ​ស្ទឹងត្រែង​ដែល​សត្វ​ត្រកួត​រស់ ១ គីឡូក្រាម អ្នកភូមិ​លក់​ក្នុង​តម្លៃ ៣ ម៉ឺន​រៀល។

ស្ត្រី​រូប​នេះ​ថា៖ «សត្វ​ត្រកួត​ហ្នឹង​ទាក់​មកពី​ព្រៃ។ សត្វ​ត្រូវ​របួស ឬ​ងាប់​គេ​លក់​នៅ​ផ្សារ។ បើ​នៅ​រស់​វិញ​គេ​លក់​ទៅ​ឲ្យ​វៀតណាម​បាន​ថ្លៃ​ជាង»។

លោក ហូ សំអុល អ្នក​សម្រប​សម្រួល​អង្គការ​អាដហុក​ប្រចាំ​ខេត្ត​ស្ទឹងត្រែង​បាន​កត់សម្គាល់​ថា​មាន​តូប​យ៉ាង​ហោច​ណាស់​ ៣ បាន​ដាក់​លក់​សាច់​សត្វព្រៃ​ដោយ​ចំហ​នៅ​ផ្សារ​ស្ទឹងត្រែង​រាល់​ថ្ងៃ ក្នុង​នោះ​ក៏​មាន​តូប​របស់​យុវជន​ទាំង ២ នាក់​នោះ​ផង​ដែរ។

លោក​ថ្លែង​ថា៖ «យើង​ឃើញ​មាន​បង្ក្រាប​ដែរ តែ​អត់​មាន​ចំណាត់ការ​អី​ឲ្យ​រឹងមាំ​សោះ គឺ​ចាប់​ព្រឹក​លក់​ល្ងាច។ អ៊ីចឹង​ឃើញ​មាន​អ្នក​លក់​ដដែលៗ​រហូត​ដល់​ឥឡូវ។ គ្មាន​ចំណាត់ការ​ណា​មួយ​ឲ្យ​អ្នក​លក់​ហ្នឹង​រាង​ចាល​នោះ​ទេ»។ លោក​ថា បើ​សកម្មភាព​នេះ​នៅ​បន្ត នោះ​សត្វព្រៃ​ពិសេស​សត្វ​ប្រើស​នឹង​វិនាស​អស់​មិន​ខាន​ឡើយ។

លោក មាស សុផុន នាយ​ខណ្ឌ​រដ្ឋបាល​ព្រៃឈើ​ខេត្ត​ស្ទឹងត្រែង​បាន​ថ្លែង​ថា​ជំនាញ​រដ្ឋបាល​ព្រៃឈើ អង្គការ​សម្ព័ន្ធមិត្ត​សត្វព្រៃ និង​អាជ្ញាធរ​ពាក់ព័ន្ធ​បាន​បង្ក្រាប​ជា​បន្តបន្ទាប់។ ប៉ុន្តែ​នៅ​តែ​មាន​ឆ្មក់​លក់​ម្តងម្កាល។

ក្រុម​បង្រ្កាប​បទល្មើស​សត្វព្រៃ​ចល័ត​ដែល​គាំទ្រ​ដោយ​អង្គការ​សម្ព័ន្ធមិត្ត​សត្វ (WA) បាន​ឲ្យ​ដឹង​ថា​ក្រុម​ចល័ត​តែងតែ​បង្រ្កាប​នៅ​ផ្សារ​ស្ទឹងត្រែង​នោះ​ពី ១ ទៅ ២ ដង​ក្នុង ១ ខែ។ តែ​បទល្មើស​នៅ​តែ​មាន​ដដែល។

លោកស្រី Suwanna aun-tlett នាយក​ប្រតិបត្តិ និង​ជា​ស្ថាបនិក​អង្គការ​ខាងលើ​បាន​ឲ្យ​ដឹង​ថា​សត្វព្រៃ​ដែល​លក់​នៅ​ផ្សារ​ស្ទឹងត្រែង​ភាគច្រើន​គេ​យក​ពី​ខេត្ត​រតនគិរី ហើយ​កាលពី​ខែ​មីនា​ក្រុម​ចល័ត​បង្រ្កាប​បាន ៣ ដង​ក្នុង​ខេត្ត​ស្ទឹងត្រែង។

លោកស្រី​ថា៖ «គ្រប់​ពេល​ដែល​យើង​ទៅ​ទី​នោះ យើង​ចាប់​ពួកគេ​ទៀត។ ស្ទឹងត្រែង​គឺជា​កន្លែង [លក់ដូរ​សត្វព្រៃ] មួយ​ដ៏​អាក្រក់​ក្នុង​ចំណោម​កន្លែង​ជាច្រើន»។ លោកស្រី​បន្ត​ថា​ក្រុម​ចល័ត​តូច ហើយ​ធ្វើ​ដំណើរ​ពេញ​ផ្ទៃ​ប្រទេស​ដើម្បី​បង្រ្កាប​បទល្មើស​សត្វព្រៃ​ និង​ពង្រឹង​ការ​អនុវត្ត​ច្បាប់ តែ​មិន​អាច​បង្រ្កាប​គ្រប់​ទីកន្លែង​ដូច​ចិត្ត​ចង់​ទេ។

ទោះ​យ៉ាង​ណា​ក្នុង​រយៈពេល ១៥ ឆ្នាំ​ចុង​ក្រោយ​នេះ​ក្រុម​ចល័ត​នេះ​បាន​រឹបអូស​សត្វ​ខ្លាឃ្មុំ ១៦៥ ក្បាល ដើម្បី​យក​ទៅ​រក្សា​ទុក​កុំ​ឲ្យ​មាន​ការ​ជួញដូរ។ ក្រៅ​ពី​នោះ​ក៏​មាន​សាច់​សត្វព្រៃ​ជាង ៣០ តោន​ផង​ដែរ​ដែល​ភាគច្រើន​ជា​សាច់​សត្វ​ជ្រូកព្រៃ និង​ប្រើស ហើយ​ថា​សកម្មភាព​ក្រុម​ចល័ត​បាន​និង​កំពុង​លុប​បំបាត់​បទល្មើស​នេះ​បាន ៧០ ភាគរយ​នៅ​កម្ពុជា៕

0

Comments

Please, login or register to post a comment