Search form

Login - Register | FOLLOW US ON

Logo of Phnom Penh Post newspaper Phnom Penh Post - ពលករ​ចំណាក​ស្រុក​ខ្មែរ​ត្រូវ​​ជួយ​សង្គ្រោះ​ជា​បន្តបន្ទាប់

ពលករ​ចំណាក​ស្រុក​ខ្មែរ​ត្រូវ​​ជួយ​សង្គ្រោះ​ជា​បន្តបន្ទាប់

ភ្នំពេញៈ កម្មករ​នេសាទ​ជនជាតិ​ខ្មែរ​ម្នាក់​ និង​ស្ត្រី​ខ្មែរ​ម្នាក់​នឹង​​ត្រូវ​ធ្វើ​មាតុភូមិ​និវត្តន៍​ពី​ប្រទេស​វៀតណាម​​ និង​ប្រទេស​ចិន​ដាច់​ដោយ​ឡែក​ពី​គ្នា​។ នេះ​បើ​យោង​តាម​ការ​ប្រកាស​ឲ្យ​ដឹង​ពី​ក្រសួង​ការបរទេស។

សេចក្តី​ប្រកាស​​ព័ត៌មាន​​របស់​​​ក្រសួង​ការបរទេស​ដែល​ចេញ​ផ្សាយ​កាលពី​ម្សិលមិញ​បាន​បញ្ជាក់​ថា​កម្មករ​ខ្មែរ​ម្នាក់​មាន​អាយុ ២០ ឆ្នាំ​មាន​ស្រុក​កំណើត​នៅ​ខេត្ត​កណ្តាល​ដែល​​បាន​ធ្លាក់​ពី​នាវា​នេសាទ​ហើយ​រសាត់​អណ្តែត​ក្នុង​សមុទ្រ​តែ​មិន​បាន​បញ្ជាក់​ពី​រយៈពេល​នៃ​ការ​រសាត់​​អណ្តែត​ក្នុង​សមុទ្រ​នោះ​ទេ​មុន​ពេល​ដែល​កម្មករ​រូប​នេះ​ត្រូវ​បាន​អ្នក​នេសាទ​វៀតណាម​នៅ​ខេត្ត​កាម៉ៅ​ជួយ​សង្គ្រោះ​រួច​បញ្ជូន​ដល់​ដីគោក​ខេត្ត​កាម៉ៅ​។ ​កម្មករ​រូប​នេះ​​គ្រោង​នឹង​​ធ្វើ​មាតុភូមិ​និវត្តន៍​មក​​ដល់​កម្ពុជា​វិញ​នៅ​ថ្ងៃ​ស្អែក​។

អ្នក​នាំពាក្យ​ក្រសួង​ការបរទេស​លោក ជុំ សុន្ទរី បាន​ឲ្យ​ថ្លែង​កាលពី​ម្សិលមិញ​ថា៖ «គាត់​បាន​​ធ្លាក់​ចូល​ក្នុង​សមុទ្រ​ដោយ​ចៃដន្យ។ គាត់​ទៅ​បត់​ជើង​តូច​ប៉ុន្តែ​គាត់​បាន [ធ្លាក់​ពី​ទូក] ដោយសារ​តែ​វា​ងងឹត»។ លោក​បន្ថែម​ថា​លោក​មិន​បាន​ដឹង​ថា​ តើ​បុរស​ម្នាក់​នោះ​ជា​កម្មករ​ចំណាក​ស្រុក​ខុស​ច្បាប់​ឬ​យ៉ាង​ណា​ទេ​ហើយ​​លោក​ក៏​មិន​ដឹង​ថា​គាត់​បាន​រសាត់​អណ្តែត​នៅលើ​សមុទ្រ​អស់​រយៈពេល​ប៉ុន្មាន​ថ្ងៃ​ដែរ​មុន​ពេល​ដែល​គាត់​ត្រូវ​បាន​ជួយ​សង្គ្រោះ។

នៅ​ក្នុង​ករណី​ដាច់​ដោយ​ឡែក​​មួយ​ផ្សេង​ទៀត​មាន​ស្ត្រី​ខ្មែរ​ម្នាក់​អាយុ ២៩ ​ឆ្នាំ​មាន​ស្រុក​កំណើត​​នៅ​ខេត្ត​កំពង់ចាម​ត្រូវ​បាន​ប៉ូលិស​ឃាត់​ខ្លួន​ដោយសារ​ទិដ្ឋាការ​ស្នាក់​​នៅ​ប្រទេស​ចិន​ហួស​សុពលភាព​ហើយ​គាត់​ត្រូវ​បាន​ធ្វើ​មាតុភូមិ​និវត្តន៍​មក​ដល់​កម្ពុជា​វិញ​កាលពី​ថ្ងៃ​អាទិត្យ​​ដោយ​មាន​ការ​ខិតខំ​ប្រឹងប្រែង​រួម​គ្នា​ពី​ស្ថានទូត​កម្ពុជា​ប្រចាំ​ប្រទេស​ចិន​រួម​ជាមួយ​អាជ្ញាធរ​ចិន​ និង​អង្គការ​អន្តរជាតិ​ទេសន្តរប្រវេសន៍។

បើ​យោង​តាម​សេចក្តី​ប្រកាស​នោះ​បាន​បញ្ជាក់​ថា​ស្ត្រី​ខ្មែរ​រូប​នេះ​បាន​ចាញ់​បោក​មេខ្យល់​ដែល​លួង​លោម​យក​ទៅ​កម្សាន្ត​នៅ​ប្រទេស​វៀតណាម​ និង​ទីក្រុង​ហុងកុង​ហើយ​ចុងក្រោយ​តម្រូវ​ឲ្យ​រៀបការ​ជាមួយ​បុរស​ជនជាតិ​ចិន​នៅ​ក្នុង​ប្រទេស​ចិន។ ទោះ​ជា​យ៉ាង​ណា​ស្ត្រី​រងគ្រោះ​​ពុំ​ដែល​បាន​ទទួល​រង​ការ​ធ្វើ​ទារុណកម្ម​ ឬ​អំពើ​ហិង្សា​ពី​ក្រុម​គ្រួសារ​របស់​បុរស​ចិន​នោះ​ទេ។

បច្ចុប្បន្ន​ដោយសារ​តែ​កង្វះ​ការងារ​ និង​មុខរបរ​ក្នុង​ស្រុក ឬ​មាន​ការងារ និង​មុខរបរ​តែ​រក​ប្រាក់​ចំណូល​បាន​ទាប​មិន​អាច​ទ្រទ្រង់​ជីវភាព​បាន​​ពលរដ្ឋ​ខ្មែរ​​រាប់​សែន​នាក់​បាន​ធ្វើ​ចំណាក​ស្រុក​ទៅ​រក​ការងារ​ធ្វើ​នៅ​បរទេស​ហើយ​ខ្លះ​ត្រូវ​គេ​ជួញដូរ​៕ NS

0

Comments

Please, login or register to post a comment

ព័ត៌មានពាក់ព័ន្ធ