.jpg)
អាជ្ញាធរចុះទៅសម្របសម្រួលឲ្យពលរដ្ឋបើកផ្លូវ បន្ទាប់ពីធ្វើការតវ៉ាបិទផ្លូវពីរថ្ងៃ កាលពីថ្ងៃទី ១០ ខែកុម្ភៈ ឆ្នាំ ២០១៨។ រូបថត សហការី
ក្រចេះ៖ ពលរដ្ឋជាង ២០០ នាក់ ក្នុងចំណោមជាង ៤០០ គ្រួសារ នៅស្រុកស្នួល ខេត្ដក្រចេះ កាលពីព្រឹកថ្ងៃចន្ទនេះ បានលើកគ្នាមកតវ៉ានៅសាលាឃុំពីរធ្នូ ដើម្បីទាមទារឲ្យអាជ្ញាធរជួយអន្តរាគមន៍ និងប្រឆាំងនឹងការបណ្ដេញពួកគាត់ពីដីសម្បទានសេដ្ឋកិច្ច របស់ក្រុមហ៊ុនវៀតណាម ដោយសុំឲ្យអាជ្ញាធរ កំណត់ព្រំប្រទល់ និងឆ្វៀលដីពីក្រុមហ៊ុនកៅស៊ូវៀតណាមមកឲ្យពលរដ្ឋវិញ។
ការលើកគ្នាទៅតវ៉ានៅសាលាឃុំ២ធ្នូនេះ ធ្វើឡើងបន្ទាប់ពីពួកគាត់បានធ្វើការតវ៉ាបិទផ្លូវអស់រយៈពេល២ថ្ងៃជាប់ៗគ្នា គឺនៅថ្ងៃទី ៩ និងទី ១០ ខែកុម្ភៈ ហើយអាជ្ញាធរបានទៅបំបែកឲ្យបើកផ្លូវឡើងវិញ ដែលការតវ៉ាបិទផ្លូវនោះ បានធ្វើឡើងបន្ទាប់ពីក្រុមហ៊ុនចំការកៅស៊ូវៀតណាមបានប្រើគ្រឿងចក្រទៅឈូសឆាយដីរបស់ពួកគាត់ ដែលពួកគាត់បានកាន់កាប់អាស្រ័យផលតាំងពីឆ្នាំ ២០១០មក។
ពលរដ្ឋម្នាក់រស់នៅឃុំ ២ ធ្នូ ស្រុកស្នួល លោក ម៉េត ធី អាយុ ៥០ ឆ្នាំ បានឲ្យដឹងថា ពួកលោកមកកាន់កាប់ដីតំបន់នេះជិត ១០ ឆ្នាំមកហើយ និងស្នើឲ្យអាជ្ញាធរ ព្រមទាំងស្ថាប័នពាក់ព័ន្ធ ពន្លឿនការឆ្វៀលដីពីក្រុមហ៊ុនវៀតណាមឈ្មោះក្រុមហ៊ុនចម្ការកៅស៊ូមេមត់ ដើម្បីបំប្លែងជាដីសម្បទានសង្គមកិច្ច ជូនពលរដ្ឋក្រីក្រ ដែលគ្មានដីបានធ្វើកសិកម្មចិញ្ចឹមជីវិត។
លោកបន្តថា៖ «ពួកខ្ញុំបានតវ៉ាជាច្រើនលើកមកហើយ ប៉ុន្ដែអាជ្ញាធរ មិនបានដោះស្រាយជូនទេ តែថែមទាំងឲ្យពួកខ្ញុំចាកចេញពីដីនេះទៀត។ បន្ទាប់ពីពួកខ្ញុំ បានតវ៉ាអាជ្ញាធរស្រុក បានឲ្យពួកខ្ញុំជ្រើសរើសតំណាង ៣ នាក់ ទៅជួបចរចា និងបានសន្យាថា នឹងជួយដោះស្រាយ ប៉ុន្ដែពួកខ្ញុំនៅមិនទាន់ជឿនោះទេ»។
ពលរដ្ឋម្នាក់ទៀតរស់នៅឃុំពីរធ្នូ អ្នកស្រី ម៉េត សារ៉េត បានថ្លែងដែរថា ពលរដ្ឋមួយចំនួន បានមកតាំងទីលំនៅក្នុងតំបន់នោះចាប់ពីឆ្នាំ ២០១០ មក ដោយខ្លះមានដីក្បាលចាប់ពី ៥ ម៉ែត្រដល់ ៤០ ម៉ែត្រ បណ្ដោយចាប់ពី ២៥០ ម៉ែត្រដល់ ៤០០ ម៉ែត្រ។ អ្នកស្រីថា ដីនេះ ជាប្រភេទដីលំនៅឋាន និងជាដីកសិកម្ម ដោយផ្នែកខ្លះ មានដំណាំដំឡូងមី និងស្វាយចន្ទីជាដើម។
អ្នកស្រីបានបន្តថា កាលពីព្រឹកថ្ងៃទី ៦ កញ្ញា អាជ្ញាធរខេត្ត បានជូនដំណឹងឲ្យពលរដ្ឋសហការជាមួយក្រុមហ៊ុនដើម្បីកំណត់ព្រំដែនជាក់ស្ដែង និងក្នុងបំណងការពារកុំឲ្យពលរដ្ឋទន្ទ្រានបន្តទៀត។ ប៉ុន្តែពលរដ្ឋបារម្ភថាការកំណត់ព្រំប្រទល់ដីនៅខែវស្សានឹងប៉ះពាល់ដល់ផលដំណាំពលរដ្ឋ។ អ្នកស្រីបញ្ជាក់ថា៖ «គ្រាន់តែតវ៉ាឲ្យចែកប្លង់ជូនពលរដ្ឋសិនទៅ ចាំឈូសឆាយ។ គេចង់ឲ្យពលរដ្ឋកាយក្រវាត់ ឈូសឆាយទៅ ដើម្បីឲ្យគេបង់ពន្ធចូលទៅរាជការ»។
លោក ប៉ឹង វិន មេឃុំ ២ ធ្នូ បានឲ្យដឹងកាលនៅព្រឹកថ្ងៃទី ១២ ខែកុម្ភៈថា៖«ពលរដ្ឋដែលរស់ក្នុងបរិវេណដីក្រុមហ៊ុននោះមាន ៤១៨ គ្រួសារក្នុងនោះអ្នកចំណាកស្រុកមានប្រហែល ៧០ ភាគរយ។ បើយើងវាយតម្លៃតាមច្បាប់ពួកគាត់មានកំហុសដែលបានមករស់នៅលើដីក្រុមហ៊ុន ប៉ុន្ដែអាជ្ញាធរស្រុក ឬខេត្តថា នឹងជួយដោះស្រាយ...ខាងខ្ញុំអាជ្ញាធរឃុំមិនមានអ្វីអារកាត់ទេ»៕
