Search form

Login - Register | FOLLOW US ON

Logo of Phnom Penh Post newspaper Phnom Penh Post - ពលរដ្ឋ​ជាច្រើន​សម្រុក​ទៅ​ចុះ​ឈ្មោះ​បោះឆ្នោត​នៅ​ថ្ងៃ​ចុង​ក្រោយ

Content image - Phnom Penh Post
ប្រជាពលរដ្ឋ​សម្រុក​ចុះ​ឈ្មោះ​បោះឆ្នោត​នៅ​ការិយាល័យ​ចុះ​ឈ្មោះ​បោះឆ្នោត​នៅ​សង្កាត់​កាកាប ខណ្ឌ​ពោធិ៍សែនជ័យ​ម្សិលមិញ​។ ហេង ជីវ័ន

ពលរដ្ឋ​ជាច្រើន​សម្រុក​ទៅ​ចុះ​ឈ្មោះ​បោះឆ្នោត​នៅ​ថ្ងៃ​ចុង​ក្រោយ

ភ្នំពេញៈ គណៈកម្មាធិការ​ជាតិ​រៀបចំ​ការ​បោះឆ្នោត​ (គ.ជ.ប) កាលពី​ម្សិលមិញ​បាន​ថ្លែង​ថា​ខ្លួន​បាន​សម្រេច​​ពន្យារ​​ពេល​​មួយ​ថ្ងៃ​​​ចំពោះ​ដំណើរ​ការ​ចុះ​ឈ្មោះ​បោះឆ្នោត​ដែល​មាន​រយៈពេល​បី​ខែ​​​ដែល​​គ្រោង​​បញ្ចប់​នៅ​ល្ងាច​នេះ​ដោយ​លើក​ឡើង​នូវ​ហេតុផល​ដើម្បី​ជំរុញ​ឲ្យ​មាន​ការ​ចុះ​ឈ្មោះ​លើស​ពី​​ ៨០%។

ប្រជាពលរដ្ឋ​​ជិត ​៧,៨ ​លាន​នាក់​ក្នុង​ចំណោម​​ប្រជាពលរដ្ឋ​​ដែល​មាន​សិទ្ធិ​បោះឆ្នោត​ប្រមាណ ៩,៦​ លាន​នាក់​រហូត​មក​ដល់​ពេល​នេះ​បាន​ចុះ​ឈ្មោះ​ដើម្បី​បោះឆ្នោត​​​នៅ​ក្នុង​ការ​បោះឆ្នោត​ឃុំ-សង្កាត់​​នា​ឆ្នាំ​ក្រោយ​។

លោក​​ថ្លែង​​តាម​ទូរស័ព្ទ​ថា​៖ «​​វា​ជា​ការ​ពន្យារ​​ពេល​ទូទាំង​ប្រទេស​»។ «​មូលហេតុ​គឺ​ថា​យើង​បាន​ឃើញ​ប្រជាជន​ជាច្រើន​មក​ចុះ​ឈ្មោះ​បោះឆ្នោត​ហើយ​​ដូច្នេះ គ.ជ.ប បាន​បង្កើត​លទ្ធភាព​ឲ្យ​ប្រជាជន​ទាំង​នេះ​ចូលរួម»។​ លោក​​បន្ត​ថា​៖ «​​កាន់​តែ​ច្រើន​កាន់​តែ​ល្អ​។ ​​នោះ​ហើយ​ជា​មូលហេតុ​ដែល​យើង​សម្រេច​ពន្យារ​ពេល​»​។

ការ​បោះឆ្នោត​ឃុំ​-សង្កាត់​គឺ​គ្រោង​ធ្វើ​ឡើង​នៅ​ថ្ងៃ​ទី​ ៤ ខែ​មិថុនា​ឆ្នាំ​ក្រោយ​។ គ.ជ.ប​​ ដែល​​មាន​​តំណាង​ស្មើភាព​ពី​គណបក្ស​ធំៗ​ទាំង​ពីរ​ចាប់​តាំង​ពី​ការ​បង្កើត​ថ្មី​ឡើង​វិញ​​ក្នុង​ឆ្នាំ​ ២០១៥​ ​បាន​និង​កំពុង​ធ្វើ​ការងារ​​ចាប់​តំាងពី​ការ​ចាប់ផ្តើម​ក្នុង​​ខែ​កញ្ញា​​ក្នុង​ការ​​បង្កើត​បញ្ជី​អ្នក​បោះឆ្នោត​​​ថ្មី​ឡើង​វិញ​ដោយ​​ប្រើ​ទិន្នន័យ​​​ជីវមាត្រ​ដើម្បី​ចៀសវាង​ការ​ប្តឹង​អំពី​ការ​ក្លែងបន្លំ​ដែល​ធ្លាប់​បាន​កើត​មាន​​នៅ​ក្នុង​ការ​បោះឆ្នោត​មុនៗ​។

លោក ពុទ្ធា ​បាន​ថ្លែង​ថា​នឹង​​មិន​​មាន​ការ​ពន្យារ​ពេល​បន្ថែម​ទៀត​​ទេ​បន្ទាប់ពី​ថ្ងៃ​នេះ​ពីព្រោះ​វា​​នឹង​ប៉ះពាល់​ដល់​​សមត្ថភាព​​របស់​ គ.ជ.ប ​​ក្នុង​ការ​​ចេញ​​បញ្ជី​ឈ្មោះ​អ្នក​បោះឆ្នោត​ថ្មី​​តាម​ការ​គ្រោង​នៅ​ថ្ងៃ​ទី​ ៣ មករា ប៉ុន្តែ​លោក​ជឿ​ថា​ការ​មក​ចុះ​ឈ្មោះ​បាន​​​ ៨០​ ភាគរយ​នៃ​​​គោលដៅ​ចុះ​ឈ្មោះ​​ ៩,៦​ លាន​​នាក់​គឺជា​​ជោគជ័យ​មួយ​។

Content image - Phnom Penh Post
អ្នក​ទៅ​ចុះ​ឈ្មោះ​បោះឆ្នោត​នៅ​សង្កាត់​កាកាប​កាលពី​ម្សិលមិញ​។ ហេង ជីវ័ន

លោក ពុទ្ធា ​ថ្លែង​ថា​​៖ «​​គោលបំណង​ចុះ​ឈ្មោះ​​ ១០០ ​ភាគរយ​ផ្អែក​តាម​ច្បាប់​ក្នុង​ប្រទេស​កម្ពុជា​គ្មាន​ប្រទេស​ណា​អាច​ធ្វើ​បាន​ទេ»។ ​

លោក​ពន្យល់​ថា​ប្រជាជន​ជាច្រើន​មិន​មាន​សំបុត្រ​កំណើត​ ឬ​អត្តសញ្ញាណ​ប័ណ្ណ​ដែល​តម្រូវ​សម្រាប់​ការ​ចុះ​ឈ្មោះ​​ខណៈ​អ្នក​ខ្លះ​ទៀត​មិន​​បាន​មក​ចុះ​ឈ្មោះ​បោះឆ្នោត​​​។ «​​អ្នក​ខ្លះ​​សម្រេច​ថា​ពួកគេ​​នឹង​​មិន​ចុះ​ឈ្មោះ​​»។ «​យើង​ក៏​មាន​បញ្ហា​ដទៃៗ​ផង​ដែរ​ដូចជា​ពលករ​ចំណាក​ស្រុក​​»។

លោក ពុទ្ធា ប៉ាន់​ប្រមាណ​ថា​ពលករ​ចំណាក​ស្រុក​កម្ពុជា​ប្រមាណ​​ ១,១ ​​លាន​នាក់​រស់នៅ​ក្នុង​ប្រទេស​ថៃ​ហើយ​​​ពួកគេ​នឹង​ត្រឡប់​មក​ស្រុក​កំណើត​ដើម្បី​ចុះ​ឈ្មោះ​បោះឆ្នោត​ប្រសិន​បើ​​ពួកគេ​ចង់​ចុះ​ឈ្មោះ​បោះឆ្នោត​ខណៈ​ការ​អំពាវនាវ​​របស់​គណបក្ស​សង្គ្រោះ​ជាតិ​ដែល​សុំ​ឲ្យ​មាន​ការ​ចុះ​ឈ្មោះ​​ក្នុង​ប្រទេស​ថៃ​ត្រូវ​បាន​បដិសេធ​ដោយ​ គ.ជ.ប​។

នៅ​ការិយាល័យ​សង្កាត់​ផ្សារ​កណ្តាល​ ៣ ក្នុង​ខណ្ឌ​ដូនពេញ​កាលពី​ម្សិលមិញ​លោក ជ្រិន សាលី ប្រធាន​ប្រតិបត្តិការ​​ចុះ​ឈ្មោះ​បោះឆ្នោត​នៅ​ទី​នោះ​​ថ្លែង​ថា​មាន​ប្រជាជន​ប្រញាប់​ប្រញាល់​​មក​ចុះ​ឈ្មោះ​នៅ​​នាទី​ចុង​ក្រោយ​​​ដែល​ពួកគេ​គិត​ថា​ជា​ថ្ងៃ​ចុង​​ក្រោយ​របស់​ពួកគេ​។

លោក សាលី ​​ថ្លែង​ថា​៖ «​​មាន​ប្រជាជន ​​៧៦​ នាក់​ដែល​បាន​មក​ទាន់​ពេល។ កាល​ពី​សប្តាហ៍​មុនៗ​​មាន​ប្រជាជន​តែ​ ៣០ ​ទៅ​ ៤០ ​នាក់​​ប៉ុណ្ណោះ​ក្នុង​មួយ​ថ្ងៃ​​​»​។ «​អ្នក​ខ្លះ​មិន​ប្រាកដ​​ថា​ តើ​ពួកគេ​ចង់​​ចុះ​ឈ្មោះ​​នៅ​រាជធានី​ភ្នំពេញ​​ ឬ​​នៅ​ស្រុក​កំណើត​»។

លោក​បន្ត​ថា​៖ «​ខ្ញុំ​មាន​ការ​ពិបាក​ចិត្ត​បន្តិច​នៅពេល​ពួកគេ​​​​​មិន​មក​​លឿនៗ​កាលពី​ពេល​​មុន​។ ​ពួកគេ​មក​នៅ​ពេល​វា​ជិត​ដល់​ពេល​ផុត​កំណត់​។ ​ប្រជាជន​ម្នាក់ៗ​ចំណាយ​ពេល​ប្រហែល ​៥ ​នាទី​ដើម្បី​ចុះ​ឈ្មោះ​»។

ប្រធាន​​ការិយាល័យ​បោះឆ្នោត​លោក ចាន់ តារា ​បាន​ថ្លែង​ថា​លោក​ក៏​បាន​ឃើញ​មាន​ចំនួន​​​កើនឡើង​ច្រើន​ផង​ដែរ​នៃ​អ្នក​មក​ចុះ​ឈ្មោះ​​នៅ​ប៉ុន្មាន​ថ្ងៃ​ចុងក្រោយ​​​នេះ​បើ​ធៀប​នឹង​សប្តាហ៍​មុន​។ «​ថ្ងៃ​នេះ​យើង​បាន​ចុះ​ឈ្មោះ​ប្រជាជន​ប្រហែល​ ១២៩ ​នាក់​»។ «​​ខ្ញុំ​មិន​គិត​ថា​នឹង​មាន​មនុស្ស​ច្រើន​​ដូច្នេះ​សម្រាប់​ការ​មក​ចុះ​ឈ្មោះ​​បោះឆ្នោត​​នៅ​ថ្ងៃ​ស្អែក​ទេ​។ ​ប្រជាជន​ជឿ​ថា​ការ​ចុះ​ឈ្មោះ​បិទ​នៅ​ថ្ងៃ​នេះ​ប៉ុន្តែ​ខ្ញុំ​បាន​ប្រាប់​អ្នក​ដែល​មក​ចុះ​ឈ្មោះ​​បោះឆ្នោត​...ឲ្យ​ជួយ​​ផ្សព្វផ្សាយ​ព័ត៌មាន​នេះ​ផង​»។

លោក គល់​ បញ្ញា ​នាយក​អង្គការ​ឃ្លាំ​មើល​ការ​បោះឆ្នោត​ហៅ​កាត់​ខុមហ្វ្រែល​បាន​ថ្លែង​ថា​លោក​ជឿ​ថា គ.ជ.ប ​​​គួរ​ពន្យារ​ពេល​ការ​ចុះ​ឈ្មោះ​បោះឆ្នោត​​ឲ្យ​ច្រើន​ជាង​មួយ​ថ្ងៃ​ដើម្បី​​ឲ្យ​ «​​មនុស្ស​រាប់​សែន​នាក់​»​ទៀត​​​អាច​ដឹង​ដំណឹង​អំពី​ការ​ពន្យារ​ពេល​នេះ​ហើយ​​ទៅ​ការិយាល័យ​ឃុំ​ សង្កាត់​របស់​ពួកគេ​ដើម្បី​ចុះ​ឈ្មោះ។ «​ការ​ពន្យារ​ពេល​តែ​មួយ​ថ្ងៃ​គឺ​មិន​គ្រប់គ្រាន់​ទេ​»។ ​

លោក​បន្ថែម​ថា​អ្នក​មាន​សិទ្ធិ​បោះឆ្នោត​ជិត​ ២ ​លាន​​នាក់​ដែល​​នឹង​មិន​អាច​​បោះឆ្នោត​បាន​នៅ​ក្នុង​ការ​បោះឆ្នោត​ឃុំ​ សង្កាត់​គឺជា​ការ​បរាជ័យ​យ៉ាង​ច្បាស់​មួយ​សម្រាប់​កំណែ​ទម្រង់​​ក្រោយ​ការ​បោះឆ្នោត​​ឆ្នាំ​ ២០១៣​។

លោក​បន្ត​ថា​៖ «​គ.ជ.ប ​និយាយ​ថា​មាន​ការ​ចុះ​ឈ្មោះ​ ៨០ ភាគរយ​គឺ​ល្អ​ប៉ុន្តែ​វា​មិន​ល្អ​ទេ​»។ «​យើង​មាន​ទំនុក​ចិត្ត​​ច្រើន​​ចំពោះ​គុណភាព​នៃ​ទិន្នន័យ​ប៉ុន្តែ​យើង​នៅ​មាន​បញ្ហា​ជាមួយ​ចំនួន​អ្នក​បោះឆ្នោត​នៅ​ឡើយ​ដែល​ជា​ចំនួន​ទាប​ណាស់​»។

ទន្ទឹម​នេះ​នៅ​គណបក្ស​សង្គ្រោះ​ជាតិ​មេធាវី​ម្នាក់​សម្រាប់​គណបក្ស​សង្គ្រោះ​ជាតិ​បាន​ថ្លែង​ថា​មន្រ្តី​របស់​ខ្លួន​​បាន​កំណត់​អត្តសញ្ញាណ​​មនុស្ស​សរុប​​ចំនួន​​ ៤៧៩៣ នាក់​លើក​លែង​​បី​នាក់​ជា​ជនជាតិ​វៀតណាម​​ដែល​បាន​ចុះ​ឈ្មោះ​បោះឆ្នោត​​ហើយ​គណបក្ស​នឹង​​ដាក់​ពាក្យ​បណ្តឹង​​នៅ​ពេល​ គ.ជ.ប​​​ បើក​ទទួល​បណ្តឹង​​បន្ទាប់​ពី​​ការ​ចេញ​បញ្ជី​​ឈ្មោះ​អ្នក​បោះឆ្នោត​។

លោកស្រី ម៉េង សុភារី មេធាវី​គណបក្ស​សង្គ្រោះ​ជាតិ​​ថ្លែង​ថា​៖​ «​ជនសង្ស័យ​ភាគច្រើន​បំផុត​ជា​ជនជាតិ​វៀតណាម​។ ​មាន​ជនជាតិ​តៃវ៉ាន់​ពីរ​នាក់ ​និង​ថៃ​ម្នាក់​។ អ្នក​ដទៃ​ទៀត​ជា​ជនជាតិ​វៀតណាម​»។ «​យើង​នៅ​តែ​ប្រើប្រាស់​គោលការណ៍​ដដែល​»។ «​​យើង​កត់សម្កាល់​បញ្ហា​​ភាសា​ហើយ​​សកម្មភាព​​ថ្នាក់​មូលដ្ឋាន​មិន​ស្គាល់​ពួកគេ​»៕ PS

0

Comments

Please, login or register to post a comment