.jpg)
ប្រជាពលរដ្ឋនៅស្រុករវៀង ខេត្តព្រះវិហារមកដាក់ញត្តិនៅក្រសួងដែនដីសុំកម្មសិទិ្ធដី។ រូបថត សហគមន៍
ភ្នំពេញៈ ពលរដ្ឋចំនួន ៧ នាក់ដែលអះអាងថាជាតំណាងពលរដ្ឋចំនួន ៥៦ គ្រួសារស់នៅភូមិត្រពាំងទន្ទឹម ឃុំរមទម ស្រុករវៀង ខេត្តព្រះវិហារបានប្រមូលផ្ដុំគ្នាមកដាក់ញត្តិទៅក្រសួងដែនដីកាលពីថ្ងៃសុក្រសប្តាហ៍មុន ដើម្បីរកដំណោះស្រាយបញ្ហាដីធ្លីជាមួយនឹងក្រុមហ៊ុនរ៉ែមាស Dellcom។ គោលបំណងរបស់ពួកគេគឺស្វះស្វែងរកកិច្ចអន្តរាគមន៍ពីក្រសួងដែនដីដើម្បីសុំចេញប្លង់កម្មសិទ្ធិកាន់កាប់ដី និងសុំលុបកិច្ចសន្យាដែលពួកគេរស់នៅលើដីក្រុមហ៊ុនរ៉ែមាសឈ្មោះ Dellcom។
ពួកគេបានធ្វើការចោទប្រកាន់អាជ្ញាធរភូមិឈ្មោះ អ៊ុក ង៉ា, មេឃុំឈ្មោះ ប្រាក់ ផន និងតំណាងក្រុមហ៊ុនលោក ឡោ អាន ថាបានបង្ខំបញ្ចុះបញ្ជូល និងបន្លំឲ្យពលរដ្ឋផ្តិតមេដៃលើកិច្ចសន្យាមួយកាលពីខែកក្កដា និងសីហាឆ្នាំ ២០១៦។
យោងតាមញត្តិដែលដាក់ទៅក្រសួងបានចោទប្រកាន់ថាអាជ្ញាធរភូមិ-ឃុំ និងក្រុមហ៊ុនបានកុហកថាស្នាមមេដៃនោះគឺយកទៅធ្វើប្លង់ដីរឹងឲ្យពួកគេ។ ប៉ុន្តែជាក់ស្តែងគឺយកទៅធ្វើកិច្ចសន្យាដោយមានខ្លឹមសារថាពលរដ្ឋទាំងនោះកំពុងតែរស់នៅអាស្រ័យផលលើដីក្រុមហ៊ុនទៅវិញ។
ញត្តិបានសរសេរថា៖ «ដោយសារតែយើងខ្ញុំជាអ្នកមិនចេះអក្សរ មិនយល់ពីអត្ថន័យខ្លឹមសារក្នុងកិច្ចសន្យា និងមានការគំរាមកំហែងពីអាជ្ញាធរភូមិ-ឃុំផងទើបយើងខ្ញុំយល់ព្រមបង្ខំចិត្តផ្តិតស្នាមមេដៃលើកិច្ចសន្យា»។
លោក ប៉ុង សេងជឹង ជាពលរដ្ឋម្នាក់ក្នុងចំណោម ៧ បានឲ្យដឹងថាពលរដ្ឋខ្លះបានកាន់កាប់លើដីសរុបជាង ១០០ ហិកតា (ដែលភាគច្រើនជាដីលំនៅឋាន) តាំងពីឆ្នាំ ១៩៩៧ និង ២០១១ ។ ប៉ុន្តែក្រុមហ៊ុនទើបតែចូលទៅតំបន់នោះក្នុងឆ្នាំ ២០១៥ ទេ។
លោក សេងជឹង ថា៖ «យើងមិនបានពិនិត្យឲ្យច្បាស់លាស់...អ៊ីចឹងសុំដកស្នាមមេដៃវិញ។ ដីពលរដ្ឋកាន់កាប់ តែម៉េចបានទៅជាយើងជាអ្នកអាស្រ័យផលលើដីក្រុមហ៊ុនទៅវិញ?»។
ក្រៅពីសុំលុបស្នាមមេដៃវិញពលរដ្ឋក៏បានសុំឲ្យក្រសួងដែនដីជួយចុះទៅធ្វើការវាស់វែង និងចេញប្លង់កម្មសិទ្ធិឲ្យពួកគាត់ផងដែរដោយចោទប្រកាន់ថាអាជ្ញាធរមូលដ្ឋានបានបដិសេធធ្វើប្លង់ឲ្យគាត់។
ទោះយ៉ាងណាអាជ្ញាធរមូលដ្ឋាន និងតំណាងក្រុមហ៊ុនបានច្រានចោលការចោទប្រកាន់ទាំងនោះ។
លោកមេភូមិ អ៊ុក ង៉ា បានឲ្យដឹងថាអាជ្ញាធរមិនបានបង្ខិតបង្ខំ និងបន្លំពលរដ្ឋដើម្បីយកស្នាមមេដៃនោះទេ។
លោក អ៊ុក ង៉ា បញ្ជាក់ថា៖ «ខ្ញុំបានអានឯកសារឲ្យគាត់ដែរ។ កុំឲ្យគេថាក្រុមហ៊ុនវិនិយោគយកដីគាត់ អ៊ីចឹងខ្ញុំបានឯកភាពគ្នាជាមួយមេឃុំធ្វើកិច្ចសន្យាឲ្យគាត់កាន់កាប់ដីនោះទៅ...យើងទុកដីឲ្យគាត់ដើម្បីរស់រានមានជីវិតតទៅទៀត។ គ្មានអ្នកយកដីគាត់ទេ»។
លោកពន្យល់ថាកិច្ចសន្យានោះបានចែងមិនឲ្យភាគីពលរដ្ឋ និងក្រុមហ៊ុនរំលោភលើដីគ្នាទៅវិញទៅមកហើយអាជ្ញាធរធានាទទួលខុសត្រូវ ប្រសិនបើក្រុមហ៊ុនទៅរំលោភយកដីពលរដ្ឋដែលបានធ្វើកិច្ចសន្យារួចហើយនោះ។
លោកថា អាជ្ញាធរក៏បានចុះវាស់វែងដីឲ្យពលរដ្ឋរួចហើយដែរ ដែល ១ គ្រួសារមានដីទទឹងពី ២០ ទៅ ៣០ ម៉ែត្រ និងបណ្តោយជាង ១០០ ម៉ែត្រក៏មាន។
ដោយឡែកតំណាងក្រុមហ៊ុនលោក ឡោ អាន វិញឲ្យដឹងថាក្រុមហ៊ុន Dellcom មានអាជ្ញាប័ណ្ណត្រឹមត្រូវក្នុងការធ្វើសកម្មភាពលើផ្ទៃដីជាង ៣០០ ហិកតាដែលកាត់ចេញពីដីក្រុមហ៊ុនកសិកម្មមួយឈ្មោះ Green Choice។
លោកថា ពលរដ្ឋដែលកាន់កាប់ដីជាក់ស្តែងត្រូវក្រុមនិស្សិតវាស់វែង និងចេញប្លង់ឲ្យ តែពលរដ្ឋដែលទៅកាប់ឆ្ការព្រៃក្រោយឆ្នាំ ២០១៣ ចំនួន ៥៥ គ្រួសារគឺអាជ្ញាធរមិនចេញប្លង់ដីឲ្យនោះទេ។
លោក ឡោ អាន បញ្ជាក់ថា៖ «ពលរដ្ឋអ្នកមានដីនៅនេះអត់មានទៅតវ៉ាទេ។ មុនធ្វើកិច្ចសន្យាហ្នឹងយើងបានប្រជុំ ៣-៤ ដង។ ក្រុមហ៊ុនយើងមិនបានបណ្តេញគាត់ចេញឯណា តែធ្វើកិច្ចសន្យាកុំឲ្យពង្រីកដីបន្ថែម»។
លោក សាយ ដេត អធិការស្រុករវៀងបានអះអាងថាមន្ត្រីនគរបាលស្រុកមិនដែលបានធ្វើការគំរាមកំហែងដល់ពលរដ្ឋនោះទេ។
លោក យស មុន្នីរ៉ាត់ អ្នកនាំពាក្យក្រសួងរ៉ែ និងថាមពលមិនទាន់បានដឹងពីការដាក់ញត្តិនេះទេ។ ទោះយ៉ាងណាលោកបានឲ្យដឹងថាដីពលរដ្ឋគ្មាននៅក្នុងក្រុមហ៊ុន Dellcom ទេហើយក្រុមហ៊ុននេះក៏កំពុងតែធ្វើអាជីវកម្មរ៉ែមាសផងដែរ៕
