Search form

Login - Register | FOLLOW US ON

Logo of Phnom Penh Post newspaper Phnom Penh Post - ពលរដ្ឋ​ទាមទារ​ឲ្យ​ដោះលែង​យុវជន​​ចលនា​មាតា​ធម្មជាតិ

សមត្ថកិច្ច​ព្យាយាម​រារាំង​ប្រជាពលរដ្ឋ​មិន​ឲ្យ​ធ្វើការ​តវ៉ា​កាលពី​ថ្ងៃ​ម្សិលមិញ។
សមត្ថកិច្ច​ព្យាយាម​រារាំង​ប្រជាពលរដ្ឋ​មិន​ឲ្យ​ធ្វើការ​តវ៉ា​កាលពី​ថ្ងៃ​ម្សិលមិញ។ រូបថត សហការី

ពលរដ្ឋ​ទាមទារ​ឲ្យ​ដោះលែង​យុវជន​​ចលនា​មាតា​ធម្មជាតិ

កោះកុងៈ ប្រជាសហគមន៍​ដីធ្លី និង​នេសាទ​ជាង ១០០ ​នាក់​មកពី​ស្រុក​ចំនួន​ ៣ ក្នុង​ខេត្ត​កោះកុង​បាន​លើក​គ្នា​ទៅ​តវ៉ា​នៅ​មុខ​ពន្ធនាគារ និង​សាលា​ដំបូង​ខេត្ត​កោះកុង​កាលពី​ថ្ងៃ​ម្សិលមិញ​ដើម្បី​ទាមទារ​ឲ្យ​តុលាការ​ដោះលែង​យុវជន​ចលនា​មាតា​ធម្មជាតិ​ ៣ នាក់​ដែល​ត្រូវ​បាន​អាជ្ញាធរ​ចាប់​ខ្លួន​ដោយសារ​ការ​តវ៉ា​ប្រឆាំង​នឹង​ការ​បូម​ខ្សាច់​របស់​ក្រុមហ៊ុន​វៀតណាម។

ការ​តវ៉ា​នេះ​បាន​ធ្វើ​ឡើង​ខណៈ​ដែល​ចៅក្រម​ស៊ើបសួរ​សាលា​ដំបូង​ខេត្ត​បន្ត​នីតិវិធី​សាកសួរ​ទៅលើ​យុវជន​ដែល​ជា​សកម្មជន​ការពារ​បរិស្ថាន​បី​នាក់​រួមមាន​លោក សាន់ ម៉ាឡា, ទ្រី សុវិគា និង ស៊ឹម សំណាង នៅក្នុង​ពន្ធនាគារ​ខេត្ត​ជុំវិញ​បណ្តឹង​របស់​អាជ្ញាធរ​ឃុំ និង​ក្រុមហ៊ុន​បូម​ខ្សាច់​ Direct Access ដែល​ចោទ​ប្រកាន់​ពី​បទ​គំរាមកំហែង​ថា​នឹង​​ធ្វើឲ្យ​ខូចខាត​ដែល​ភ្ជាប់​នឹង​បញ្ជា​អ្វី​មួយ។

លោក យន នៅ ប្រជាពលរដ្ឋ​មកពី​ស្រុក​បទុមសាគរ​បាន​ឲ្យ​ដឹង​ថា​ពួកគាត់​បាន​ប្រមូល​ផ្តុំ​តវ៉ា​នៅ​មុខ​ពន្ធនាគារ​ខេត្ត​នា​ពេល​ព្រឹក និង​ដើរ​ដង្ហែ​ក្បួន​ទៅ​កាន់​សាលា​ដំបូង​ខេត្ត​នៅពេល​រសៀល​ដើម្បី​ទាមទារ​ឲ្យ​តុលាការ​​ដោះលែង​យុវជន​ចល​នាមាតា​ធម្មជាតិ​ទាំង​បី​នាក់​នោះ​ដែល​គ្មាន​កំហុស និង​ស្នើឲ្យ​ជួយ​អន្តរាគមន៍​រក​យុត្តិធម៌​ករណី​ក្រុមហ៊ុន​វៀតណាម​ បូម​ខ្សាច់​ធ្វើឲ្យ​ប៉ះពាល់​ដល់​របរ​នេសាទ​របស់​ប្រជាសហគមន៍​នៅ​ឃុំ​អណ្តូង​ទឹក។

លោក​បាន​បន្ត​ថា៖ «ប្រជាពលរដ្ឋ​មិន​សុខ​ចិត្ត​ទេ​យើង​​សុំ​ឲ្យ​​តុលាការ​រក​យុត្តិធម៌​ឲ្យ​ពួកគាត់​ដែល​​ជា​​សកម្មជន​ការពារ​បរិស្ថាន​បើ​មិន​អ៊ីចឹង​ទេ​ពួកខ្ញុំ​នឹង​បន្ត​ការ​តវ៉ា​រហូត​ និង​បោះតង់​ដេក​នៅ​មុខ​សាលា​ដំបូង​ខេត្ត​រហូត​ដល់​ដោះលែង​»។

បើ​តាម​លោក យន នៅពេល​ដែល​តវ៉ា​នោះ​អាជ្ញាធរ​ជាច្រើន​នាក់​បាន​មក​រារាំង​ប្រជាពលរដ្ឋ​ប៉ុន្តែ​ពុំ​មាន​ការ​ប៉ះទង្គិច​ណា​មួយ​ទេ។

ចៅក្រម​ស៊ើបសួរ​សាលា​ដំបូង​ខេត្ត​កោះកុង កញ្ញា ឈុន ដាវី ពុំ​អាច​សុំ​ការ​អត្ថាធិប្បាយ​បាន​ទេ​ខណៈ​ដែល​​ព្រះរាជអាជ្ញា​លោក ប៊ូ ប៊ុនហាង បដិសេធ​ឆ្លើយតប​ដោយ​ប្រាប់​ថា​ជាប់​ប្រជុំ។

អ្នក​នាំពាក្យ​ក្រសួង​រ៉ែ និង​ថាមពល​លោក ឌិត ទីណា បាន​ប្រាប់​ភ្នំពេញ​ប៉ុស្តិ៍​តាមរយៈ​អ៊ីមែល​ថា​ក្រុម​អធិការកិច្ច​ក្រសួង​បាន​ចុះ​ទៅ​ត្រួតពិនិត្យ​សកម្មភាព​បូមខ្សាច់​របស់​ក្រុមហ៊ុន Direct Access កាលពី​ថ្ងៃ​​សុក្រ​សប្តាហ៍​មុន​នេះ​ដោយ​រកឃើញ​ថា​ក្រុមហ៊ុន​បាន​ធ្វើ​អាជីវកម្ម​របស់​ខ្លួន​ក្នុង​តំបន់​ដែល​ក្រសួង​បាន​កំណត់​ប៉ុន្តែ​បែរ​ជា​រង​ការ​រំខាន​ពី​សំណាក់​យុវជន​ចលនា​មាតា​ធម្មជាតិ។

មន្ត្រី​បច្ចេកទេស​ជាន់ខ្ពស់​ឃ្លាំ​មើល​សិទ្ធិ​មនុស្ស​​នៃ​អង្គការ​លីកាដូ លោក អំ សំអាត តំណាង​ឲ្យ​មេធាវី​របស់​យុវជន​ទាំង​ ៣ នាក់​បាន​ឲ្យ​ដឹង​ថា​ចៅក្រម​​ស៊ើបសួរ​បាន​សាកសួរ​ទៅលើ​យុវជន​តែ​មួយ​រូប​ទេ​គឺ​លោក ស៊ឹម សំណាង ខណៈ​ដែល​យុវជន​ពីរ​នាក់​ទៀត​ត្រូវ​បាន​លើក​ពេល​​។

លោក​ថា៖ «ការ​ផ្អាក​ការ​សាកសួរ​នេះ​ប្រហែល​មកពី​ស្ថានភាព​ប្រជាពលរដ្ឋ​ដែល​តវ៉ា​នៅ​ខាង​ក្រៅ​ពន្ធនាគារ​ទាមទារ​ឲ្យ​ដោះលែង»៕

0

Comments

Please, login or register to post a comment