.jpg)
ពលរដ្ឋបុរីកីឡា តវ៉ានៅខាងមុខផ្ទះលោកស្រី ស៊ុយ សុផាន ក្នុងខណ្ឌទួលគោក កាលពីថ្ងៃទី ១៧ ខែមករា ឆ្នាំ ២០១៨។ ហុង មិនា
ភ្នំពេញៈ ពលរដ្ឋរាប់រយគ្រួសារ ត្រូវបានបង្ខំឲ្យបោះបង់លំនៅឋានរបស់ពួកគេ នៅពេលដែលផ្ទះសម្បែងរបស់ពួកគេត្រូវបានបំផ្លាញចោល កាលពីឆ្នាំ ២០១២ ដើម្បីយកទីតាំងនោះ សម្រាប់គម្រោងអភិវឌ្ឍន៍។ ថ្វីបើមានប្រជាពលរដ្ឋភាគច្រើន បានព្រមទទួលយកសំណង នឹងផ្លាស់ប្តូរទីលំនៅទៅរស់នៅលើទីតាំងថ្មីក្តី ក៏នៅមានពលរដ្ឋពីរក្រុមទៀត ដែលមិនព្រមចាកចេញ។
មួយក្រុមក្នុងចំណោមប្រាំបួនគ្រួសារ ត្រូវបានគេដាក់ឱសានវាទ ឲ្យត្រឹមថ្ងៃទី ២២ ខែធ្នូ ហើយចាប់តាំងពីពេលនោះមក មានការផ្តល់សំណងបន្ថែមទៀត ហើយមួយក្រុមទៀត ដែលមាន ៣០ គ្រួសារ ចាប់តាំងពីខែធ្នូមក ក៏មានការផ្តល់សំណងផ្នែកហិរញ្ញវត្ថុនិងផ្ទះមួយកន្លែង ដែលមានទីតាំងនៅជាយក្រុង ដែលស្ថិតនៅក្នុងភូមិអណ្ដូង ឬក៏ទាំងពីរផងដែរ។
សម្រាប់ក្នុងក្រុមទី ២ ចំនួនអ្នកដែលព្រមទទួលយកសំណង បានកើនឡើងដល់២៦គ្រួសារ កាលពីថ្ងៃទី ២ ខែកុម្ភៈ នៅពេលដែលអ្នកស្រី កៅ ចាន់ធូ និង មឿន ប៊ុនធឿន បានព្រមទទួលយកផ្ទះ នៅក្នុងភូមិអណ្តូងនិងប្រាក់ចំនួន ២០០០ ដុល្លារ។
នៅថ្ងៃទី ៦ ខែកុម្ភៈ អ្នកស្រីចាន់ធូ បានថ្លែងថា អ្នកស្រីគ្មានជម្រើសទេ។ អ្នកស្រីបន្តថា៖«វាពិបាកណាស់សម្រាប់ពួកយើង ក្នុងការរង់ចាំ ដើម្បីទទួលនូវអ្វីដែលយើងចង់បាន។ វាត្រូវការពេលវេលាច្រើន។ ដូច្នេះហើយ ខ្ញុំត្រូវបិទភ្នែក ដើម្បីទទួលយកសំណងនោះ»។
លោក វណ្ណ សូផាត អ្នកសម្របសម្រួលរបស់មជ្ឈមណ្ឌលសិទ្ធិមនុស្សកម្ពុជា សម្រាប់ពលរដ្ឋបុរីកីឡា បានថ្លែងថា ក្រៅពីក្រុមទាំងពីរនេះ នៅមាន១១គ្រួសារផ្សេងទៀត ដែលកំពុងពិចារណាអំពីសំណងនេះពីសាលារាជធានីភ្នំពេញ។
អ្នកស្រី ដាញ់ គង្គា ដែលជាសមាជិកក្រុមប្រាំបួនគ្រួសារ បាននិយាយនៅថ្ងៃទី ៦ ខែកម្ភៈថា អ្នកស្រីនៅតែរង់ចាំស្តាប់ដំណឹងពីសាលារាជធានីភ្នំពេញ។
អ្នកស្រីបញ្ជាក់ថា៖«យើងនឹងមានកិច្ចប្រជុំជាថ្មីម្តងទៀតជាមួយក្រុមរបស់យើង ដើម្បីពិភាក្សាគ្នា អំពីអ្វីដែលយើងត្រូវធ្វើបន្ទាប់ ថាតើត្រូវធ្វើការតវ៉ា ឬរង់ចាំស្តាប់ដំណឹងពីសាលារាជធានីភ្នំពេញ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ និងអភិបាលខណ្ឌ៧មករា លោក លឹម សុភា បានបដិសេធធ្វើអត្ថាធិប្បាយ៕ NS
