ភ្នំពេញៈ ពលរដ្ឋប្រមាណ ២០ នាក់ មកពីខណ្ឌច្បារអំពៅ បានប្រមូលផ្តុំគ្នានៅមុខផ្ទះ លោកនាយករដ្ឋមន្ត្រី ហ៊ុន សែន ក្បែរវិមានឯករាជ្យនៅព្រឹកមិញនេះ ក្នុងបំណងដើម្បីទទួលបានអាំងប៉ាវម្នាក់ ៥ ម៉ឺនរៀល ក្នុងឱកាសបុណ្យចូលឆ្នាំចិន ក្រោយការលេចឮតៗគ្នាថា លោកបានផ្តល់ឲ្យពលរដ្ឋ កាលពីឆ្នាំមុនផងដែរ ប៉ុន្តែពួកគេត្រូវបានបណ្តេញចេញដោយក្រុមសន្តិសុខ។
អ្នកស្រី សម ចាន់ ដែលជាស្ត្រីមេផ្ទះមកពីសង្កាត់ច្បារអំពៅទី ១ បានបញ្ជាក់ប្រាប់ថា ក្រុមគាត់បានជិះម៉ូតូកង់បី ចំនួនពីរ មកកាន់ទីនេះ ពីព្រោះពួកគាត់បានឮថា លោកនាយករដ្ឋមន្រ្តីបានផ្តល់ថវិកាចំនួន ៥០០០០ រៀល ទៅកាន់ប្រជាជនកាលពីឆ្នាំមុន។
អ្នកស្រីនិយាយថា៖ «ថ្ងៃនេះ គ្មាននរណាម្នាក់ឲ្យប្រាក់ដល់ពួកយើងទេ ប៉ុន្តែពួកយើងបែរជាត្រូវបានបណ្តេញចេញពីផ្ទះសម្តេចដោយក្រុមសន្តិសុខទៅវិញ»។
ក្រុមសន្តិសុខបានប្រាប់ដល់ប្រជាជនទាំងនោះថាថ្ងៃនេះជា «ថ្ងៃសែន» ចូលឆ្នាំចិនដូច្នេះគ្មាននរណាឲ្យអាំងប៉ាវក្នុងថ្ងៃនេះទេ។
លោក គង់ ចំរើន ដែលជាមន្រ្តីមួយរូបមកពីឧទ្ទុកាល័យលោក ហ៊ុន សែន បានប្រាប់ថា គាត់មិនបានដឹងពីរឿងមួយនេះទេ ហើយគាត់ក៏បានបញ្ជាក់ថា កាលពីឆ្នាំមុនសម្តេច ហ៊ុន សែន ក៏មិនបានផ្តល់អាំងប៉ាវ ដល់ពលរដ្ឋនោះដែរ។
លោកថា៖ «លោកផ្ដល់ឲ្យតែចំពោះតែប៉ូលិសចំនួន ១០ ទៅ ២០ នាក់ ដែលយាមនៅពីមុខផ្ទះសម្តេចតែប៉ុណ្ណោះ»។
ជំនួសដោយការផ្តល់ប្រាក់លោក ចំរើន បន្ថែមទៀតថា៖ «លោកនាយករដ្ឋមន្រ្តី តែងតែយកចិត្តទុកដាក់ទៅលើទាំងអ្នកមាន និងអ្នកក្រដែលកំពុងត្រូវការជំនួយ»។
ទោះជាយ៉ាងណាក្តី អ្នកលក់ទឹកអំពៅម្នាក់តាមផ្លូវម្នាក់ ដែលរស់នៅសង្កាត់ព្រែកឯង ខណ្ឌច្បារអំពៅ បានប្រាប់ឲ្យដឹងថា កាលពីឆ្នាំមុន គាត់បានទទួលប្រាក់ចំនួន ៥ ម៉ឺនរៀលដែលផ្តល់ឲ្យដោយអង្គរក្សមួយរូបនៅក្នុង ភូមិគ្រឹះនាយករដ្ឋមន្ត្រីតែម្តង៕(រាយការណ៍បន្ថែមដោយ អ៊ុក សុន្ទថារ័ត្ន)