Search form

Login - Register | FOLLOW US ON

Logo of Phnom Penh Post newspaper Phnom Penh Post - ពលរដ្ឋ​រងគ្រោះ​នៅ​បុរីកីឡា​ ១៥ គ្រួសារ​ទៀត​មិន​ទាន់​បាន​សំណង

Content image - Phnom Penh Post
លោកស្រី ស៊ុយ សុផាន ប្រធាន​ក្រុមហ៊ុន ផានអ៊ីម៉ិច ធ្វើ​កាយវិការ​នៅក្នុង​សន្និសីទ​នៅឯ​សាលា​រាជធានី​ភ្នំពេញ​ពី​ថ្ងៃ​ម្សិលមិញ​​។ ហេង ជីវ័ន

ពលរដ្ឋ​រងគ្រោះ​នៅ​បុរីកីឡា​ ១៥ គ្រួសារ​ទៀត​មិន​ទាន់​បាន​សំណង

ភ្នំពេញៈ សាលា​រាជធានី​ភ្នំពេញ​បាន​អះអាង​ថា​នៅ​មាន​ប្រជាពលរដ្ឋ​តែ​ ១៥ ​គ្រួសារ​ទៀត​ប៉ុណ្ណោះ​ដែល​មិន​ទាន់​បាន​ទទួល​យក​ដំណោះស្រាយ​ពី​សាលា​រាជធានី​ដើម្បី​បញ្ចប់​ជម្លោះ​ដីធ្លី​ដ៏រ៉ាំរ៉ៃ​នៅ​ក្នុង​តំបន់​បុរីកីឡា បន្ទាប់ពី​រដ្ឋាភិបាល​បាន​សម្រេច​ប្រគល់​ដី​នៅ​តំបន់​នេះ​ទៅ​​ឲ្យ​ក្រុមហ៊ុន​ផានអ៊ីម៉ិច​សម្រាប់​អភិវឌ្ឍកាល​ពី​​ឆ្នាំ ២០០៧។

ក្រុមហ៊ុន​បាន​សន្យា​សង់​អគារ​​ស្នាក់នៅ​ចំនួន​ ១០ សម្រាប់​ចែក​ជូន​ប្រជាពលរដ្ឋ​​ជាង​ ១៧០០ គ្រួសារ​ដែល​​កំពុង​ស្នាក់នៅ​បុរីកីឡា។ ប៉ុន្តែ​ក្រុមហ៊ុន​មិន​បាន​គោរព​ទៅ​តាម​កិច្ចសន្យា​ឡើយ​ដោយ​សាងសង់​អគារ​តែ​​ប្រាំបី​ប៉ុណ្ណោះ​ និង​អាច​ឲ្យ​ប្រជាពលរដ្ឋ​ចូល​រស់នៅ​បាន​​ប្រហែល​​តែ​ ១ ៤០០ ​គ្រួសារ​។

ដោយ​ឡែក ​អ្នក​ដែល​នៅ​សេសសល់​ត្រូវ​សាលា​រាជធានី​ភ្នំពេញ​​ដោះដូរ​ទីតាំង ឬ​សំណង​​ផ្សេងៗ​​ដើម្បី​ចាកចេញ​​ពី​បុរីកីឡា។

អភិបាលរង​រាជធានី​ភ្នំពេញ​លោក មាន ចាន់យ៉ាដា ថ្លែង​ក្នុង​សន្និសីទ​សារព័ត៌មាន​កាលពី​ម្សិលមិញ​ស្តីពី​ដំណោះស្រាយ​អ្នក​បុរីកីឡា​ថា​ បញ្ហា​នៅ​បុរីកីឡា​នៅ​មាន​តែ​​ប្រជាពលរដ្ឋ​ ១៥ ​គ្រួសារ​ទៀត​ប៉ុណ្ណោះ​ដែល​មិន​​ទាន់​ឯកភាព​ទទួល​សំណង​ចាកចេញ​ពី​តំបន់​​បុរីកីឡា។ លោក​ឲ្យ​ដឹង​ថា​ប្រជាពលរដ្ឋ​ក្រុម​ចុង​ក្រោយ​មាន​​ចំនួន ១៥៤ គ្រួសារ​បាន​ដាក់​ពាក្យ​តវ៉ា​មិន​ព្រម​ទទួល​សំណង​ដែល​សាលា​រាជធានី​ភ្នំពេញ​ផ្តល់​ឲ្យ​។

លោក​ថា​ក្នុង​ចំណោម ១៥៤ គ្រួសារ​នោះ​មាន​ចំនួន​ ៣៥​ គ្រួសារ​មាន​លក្ខណសម្បត្តិ​ទទួល​បាន​ផ្ទះ​នៅ​បុរីកីឡា​មាន ៣៤ ​គ្រួសារ​បាន​យល់ព្រម​ទទួល​សំណង​បន្ទប់​មួយ​នៅ​ភូមិ​​អណ្ដូង និង​ប្រាក់​ ២០០០​ ដុល្លារ​សម្រាប់​ការ​ចាកចេញ​មាន ៤៦ គ្រួសារ​ទទួល​យក​សំណង​ ៥០០០ ដុល្លារ និង​ ២១ ​គ្រួសារ​ទទួល​យក​ថវិកា ៣០០០​ ដុល្លារ​សម្រាប់​ការ​ចាកចេញ។

ដោយ​ឡែក​ លោក​ថា ​មាន​តែ ១៥ ​គ្រួសារ​ទៀត​ប៉ុណ្ណោះ​នៅ​មិន​ទាន់​ទទួល​យក​ដំណោះស្រាយ​​។

លោក​ថា ​មាន​ ៨ គ្រួសារ​ ត្រូវ​ទទួល​បាន​បន្ទប់​មួយ​ និង​ថវិកា​ ២ ០០០ ​ដុល្លារ នៅ​ភូមិ​អណ្តូង ឬ​ប្រាក់​ ៥០០០ ​ដុល្លារ​សម្រាប់​ការ​ចាកចេញ និង​ ៧ គ្រួសារ​ត្រូវ​ទទួល​សំណង ៣០០០ ​ដុល្លារ​សម្រាប់​ការ​ចាកចេញ។​

លោក​បញ្ជាក់​ថា​ដំណោះស្រាយ​​នេះ​វាយ​តម្លៃ​ទៅ​តាម​ឯកសារ​បញ្ជាក់​របស់​គ្រួសារ​នីមួយៗ​ពី​សិទ្ធិ​ក្នុង​ការ​ទទួល​បាន​សំណង​ជាក់ស្តែង។​

លោក​បន្ថែម​ថា៖ «ក្រុម​ការងារ​យើង​ធ្វើការ​ដោយ​ឈរ​លើ​ផលប្រយោជន៍​ប្រជាជន​ជា​ធំ​...​ក្រុម​​ការងារ​ដោះស្រាយ​គោលនយោបាយ​ដោយ​ឈរ​លើ​គោលការណ៍​សង្គមកិច្ច និង​គោលការណ៍​មនុស្សធម៌​ជា​ចម្បង​បើ​យើង​ឈរ​លើ​គោលការណ៍​រក​ខុស​រក​ត្រូវ បញ្ហា​បុរី​កីឡា...​មាន​លក្ខណៈ​ស្មុគស្មាញ​មិន​ងាយ​រក​ទីបញ្ចប់...លទ្ធផល​នៃ​ការ​ដោះស្រាយ​នៅ​បុរី​កីឡា​បាន​ជាង​ ៩០​ ភាគរយ​ហើយ​...​ដើម្បី​ឈាន​ដល់​ការ​បញ្ចប់​គឺ​បងប្អូន​ប្រជាពលរដ្ឋ​ខ្លួនឯង​ស្ម័គ្រ​ចិត្ត​មក​បន្ត​ការ​ពិភាក្សា​ជាមួយ​ក្រុម​ការងារ​ដោយ​ស្មោះត្រង់ អាហ្នឹង​អាច​បញ្ចប់​បាន​ហើយ​»។

បើ​តាម​លោក មាន ចាន់យ៉ាដា សាលា​រាជធានី​នឹង​ជូន​ដំណឹង​ដល់​អ្នក​ទាំង​ ១៥ ​គ្រួសារ​ឲ្យ​មក​ពិភាក្សា​ទទួល​សំណង​ពី​​សាលា​រាជធានី​ភ្នំពេញ ឬ​ក៏​អាច​ដាក់​ឯកសារ​បន្ថែម​បើ​សិន​ជា​ពួកគាត់​មាន​ក្នុង​រយៈពេល​មួយ​ខែ​គិត​ចាប់ពី​ថ្ងៃ​ផ្សព្វផ្សាយ​ដំណឹង​នេះ​តទៅ បើ​មិន​ដូច្នោះ​ទេ​សាលា​រាជធានី​មិន​ទទួល​ដោះស្រាយ​បញ្ហា​នេះ​ទៀត​នោះ​ទេ។

Content image - Phnom Penh Post
អតីត​អ្នក​បុរីកីឡា​មកពី​ភ្នំបាត​តវ៉ា​នៅ​មុខ​សាលា​រាជធានី​ពី​ម្សិលមិញ​។ ហេង ជីវ័ន

ចំណែក​ប្រធាន​ក្រុមហ៊ុន​ផានអ៊ីម៉ិច​លោកស្រី ស៊ុយ សុផាន បាន​ថ្លែង​​ក្នុង​សន្និសីទ​នោះ​ដែរ​ថា​ក្រុមហ៊ុន​លោកស្រី​បាន​ទទួល​ដី​ពី​រដ្ឋាភិបាល​ក្នុង​ទំហំ​ដី ២,៦ ហិកតា​ជា​ថ្នូរ​នឹង​ការ​កសាង​អគារ​ស្នាក់នៅ​ឲ្យ​អ្នក​បុរី​កីឡា​នៅ​លើ​ដី​ទំហំ​ ២ ​ហិកតា។

លោកស្រី​ឲ្យ​ដឹង​ថា ​ចំនួន​ស្ថិតិ​ប្រជាពលរដ្ឋ​នៅ​បុរីកីឡា​មុន​ឆ្នាំ​ ២០០៣ ​មាន​តែ​ ១ ២៦៦​ គ្រួសារ​តែ​ប៉ុណ្ណោះ​ហើយ​​ក្រោយ​មក​ចំនួន​នេះ​ចេះ​តែ​កើន​ឡើង​ដែល​ធ្វើឲ្យ​ដំណោះស្រាយ​ចេះ​តែ​មាន​បញ្ហា។

លោកស្រី​បន្ថែម​ថា៖ «ខ្ញុំ​សូម​បញ្ជាក់​ថា​ដំបៅ​នៅ​បុរីកីឡា​នេះ​មិនមែន​ដោយសារ​ក្រុមហ៊ុន​ ឬ​សាលាក្រុង​ទេ...សូម្បី​តែ (ចែក) សារុង​មាន​មនុស្ស​ ៣០០​ នាក់​ហើយ​សារុង ៥០០ ក៏​ចែក​មិន​គ្រាន់​ដែរ​ចុះ​ទម្រាំ​តែ​ផ្ទះ​ទៀត​នេះ​ចែក​មិន​គ្រប់​ជា​ដាច់​ខាត...​ការ​ទំនាស់​កន្លង​​មក​នេះ​មនុស្ស​​បាន​ផ្ទះ​ចេះ​តែ​ចូល​មកៗ​អ៊ីចឹង​ស្ថិតិ​ចេះ​តែ​ប៉ោង...»។

ទោះ​យ៉ាង​ណា​ លោកស្រី ស៊ុយ សុផាន មិន​បាន​ឆ្លើយ​ទៅ​នឹង​សំណួរ​របស់​អ្នក​កាសែត​អំពី​មូលហេតុ​ដែល​ខាង​ក្រុមហ៊ុន​មិន​បាន​សង់​អគារ​ឲ្យ​បាន​គ្រប់​​ចំនួន​ ១០ អគារ​ទៅ​តាម​កិច្ចសន្យា​នោះ​ទេ។

ទោះ​យ៉ាង​ណា​អ្នកស្រី ស ស៊ន អ្នក​បុរីកីឡា​ក្នុង​ចំណោម​ ១៥ ​គ្រួសារ​អះអាង​ប្រាប់​ភ្នំពេញ​ប៉ុស្តិ៍​ថា​អ្នកស្រី​មិន​ព្រម​ទៅ​រស់នៅ​ភូមិ​អណ្តូង​តាម​ការ​ផ្តល់​ឲ្យ​របស់​សាលា​រាជធានី​នោះ​ទេ និង​ថា​អ្នកស្រី​នឹង​បន្ត​តវ៉ា និង​រស់នៅ​ក្នុង​អគារ​បុរីកីឡា​ចាស់​ដដែល។

អ្នកស្រី​បន្ថែម​ថា៖ «ខ្ញុំ​ចង់​និយាយ​ថា​បើ​នៅ​តែ​ឲ្យ​ពួកខ្ញុំ​ទៅ​យក​ដដែល​ហ្នឹង​ខ្ញុំ​អត់​ទៅ​យក​ទេ​ហើយ​​បើ​ឈប់​ដោះស្រាយ​ហើយ​កុំ​មក​បណ្តេញ​ខ្ញុំ​ជា​លើក​ទី​ពីរ​ ខ្ញុំ​រស់​នៅ​យ៉ាង​ម៉េច​បាន​រស់​ទៅ​...​ខ្ញុំ​អស់​ផ្ទះ​អស់​ដី​​ដោយសារ​ការ​អភិវឌ្ឍ​មិន​ស្មើភាព​គ្នា អ្នក​ (ក្រៅ) ​បាន​ផ្ទះ​នៅ​បុរីកីឡា​ហើយ​ខ្ញុំ​មិន​អាច​ទទួល​យក​បាន​ទេ...​គេ​ថា​ខ្ញុំ​ខ្វះ​ឯកសារ​តែ​វា​មិន​ពិត​គេ​ដោះស្រាយ​ហាក់​ប្រកាន់​បក្ខពួក»។

ចំណែក​នាយក​ប្រតិបត្តិ​អង្គការ​ក្រុម​ការងារ​ពិសេស​សិទ្ធិ​លំនៅឋាន​ដែល​បាន​ចូលរួម​ដំណើរការ​ដោះស្រាយ​នេះ​ថ្លែង​ក្នុង​សន្និសីទ​សារព័ត៌មាន​នោះ​ដែរ​ថា​ការ​ដោះស្រាយ​ដែល​ធ្វើ​ឡើង​ដោយ​ក្រុម​ការងារ​ចម្រុះ​របស់​សាលា​រាជធានី​ភ្នំពេញ​អាច​ទទួល​យក​បាន។​

លោក​បន្ត​ថា​រាល់​ការ​ផ្តល់​ដំណោះស្រាយ​គឺ​ពឹង​ផ្អែក​ទៅ​លើ​ឯកសារ​ដែល​ប្រជាពលរដ្ឋ​មាន​សម្រាប់​ដាក់​សំអាង។

លោក​បាន​បន្ថែម​ទៀត​ថា៖ «ក្រុម​ការងារ​របស់​ពួកយើង​គឺ​ពិនិត្យ​លើ​ឯកសារ​​...​ប្រសិន​ជា​អ្នក​ ១៥ ​គ្រួសារ​មាន​ឯកសារ​គ្រប់គ្រាន់​ពីព្រោះ​យើង​មិន​អាច​ធ្វើ​អ្វី​ក្រៅពី​មាន​ឯកសារ​ទេ បើ​សិន​ជា​គាត់​មាន​ឯកសារ​​គ្រប់គ្រាន់​សាលា​រាជធានី​នឹង​ផ្តល់​ជូន​ពួក​គាត់...​ខ្ញុំ​លើក​ទឹក​ចិត្ត​ឲ្យ​អ្នក​ទាំង​ ១៥ ​គ្រួសារ​ដែល​នៅ​សេសសល់​សូម​ចូល​ចរចា​គ្នា​ដោយ​សន្តិវិធី​ដើម្បី​បញ្ចប់​ (បញ្ហា) ​ដោយ​សុខដុមរមនា​»​។

ខណៈ​ដែល​កំពុង​មាន​សន្និសីទ​ក្នុង​សាលា​រាជធានី​នៅ​ខាង​មុខ​សាលា​រាជធានី​ក៏​មាន​អតីត​អ្នក​បុរីកីឡា​ប្រហែល​ ៥០ ​នាក់​តំណាង​ឲ្យ​ប្រជាពលរដ្ឋ​ ១៤០​ គ្រួសារ​ដែល​ត្រូវ​បាន​បណ្តេញ​ចេញ​​ទៅ​កាន់​ភ្នំបាត​ក៏​បាន​មក​ទាមទារ​សំណង​បន្ថែម​ផង​ដែរ។

ទោះ​យ៉ាង​ណា​លោក​ មាន ចាន់យ៉ាដា បាន​បញ្ជាក់​ថា​សាលា​រាជធានី​ភ្នំពេញ​នឹង​ទៅ​ពិនិត្យ​នៅ​ទីតាំង​ភ្នំបាទ​ប្រហែល​ជា​សប្តាហ៍​ក្រោយ៕

0

Comments

Please, login or register to post a comment