Search form

Login - Register | FOLLOW US ON

Logo of Phnom Penh Post newspaper Phnom Penh Post - ពលរដ្ឋ​អារ៉ែង​ភ័យ​ខ្លាច​ទាហាន​នឹង​ការពារ​ឲ្យ​ក្រុម​ហ៊ុន

Content image - Phnom Penh Post
ពលរដ្ឋ​ជន​ជាតិ​ភាគ​តិច​ជង​បាន​ឡើង​មក​ស្វែង​រក​អន្តរាគមន៍​នៅ​ភ្នំពេញ​កន្លង​មក។ ហេង ជីវ័ន

ពលរដ្ឋ​អារ៉ែង​ភ័យ​ខ្លាច​ទាហាន​នឹង​ការពារ​ឲ្យ​ក្រុម​ហ៊ុន

កោះកុងៈ ប្រជា​ពលរដ្ឋ​ជន​ជាតិ​ភាគ​តិច​ជង​មក​ពី​ឃុំ​ចំនួន​បី ស្ថិត​នៅ​ក្នុង ស្រុក​ថ្មបាំង ខេត្ត​កោះកុង ដែល​បាន​បិទ​ផ្លូវ​ចូល​ទៅ​កាន់​តំបន់​សាង​សង់​វារី​អគ្គិសនី​ស្ទឹង​អារ៉ែង ដោយ​មិន​ឲ្យ​ក្រុម​ហ៊ុន​ចិន Sinohydro ដឹក​ជញ្ជូន​គ្រឿង​ចក្រ​យក​ទៅ​ឈូស​ឆាយ​នៅ​តំបន់​នោះ​អស់​រយៈ​ពេល​ជាង​បី​ខែ​មាន​ការ​ព្រួយ​បារម្ភ​ថា អាជ្ញាធរ​នឹង​ដាក់​កម្លាំង​ប៉ូលិស​ទាហាន​ការពារ​ឲ្យ​ក្រុម​ហ៊ុន​ចិន។

លោក ឌឹម គុណឌី អ្នក​តស៊ូ​មតិ​មក​ពី​អង្គការ​មាតា​ធម្មជាតិ​ថ្លែង​ថា ជន​ជាតិ​ជង​ដែល​ប្រឆាំង​មិន​ឲ្យ​ក្រុម​ហ៊ុន​ចិន​ដឹក​គ្រឿង​ចក្រ​ចូល​ទៅ​ក្នុង​តំបន់​របស់​ពួក​គេ​អស់​រយៈ​ពេល​ជាង ៣ ខែ​មក​ហើយ​ស្រាប់​តែ​ព្រឹក​ម្សិល​មិញ​មាន​រថយន្ត​ធំ​មួយ​ដែល​មាន​ទាហាន​និង​ប៉ូលិស​មួយ​ចំនួន​បាន​ចូល​ក្នុង​តំបន់​នោះ។

លោក​ថា៖ «ពេល​យើង​សួរ​គេ គេ​ថា​ទៅ​ជួស​ជុល​រថយន្ត​ចាស់​ដែល​ខូច​ជាង ២ ឆ្នាំ​ហើយ ប៉ុន្តែ​យើង​បារម្ភ​ថា ចិន​អាច​យក​ទាហាន​ដើម្បី​មក​ការពារ​គេ»។

លោក​បាន​ឲ្យ​ដឹង​ទៀត​ថា រថយន្ត​នោះ​គឺ​ធំ​សម្រាប់​ដឹក​ឈើ​ដូច្នេះ​ពួក​លោក​បារម្ភ​ថា រថយន្ត​នោះ​គេ​អាច​ដាក់​ឧបករណ៍​ដើម្បី​សម្អាត​បាត​អាង​បាន។

លោក​ថា៖ «យើង​បាន​បោះ​តង់​នៅ​ក្នុង​តំបន់​ជិត ៣ ខែ​កន្លះ​ទៅ​ហើយ ជា​ពិសេស​នៅ​រដូវ​ភ្លៀង​នេះ​គឺ​ធ្វើ​ឲ្យ​ពួក​ខ្ញុំ​មាន​ការ​ប្រឈម​ច្រើន​ប៉ុន្តែ​វា​មិន​ជា​បញ្ហា​ទេ​យើង​អាច​ទ្រាំ​បាន គឺ​ធ្វើ​យ៉ាង​ណា​ឲ្យ​តែ​ការពារ​តំបន់​អារ៉ែង​នេះ​បាន។ បើ​បាត់​បង់​អារ៉ែង​ទើប​មិន​អាច​ទ្រាំ​បាន​ពីព្រោះ​វា​បាត់​បង់​ក្រពើ​ភ្នំ ត្រី​នាគ ជីវិត​អ្នក​ភូមិ ១៥០០ នាក់​ព្រម​ទាំង​ព្រៃ​ឈើ​ចុង​ក្រោយ​ជាង ២ ម៉ឺន​ហិកតា»។

លោក ប៊ុន លើត អភិបាល ខេត្ត​កោះកុង ពុំ​អាច​ទំនាក់​ទំនង​ដើម្បី​ធ្វើ​ការ​អត្ថាធិប្បាយ​បាន​ទេ​កាល​ពី​ថ្ងៃ​ម្សិល​មិញ។

ពលរដ្ឋ​ជាង ១០០ នាក់​បាន​ប្រឆាំង​បិទ​ផ្លូវ​ចូល ទៅ​កាន់​តំបន់​សាង​សង់​វារី​អគ្គិសនី​ស្ទឹង​អារ៉ែង ចាប់​តាំង​ពី​ថ្ងៃ ទី​១៥ ខែ​មីនា រហូត​មក​ដល់​បច្ចុប្បន្ន​នេះ។

កាល​ពី​ថ្ងៃ ទី​៧ ខែ​មីនា ឆ្នាំ​២០១៤ ក្រសួង​ឧស្សាហកម្ម រ៉ែ និង​ថាមពល អនុញ្ញាត​ឲ្យ​ក្រុម​ហ៊ុន​ចិន Sinohydro នាំ​គ្រឿង​ចក្រ​ចូល​សិក្សា ប្រមូល​ទិន្នន័យ​បន្ថែម សម្រាប់​គម្រោង​វារី​អគ្គិសនី ស្ទឹង​ឆាយ​អារ៉ែង ស្ថិត​នៅ​ក្នុង ឃុំ​ថ្ម​ដូន​ពៅ ដោយ​ក្រុម​ហ៊ុន​ចិន​នោះ​នឹង​ត្រូវ​ជួស​ជុល​ផ្លូវ​ប្រវែង ៥៤ គ.ម. ខួង​ពិនិត្យ​វាស់​វែង ស្ទង់​ទីតាំង​ផ្លូវ​បង្វែរ​ទឹក​ក្រោម​ដី​ប្រវែង ៤៩០ ម៉ែត្រ។

លោក​នាង បូរាទីណូ មន្ត្រី​សម្រប​សម្រួល​សមាគម អាដហុក ប្រចាំ​ខេត្ត​បាន​ថ្លែង​ឲ្យ​ដឹង​ថា ក្នុង​រយៈ​ពេល​មួយ​ខែ​នេះ​ឃើញ​កម្លាំង​ទាហាន​ចេះ​តែ​បន្ថែម​ចូល​រហូត​មក​ក្នុង​ទីតាំង​អារ៉ែង​នេះ​ដែល​ធ្វើ​ឲ្យ​ពលរដ្ឋ​មាន​ការ​ព្រួយ​បារម្ភ ប៉ុន្តែ​លោក​មិន​ដឹង​ថា តើ​ទ័ព​ទាំង​នេះ​យក​មក​ពី​ខាង​ណា​នោះ​ទេ។

លោក​បាន​ថ្លែង​ឲ្យ​ដឹង​ទៀត​ថា៖ «ការ​បង្កើត​នៅ​ក្នុង​មូលដ្ឋាន​នោះ​គឺ​ហាក់​ដូច​ជា​ដើម្បី​ការពារ​ឲ្យ​ក្រុម​ហ៊ុន​តែ​ប៉ុណ្ណោះ ពីព្រោះ​អី​ពី​មុន​ម៉េច​ក៏​មិន​បង្កើត​ហេតុ​អី​ទើប​តែ​បង្កើត​នៅ​ពេល​នេះ»៕

0

Comments

Please, login or register to post a comment

ព័ត៌មានពាក់ព័ន្ធ