.jpg)
សកម្មភាពពលរដ្ឋដុតឈើចោល រារាំងសមត្ថកិច្ចពេលចុះបង្ក្រាបនៅវាលស្រែ។ រូបថត សហការី
កំពង់ស្ពឺៈ ពលរដ្ឋប្រមាណជាង ២០ នាក់ប្រើហិង្សាតវ៉ាដុតឈើប្រឆាំងនឹងកម្លាំងនគរបាលយុត្តិធម៌នៅស្រុកភ្នំស្រួចកំពុងតែត្រូវបានស្រាវជ្រាវស្របពេលដែលមានការចោទប្រកាន់ថាមន្ដ្រីយោធាម្នាក់នៅពីក្រោយខ្នងរឿងនេះ។
លោក ជា សារ៉ន នាយផ្នែករដ្ឋបាលព្រៃឈើបសេដ្ឋបានឲ្យដឹងកាលពីម្សិលមិញថា កម្លាំងរដ្ឋបាលព្រៃឈើ និងនគរបាលស្រុកភ្នំស្រួចជាង ១០ នាក់ទៅបង្ក្រាបការស្តុកឈើខុសច្បាប់កាលពីព្រឹកថ្ងៃពុធ បន្ទាប់ពីទទួលបានសេចក្តីរាយការណ៍ពីការលាក់ឈើខុសច្បាប់នៅតាមវាលស្រែនៅក្នុងឃុំតាំងស្យា។ ប៉ុន្តែខណៈពេលដែលកម្លាំងកំពុងចុះបង្ក្រាបនោះ ស្រាប់តែមានប្រជាពលរដ្ឋប្រមាណជា ២០ នាក់ ដែលភាគច្រើនជាស្ត្រីទៅរារាំងការអនុវត្តច្បាប់នោះ ហើយបានយកជញ្ជ្រាំងស្រូវ និងស្លឹកត្នោតដុតឈើចោលអស់មួយកំណាត់ធំទៀតផង។ លើសពីនោះពលរដ្ឋក៏ប៉ុនប៉ងរកដុតទាំងឡាន ដែលយកទៅស្ទូចឈើនោះចោលផងដែរ។
លោក សារ៉ន ថ្លែងថា៖ «យើងមិនបានដឹងថាឈើជារបស់អ្នកណាឲ្យពិតប្រាដកទេ តែពលរដ្ឋអះអាងថាឈើនោះជារបស់គាត់។ រកដុតទាំងឡានទៀត។ [យើង] ភ័យដែរហ្នឹង»។
លោក សារ៉ន ថ្លែងថា៖ «ពាក់ព័ន្ធផ្លូវច្បាប់អ្នកដែលរារាំងហ្នឹងគឺខុសទាំងស្រុងហើយ តែយើងធ្វើមិនកើត ដោយសារតែគាត់ជាប្រជាពលរដ្ឋ ហើយគ្នាច្រើននាក់។ សំខាន់មិនបានចូលរួមជ្រោមជ្រែងទាំងអស់គ្នា។ ខ្ញុំព្យាយាមអស់លទ្ធភាព តែពលរដ្ឋចាប់ក្រៀកដៃ។ គាត់គិតថាកម្លាំងយើងមិនតបត ទើបហ៊ានដុត»។
ទោះយ៉ាងណាការដុតនោះមិនបានបង្ករបួសស្នាមដល់កម្លាំងជំនាញនោះទេ។ ដោយសារតែឈើនោះដាក់នៅកន្លែងផ្សេងៗគ្នាជាច្រើនកន្លែងតាមវាលស្រែខាងក្រោយផ្ទះពលរដ្ឋ ទើបកម្លាំងរដ្ឋបាលព្រៃឈើអាចស្ទូចរឹបអូសបាន ២ កំណាត់ធំៗយកទៅរក្សាទុក។
លោក សារ៉ន បានឲ្យដឹងថា លោកកំពុងតែស្រាវជ្រាវលើករណីនេះដើម្បីរកអ្នកទទួលខុសត្រូវ នៅពេលដែលស្រាវជ្រាវដឹងឈ្មោះអ្នកពាក់ព័ន្ធហើយនឹងរៀបចំឯកសារបញ្ជូនទៅតុលាការ។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋបានអះអាងថា ឈើនោះគេបានលក់ទៅឲ្យឈ្មួញម្នាក់ជាមន្ត្រីយោធាឈ្មោះ យឹម សុផាន់ ហើយបើឈើត្រូវបានរឹបអូសយកអស់នោះពលរដ្ឋជាអ្នកទទួលខុសត្រូវចេញលុយសងទៅលោក សុផាន់ វិញ។ ឈើទាំងនោះជាប្រភេទឈើម្រេញសរុបជាង ១០ កំណាត់ ដែលគេកាប់មកពីតំបន់ជួរភ្នំក្រវាញ។
លោក ហ៊ាន ថ្លែងថា៖ «ពេលសមត្ថកិច្ចចុះបង្ក្រាបឈ្មួញឈើឈ្មោះ យឹម សុផាន់ ដែលជាមន្ត្រីយោធាហ្នឹងបានឲ្យទៅបាតុកម្ម គំរាមដុតឡាន និងដុតឈើចោលពលរដ្ឋទាំងនោះជាអ្នកលក់ឈើឲ្យ យឹម សុផាន់។ មិនមែនជាឈើគ្រឿងផ្ទះទេ»។
លោក ជា ហ៊ាន បានឲ្យដឹងថាលោក យឹម សុផាន់ គឺជាឪពុករបស់ឈ្មោះ យឹម សុកាន ជាមន្ត្រីយោធានៅអង្គភាពរថក្រោះ ដែលត្រូវបានមន្ត្រីអាវុធហត្ថចាប់ពីបទ «ប្រើប្រាស់រថយន្តពណ៌ត្រេអ៊ី និងក្លែងស្លាកលេខ» យកទៅដឹកជញ្ជូនឈើខុសច្បាប់។ ដែលជាអ្នករកស៊ីឈើជាច្រើនឆ្នាំហើយ។
លោក ជា ហ៊ាន បញ្ជាក់ថា៖ «គាត់ថា គាត់ជាមិត្តភក្តិរបស់រដ្ឋបាលព្រៃឈើរបស់អភិបាលខេត្ត និងបងប្អូនធម៌ជាមួយព្រះរាជអាជ្ញា។ អ៊ីចឹងរាយការណ៍ទៅស្ថាប័នណាក៏គ្មាននរណាចាប់ដែរ។ គាត់ថារាយការណ៍ក៏អត់ប្រយោជន៍ដែរ»។
ទោះយ៉ាងណាលោក យឹម សុផាន់ បានបដិសេធការចោទប្រកាន់ទាំងនោះ ហើយក៏អត់មានពាក់ព័ន្ធទៅនឹងបទល្មើសព្រៃឈើ ឬបានឲ្យពលរដ្ឋទៅបាតុកម្មយកឈើនោះទេ។
លោក សុផាន់ ថ្លែងថា៖ «អូ អត់ពាក់ព័ន្ធជាមួយខ្ញុំទេ។ រឿងហ្នឹងគឺអត់ពាក់ព័ន្ធជាមួយខ្ញុំ។ អត់ទេ។ ខ្ញុំគ្មានបញ្ជាដល់ពលរដ្ឋណាម្នាក់ទេ»។
ទាក់ទងទៅនឹងការចោទប្រកាន់កូនប្រុសរបស់លោកវិញ លោក សុផាន់ បានអះអាងថា រថយន្តនោះត្រូវបានកូនចៅរបស់កូនប្រុសលោកយកទៅស៊ីឈ្នួលដឹកឈើឲ្យគេ។ រីឯកូនប្រុសលោកមិនបានដឹងនោះទេ តែបែរមានដីកាបញ្ជាឲ្យចូលខ្លួន និងចាប់ខ្លួនកូនប្រុសលោកមុនថ្ងៃកំណត់ទៅវិញ។
លោកអះអាងថា កូនប្រុសរបស់លោកក៏បានដាក់ពាក្យប្រើស្លាកលេខ ខ.ម នោះដែរ៕
