ភ្នំពេញៈ ប្រជា​ពលរដ្ឋ​ចំនួន ៤០៥ គ្រួសារ​មក​ពី ស្រុក​ស្នួល ដែល​បាត់បង់​ដីធ្លី ទៅ​ក្រុមហ៊ុន​ដី​សម្បទាន​សេដ្ឋកិច្ច វៀតណាម បាន​បដិសេធ​មិន​ទទួល​យក​ដី​សម្បទាន​សង្គមកិច្ច ដែល​រដ្ឋាភិបាល​ផ្តល់​ឲ្យ​សរុប​ទំហំ ៧៥០ ហិកតា​ដោយ​សារ​តែ​តូច​ពេក មិន​អាច​ធ្វើ​ស្រែ​ចិញ្ចឹម​ជីវិត​បាន។ ប្រជា​ពលរដ្ឋ​ចំនួន ២០៤ នាក់​តំណាង​ឲ្យ​ប្រជា​ពលរដ្ឋ​រងគ្រោះ ៤០៥ គ្រួសារ​នៅ ឃុំ​ឃ្សឹម ស្រុក​ស្នួល បាន​ឡើង​មក​ដាក់​ញត្តិ​នៅ​តាម​ស្ថាប័ន​រដ្ឋ​នានា​នៅ​ភ្នំពេញ ដោយ​ស្នាក់នៅ​ក្នុង វត្ត​សាមគ្គី​រង្សី ជាង​មួយ​សប្តាហ៍​មក​ហើយ ដើម្បី​ស្នើ​សុំ​ឲ្យ​មាន​ការ​ជួយ​អន្តរាគមន៍​ដោះស្រាយ​បញ្ហា​ដីធ្លី​របស់​ពួក​គាត់។