.jpg)
ពលរដ្ឋរងគ្រោះដោយបាត់បង់ផ្ទះសំបែងក្នុងសហគមន៍បឹងកក់ទាមទារឲ្យតុលាការកំពូលដោះលែងអ្នកស្រី ទេព វន្នី ពីម្សិលមិញ។ ផា លីណា
ភ្នំពេញៈ អតីតសកម្មជនបឹងកក់ និងជាម្ចាស់ពានរង្វាន់ផ្នែកតស៊ូមតិ ហើយដែលរងបណ្តឹងពាក់ព័ន្ធបង្ករបួសស្នាមក្នុងការធ្វើកូដកម្មកាលពីឆ្នាំ ២០១៣ នៅក្បែរផ្ទះលោកនាយករដ្ឋមន្ត្រី ហ៊ុន សែន ត្រូវបានតុលាការកំពូលកាលពីម្សិលមិញសម្រេចតម្កល់សាលដីការបស់តុលាការថ្នាក់ក្រោមឲ្យជាប់ពន្ធនាគារ ២ ឆ្នាំកន្លះដដែល បន្ទាប់ពីបើកសវនាការជំនុំជម្រះប្រមាណជាង ១ ម៉ោងមក។
ក្នុងការជំនុំជម្រះដែលមានសមាសភាពចៅក្រម ៥ រូបនោះលោកស្រីចៅក្រម គឹម សត្ថាវី ប្រធានក្រុមប្រឹក្សាជំនុំជម្រះបានអានសាលដីកានៅចំពោះមុខអ្នកស្រី ទេព វន្នី ថាក្រោយពីក្រុមប្រឹក្សាជំនុំជម្រះពិភាក្សាគ្នាមកយល់ឃើញថា ប្រការដែលជនជាប់ចោទ ទេព វន្នី និងមេធាវីការពារសិទ្ធិឲ្យជនជាប់ចោទលើកឡើងថាមិនបានប្រព្រឹត្តក្នុងអំពើហិង្សានោះគឺជាការមិនត្រឹមត្រូវទេ ហើយសភាព្រហ្មទណ្ឌសាលាឧទ្ធរណ៍សម្រេចមកនេះមានលក្ខណៈត្រឹមត្រូវតាមច្បាប់ហើយ។
លោកស្រីចៅក្រម គឹម សត្ថាវី បញ្ជាក់ថា៖ «សំអាងលើចម្លើយជនរងគ្រោះឈ្មោះ ហោ ហឿន និងឈ្មោះ អ៊ុក រតនា រួមសាក្សីដែលបានឆ្លើយបំភ្លឺនៅតុលាការថ្នាក់ក្រោមគឺមានភាពស៊ីចង្វាក់គ្នានៃការប្រព្រឹត្តរបស់ជនជាប់ចោទ។ ចំពោះមេធាវីលើកឡើងថាមានវិមតិសង្ស័យច្រើនក្នុងសំណុំរឿងនេះនោះតុលាការមិនយល់ស្របឡើយ...»។
នៅក្នុងសវនាការពីម្សិលមិញនេះដែរលោកស្រី សាម សុគន្ធា និងលោក ហម ស៊ុនរិទ្ធ ជាមេធាវីការពារសិទ្ធិបានសន្និដ្ឋានថាការចោទប្រកាន់មកលើកូនក្តីលោកស្រីនេះលោកស្រីនៅតែមើលឃើញថាមានវិមតិសង្ស័យច្រើនបើផ្អែកតាមមាត្រា ៣៨ នៃរដ្ឋធម្មនុញ្ញ និងមាត្រា ៣៥១ នៃក្រមនីតិវិធីព្រហ្មទណ្ឌ និងមាត្រា ២៤ នៃក្រមព្រហ្មទណ្ឌ។ «ចម្លើយដើមបណ្តឹងដែលឆ្លើយកន្លងមកសុទ្ធតែជាចម្លើយដាក់បន្ទុកគ្មានមូលដ្ឋានច្បាស់លាស់ទេ។ បន្ទាប់ពីដាក់បណ្តឹងមកពួកគាត់ចូលបំភ្លឺនៅតុលាការបានតែម្តងគត់។ ពួកគាត់ចោទដោយគ្មានរូបភាព និងសំឡេងដើម្បីសំអាងជាភ័ស្តុតាងឡើយ»។
បន្ទាប់ពីបញ្ចប់ការប្រកាសសាលដីកាហើយត្រូវអមដោយកងអនុរក្សពន្ធនាគារបណ្តើរចេញពីបន្ទប់សវនាការឡើងរថយន្តទាំងតក់ក្រហល់នោះអ្នកស្រី ទេព វន្នី បាននិយាយមុនត្រូវបង្ខំឲ្យឡើងរថយន្តបានប៉ុន្មានម៉ាត់ថា៖ «ពេលនេះសេរីភាពសម្រាប់ខ្ញុំគ្មានទេ តែមានតែភាពអយុត្តិធម៌សម្រាប់ខ្ញុំ»។
កូនស្រី អ្នកស្រី ទេព វន្នី នៅមុខតុលាការកំពូល។ផា លីណា
នៅខាងក្រៅរបងតុលាការកំពូលអ្នកស្រី បូវ សោភា ក្នុងចំណោមអ្នកមកគាំទ្រអ្នកស្រី ទេព វន្នី ប្រមាណ ២០ នាក់បាននិយាយថានៅគ្រប់ទីកន្លែងណាក៏ដោយឲ្យតែមានទំនាស់ដីធ្លីហើយចូលតុលាការគឺមិនដែលទទួលបានយុត្តិធម៌ទេមិនដែលមានក្តីសង្ឃឹមទេបើសិនជាគ្មានលុយពុករលួយឲ្យតុលាការ។
អ្នកស្រីថា៖ «តុលាការចោទអ្នកស្រី ទេព វន្នី គ្មានសាក្សីគ្មានភ័ស្តុតាងគឺគេចោទតែតាមពាក្យបណ្តឹងហើយតុលាការគួរតែដោះលែងឲ្យអ្នកស្រី ទេព វន្នី បានជួបជុំកូនដែលគ្នាបែកម្តាយព្រោះតំបន់បឹងកក់រដ្ឋាភិបាលបានដោះស្រាយអស់ហើយ។ បញ្ចប់ការគុំកួនលើស្ត្រីម្នាក់នេះទៅ។ តុលាការគួរតែផ្តល់យុត្តិធម៌ឲ្យពួកខ្ញុំតែផ្ទុយទៅវិញមិនបានជួយពួកខ្ញុំហើយថែមទាំងព្រួតគ្នាធ្វើបាបពួកខ្ញុំ...»។
លោក អំ សំអាត ទីប្រឹក្សាផ្នែកច្បាប់នៃអង្គការលីកាដូថ្លែងថាលោកមានការសោកស្តាយចំពោះសាលដីកានេះព្រោះអ្នកស្រី វន្នី អាចត្រូវបានលើកលែងការចោទហើយឲ្យគាត់ទៅថែរក្សាកូនៗ និងម្តាយចាស់ជរា។ រឿងនេះជាការផ្តើមចេញពីបញ្ហាវិវាទដីធ្លីនៅតំបន់បឹងកក់។
គួររំឭកថាកាលពីថ្ងៃទី ១៣ ខែមីនា ឆ្នាំ ២០១៣ អ្នកស្រី វន្នី បានចូលរួមដាក់ញត្តិពាក់ព័ន្ធដីធ្លីនៅបឹងកក់ហើយបានដើរជាក្បួនទៅក្រសួងយុត្តិធម៌ ហើយទៅខុទ្ទកាល័យលោកនាយករដ្ឋមន្ត្រី ហ៊ុន សែន ទៀត។ ប៉ុន្តែត្រូវកម្លាំងសន្តិសុខខណ្ឌដូនពេញរារាំង និងវាយតប់គ្នាដែលបណ្តាលឲ្យក្រុមហែក្បួនរងរបួស៕
