.jpg)
ពលរដ្ឋនៅអារ៉ែង តែងជួបប្រជុំនៅស្នាក់ការសហគមន៍ តែពេលនេះអាជ្ញាធរ តម្រូវឲ្យរុះរើ។
កោះកុងៈ អាជ្ញាធរកំពុងពិភាក្សាជាមួយពលរដ្ឋពីការរុះរើទីតាំងស្នាក់ការសហគមន៍អារ៉ែង ក្រោយបានជូនដំណឹងឲ្យពលរដ្ឋរុះរើស្នាក់ការក្នុងរយៈពេលមួយខែនេះ ដើម្បីយកទីតាំង មកសាងសង់ ជាសាលាឃុំស្តង់ដារវិញ ក្រោមមូលហេតុ «បម្រើសេវាជូន ប្រជាពលរដ្ឋក្នុងឃុំ»។
ស្នាក់ការសហគមន៍ស្ទឹងអារ៉ែងសព្វថ្ងៃ ដែលស្ថិតនៅភូមិច្រកឫស្សី ឃុំជំនាប់ ធា្លប់ជាបញ្ហានៃករណីចាប់តំណាងសហគមន៍លោក វ៉ែន វ៉ន នៅខែតុលា ២០១៥ និងចោទពីបទប្រមូលផលអនុផលព្រៃឈើ «ដោយគ្មានលិខិតអនុញ្ញាត» និងបទ «លុបបំបាត់វត្ថុតាង»។
នៅខែមីនា ២០១៦ តុលាការខេត្តកោះកុង បានផ្តន្ទាទោស រយៈពេល ១ ឆ្នាំ តែព្យួរទោសទាំងអស់វិញ ហើយលោកក៏ត្រូវបានដោះលែងឲ្យនៅក្រៅឃុំ ។
តាមសេចក្តីជូនដំណឹងរបស់សាលាឃុំជំនាប់ ចុះថ្ងៃទី ២១ ខែមីនានេះ បានតម្រូវឲ្យសហគមន៍ រុះរើទីស្នាក់ការចេញមុន ថ្ងៃ ២៥ ខែមេសា «បើមិនដូច្នោះទេ រដ្ឋបាលឃុំនឹងចាត់វិធានការតាមផ្លូវច្បាប់»។
សហគមន៍ស្ទឹងអារ៉ែង ដែលបង្កើតឡើងដោយប្រជាពលរដ្ឋដើម្បីការពារសត្វ និង ព្រៃឈើនៅក្នុងស្រុកថ្មបាំងនេះ ធ្លាប់បានចេញមុខតវ៉ាបន្តបន្ទាប់ ប្រឆាំងគម្រោងរដ្ឋាភិបាលរៀបចំអភិវឌ្ឍន៍ទំនប់វារីអគ្គិសនីនៅតំបន់នោះ។ ស្នាក់ការសហមន៍អារ៉ែង ស្ថិតនៅភូមិច្រកឫស្សី ឃុំជំនាប់ ស្រុកថ្មបាំង ខេត្តកោះកុង ដែលប្រជាពលរដ្ឋបានសន្សំប្រាក់ទិញឈើធ្វើរួចរាល់កាលឆ្នាំ២០១៥ ។
លោក វ៉ែន វ៉ន ដែលជាសកម្មជនបរិស្ថាននៅតំបន់អារ៉ែង និងជាអតីតសមាជិកក្រុមប្រឹក្សាឃុំជំនាប់ មកពីគណបក្សប្រជាជនកម្ពុជា ក្នុងស្រុកថ្មបាំងដែលជាអ្នកផ្ដើមគំនិតទិញឈើមកសាងសងស្នាក់ការនេះ មិនទាន់អាចសុំការបញ្ជាក់ជុំវិញករណីនេះបានទេ។
ទោះយ៉ាងណា អ្នកស្រី ម៉ន សុម៉ុន ភរិយារបស់លោក វ៉ែន វ៉ន បានឲ្យដឹងថា អ្នកស្រីពិតជាមានអារម្មណ៍សោកស្ដាយចំពោះការខិតខំប្រឹងប្រែងរបស់ស្វាមីអ្នកស្រីដែលបានចំណាយកម្លាំងកាយចិត្តសាងសង់ស្នាក់ការរដែលជាសេចក្ដីត្រូវការសម្រាប់បម្រើផលប្រយោជន៍រួមក្នុងសហគមន៍ ប៉ុន្ដែបែរជាអាជ្ញាធរបង្គាប់ឲ្យរើចេញទៅវិញ។
អ្នកស្រីបន្តថា ៖ «គេប្រាប់ឲ្យយើងរុះរើទៅ គេយកកន្លែងហ្នឹងធ្វើជាកន្លែងសាលាឃុំម្ដង ព្រោះកន្លែងតូចចង្អៀតមិនអាចធ្វើក្បែរគ្នាបានទេ ប៉ុន្ដែជាក់ស្ដែង ខ្ញុំឃើញវាមិនមានអ្វីដែលចង្អៀតទេ កន្លែងធំទូលាយណាស់ ហើយមិនដឹងជាគេមានចេតនាដូចម្ដេចទេ ខ្ញុំអត់យល់ដែរ ពេលនេះ យើងក៏កំពុងពិភាក្សាគ្នា ដើម្បីរើទៅទីតាំងកន្លែងផ្សេងទៀត»។
លោក អន សុភារិទ្ធ អភិបាលស្រុកថ្មបាំង មានប្រសាសន៍ថា នៅព្រឹកនេះអាជ្ញាធរកំពុងជួបប្រជុំដើម្បីពិភាក្សាពីការរើទីតាំងស្នាក់ការសហគមន៍ ៕
