Search form

Login - Register | FOLLOW US ON

Logo of Phnom Penh Post newspaper Phnom Penh Post - ព្រះមហាក្សត្រ​ខ្មែរ ​បាន​អំពាវនាវ​ដល់​ពលរដ្ឋ​ទៅ​ បោះឆ្នោត​ តាម​ឆន្ទៈ​របស់​ខ្លួន

Content image - Phnom Penh Post
ព្រះមហាក្សត្រ​អំពាវនាវ​ដល់​ប្រជាពលរដ្ឋ​ទៅ​បោះឆ្នោត​តាម​ឆន្ទៈ​ខ្លួន។ ហេង ជីវ័ន

ព្រះមហាក្សត្រ​ខ្មែរ ​បាន​អំពាវនាវ​ដល់​ពលរដ្ឋ​ទៅ​ បោះឆ្នោត​ តាម​ឆន្ទៈ​របស់​ខ្លួន

ភ្នំពេញ: ព្រះមហាក្សត្រ​ព្រះបាទ នរោត្តម សីហមុនី ទ្រង់​បាន​អំពាវនាវ​ដល់​ប្រជាពលរដ្ឋ​ដែល​គ្រប់​អាយុ ត្រូវ​ប្រើ​សិទ្ធិ​របស់​ខ្លួន​ទៅ​បោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់​ដែល​នឹង​ប្រព្រឹត្ត​ទៅ​នៅ​ថ្ងៃ​ទី ៤ មិថុនា ខាង​មុខ​នេះ​ដោយ​កុំ​មាន​ការ​ភ័យខ្លាច​ពី​ការ​គំរាម​កំហែង ខណៈ​ដែល​រដ្ឋាភិបាល​ផ្តល់​ថវិកា​ជាង ៥០ លាន​ដុល្លារ​ដល់ គ.ជ.ប សម្រាប់​ចំណាយ​ទៅ​ការងារ​បោះឆ្នោត​នេះ។

ព្រះរាជសារ​របស់​ព្រះករុណា​ព្រះបាទ​សម្តេច​បរមនាថ នរោត្តម​សីហមុនី ដែល​បាន​ឡាយ​ព្រះហស្ត​លេខា​តាំង​ពី​ថ្ងៃ ២០ ខែ​កុម្ភៈ និង​ត្រូវ​បាន​ចែកចាយ​កាលពី​ម្សិលមិញ​បាន​អំពាវនាវ​ឲ្យ​ប្រើ​សិទ្ធិ​សេរីភាព​របស់​ខ្លួន​ទៅ​បោះឆ្នោត​ទៅ​តាម​សតិសម្បជញ្ញៈ​របស់​ខ្លួន​ម្នាក់ៗ​ដែល​មាន​ទំនុក​ចិត្ត​ទៅ​លើ​បុគ្គល ឬ​គណបក្ស​នយោបាយ​ដែល​ខ្លួន​ពេញ​ចិត្ត។

ព្រះអង្គ​មាន​ព្រះបន្ទូល៖ «ការ​បោះឆ្នោត​ដោយ​សម្ងាត់ តាម​លទ្ធិ​ប្រជាធិបតេយ្យ សេរី ពហុបក្ស ដូចនេះ​សុំកុំ​ឱ្យ​មាន​ការ​ព្រួយបារម្ភ​ពី​ការ​គាប​សង្កត់ ការ​គំរាម​កំហែង​ពី​ជន​ណា​ម្នាក់ ឬ​បក្ស​ណា​មួយ​ឱ្យ​សោះ»។

នាយក​ប្រតិបត្តិ​នៃ​អង្គការ​និចហ្វិក​លោក សំ គន្ធាមី ថ្លែង​ថា​ព្រះរាជសារ​របស់​ព្រះមហាក្សត្រ​ពិត​ជា​សំខាន់​ក្នុង​ការ​ជំរុញ​ដល់​ប្រជាពលរដ្ឋ​ខ្មែរ​មាន​ស្មារតី​ទៅ​បោះឆ្នោត និង​ជា​សញ្ញា​នៃ​ភាព​កក់ក្តៅ​ផង​ដែរ។

លោក ថ្លែង​ថា៖ «ព្រះអង្គ​បង្ហាញ​ឆន្ទៈ​មួយ​ដែល​ព្រះអង្គ​ចង់​ឱ្យ​យើង​ទៅ​បោះឆ្នោត​ឱ្យ​បាន​គ្រប់​គ្នា​ព្រម​ទាំង​ចង់​ប្រាប់​ឱ្យ​គណបក្ស​នយោបាយ​កុំ​មាន​ការ​គាបសង្កត់ អ៊ីចឹង​ហើយ​គឺជា​សារ​មួយ​ឱ្យ​ប្រជាពលរដ្ឋ​ចាប់​អារម្មណ៍»។

លោក​ថ្លែង​ថា​សារ​នេះ​ក៏​ចង់​បង្ហាញ​ឱ្យ​គណបក្ស​ធំ​ត្រូវ​បង្ក​បរិយាកាស​ល្អ​សម្រាប់​ការ​បោះឆ្នោត​ខាង​មុខ​នេះ។

លោក​ថ្លែង​ថា៖ «កន្លង​មក​បរិយាកាស​នយោបាយ​មិន​សូវ​ល្អ ឬ​មាន​ទំនាស់​ពាក្យ​សម្តី​រវាង​គណបក្ស​ធំៗ​ទាំង​ពីរ​ដល់​អ៊ីចឹង​ទៅ​ព្រះអង្គ​អំពាវនាវ​ឱ្យ​អ្នក​បោះឆ្នោត​អញ្ជើញ​ទៅ​បោះឆ្នោត​ដោយ​ឆន្ទៈ​របស់​អ្នក​បោះឆ្នោត​រៀងៗ​ខ្លួន»។

អ្នក​នាំ​ពាក្យ​គណបក្ស​ប្រជាជន​កម្ពុជា​លោក សុខ ឥសាន បាន​ថ្លែង​ថា​ការ​ចេញ​ព្រះរាជសារ​ដើម្បី​ក្រើន​រំឭក​ដល់​ពលរដ្ឋ​ឱ្យ​នឹងនរ​ក្នុង​អារម្មណ៍ និង​អញ្ជើញ​ទៅ​បោះឆ្នោត​ដោយ​គ្មាន​បញ្ហា​ភ័យខ្លាច។

លោក​ថ្លែង​ថា៖ «នេះ​ជា​ទម្លាប់​របស់​ព្រះករុណា​ដែល​ជា​ម្ចាស់​ផែនដី​ក្នុង​នាម​ព្រះអង្គ​ជា​ប្រមុខ​រដ្ឋ ទ្រង់​តែងតែ​ចង់​បាន​ប្រទេស​ជាតិ​មាន​បរិយាកាស​ល្អ​ឆ្ពោះ​ទៅ​រក​ការ​បោះឆ្នោត កុំ​ឱ្យ​ខ្លាច​តាម​ការ​ញុះញង់​របស់​គណបក្ស និង​អ្នក​នយោបាយ​មួយ​ចំនួន»។

លោក​បន្ត​ថា​ការ​ចេញ​ព្រះរាជសារ​នេះ​ដើម្បី​បង្ក​បរិយាកាស​នយោបាយ​ល្អ មិនមែន​មកពី​ព្រះអង្គ​បារម្ភ​ពី​ការ​គំរាម​កំហែង​ពី​ជន​ណា​ទេ។

លោក​ថ្លែង​ថា៖ «នេះ​ជា​តួនាទី​របស់​ព្រះអង្គ​ក្នុង​ការ​ធ្វើ​ឱ្យ​ស្ថានការណ៍​នយោបាយ​ល្អ ដែល​មាន​ចែង​ក្នុង​រដ្ឋធម្មនុញ្ញ អ៊ីចឹង​ព្រះអង្គ​គ្រាន់​តែ​បំពេញ​ព្រះរាជ​តួនាទី​របស់​ព្រះអង្គ​ក្នុង​តួនាទី​ជា​អាជ្ញាកណ្តាល»។

អនុប្រធាន​គណបក្ស​សង្គ្រោះជាតិ​លោកស្រី មូរ សុខហួរ​ ថ្លែង​ថា​ការ​ចេញ​ព្រះរាជសារ​នា​ពេល​នេះ គឺ​ចំ​កាលៈទេសៈ​ល្អ​ដែល​នឹង​ជំរុញ​ដល់​ពលរដ្ឋ និង​ក្រើន​រំឭក​ដល់​ពលរដ្ឋ​ឱ្យ​ទៅ​បោះឆ្នោត​ដោយ​គ្មាន​ការ​ភ័យខ្លាច។ ជា​រឿង​កម្រ​ដែល​ព្រះមហាក្សត្រ​ទ្រង់​មាន​ព្រះបន្ទូល​ទៅ​លើ​រឿង​ការងារ​បោះឆ្នោត។

គួរ​រំឭក​ផង​ដែរ​ថា ​ក្រោយ​ការ​បោះឆ្នោត​កាលពី​ឆ្នាំ ២០១៣ ខែ​សីហា​ព្រះមហាក្សត្រ​ចេញ​ព្រះរាជសារ​ដោយ​អំពាវនាវ​ឱ្យ​គណបក្ស​ដែល​ឈ្នះ​ឆ្នោត​ត្រូវ​ស្វែងរក​ដំណោះស្រាយ​ដោយ​សន្តិវិធី ខណៈ​ដែល​គ្រា​នោះ​បក្ស​សង្គ្រោះជាតិ​មិន​ទទួល​ស្គាល់​ការ​បោះឆ្នោត​នាំ​ឱ្យ​មាន​ស្ថានការណ៍​នយោបាយ​ឡើង​កម្តៅ និង​ចោទ​គណបក្ស​ប្រជាជន​លួច​បន្លំ​សន្លឹក​ឆ្នោត។

អ្នក​នាំពាក្យ គជប លោក ហង្ស ពុទ្ធា ឱ្យ​ដឹង​ដែរ​ថា​រដ្ឋាភិបាល​ក៏​បាន​រៀបចំ​ថវិកា ៥៣ លាន​ដល់​ស្ថាប័ន​របស់​ខ្លួន​ក្នុង​ការ​រៀបចំ​ការ​បោះឆ្នោត​ដោយ​គ្រោង​ចំណាយ​ទៅ​លើ​ឧបករណ៍​សម្ភារ ការ​ដឹកជញ្ជូន កម្រៃ​ការងារ​របស់​មន្ត្រី​ជាប់​កិច្ចសន្យា និង​មន្ត្រី​រាជការ​របស់ គជប ការ​ទិញ​ទឹកថ្នាំ​ខ្មៅ និង​ការ​ចំណាយ​ផ្សេងៗ​ទៀត»។

គណបក្ស​នយោបាយ ១២ នឹង​ប្រកួត​ប្រជែង​ក្នុង​ការ​បោះឆ្នោត៕

0

Comments

Please, login or register to post a comment

ព័ត៌មានពាក់ព័ន្ធ