ភ្នំពេញៈ អ្នកស្រី ប៊ូ រចនា ភរិយាលោក កែម ឡី និងមជ្ឈដ្ឋានអ្នកគោរពស្រឡាញ់លោក កែម ឡី បានរិះគន់លោក កែម រិទ្ធិសិត ប្អូនប្រុសលោក កែម ឡី ដែលប្រកាសបង្កើតគណបក្សនយោបាយថ្មីមួយដោយដាក់ឈ្មោះអ្នកវិភាគល្បីឈ្មោះដែលត្រូវបានខ្មាន់កាំភ្លើងបាញ់សម្លាប់ទាំងកណ្តាលថ្ងៃ នៅកណ្តាលក្រុងភ្នំពេញ ដែលមានមនុស្សច្រើនកុះករកាលពីថ្ងៃ ១០ ខែកក្កដា ឆ្នាំ ២០១៦។
លោក កែម រិទ្ធិសិត ប្អូនប្រុសបង្កើតលោក កែម ឡី អ្នកវិភាគល្បីឈ្មោះបានប្រកាសបង្កើតគណបក្សនយោបាយមួយដោយដាក់ឈ្មោះថា គណបក្ស កែម ឡី។ តាមសេចក្តីប្រកាសព័ត៌មានរបស់លោកកាលពីថ្ងៃទី ២៤ ខែកុម្ភៈ ការបង្កើតបក្សនេះ គឺដើម្បីយកទស្សនទានល្អៗរបស់លោក កែម ឡី ទៅចូលរួមចំណែកក្នុងការអភិវឌ្ឍប្រទេសជាតិ។ ចំណែកគោលបំណងដ៏ចម្លែកមួយទៀតគឺ «ដើម្បីទប់ស្កាត់ដល់ក្រុមជ្រុលនិយមមួយចំនួនតែងតែយកឈ្មោះលោកបណ្ឌិត កែម ឡី ទៅធ្វើជាឧបករណ៍កេងចំណេញផ្នែកនយោបាយដើម្បីបម្រើមហិច្ឆតារបស់ពួកគេជារៀងរាល់ថ្ងៃ»។
លោក រិទ្ធិសិត បានថ្លែងប្រាប់ភ្នំពេញប៉ុស្តិ៍កាលពីម្សិលមិញថា ដោយសារតែច្បាប់ហាមមិនឲ្យដាក់ឈ្មោះគណបក្សដោយប្រើឈ្មោះបុគ្គល លោក និងក្រុមការងារកំពុងពិភាក្សាលើឈ្មោះថ្មី។
លោក រិទ្ធិសិត ថ្លែងថាក្រោយពេលប្រកាសបង្កើតគណបក្សនេះធ្វើឲ្យមានការមិនពេញចិត្តពីមជ្ឈដ្ឋានមួយចំនួន ប៉ុន្តែលោកថាលោកនៅតែបន្តធ្វើដោយមិនបញ្ឈប់ឡើយ។ «គេ ខមមិន (comment) ជេរអីលេងអ៊ីចឹងទៅ គេមិនចង់ឲ្យបង្កើត។ គេថា យើងហ្នឹងយកកេរ្តិ៍ឈ្មោះបងទៅធ្វើម៉េចៗ។ កេរ្តិ៍ឈ្មោះម៉េច បើគាត់ស្លាប់ហើយហ្នឹង ហើយគ្នាស្លាប់ហើយ មិនឲ្យប្អូនធ្វើការងារសង្គម ដើម្បីរកយុត្តិធម៌ទៅថ្ងៃក្រោយ ប្រសិនបើយើងមានលទ្ធភាពឈានដល់ដឹកនាំប្រទេស...»។ លោកអះអាងថាមានស្ថាបនិកជាច្រើនបានមកសុំធ្វើការងារនេះ។
លោកនិយាយទៀតថា៖ «យើងនឹងដំណើរការងារផ្សេងៗមានដូចជាលក្ខន្តិកៈ ច្បាប់ទម្លាប់ គោលនយោបាយ យើងធ្វើទាំងអស់តាំងពីស្លាកសញ្ញាអី តែយើងមិនទាន់អាចផ្សាយបាននៅឡើយ។ ដំបូងយើងចង់ដឹងថា មានអ្នកមិនពេញចិត្តប៉ុន្មាន ជំហានដំបូងដូច survey មួយអ៊ីចឹង។ យើងអាចនឹងចូលរួមការបោះឆ្នោតខាងមុខ យើងនឹងព្យាយាមធ្វើឲ្យទាន់»។
លោក ខៀវ សុភ័គ អ្នកនាំពាក្យក្រសួងមហាផ្ទៃថ្លែងកាលពីម្សិលមិញថា ក្រសួងមិនទាន់បានទទួលពាក្យសុំបង្កើតគណបក្សនេះទេ។
អ្នកស្រី ប៊ូ រចនា ភរិយាលោក កែម ឡី ដែលទើបទៅដល់ប្រទេសអូស្ត្រាលី ក្នុងនាមជនភៀសខ្លួនបានប្រតិកម្មមិនពេញចិត្តនឹងការបង្កើតគណបក្សនេះ ដោយអ្នកស្រីថ្លែងថា ស្វាមីអ្នកស្រីមិនដែលប្រាថ្នាចង់បង្កើតបក្សនយោបាយទេ។
អ្នកស្រីបញ្ជាក់ថា៖ «ខ្ញុំមិនបានដឹងឮមកពីគាត់នោះទេ ពីរឿងកាលដែលគាត់បង្កើតគណបក្សទាល់តែសោះ។ ខ្ញុំមានអារម្មណ៍ថា មិនសប្បាយចិត្តទេ ចំពោះប្អូនថ្លៃខ្ញុំដែលបង្កើតគណបក្សនេះឡើង ដោយសារកាលពីប្តីខ្ញុំនៅរស់គាត់មិនដែលធ្លាប់មានគំនិតបង្កើតចង់គណបក្សនយោបាយអីទេ។ ខ្ញុំមិនយល់ហេតុអ្វីបានគាត់បង្កើតគណបក្សនយោបាយដោយបានដាក់ឈ្មោះប្តីរបស់ខ្ញុំ ហើយកាលដែលធ្វើនេះ គឺផ្ទុយពីគំនិត និងឆន្ទៈរបស់ប្តីខ្ញុំ»។
លោក សៅ កុសល ប្រធានមូលនិធិ កែម ឡី ដែលទើបបង្កើតឡើងកាលពីចុងខែមករាបានថ្លែងថា លោក រិទ្ធិសិត ដែលមានឈ្មោះជាសមាជិកគណៈកម្មការនាយកនៃមូលនិធិនេះបានទូរស័ព្ទមកលោកកាលពីថ្ងៃសៅរ៍ដោយប្រាប់ថា លោកនឹងលាលែងពីសមាជិកមូលនិធិនេះដើម្បីទៅបង្កើតគណបក្សនយោបាយ។
លោក កុសល ថ្លែងថា លោកមិនគាំទ្រការបង្កើតគណបក្សនេះទេ ព្រោះវាប៉ះពាល់ដល់លោក កែម ឡី ប៉ុន្តែទោះជាយ៉ាងណាវាជាសិទ្ធិរបស់លោក រិទ្ធិសិត។ «បើខ្ញុំជាគាត់វិញ ខ្ញុំអត់ធ្វើទេ។ មូលហេតុគឺយើងឃើញថា ពលរដ្ឋគេគោរពស្រឡាញ់បង ឡី គេមិនគោរពស្រឡាញ់គាត់ (រិទ្ធិសិត) ទេ។ គេស្រឡាញ់បង ឡី ដោយសារបង ឡី គាត់ធ្វើការងារសង្គម មិនមែនការងារនយោបាយទេ។ អ៊ីចឹងមិនមែនមានន័យថា គេស្រឡាញ់បង ឡី ហើយអស់ពីគាត់ទៅគេស្រឡាញ់ប្អូនបង ឡី ទេ»។
លោក ឡៅ ម៉ុងហៃ អ្នកវិភាគនយោបាយថ្លែងថា ការបងើ្កតគណបក្សនេះ អាចធ្វើឲ្យប៉ះពាល់ដល់កិត្តិយសរបស់លោក កែម ឡី ប្រសិនបើគណបក្សនេះមិនទទួលបានជោគជ័យ។ «បើសិនមិនជោគជ័យទេ គណបក្សនេះនឹងបំផ្លាញកេរ្ដិ៍ឈ្មោះរបស់លោកបណ្ឌិត កែម ឡី»។
នៅលើបណ្ដាញសង្គមហ្វេសប៊ុកក៏មានការរិះគន់ជាច្រើនពីសំណាក់អ្នកគោរពស្រឡាញ់លោក កែម ឡី ដែរ ចំពោះការបង្កើតគណបក្សនេះ។ ប៉ុន្តែលោក ពេជ្រ ស្រស់ ប្រធានគណបក្សយុវជនកម្ពុជាបានអបអរសាទរ ចំពោះការបង្កើតគណបក្សនេះ។
លោក ពេជ្រ ស្រស់ គឺជាអ្នកដាក់ពាក្យប្តឹងគណៈកម្មការបុណ្យសពលោក កែម ឡី ដែលរួមមានលោក ប៉ា ងួនទៀង លោក មឿន តុលា និងព្រះសង្ឃ ប៊ុត ប៊ុនតិញ ទៅតុលាការ ហើយតុលាការបានចោទប្រកាន់ពួកគាត់ទាំង ៣ នាក់ពីបទ «រំលោភលើទំនុកចិត្ត»។
លោក ស្រស់ថ្លែងកាលពីម្សិលមិញថា ក្រោយពេលលោកឃើញសេចក្តីប្រកាសព័ត៌មានរបស់លោក កែម រិទ្ធិសិត ភ្លាមលោកបានទូរស័ព្ទទៅអបអរសាទរ។ «ខ្ញុំអត់មានអីច្រើនក្រៅពីអបអរសាទរ ចំពោះគំនិតរបស់លោក កែម រិទ្ធិសិត ទេដោយសារតែវាជាសិទ្ធិរបស់ពលរដ្ឋក្នុងការបង្កើតគណបក្ស ហើយបើលោក កែម រិទ្ធិសិត ភ្ជាប់ទៅនឹងបងប្រុសរបស់លោកនោះវាល្អប្រសើរ ព្រោះគាត់ជាសាច់ឈាមផ្ទាល់ផង និងដើម្បីការពារកិត្តិនាមរបស់លោកបណ្ឌិត កែម ឡី ព្រមទាំងមិនឲ្យជនណាយកឈ្មោះលោកបណ្ឌិត កែម ឡី ទៅធ្វើអាជីវកម្ម ឬធ្វើជាឈ្នាន់នយោបាយ»។
ប៉ុន្តែលោកប៉ា ងួនទៀង ដែលជាមិត្តស្និទ្ធនឹងលោក កែម ឡី កាលពីលោកនៅមានជីវិតបានចោទជាសំណួរចំពោះគំនិតបង្កើតបក្សនេះ។
លោកសរសេរលើហ្វេសប៊ុករបស់លោកថា៖ «តើនរណាជាម្ចាស់គំនិត? ខ្ញុំគិតថា លោក កែម រិទ្ធិសិត គ្មានសមត្ថភាព បង្កើត និងដឹកនាំគណបក្សនយោបាយទេ។ ដូច្នេះវាជាការប្រាកដណាស់ថា គណបក្សនេះនឹងមិនឈ្នះឆ្នោតទេ ហើយពេលនោះគេនឹងចោទថា ប្រជាពលរដ្ឋខ្មែរឲ្យតម្លៃបណ្ឌិត កែម ឡី ខុស»៕