Search form

Login - Register | FOLLOW US ON

Logo of Phnom Penh Post newspaper Phnom Penh Post - ភ្លៀង និង​ខ្យល់​កន្ត្រាក់​នឹង​បន្ត​កើតឡើង​ដល់​ថ្ងៃ​ទី ៩ មេសា

Content image - Phnom Penh Post
ភ្លៀងធ្លាក់នៅទីក្រុងភ្នំពេញ កាល​ពី​ចុង​សប្តាហ៍​មុន។ ហេង ជីវ័ន

ភ្លៀង និង​ខ្យល់​កន្ត្រាក់​នឹង​បន្ត​កើតឡើង​ដល់​ថ្ងៃ​ទី ៩ មេសា

ភ្នំពេញៈ ក្រសួង​ធនធាន​ទឹក​ និង​ឧតុនិយម​បាន​ព្យាករ​ថា​ភ្លៀង​កក់ខែ​ដែល​នាំ​មក​នូវ ខ្យល់​កន្ត្រាក់ និង​ផ្គររន្ទះ​នឹង​បន្ត​ធ្លាក់​រហូត​ដល់​ថ្ងៃ​ទី ៩ ខែ​មេសា​ហើយ​ថា​រដូវវស្សា​អាច​នឹង​មក​ដល់​នៅ​សប្ដាហ៍​ទី ១ នៃ​ខែ​ឧសភា​ដែល​លឿន​ជាង​ឆ្មាំ​មុនៗ​។

លោក ចាន់ យុត្ថា អ្នក​នាំពាក្យ​ក្រសួង​ធនធាន​ទឹក​ និង​ឧតុនិយម​បាន​ថ្លែង​កាលពី​ម្សិលមិញ​ថា​យោង​តាម​ការ​ព្យាករ​អាកាសធាតុ​បង្ហាញ​ថា​ជ្រលង​សម្ពាធ​ទាប​ដែល​កំពុង​រុញ​ច្រាន​​មកពី​ភាគ​ខាង​ត្បូង​នៃ​សមុទ្រ​ចិន​ភាគ​ខាង​ត្បូង​បាន​ប្រសព្វ​គ្នា​ជាមួយ​ជ្រលង​សម្ពាធ​​ខ្ពស់​ដែល​រុញ​មកពី​ភាគ​​ខាង​ត្បូង​ប្រទេស​ចិន​ត្រង់​ចំណុច​ដែនដី​សណ្ដ​ទន្លេ​មេគង្គ​ហើយ​វា​នឹង​រំកិល​មក​គ្របដណ្ដប់​លើ​ប្រទេស​​កម្ពុជា​នៅ​ថ្ងៃ​​អង្គារ​​នេះ​ ​ដែល​នឹង​បង្ក​ឲ្យ​មាន​ភ្លៀង​ធ្លាក់​រាយប៉ាយ​ពេញ​លើ​ផ្ទៃ​ប្រទេស​ក្នុង​កម្រិត​ពី​មធ្យម​ទៅ​ច្រើន។

លោក​​បញ្ជាក់​ថា៖ «​តំបន់​ទំនាប​កណ្ដាល​ភាគ​ខាង​ត្បូង តំបន់​ខ្ពង់រាប​ភាគ​ឦសាន និង តំបន់​មាត់​សមុទ្រ​អាច​នឹង​មាន​ភ្លៀងធ្លាក់​ពី​បង្គួរ​ទៅ​ច្រើន​ចាប់​ពី​ថ្ងៃ​អង្គារ​នេះ​រហូត​ដល់​ថ្ងៃ​អាទិត្យ​ខាង​មុខ​នេះ»។

ជាមួយ​គ្នា​នេះ​លោក​បាន​អំពាវនាវ​ដល់​ប្រជាពលរដ្ឋ​ពិសេស​ប្រជានេសាទ​សមុទ្រ និង​ទេសចរ​មេត្តា​បង្កើន​ការ​ប្រុងប្រយ័ត្ន​ខ្ពស់​ចំពោះ​បាតុភូត​ខ្យល់​កន្ត្រាក់​ និង​ផ្គររន្ទះ​ដែល​អាច​នឹង​កើត​មាន​ឡើង​នៅ​ពេល​មេឃ​រក​កល​ភ្លៀង។

លោក យុត្ថា ក៏​បាន​​ឲ្យ​ដឹង​ផង​ដែរ​ថា​អាកាសធាតុ​ឆ្នាំ​នេះ​មាន​​ការ​ប្រែប្រួល​ទៅ​រក​ភាព​ល្អ​ប្រសើរ​ច្រើន​ជាង​ឆ្នាំ​មុន​ដោយ​ឆ្នាំ​នេះ​ប្រទេស​កម្ពុជា​បាន​រួច​ផុត​​ពី​ឥទ្ធិពល​នៃ​បាតុភូត El Nino ដែល​ក្ដៅ​ហើយ​រាំង​ស្ងួត​ស្ទើរ​ពាក់កណ្ដាល​​ពិភពលោក​ហើយ​ពេល​នេះ​កម្ពុជា​កំពុង​ស្ថិត​នៅ​ចន្លោះ​នៃ​បាតុភូត El Nino និង La Nina ដែល​​អាកាសធាតុ​មិន​ក្ដៅ​ហួតហែង​​ដូច​ឆ្នាំ​មុន​នោះ​ទេ៕

0

Comments

Please, login or register to post a comment