.jpg)
រូបថតរន្ទះបាញ់ ថតបាននៅក្នុងរាជធានីភ្នំពេញ។ ហេង ជីវ័ន
ភ្នំពេញៈ ខណៈភ្លៀងកំពុងធ្លាក់នៅតាមបណ្ដាខេត្តមួយចំនួនជាប់ព្រំដែនកម្ពុជា-ថៃ នៅឯខេត្តពោធិ៍សាត់ និងខេត្តព្រៃវែងមានបាតុភូតរន្ទះបាញ់កើតឡើងដែលបង្កឲ្យមនុស្ស ២ នាក់បានស្លាប់ និងម្នាក់ទៀតរងរបួស។ នេះបើតាមការអះអាងរបស់លោក កែវ វី អ្នកនាំពាក្យគណៈកម្មការគ្រប់គ្រងគ្រោះមហន្តរាយកាលពីម្សិលមិញ។
របាយការណ៍បានបង្ហាញថាជនរងគ្រោះឈ្មោះ យូ សុលាង ភេទប្រុស អាយុ ៥៦ ឆ្នាំជាកសិករនៅភូមិបឹងវាល ឃុំត្នោតជុំ ស្រុកក្រគរ ខេត្តពោធិ៍សាត់ ត្រូវរន្ទះបាញ់ស្លាប់ខណៈកំពុងធ្វើការងារដកដំឡូងមីនៅក្នុងចម្ការខាងក្រោយភូមិ ចំណែកអ្នកស្រី យួន ច្រឹម អាយុ ៤៥ ឆ្នាំជាកសិករនៅភូមិព្រំ ឃុំព្រៃព្នៅ ស្រុកពារាំង ខេត្តព្រៃវែងត្រូវរន្ទះបាញ់ស្លាប់ខណៈកំពុងជញ្ជូនកណ្ដាប់ដាក់ពង្រាយនៅតាមភ្លឺស្រែដើម្បីរៀបចំស្ទូង។
ដោយឡែកអ្នកស្រី អ៊ន សុខឿន អាយុ ២៦ ឆ្នាំជាកសិករនៅភូមិកូនក្រាយឃុំកញ្ជរ ស្រុកកណ្តៀង ខេត្តពោធិ៍សាត់ក៏ត្រូវបានរន្ទះបាញ់ដែរគ្រាដែលគាត់កំពុងប្រមូលមើមដំឡូងមីគរទុក ប៉ុន្តែគាត់គ្រាន់តែដួលសន្លប់បាត់ស្មារតីមួយរយៈខ្លីប៉ុណ្ណោះ។
លោក វី បានថ្លែងថា៖ «ការប្រែប្រួលអាកាសធាតុពីមួយឆ្នាំទៅមួយឆ្នាំបានជំរុញឲ្យបាតុភូតគ្រោះធម្មជាតិកើតមានកាន់តែច្រើនឡើង និងខុសប្រក្រតី ដែលបង្កការគំរាមកំហែងកាន់តែខ្លាំងដល់ជិវិតមនុស្ស សត្វ និង ជីវៈចម្រុះក្នុងភពផែនដី»។
លោកបន្តថា៖ «ជាទូទៅនៅក្នុងប្រទេសកម្ពុជាបាតុភូតរន្ទះបាញ់ចាប់ផ្ដើមកើតមានឡើងនៅពាក់កណ្ដាលខែកុម្ភៈ ឬដើមខែមីនាមិនដែលកើតមាននៅដើមខែមករាបែបនេះទេ»។
កាលពីថ្ងៃចន្ទក្រសួងធនធានទឹក និងឧតុនិយមបានចេញសេចក្ដីជូនដំណឹងថាប្រទេសកម្ពុជានៅពេលនេះកំពុងទទួលរងឥទ្ធិពលខ្យល់មូសុងឦសាន និងជ្រលងសម្ពាធខ្ពស់ខ្សោយពីប្រទេសចិនដោយឥទ្ធិពលនៃបាតុភូតទាំង ២ នេះនឹងបង្កឲ្យកម្រិតសីតុណ្ហភាពនៅកម្ពុជាធ្លាក់ចុះជាបន្តបន្ទាប់ចាប់ពីថ្ងៃទី ១០ ខែមករា ឆ្នាំ ២០១៨ ជាពិសេសចាប់ពីថ្ងៃ ១២ ដល់ថ្ងៃទី ១៥ ខែមករាបណ្តាខេត្តមួយចំនួននៅភាគឦសានដែលរួមមាន ខេត្តមណ្ឌលគិរី រតនគិរី ស្ទឹងត្រែង ឧត្តរមានជ័យ ព្រះវិហារ និងប៉ៃលិន សីតុណ្ហភាពនឹងធ្លាក់ចុះនៅក្នុងរង្វង់ពី ១៦ អង្សាទៅ ១៨ អង្សា ខណៈនៅតំបន់ជួរភ្នំដងរែកធ្លាក់ដល់កម្រិត ១៤ អង្សា។ ដោយឡែកនៅរាជធានីភ្នំពេញ និងបណ្ដាខេត្តមួយចំនួនទៀតសីតុណ្ហភាពអប្បបរមានឹងធ្លាក់ចុះនៅក្នុងរង្វង់ពី ១៩ អង្សាទៅ ២១ អង្សា។
លើកលែងតែបណ្ដាខេត្តជាប់មាត់សមុទ្រសីតុណ្ហភាពអប្បបរមាស្ថិតនៅក្នុងរង្វង់ពី ២៣ ទៅ ២៤ អង្សា៕
