ភ្នំពេញៈ ជនសង្ស័យ ៦នាក់ ដែលពាក់ព័ន្ធនឹងការបាញ់សម្លាប់អ្នកការពារនិងអភិរក្សព្រៃឈើ នៅស្រុកអូររាំង ខេត្តមណ្ឌលគិរី នៅថ្ងៃអាទិត្យ ទី៤ ខែកុម្ភៈនេះ ត្រូវបានបញ្ជូនទៅកាន់តុលាការខេត្ត ដើម្បីធ្វើការផ្តន្ទាទោសតាមច្បាប់។
ជនទាំងនេះ ដែលមានមន្ត្រីយោធា និងមន្ត្រីប៉ូលីសព្រំដែនផងដែរ ត្រូវបានដឹកបញ្ជូនចេញពីទីបញ្ជាការកងរាជអាវុធហត្ថខេត្តមណ្ឌលគិរី ដើម្បីបញ្ជូនទៅកាន់តុលាការខេត្ត។
បើតាមលោក ប៊ូ ប៊ុនឈាត អធិការនគរបាលស្រុកអូររាំង ប្រាប់ភ្នំពេញប៉ុស្តិ៍ថា ជនសង្ស័យសរុប៦នាក់ ដែលជាប់ពាក់ព័ន្ធនឹងអំពើឃាតកម្មបាញ់ប្រហារ សម្លាប់ជនរងគ្រោះបីនាក់ មានម្នាក់ជាមន្ត្រីកងរាជអាវុធហត្ថលើផ្ទៃប្រទេស ម្នាក់ជាមន្ត្រីបរិស្ថាន និងម្នាក់ជាមន្ត្រីអង្គការការពារសត្វព្រៃ WCS។
ចំណែកជនសង្ស័យទាំង៦ ដែលត្រូវបានឃាត់ខ្លួនមានឈ្មោះ ១. ផល ពេញ ជានាយនគរបាលប៉ុស្ដិ៍អូររលែ នៃវរៈការពារព្រំដែនលេខ ៦២១ ស្នងការដ្ឋាននគរបាលខេត្តមណ្ឌលគិរី ត្រូវបានចាប់ខ្លួននៅព្រឹកថ្ងៃ ទី០២ ខែកុម្ភៈ នៅខេត្តត្បូងឃ្មុំ ២.ឈ្មោះ កើត វេតា ជាទាហានការពារព្រំដែន ៣. ឈ្មោះ ឡាយ សាវី ជាទាហានការពារព្រំដែន ៤. ឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ ត្រូវបានចាប់ខ្លួននៅយប់ថ្ងៃទី០១ ខែកុម្ភៈនិង ៥.ឈ្មោះឈាង វ៉ាន់និត ប្អូនថ្លៃ ផល ពេញ ត្រូវបានចាប់ខ្លួននៅរសៀលថ្ងៃទី២ ខែកុម្ភៈ ឆ្នាំ២០១៨។ ចំណែកទី៦ ឈ្មោះ កើត វេហា ត្រូវបានចូលខ្លួនមកសារភាព នៅថ្ងៃទី១ ខែកុម្ភៈ។
គួរបញ្ជាក់ថា ករណីបាញ់ប្រហារនោះ បណ្តាលឲ្យមន្ត្រីការពារព្រៃឈើបីរូបស្លាប់ នៅចំណុចអូរហ៊ុច ស្រុកអូររាំង ខេត្តមណ្ឌលគិរី បានកើតឡើងនៅចន្លោះម៉ោង ៤ រសៀល ថ្ងៃទី ៣០ ខែមករា ឆ្នាំ ២០១៨ បានបណ្ដាលឲ្យស្លាប់មនុស្ស ៣ នាក់ រួមមានមន្ដ្រីអាវុធហត្ថលើផ្ទៃប្រទេសម្នាក់ ឈ្មោះសេក វឌ្ឍនា មន្ដ្រីឧទ្យានុរក្សនៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគមន៍ អភិរក្សសត្វព្រៃ Wildlife Conservation Society (WCS) ឈ្មោះ ថុល ខ្នា។
ទាក់ទងនឹងការស្រាវជ្រាវករណីនេះ សមត្ថកិច្ច ឲ្យដឹងថា គេបានរកឃើញគ្រាប់កាទូសកាំភ្លើង ៧ គ្រាប់សុទ្ធតែប្រភេទ AK និងថា ជនរងគ្រោះត្រូវគេពួនស្ទាក់បាញ់ពេលកំពុងល្បាត។
អង្គការ WCS បានចេញសេចក្តីថ្លែងការណ៍ កាលពីថ្ងៃសុក្រ ដោយហៅជនរងគ្រោះទាំងបីថា ជា «វីរជនអភិរក្សព្រៃឈើ»។
(សូមអានព័ត៌មានពិស្តារក្នុងកាសែត)